ຄະນະຜູ້ແທນຂັ້ນສູງພັກ ປປ ລາວ ສຳເລັດການເດີນທາງໄປ ຢ້ຽມຢາມ ຍີ່ປຸ່ນ

ເຜີຍ​ແຜ່​ໂດຍ​: editor ເວ​ລາ: 05/10/2022 13:47:45 ຈຳ​ນວນ​​ຢ້ຽມ​ຊົມ 555 ຄັ້ງ ​

        ໂດຍຕອບສະໜອງຕາມຄຳເຊີນຂອງລັດຖະບານຍີ່ປຸ່ນ, ຄະນະຜູ້ແທນຂັ້ນສູງພັກ ປປ ລາວ ນຳໂດຍ ທ່ານ ນາງ ສີ​ໃສ ລື​ເດດ​ມູນ​ສອນ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ປະຊາຊົນ ປະຕິວັດລາວ ໄດ້ສໍາເລັດການຢ້ຽມຢາມ ຍີ່ປຸ່ນ ແຕ່ວັນທີ 28 ກັນ​ຍາ ຫາ 02 ຕຸລາ 2022.

   ໃນໄລຍະຢ້ຽມຢາມຍີ່ປຸ່ນ, ຄະນະໄດ້ພົບປະກັບ ບັນດາພາກສ່ວນກ່ຽວຂ້ອງຂອງຍີ່ປຸ່ນ ທັງຢູ່ນະຄອນຫຼວງໂຕກຽວ ແລະ ນະຄອນກຽວໂຕ ​ໂດຍ​ໄດ້​ພົບ​ປະ​ກັບ ທ່ານ ອິ​ໂຕ ຊິນ​ທາ​​ໂລ, ຫົວໜ້າສໍານັກງານສາກົນຂອງ ພັກເສລີປະຊາທິປະໄຕ; ທ່ານ ທາ​ເກ​ອິ ຊຸນ​ຊູ​ເກ, ຮອງລັດຖະມົນຕີກະຊວງການຕ່າງປະເທດຍີ່ປຸ່ນ; ທ່ານ ຊືຈິ​ຍະ ຊິ​ນາ​ໂກະ, ປະທານຄະນະມິດຕະພາບ ລັດຖະສະພາ ຍີ່ປຸ່ນ-ລາວ; ເຈົ້າຄອງນະຄອນກຽວໂຕ, ສະມາຄົມມິດຕະພາບຄັນໄຊ-ລາວ ​ແລະ ຮັບ​​ການ​ເຂົ້າ​ຢ້ຽມ​ຂ່ຳນັບຂອງອົງການໄຈກາ.

        ນອກຈາກ​ພົບ​ປະ​ກັບ​ ການ​ນຳ​ຂອງ​ພັກ​ເສລີ​ປະຊາທິປ​ະ​ໄຕ ​ແລະ ອົງການ​ກ່ຽວຂ້ອງ​ຂອງ​ລັດຖະບານ​ຍີ່ປຸ່ນ​ແລ້ວ, ​ຄະນະ​ຍັງ​ໄດ້​ເຂົ້າ​ພົບ​ປະ​ກັບ​ ທ່ານ ຊີ​ອິ ຄາ​ຊື​ໂອະ, ປະທານຄະນະ​ບໍລິຫານ​ງານ​ສູນ​ກາງພັກກອມມູນິດຍີ່ປຸ່ນ.

