ສະມາຄົມມິດຕະພາບ ລາວ-ຣັດເຊຍ ຈັດພິທີສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຣັດເຊຍ ຄົບຮອບ 62 ປີ

ເຜີຍ​ແຜ່​ໂດຍ​: editor ເວ​ລາ: 10/10/2022 13:37:36 ຈຳ​ນວນ​​ຢ້ຽມ​ຊົມ 769 ຄັ້ງ ​

  ໃນວັນທີ 7 ຕຸລາ 2022 ສະມາຄົມມິດຕະພາບ ລາວ-ຣັດເຊຍ ໄດ້ຈັດພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຣັດເຊຍ ຄົບຮອບ 62 ປີ ( 07/10/1960-07/10/2022 ), ໂດຍການໃຫ້ກຽດເຂົ້າຮ່ວມຂອງ ທ່ານ ສຈ.ປອ. ບໍ່ແສງຄໍາ ວົງດາລາ, ປະທານສະມາຄົມມິດຕະພາບ ລາວ-ຣັດເຊຍ, ທ່ານ ວາດີເມຍ ກາລິນິນ (Mr. Vladimir A. KALININ), ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສ.ຣັດເຊຍ ປະຈໍາ ສປປ ລາວ. ນອກນັ້ນ, ຍັງມີ ຄະນະນຳ ຄະນະພົວພັນຕ່າງປະເທດສູນກາງພັກ,ຄະນະນຳ ກະຊວງການຕ່າງປະເທດ, ຄະນະນໍາ ກະຊວງປ້ອງກັນປະເທດ, ຫົວໜ້າຫ້ອງການຜູ້ຕາງໜ້າສະມາຄົມມິດຕະພາບ ຣັດເຊຍ-ລາວ ປະຈຳ ສປປ ລາວຄະນະບໍລິຫານງານສະມາຄົມມິດຕະພາບ ລາວ-ຣັດເຊຍ ແລະ ແຂກຖືກເຊີນເຂົ້າຮ່ວມ 60 ທ່ານ.

   ໃນພິທີດັ່ງກ່າວ, ທ່ານ ສຈ.ປອ. ບໍ່ແສງຄໍາ ວົງດາລາ, ປະທານສະມາຄົມມິດຕະພາບ ລາວ-ຣັດເຊຍ ໄດ້ມີຄຳເຫັນ ກ່ຽວກັບລາວ ແລະ ຣັດເຊຍ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 07 ຕຸລາ 1960, ນັບແຕ່ນັ້ນເປັນຕົ້ນມາສອງປະເທດ ໄດ້ມີການພັດທະນາ, ເສີມຂະຫຍາຍ ແລະ ເພີ່ມພູນຄູນສ້າງເປັນແຕ່ລະໄລຍະ, ເຖິງແມ່ນວ່າ ລາວ ແລະ ຣັດເຊຍ ຈະມີທີ່ຕັ້ງພູມສັນຖານຢູ່ຫ່າງໄກກັນຄົນລະທະວີບ ແຕ່ສອງປະເທດກໍ່ພະຍາຍາມພັດທະນາ ແລະ ເສີມຂະຫຍາຍສາຍພົວພັນໃຫ້ນັບມື້ແໜ້ນແຟ້ນ, ມີການໄປມາຫາສູ່ກັນ, ມີຄວາມໄວ້ເນື້ອເຊື່ອໃຈ ແລະ ຊ່ວຍເຫຼືອເຊິ່ງກັນ ແລະ ກັນ ຕັ້ງແຕ່ໄລຍະຕໍ່ສູ້ປົດປ່ອຍປະເທດຊາດ ກໍ່ຄືໄລຍະປົກປັກຮັກສາ ແລະສ້າງສາພັດທະນາປະເທດຊາດ ເຮັດໃຫ້ປະຊາຊົນສອງຊາດ ມີຄວາມເຂົ້າໃຈກັນ, ເຫັນໃຈ, ມີການສະໜັບສະໜູນ ແລະ ຊ່ວຍເຫຼືອເຊິ່ງກັນ ແລະກັນ. ການນໍາຂັ້ນສູງ ຂອງ ສອງປະເທດມີການແລກປ່ຽນຢ້ຽມຢາມ, ບັນດາຂະແໜງການຕ່າງໆຂອງສອງປະເທດ ກໍ່ໄດ້ມີການພົວພັນຮ່ວມມືກັນຢ່າງມີປະສິດທິພາບ ແລະ ປະສິດທິຜົນ. ນອກຈາກການຮ່ວມມືສອງຝ່າຍ ສປປ ລາວ ແລະ ສ. ຣັດເຊຍ ໄດ້ໃຫ້ການຊ່ວຍເຫຼືອ ແລະ ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.

