ຄະນະພົວພັນຕ່າງປະເທດສູນກາງພັກ ຈັດຕັ້ງໂຄສະນາປາຖະກະຖາ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ

ເຜີຍ​ແຜ່​ໂດຍ​: editor ເວ​ລາ: 15/09/2022 16:07:15 ຈຳ​ນວນ​​ຢ້ຽມ​ຊົມ 645 ຄັ້ງ ​

       ໃນວັນທີ 15 ກັນຍາ 2022, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດຕັ້ງເຜີຍແຜ່ມູນເຊື້ອວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 20 ປີ (09 ກັນຍາ 2002 - 09 ກັນຍາ 2022). ພາຍໃຕ້ການເປັນປະທານຂອງ ສະຫາຍ ວາລະໄຊ ເລັ່ງສະຫວັດ,  ກໍາມະການຄະນະພັກ,  ຮອງຫົວໜ້າຄະນະພົວພັນຕ່າງປະເທດສູນກາງພັກ ແລະ ໃຫ້ກຽດປາຖະກະຖາໂດຍ ສະຫາຍ ພົນ​ຈັດ​ຕະ​ວາ ຄຳ​ໝັ້​ນ ວັນ​ນະ​ວົງ, ຄະ​ນະ​ບໍ​ລິ​ຫານ​ງານ​ພັກ, ຮອງປະທານສະຫະພັນນັກຮົບເກົ່າແຫ່ງຊາດລາວ, ມີບັນດາສະຫາຍ ໃນຄະນະບໍລິຫານງານພັກ, ພະນັກງານອາວຸໂສບໍານານ ແລະ ພະນັກງານ​ຫຼັກ​ແຫຼ່ງທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມຢ່າງພ້ອມພຽງ.   

       ໃນພິທີ ສະຫາຍ ພົນ​ຈັດ​ຕະ​ວາ ຄຳ​ໝັ້​ນ ວັນ​ນະ​ວົງ ໄດ້ຫວນຄືນມູນເຊື້ອການກຳ​ເນີດ ແລະ ເຕີບ​ໃຫຍ່​ຂະ​ຫຍາຍ​ຕົວ​ຂອງ ສະຫະພັນນັກຮົບເກົ່າແຫ່ງຊາດລາວ 20 ປີ ພາຍໃຕ້ຮົ່ມທຸງຂອງພັກ, ບັນດາພາລະບົດບາດ ແລະ ຜົນງານອັນພົ້ນເດັ່ນໃນການເຄື່ອນໄຫວປະກອບສ່ວນເຂົ້າໃນພາລະກິດປະຕິວັດຊາດ, ປົກປັກຮັກສາ ແລະ ພັດທະນາປະເທດຊາດ ເພື່ອສືບຕໍ່ເສີມຂະຫຍາຍທາດແທ້ມູນເຊື້ອປະ​ຕິ​ວັດ​ເຂົ້າ​ໃນການຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດສັງຄົມຂອງລັດ ຕິດພັນກັບມະຕິກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດຄັ້ງທີ IV ໃຫ້ເປັນຂະບວນການ ແລະ ມີໝາກຜົນຕົວຈິງ, ສະຫະພັນນັກຮົບເກົ່າແຫ່ງຊາດລາວ ຈະໄດ້ສືບຕໍ່ຫັນລົງກໍ່ສ້າງຮາກຖານການ​ເມືອງຢ່າງແຂງແຮງເຊີດຊູຄວາມຮັບຜິດຊອບໃນການພັດທະນາ ສະຫະພັນນັກຮົບເກົ່າຕິດພັນກັບວຽກງານ 3 ສ້າງ, ພ້ອມກັນສ້າງຂະບວນການແຂ່ງຂັນ “ຮັກຊາດ ແລະ ພັດທະນາ” ໄປຄຽງຄູ່ກັບການປະຕິບັດ 7 ແຜນງານ 31 ໂຄງການ ເນື້ອໃນຂໍ້ແຂ່ງຂັນ 3 ດີ 6 ຮັກສາຂອງ ສະຫະພັນນັກຮົບເກົ່າ ແຕ່ນີ້ຮອດປີ 2025 ໃຫ້ປະກົດຜົນເປັນຈິງ.

       ການປາຖະກະຖາໃນຄັ້ງນີ້ ໄດ້ເຮັດໃຫ້ພະນັກງານ ຄະນະພົວພັນຕ່າງປະເທດສູນກາງພັກ ມີຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ຜົນງານ, ພາລະບົດບາດ ແລະ ການເຕີບໃຫຍ່ຂະຫຍາຍຕົວຂອງ ສະຫະພັນນັກຮົບເກົ່າແຫ່ງຊາດລາວ ເວົ້າລວມ, ເວົ້າສະເພາະແມ່ນຜູ້ທີ່ໄດ້ຜ່ານການປະຕິບັດໜ້າທີ່ເປັນນັກຮົບປ້ອງກັນຊາດ, ປ້ອງກັນຄວາມສະຫງົບ  ທີ່ໄດ້ຜ່ານການທົດສອບໃນແປວໄຟແຫ່ງການຕໍ່ສູ້ກູ້ຊາດ ແລະ ນໍາເອົາເອກະລາດຄວາມຢູ່ເຢັນເປັນສຸກມາໃຫ້ປະຊາຊົນລາວບັນດາເຜົ່າ.

---