ຄະນະນໍາ ຄະນະພົວພັນຕ່າງປະເທດສູນກາງພັກ ເຂົ້າອວຍພອນ ເອກອັກຄະລັດຖະທູດ ສປ ຈີນ ເນື່ອງໃນໂອກາດບຸນປີໃໝ່ປະຈໍາຊາດຈີນ

ເຜີຍ​ແຜ່​ໂດຍ​: editor ເວ​ລາ: 20/01/2023 14:41:48 ຈຳ​ນວນ​​ຢ້ຽມ​ຊົມ 395 ຄັ້ງ ​

ໃນຕອນບ່າຍ ຂອງວັນທີ 19 ມັງກອນ 2023, ສະ​ຫາຍ ສົມພອນ ສີຈະເລີນ, ຮອງຫົວໜ້າ ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ນໍາພາຄະນະ ​ເຂົ້າອວຍ​ພອນ ສະຫາຍ​ເອກ​ອັກ​ຄະ​ລັດ​ຖະ​ທູດ ວິສາມັນຜູ້ມີອໍານາດເຕັມ ແຫ່ງ ສປ ຈີນ ພ້ອມພະນັກງານສະຖານທູດ ທີ່ນະຄອນຫຼວງວຽງຈັນ ເນື່ອງໃນໂອກາດບຸນປີໃໝ່ປະຈໍາຊາດຈີນ 2023.

ໃນ​ໂອ​ກາດ​ດັ່ງ​ກ່າວ, ສະ​ຫາຍ ສົມພອນ ສີຈະເລີນ ​ໄດ້​ຕາງໜ້າໃຫ້ ຄະນະພັກ, ຄະນະນຳ ຄະນະພົວພັນຕ່າງປະເທດສູນກາງພັກ ອວຍພອນໄຊອັນປະເສີດ ມາຍັງ ສະຫາຍເອກອັກຄະລັດຖະທູດ ແລະ ພະນັກງານສະຖານທູດຈີນ ທີ່ນະຄອນຫຼວງວຽງຈັນ ທຸກຖ້ວນໜ້າໃນໂອກາດປີໃໝ່ຈີນ, ສະຫາຍ ຍັງໄດ້ສະແດງຄວາມຊົມເຊີຍຕໍ່ຜົນງານອັນຜົ້ນເດັ່ນ ທີ່ສະຫາຍເອກອັກຄະລັດຖະທູດ ກໍຄື ສະຖານທູດຈີນ ຍາດມາໄດ້ໃນຕະຫຼອດໄລຍະຜ່ານມາ, ໂດຍສະເພາະ ການກະກຽມຢ່າງຮອບດ້ານ ໃຫ້ແກ່ຜົນສຳເລັດຂອງການຢ້ຽມຢາມລັດຖະກິດ ສປ ຈີນ ຂອງ ສະຫາຍເລຂາທິການໃຫຍ່, ປະທານປະເທດ ສປປ ລາວ ໃນທ້າຍປີ 2022 ຜ່ານມາ, ເຊິ່ງເປັນນິມິດໝາຍໃໝ່ ໃນການພົວພັນຮ່ວມມື ລາວ-ຈີນ.

ສະຫາຍ ສົມພອນ ສີຈະເລີນ ໄດ້ສະແດງຄວາມພາກພູມໃຈ ແລະ ປິຕິຊົມຊື່ນເປັນຢ່າງຍິ່ງ ທີ່ເຫັນວ່າ

ໃນຕະຫຼອດໄລຍະຜ່ານມາ, ຄະນະພົວພັນຕ່າງປະເທດສູນກາງ ພັກ ປປ ລາວ ໃນຖານະທີ່ເປັນເສນາທິການໃນວຽກງານການຕ່າງປະເທດຂອງສູນກາງພັກ ໄດ້ມີການປະສານສົມທົບຢ່າງແໜ້ນແຟ້ນ, ຄ່ອງຕົວ ແລະ ທັນການກັບ ສະຖານທູດ ສປ ຈີນ ໃນການເປັນຂົວຕໍ່ອັນສຳຄັນປະກອບສ່ວນຊຸກຍູ້ສາຍພົວພັນມິດຕະພາບອັນເປັນມູນເຊື້ອ ລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ ລາວ-ຈີນ.  

ສອງຝ່າຍ ເປັນເອກະພາບໃນການສືບຕໍ່ ປະສານສົມທົບກັນ ໃນການຈັດຕັ້ງຜັນຂະຫຍາຍບັນດາແຜນການຮ່ວມມື ລະຫວ່າງ 2 ພັກລາວ-ຈີນ, ໂດຍສະເພາະການຮ່ວມກັນກະກຽມຈັດກອງປະຊຸມສໍາມະນາທິດສະດີ 2 ພັກ ລາວ-ຈີນ ຄັ້ງທີ 10; ການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆ ໄປມາຫາສູ່ກັນການຮ່ວມມືບໍາລຸງສ້າງພະນັກງານ ແລະ ອື່ນໆ ໃຫ້ໄດ້ຮັບການຈັດຕັ້ງປະຕິບັດໃຫ້ເປັນຮູບປະທໍາ ພາຍຫຼັງການເປີດປະເທດຂອງ ສປ ຈີນ, ພ້ອມນັ້ນ ສອງຝ່າຍຍັງເອກະພາບໃນການສືບຕໍ່ປະສານສົມທົບຢ່າງແໜ້ນແຟ້ນໃນ ການຈັດຕັ້ງຜັນຂະຫຍາຍບັນດາເນື້ອໃນຈິດໃຈທີ່ການນໍາຂັ້ນສູງຂອງ ສອງພັກ, ສອງລັດ ຕົກລົງກັນໃນຜ່ານມາໃຫ້ປະກົດຜົນເປັນຈິງ ເພື່ອປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບ ທີ່ເປັນມູນເຊື້ອ ບົນພື້ນຖານການເປັນຄູ່ຮ່ວມຍຸດທະສາດ, ຮອບດ້ານ, ໝັ້ນຄົງ ຍາວນານ ແລະ ການສ້າງເປັນຄູ່ຮ່ວມຊະຕາກຳ ລາວ-ຈີນ ໃຫ້ສືບຕໍ່ໄດ້ຮັບການເສີມຂະຫຍາຍຢ່າງເລິກເຊິ່ງ ແລະ ມີປະສິດທິຜົນຍິ່ງໆຂື້ນ.

---