  ສຳລັບສະມາຄົມມິດຕະພາບ ລາວ-ຣັດເຊຍ ໃນຖານະເຮັດໜ້າທີ່ເຄື່ອນໄຫວວຽກງານການທູດປະຊາຊົນ, ຍາມໃດກໍ່ສະໜັບສະໜູນ ແລະ ເຮັດໜ້າທີ່ເປັນຂົວຕໍ່ການພົວພັນຮ່ວມມືກັບຂະແໜງການຕ່າງໆ ຂອງ ສອງປະເທດ ໃຫ້ມີການພົວພັນຮ່ວມມື, ຊຸກຍູ້ໃຫ້ປະຊາຊົນສອງຊາດ ລາວ ແລະ ຣັດເຊຍ ໄດ້ມີການພົວພັນຮ່ວມມື, ໄປມາຫາສູ່ກັນຫຼາຍຂື້ນ, ມີຄວາມໄວ້ເນື້ອເຊື່ອໃຈ ແລະ ຊ່ວຍເຫຼືອເຊິ່ງກັນ ແລະກັນ ເພື່ອປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມື ທີ່​ມີ​ມາ​ແຕ່​ຍາວ​ນານ ໃຫ້ນັບມື້ເຕີບໃຫ່ຍເຂັ້ມແຂງ ແລະ ເກີດດອກອອກຜົນ. ໄລຍະຜ່ານມາ, ສະມາຄົມມິດຕະພາບ ລາວ-ຣັດເຊຍ ຮ່ວມກັບ ສະມາຄົມມິດຕະພາບ ຣັດເຊຍ-ລາວ ຈັດກິດຈະກຳເນື່ອງໃນໂອກາດວັນສຳຄັນຂອງສອງປະເທດຄື: ວັນຊາດ, ວັນສ້າງຕັ້ງສາຍພົວພັນການທູດ,​ ວັນມະຫາປະຕິວັດສັງຄົມນິຍົມເດືອນຕຸລາ,​ ວັນໄຊຊະນະເໜືອຟາຊິດ ແລະ ອື່ນໆ. ທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງສ.ຣັດເຊຍ ປະຈຳ ສປປ ລາວ ໄດ້ສະແດງຄວາມຂອບໃຈ ມາຍັງ ສະມາຄົມມິດຕະພາບ ລາວ-ຣັດເຊຍ ກໍ່ຄືພັກ, ລັດຖະບານ ແລະ ປະຊາຊົນລາວ ທີ່ໄດ້ຈັດພິທີສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຣັດເຊຍ ທີ່ມີຄວາມໝາຍຄວາມສໍາຄັນດັ່ງກ່າວຂຶ້ນ ແລະ  ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ທີ່​ມີ​ມາ​ແຕ່​ຍາວ​ນານ ລະຫວ່າງ ລາວ ແລະ ຣັດເຊຍ ທີ່ລັດຖະບານ ແລະ ປະຊາຊົນ ຂອງ ສອງປະເທດ ມີຄວາມເຊື່ອໝັ້ນ, ໄວ້ເນື້ອເຊື່ອໃຈ ແລະ  ເຂົ້າໃຈເຊິ່ງກັນ ແລະ ກັນ, ຊ່ວຍເຫຼືອກັນຕ່າງຝ່າຍຕ່າງມີຜົນປະໂຫຍດນັ້ນ, ໃນນັ້ນ,ທ່ານ ເອກອັກຄະລັດຖະທູດ ໄດ້ໃຫ້ຄຳໜັ້ນສັນຍາຈະສຶບຕໍ່ເສີມຂະຫຍາຍ ແລະ ເພີ່ມພູນຄູນ ສາຍພົວພັນດັ່ງກ່າວ ຂອງ ສອງປະເທດ ສ.ຣັດເຊຍ ແລະ ສປປ ລາວ ໃຫ້ໄດ້ຮັບການພັດທະນາ ແລະ ຈະເລີນງອກງາມຍິ່ງໆຂື້ນ.

---