ຄະນະພົວພັນຕ່າງປະເທດສູນກາງພັກ ຈັດປາຖະກະຖາເຜີຍແຜ່ ເຊື່ອມຊຶມ ເອກະສານສຳຄັນຂອງພັກ - ລັດ

ເຜີຍ​ແຜ່​ໂດຍ​: editor ເວ​ລາ: 10/10/2022 16:26:35 ຈຳ​ນວນ​​ຢ້ຽມ​ຊົມ 507 ຄັ້ງ ​

   ໃນວັນທີ 10 ຕຸລາ 2022, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດຕັ້ງເຜີຍແຜ່ເຊື່ອມຊຶມ ມູນເຊື້ອວັນປະກາດເອກະລາດ ຄົບຮອບ 77 ປີ; ວັນການທູດລາວ ຄົບຮອບ 77 ປີ ແລະ ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ຂອງ ສປປລາວ, ໂດຍການໃຫ້ກຽດເຜີຍແຜ່ ຂອງ  ສະຫາຍ  ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍໃນຄະນະບໍລິຫານງານພັກ, ສະມາຊິກພັກ, ພະນັກງານ ​ທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມ 129 ສະຫາຍ.

   ໃນພິທີ ສະຫາຍ ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ຫວນຄືນມູນເຊື້ອອັນພິລະອາດຫານໃນຂະບວນການຕໍ່ສູ້ຂອງ ປະຊາຊົນລາວ ຕ້ານການຮຸກຮານຂອງ ຈັກກະພັດຕ່າງດ້າວ  ພາຍໃຕ້ການນໍາພາຂອງວິລະຊົນ, ວິລະບູລຸດຜູ້ເກັ່ງກ້າ ໃນໄລຍະທີ່ບໍ່ທັນມີພັກນໍາພາ ແລະ ການຕໍ່ສູ້ກູ້ຊາດຕ້ານພວກລ່າເມືອງຂຶ້ນ ພາຍໃຕ້ການນໍາພາຂອງພັກກອມມູນິດອິນດູຈີນ ເລີ່ມແຕ່ປີ 1930 ແລະ ພາຍຫຼັງທີ່ໄດ້ສ້າງຕັ້ງອົງຄະນະພັກແຄວ້ນລາວ ເຮັດໃຫ້ການຕໍ່ສູ້ຂອງປະຊາຊົນລາວ ຍາດໄດ້ໄຊຊະນະຢ່າງເນືອງນິດລຽນຕິດຈົນສາມາດ ປະກາດເອກະລາດຕໍ່ຊາວໂລກໃນວັນທີ 12 ຕຸລາ 1945. ວັນດັ່ງກ່າວຍັງເປັນວັນສ້າງຕັ້ງການທູດລາວ ທີ່ເປັນຈຸດເລີ່ມຕົ້ນ ຂອງການກໍານົດແນວທາງນະໂຍບາຍການຕ່າງປະເທດ ທີ່ຖືກຕ້ອງ ແລະ ປະດິດສ້າງຂອງພັກເຮົາ, ປະກອບສ່ວນສໍາຄັນເຂົ້າໃນພາລະກິດການຕໍ່ສູ້ປົດປ່ອຍຊາດ, ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດສູ່ຈຸດໝາຍສັງຄົມນິຍົມ ຕະຫຼອດໄລຍະ 77 ປີຜ່ານມາ. ໃນປັດຈຸບັນ ພັກເຮົາໄດ້ມີການເປີດກວ້າງການພົວພັນກັບບັນດາພັກການເມືອງ ຈໍານວນ 140  ພັກ ແລະ ມີສາຍພົວພັນການທູດ ກັບ 148 ປະເທດ.

   ໃນໂອກາດດັ່ງກ່າວ, ສະຫາຍຫົວໜ້າ ຄຕພ ໄດ້ ຫວນຄືນປະຫວັດຄວາມເປັນມາຂອງ ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ຂອງ ສປປ ລາວ, ໃນຖານະທີ່ ສປປ ລາວ ເປັນປະເທດສະມາຊິກ ຂອງອົງການສະຫະປະຊາຊາດ ຍາມໃດກໍຖືວ່າວຽກງານການແກ້ໄຂຄວາມທຸກຍາກຂອງປະຊາຊົນເປັນວຽກຍຸດທະສາດສໍາຄັນ, ເປັນໜ້າທີ່ບູລິມະສິດ ຂອງທົ່ວພັກ - ທົ່ວລັດ, ທົ່ວປວງຊົນ ໄດ້ເອົາໃຈໃສ່ຊີ້ນໍາການຈັດຕັ້ງວຽກງານດັ່ງກ່າວຢ່າງຕັ້ງໜ້າ ແລະ ຕໍ່ເນື່ອງຄຽງຄູ່ກັບການກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ແລະ ວຽກງານ 3 ສ້າງ ແມ່ນມີຄວາມຄືບໜ້າເປັນກ້າວໆ, ໂຄງຮ່າງພື້ນຖານທາງດ້ານເສດຖະກິດ-ສັງຄົມ ຢູ່ຊົນນະບົດໄດ້ສືບຕໍ່ພັດທະນາທັງດ້ານປະລິມານ ແລະ ຄຸນນະພາບ ເທື່ອລະກ້າວ

---