ພິທີ ປາຖະກະຖາວັນຄ້າຍວັນເກີດ ປະທານ ກິມ ເຈິງ ອິນ ຄົບຮອບ 81 ປີ (16/02/1942 - 16/02/2023)
ເຜີຍແຜ່ໂດຍ: editor ເວລາ: 17/02/2023 15:56:08 ຈຳນວນຢ້ຽມຊົມ 355 ຄັ້ງ ໃນຕອນເຊົ້າວັນທີ 15 ກຸມພາ 2023, ທີ່ວິທະຍາຄານກົມມະດໍາ, ສະມາຄົມ ມິດຕະພາບ ລາວ - ສປປ ເກົາຫຼີ ແລະ ວິທະຍາຄານກົມມະດໍາ ຮ່ວມກັບສະຖານເອກອັກຄະລັດຖະທູດແຫ່ງ ສປປ ເກົາຫຼີ ປະຈໍາ ສປປ ລາວ ໄດ້ຈັດພິທີປາຖະກະຖາ ເນື່ອງໃນໂອກາດວັນຄ້າຍວັນເກີດ ຂອງ ສະຫາຍ ກິມ ເຈີງ ອິນ, ຜູ້ນໍາທີ່ຍິ່ງໃຫຍ່, ເລຂາທິການໃຫຍ່ພັກແຮງງານເກົາຫຼີ ຕະຫຼອດການ, ປະທານຄະນະກໍາມະທິການປ້ອງກັນຊາດແຫ່ງ ສປປ ເກົາຫຼີ ຕະຫຼອດການ ຄົບຮອບ 81 ປີ (16/2/1942 - 16/2/2023) ເຊິ່ງໄດ້ມີການວາງສະແດງຮູບພາບ, ປື້ມ, ສາຍວີດີໂອ, ການສະແດງສີລະປະຂອງ ສປປ ລາວ ແລະ ສປປ ເກົາຫຼີ ແລະ ປາຖະກະຖາກ່ຽວກັບຜົນງານການນໍາພາຂອງ ສະຫາຍ ກິມ ເຈິງ ອິນ ໃນພາລະກິດປົກປັກຮັກສາ ແລະ ສ້າງສາພັດ ທະນາປະເທດຊາດ ສປປ ເກົາຫຼີ ໃນໄລຍະ ຜ່ານມາ.
ການຈັດງານປາຖະກະຖາໃນຄັ້ງນີ້ ໃຫ້ກຽດເຂົ້າຮ່ວມມີ: ສະຫາຍ ປອ. ອາດສະພັງທອງ ສີພັນດອນ, ກໍາມະການສູນກາງພັກ, ເຈົ້າຄອງນະຄອນຫຼວງວຽງຈັນ, ປະທານ ສະມາຄົມມິດຕະພາບ ລາວ - ສປປ ເກົາຫຼີ; ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ; ສະຫາຍ ພົນຈັດຕະວາ ຖາວອນ ແກ້ວອິນທະວົງ, ອໍານວຍການວິທະຍາຄານກົມມະດໍາ; ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າ ຄະນະພົວພັນຕ່າງປະເທດສູນກາງພັກ; ມີບັນດາສະຫາຍການນໍາ, ຄະນະກົມ, ຄະນະພະແນກ, ພະນັກງານ, ນາຍ ແລະ ພົນທະຫານ, ນັກຮຽນນັກສຶກສາ ແລະ ແຂກທີ່ມາຈາກພາກສ່ວນກ່ຽວຂ້ອງ ມີຈໍານວນ ປະມານ 360 ສະຫາຍໄດ້ເຂົ້າຮ່ວມ.
ການຈັດປາຖະກະຖາໃນຄັ້ງນີ້ ເປັນນິມິດໝາຍອັນດີງາມທີ່ພັກ ແລະ ລັດຖະບານກໍ່ຄື ປະຊາຊົນ ສປປ ເກົາຫຼີ ໃນທົ່ວປະເທດ ໄດ້ມີການຈັດຕັ້ງງານສະເຫຼີມສະຫຼອງໂຮມຊຸມນຸມ ເພື່ອລະນຶກວັນທີ່ມີຄວາມໝາຍຄວາມສຳຄັນນີ້, ພັກ ແລະ ລັດ ຖະບານແຫ່ງ ສປປ ລາວ ໄດ້ມອບໃຫ້ ສະມາຄົມມິດຕະພາບ ລາວ - ສປປ ເກົາຫຼີ ແລະ ວິທະຍາຄານກົມມະດໍາຮ່ວມກັບສະຖານເອກອັກຄະລັດຖະທູດແຫ່ງ ສປປ ເກົາຫຼີ ປະຈໍາ ສປປ ລາວ ເປັນເຈົ້າ ພາບຈັດປາຖະກະຖາ ເພື່ອລະນຶກ ເຖິງວັນອັນມີຄວາມໝາຍດັ່ງກ່າວຂອງປະຊາຊົນ ສປປ ເກົາຫຼີ.
ໃນພິທີອັນມີຄວາມໝາຍສໍາຄັນນີ້ ສະຫາຍ ລີ ຢົງ ຊົນ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວ ໄດ້ກ່າວຍ້ອງຍໍເຖິງຜົນງານການນໍາພາຂອງ ສະຫາຍ ກິມ ເຈີງ ອິນ, ຜູ້ນໍາທີ່ຍິ່ງໃຫຍ່, ເລຂາທິການໃຫຍ່ພັກແຮງງານເກົາຫຼີ ຕະຫຼອດການ, ປະທານຄະນະກໍາມະທິການປ້ອງກັນຊາດແຫ່ງ ສປປ ເກົາຫຼີ ຕະຫຼອດການ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານມາ ແລະ ທິດທາງໃນການນໍາພາປະເທດຊາດກ້າວສູ່ປະເທດສັງຄົມນິຍົມຂອງ ສປປ ເກົາຫຼີ ເພື່ອເຮັດໃຫ້ບັນດາສະຫາຍ ທີ່ໄດ້ເຂົ້າຮ່ວມ ພິທີດັ່ງກ່າວ ໄດ້ຮັບຮູ້ ແລະ ເຂົ້າໃຈເຖິງສະພາບການພັດທະນາຂອງ ສປປ ເກົາຫຼີ ພາຍໃຕ້ການນໍາພາ ຂອງພັກ ແຮງງານເກົາຫຼີ ບົນເສັ້ນທາງສູ່ຈຸດໝາຍສັງຄົມນິຍົມ, ພ້ອມດຽວກັນນີ້ ກໍ່ຍັງໄດ້ຍົກໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນ ສອງຊາດລາວ ແລະ ສປປ ເກົາຫຼີ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ແລະ ໄດ້ຮັບການພັດທະນາເພີ່ມພູນຄູນສ້າງດ້ວຍດີຕະຫຼອດມາ. ຫຼັງຈາກນັ້ນ ກໍ່ໄດ້ຊົມການສະແດງສີລະປະຂອງ ລາວ ແລະ ສປປ ເກົາຫຼີ. ການຈັດປາຖະກະຖາໃນຄັ້ງນີ້ ໄດ້ດໍາເນີນໄປດ້ວຍບັນຍາກາດອັນດີ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20