ຫົວໜ້າ ຄຕພ ຕ້ອນຮັບການເຂົົ້າຢ້ຽມຂໍ່ານັບຂອງ ຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດ
ເຜີຍແຜ່ໂດຍ: editor ເວລາ: 17/11/2022 14:37:24 ຈຳນວນຢ້ຽມຊົມ 906 ຄັ້ງ ໃນວັນທີ 17 ພະຈິກ 2022, ທີ່ສໍານັກງານຄະນະພົວພັນຕ່າງປະເທດສູນກາງພັກ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົົ້າຢ້ຽມຂໍ່ານັບ ຂອງ ສະຫາຍ ແຟັກນັງໂດ ກອງຊາເລສ ໂຢ, ວິລະຊົນແຫ່ງຊາດ ສ.ກູບາ, ປະທານສະຖາບັນກູບາເພື່ອມິດຕະພາບກັບນາໆຊາດ ພ້ອມດ້ວຍຄະນະ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ.
ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງ ຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດ,ເຊິ່ງຢູ່ໃນທ່າມກາງບັນຍາກາດທີ່ສາຍພົວພັນມິດຕະພາບ ແລະ ການຮ່ວມມື ລາວ ແລະ ກູບາ ກຳລັງໄດ້ຮັບການສຶບຕໍ່ເສີມຂະຫຍາຍ ແລະ ເພີ່ມພູນຄູນສ້າງ, ການນໍາຂັ້ນສູງ ຂອງ ສອງປະເທດ ມີການໄປມາຫາສູ່, ພົບປະຢ້ຽມຢາມເຊິ່ງກັນ ແລະ ກັນ, ການຮ່ວມມືຂອງບັນດາຂະແໜງການເປັນຕົ້ນແມ່ນຂະແໜງສຶກສາ-ກິລາ, ສາທາລະນະສຸກ ແລະ ກະສິກຳ ຍັງສືບຕໍ່ມີປະສິດທິຜົນ ນໍາເອົາຜົນປະໂຫຍດມາສູ່ປະຊາຊົນສອງປະເທດ. ພ້ອມນັ້ນ, ສະຫາຍ ຫົວໜ້າ ຄຕພ ຍັງໄດ້ຕີລາຄາສູງຕໍ່ການພົວພັນຮ່ວມມື ຂອງ ສະມາຄົມມິດຕະພາບ ລາວ-ກູບາ ກັບ ສະຖາບັນກູບາເພື່ອມິດຕະພາບກັບນາໆຊາດ ໃນການເຄື່ອນໄຫວການທູດປະຊາຊົນເຮັດໜ້າທີ່ບົດບາດສໍາຄັນໃນການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະກັນໃນເວທີພາກພື້ນ ແລະ ສາກົນ, ທັງຊຸກຍູ້ການພົວພັນຮ່ວມມືໃຫ້ແກ່ ຂະແໜງການຕ່າງໆຂອງ ສອງປະເທດໃຫ້ມີປະສິດທິພາບ ແລະ ປະສິດທິຜົນ, ທັງເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມື ລະຫວ່າງສອງປະເທດ ລາວ ແລະ ກູບາ ໃຫ້ນັບມື້ຂຽວສົດງົດງາມ ແລະ ເກີດດອກອອກຜົນ.
ສະຫາຍ ແຟັກນັງໂດ ກອງຊາເລສ ໂຢ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ ຂອງ ສະຫາຍ ຫົວໜ້າຄະນະພົວພັນຕ່າງປະເທດສູນກາງພັກ ແລະ ແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ, ທັງໄດ້ໃຫ້ຄວາມໝາຍໝັ້ນທີ່ຈະພົວພັນຮ່ວມມື ແລະ ປະສານງານກັບ ກັບສະມາຄົມມິດຕະພາບ ລາວ-ກູບາ ເພື່ອເຄື່ອນໄຫວສະໜັບສະໜູນເຊິ່ງກັນ ແລະກັນ ເພື່ອຜົນປະໂຫຍດ ຂອງ ສອງຊາດ ທັງເປັນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການຮ່ວມມືອັນດີງາມຂອງສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ກູບາ.
ວັນທີ 16 ຜ່ານມາ, ສະຫາຍ ແຟັກນັງໂດ ກອງຊາເລສ ໂຢ ໄດ້ນໍາພາ ຄະນະຜູ້ແທນສະຖາບັນກູບາເພື່ອມິດຕະພາບກັບນາໆຊາດ ເຂົ້າຢ້ຽມພົບປະສອງຝ່າຍກັບ ສະຫາຍ ສຈ.ປອ ຈະເລີນ ເຍຍປາວເຮີ, ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກູບາ. ສອງຝ່າຍໄດ້ແຈ້ງສະພາບການພົ້ນເດັ່ນ ຂອງ ແຕ່ລະປະເທດໃຫ້ກັນຊາບ ແລະ ຕີລາຄາການການພົວພັນຮ່ວມມື ດ້ານການທູດປະຊາຊົນກໍ່ຄືການເຄື່ອນໄຫວຈັດກິດຈະກຳສະໜັບສະໜູນຊ່ວຍເຫຼືອເຊິ່ງກັນ ແລະ ກັນໃນໄລຍະຜ່ານມາ, ປືກສາຫາລື ແລະ ວາງທິດທາງແຜນການຮ່ວມມືກັນໃນຕໍ່ໜ້າ. ສອງຝ່າຍເຫັນດີເປັນເອກະພາບກັນໃນການສືບຕໍ່ພົວພັນຮ່ວມມື, ສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະ ກັນ ທັງໃນເວທີພາກພື້ນ ແລະ ສາກົນ.
ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຄັ້ງນີ້, ສະຫາຍ ແຟັກນັງໂດ ກອງຊາເລສ ໂຢ ຍັງໄດ້ເຂົົ້າຢ້ຽມຂໍ່ານັບການນໍາຂັ້ນສູງ ຂອງ ສປປ ລາວຈຳນວນໜຶ່ງ, ພົບປະເຮັດວຽກກັບຫຼາຍພາກສ່ວນຂອງລາວ, ຈັດປາຖະກະຖາ, ແລະ ຢ້ຽມຊົມສະຖານທີ່ທ່ອງທ່ຽວປະຫວັດສາດ, ວັດທະນະທຳ ແລະ ທຳມະຊາດ ໃນນະຄອນຫຼວງວຽງຈັນ ແລະ ແຂວງວຽງຈັນຈຳນວນໜຶ່ງ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20