     ໃນການພົບປະດັ່ງກ່າວ, ສອງຝ່າຍ ​ໄດ້​ເຫັນ​ດີ​ເປັນ​ເອກະ​ພາບ​ກັນ ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ລະຫວ່າງ ພັກ ປປ ລາວ ​ແລະ ພັກ​ເສລີ​ປະຊາທິປະ​ໄຕ ກໍ່​ຄື ສາຍ​ພົວພັນ​ຄູ່​ຮ່ວມ​​ຍຸດ​ທະ​ສາດ ລະຫວ່າງ ສອງ​ປະ​ເທດ ລາວ-​ຍີ່ປຸ່ນ ​ໃນ​ໄລຍະ​ຜ່ານ​ມາ ​ກໍ່​ຄື ປັດຈຸ​ບັນ​ ເຖິງ​ວ່າ​ສະພາບ​ການ​ແຜ່​ລະບາດ​ຂອງ​ພະ​ຍາດ​ໂຄ​ວິດ-19 ຈະ​ສົ່ງ​ຜົນ​ກະທົບໃຫ້​ແກ່​ການ​ໄປ​ມາຫາ​ສູ່​ກັນ ລະ​ຫວ່າງ​ ສອງ​ຝ່າຍ ​ກໍ່ຕາມ ​ແຕ່​ສາຍ​ພົວພັນ​ດັ່ງກ່າວ​ຍັງ​ສືບ​ຕໍ່​ໄດ້​ຮັບ​ການ​ເສີມ​ຂະຫຍາຍ ​ແລະ ຮັດ​​ແໜ້ນ​,  ສອງ​ຝ່າຍ​ ຍິນ​ດີສືບ​ຕໍ່​ຊຸກຍູ້​ແລກປ່ຽນ​ການ​ພົບ​ປະ ​ແລະ ຢ້ຽມຢາມ​ຂອງການ​ນຳ​ຂັ້ນ​ສູງ​ຂອງ​ສອງ​ປະ​ເທດ ລວມທັງ​ການ​ໄປ​ມາ​ຫາ​ສູ່​ກັນ ​ລະຫວ່າງ ​ປະຊາຊົນ​ສອງ​ຊາດ​ລາວ-​ຍີ່ປຸ່ນ ​ໃຫ້​ເປັນ​ປົກກະຕິ. ຝ່າຍ​ຍີ່ປຸ່ນ​ ຍິນ​ດີສືບ​ຕໍ່​ຊຸກຍູ້​ການ​ລົງທຶນ​ຂອງ​ຍີ່ປຸ່ນ ຢູ່ ສປປ ລາວ​ ​ໃຫ້​ຫຼາຍ​ຂື້ນ, ສືບ​ຕໍ່ໃຫ້ການ​ສະໜັບ​ສະ​ໜູນ ຊ່ວຍ​ເຫຼືອ ສປປ ລາວ ​​ໃນການ​ພັດ​ທະ​ນາ​ພື້ນຖານ​ໂຄງ​ລ່າງ, ສາທາລະນະ​ສຸກ, ການ​ສຶກສາ, ວັດທະນະ​ທໍາ​ ​ແລະ ອື່ນໆ;

​ ​ໃນ​ໂອກາດ​ດັ່ງກ່າວ, ທ່ານ ນາງ ສີ​ໃສ ລື​ເດດ​ມູນ​ສອນ ໄດ້ຕາງໜ້າພັກ, ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ​ແລະ ຕີ​ລາຄາ​ສູງ​ຕໍ່​ການ​ຮ່ວມ​ມື ​ແລະ ຊ່ວຍ​ເຫຼືອ ສປປ ລາວ ຂອງລັດຖະບານ ກໍ​ຄື ​ປະຊາຊົນຍີ່ປຸ່ນ ​ໃນ​ໄລຍະ​ຜ່ານ​ມາ, ​​ເຊິ່ງເປັນ​ການ​ຊ່ວຍ​ເຫຼືອ​ທີ່ີມີ​ປະສິດ​ທິພາ​ບ, ປະສິດ​ທິ​ຜົນ ​ແລະ ​ແທດ​ເໝາ​ະກັບ​ຄວາມ​ຮຽກຮ້ອງ​ຕ້ອງການ​ຕົວ​ຈິງ ຂອງ ສປປ ລາວ,​ ​ເຊິ່ງ ຍີ່ປຸ່ນ ​ເປັນ​ປະ​ເທດ​ອັນ​ດັບ​ຕົ້ນ ທີ່​ໃຫ້ການ​ຊ່ວຍ​ເຫຼືອທາງ​ການ​ເພື່ອ​ການ​ພັດທະນາ (ODA) ​ໃຫ້​ແກ່ ສປປ ລາວ.

     ໃນ​ໄລຍະ​ຢູ່​ຢ້ຽມຢາມ ຍີ່ປຸ່ນຄັ້ງນີ້, ​ທ່ານ ນາງ ສີ​ໃສ ລື​ເດດ​ມູນ​ສອນ ພ້ອມ​ດ້ວຍ​ຄະນະ ຍັງ​ໄດ້​ຢ້ຽມຢາມ​ສະຖານ​ທີ່​ສໍາຄັນ​ທາງ​ປະຫວັດສາດ ​ແລະ ວັດທະນະ​ທໍາ​ ຢູ່ ນະຄອນຫຼວງ​ໂຕ​ກຽວ ​ແລະ ນະຄອນ​ກຽວ​ໂຕ​ຂອງ ຍີ່ປຸ່ນ ຈໍານວນ​ໜຶ່ງ.

---