ພິທີປາຖະກະຖາ ຜົນສໍາເລັດ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ

ເຜີຍ​ແຜ່​ໂດຍ​: editor ເວ​ລາ: 22/12/2022 15:51:00 ຈຳ​ນວນ​​ຢ້ຽມ​ຊົມ 448 ຄັ້ງ ​

ໃນຕອນເຊົ້າຂອງວັນທີ 21 ທັນວາ 2022, ທີ່ ສຳນັກງານຄະນະພົວພັນຕ່າງປະເທດສູນກາງພັກ ໄດ້ຈັດປາຖະກະຖາເຜີຍແຜ່ “ຜົນສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ”, ເຊິ່ງໃຫ້ກຽດປາຖະກະຖາໂດຍ ສະຫາຍ QIN CHEN (ແສງອາລຸນ), ທີ່ປຶກສາຝ່າຍການເມືອງ ສະຖານທູດ ສປ ຈີນ ປະຈໍາ ສປປ ລາວ ແລະ ໃຫ້ກຽດເຂົ້າຮ່ວມໂດຍ ສະຫາຍ ວາລະໄຊ ເລັ່ງສະຫວັດ, ກໍາມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ແລະ ມີບັນດາ ສະຫາຍ ຕາງໜ້າຄະນະໜ່ວຍພັກ-ຄະນະຫ້ອງການ, ບັນດາກົມ ແລະ ພະນັກງານພາຍໃນ ຄະນະພົວພັນຕ່າງປະເທດສູນກາງພັກ ເຂົ້າຮ່ວມ.

ສະຫາຍ QIN CHEN ໄດ້ເຜີຍແຜ່ ກ່ຽວກັບ ຜົນສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ທີ່ໄດ້ອົດລົງຢ່າງຈົບງາມ ໃນທ້າຍເດືອນຕຸລາ 2022 ຜ່ານມາ, ໂດຍສະເພາະແມ່ນໝາກຜົນອັນຍິ່ງໃຫຍ່ທີ່ ທົ່ວພັກ, ທົ່ວລັດ ແລະ ທົ່ວປວງຊົນຊາວຈີນ ຍາດມາໄດ້ ໃນໄລຍະຜ່ານມາ ພາຍໃຕ້ການຊີ້ນຳນຳພາ ຂອງພັກກອມມູນິດຈີນ ທີ່ຖືເອົາ ສະຫາຍ ສີ ຈິ້ນຜິງ ເປັນແກນກາງ; ສະຫາຍ ໄດ້ຊີ້ໃຫ້ເຫັນຄວາມໝາຍຄວາມສໍາຄັນຂອງ ກອງປະຊຸມໃຫຍ່ຄັ້ງທີ XX ຂອງພັກກອມມູນິດຈີນ, ຄວາມເຂົ້າໃຈກ່ຽວກັບ ແນວຄິດສີຈິ້ນຜິງ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່, ແນະນໍາກ່ຽວກັບ ກົດລະບຽບພັກກອມມູນິດຈີນ ສະບັບປັບປຸງ ແລະ ຄະນະກໍາມະການສູນກາງພັກກອມມູນິດຈີນ ຊຸດທີ XX. ໃນພິທີ ຍັງໄດ້ແລກປ່ຽນຄໍາຄິດຄໍາເຫັນ, ຕອບຄໍາຖາມເຈາະຈີ້ມ ທີ່ບັນດາຜູ້ເຂົ້າຮ່ວມໃຫ້ຄວາມສົນໃຈ, ເຊິ່ງໄດ້ເຮັດໃຫ້ການປາຖະກະຖາຄັ້ງນີ້ ມີເນື້ອໃນທີ່ອຸດົມສົມບູນ, ມີບັນຍາກາດທີ່ຟົດຟື້ນ ດ້ວຍຄວາມໃກ້ຊິດສະໜິດສະໜົມກັນ.

ການປະຖາກະຖາຄັ້ງນີ້ ແມ່ນໜຶ່ງໃນກິດຈະກໍາ ຂອງ ສະຖານທູດ ສປ ຈີນ ທີ່ປະຈໍາຢູ່ຕ່າງປະເທດ ພາຍຫລັງກອງປະຊຸມໃຫຍ່ຂອງພັກກອມມູນິດຈີນ, ເຊິ່ງໄດ້ສ້າງໂອກາດໃຫ້ ພະນັກງານພາຍໃນ ຄະນະພົວພັນຕ່າງປະເທດສູນກາງພັກ ໄດ້ຮັບຮູ້ ແລະ ແລກປ່ຽນຄວາມຄິດຄວາມເຫັນນໍາກັນ ກ່ຽວກັບ ແນວທາງນະໂຍບາຍ ແລະ ຍຸດທະສາດຂອງພັກກອມມູນິດຈີນ ໃນການສ້າງສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ ແລະ ການປະກອບສ່ວນຂອງຈີນ ຕໍ່ການປົກປັກຮັກສາສັນຕິພາບ ແລະ ການຮ່ວມມືເພື່ອການພັດທະນາໃນເວທີພາກພື້ນ ແລະ ສາກົນ.

---