ສະມາຄົມມິດຕະພາບ ລາວ-ກູບາ ໄດ້ຮັບ ຫຼຽນໄຊສາມັກຄີ ຈາກລັດຖະບານ ສ.ກູບາ ແລະ ຫຼຽນກາລະນຶກ 60 ປີ ຈາກສະຖາບັນກູບາເພື່ອມິດຕະພາບກັບນາໆຊາດ
ເຜີຍແຜ່ໂດຍ: editor ເວລາ: 05/09/2022 08:28:25 ຈຳນວນຢ້ຽມຊົມ 532 ຄັ້ງ ວັນທີ 4 ກັນຍາ 2022, ທີ່ຫໍສະພາແຫ່ງຊາດ ສະມາຄົມມິດຕະພາບ ລາວ-ກູບາ ໄດ້ມີພິທີມອບຫຼຽນໄຊສາມັກຄີ ຈາກລັດຖະບານ ສ.ກູບາ ແລະ ຫຼຽນກາລະນຶກ 60 ປີ ຈາກສະຖາບັນກູບາເພື່ອມິດຕະພາບກັບນາໆຊາດ (ICAP) ໃຫ້ແກ່ ສະມາຄົມມິດຕະພາບ ລາວ-ກູບາ. ຕາງໜ້າລັດຖະບານ ສ.ກູບາ ແລະ ສະຖາບັນກູບາເພື່ອມິດຕະພາບກັບນາໆຊາດ ມອບໂດຍ ສະຫາຍ ເກີຣາໂດ ເປນາລເວ ປໍຕາລ (Gerardo penalver portal), ຮອງລັດຖະມົນຕີກະຊວງການຕ່າງປະເທດ ຜູ້ທີ 1 ແຫ່ງ ສ.ກູບາ ແລະ ຕາງໜ້າຄະນະບໍລິຫານສະມາຄົມມິດຕະພາບຕະພາບ ລາວ-ກູບາ ຮັບໂດຍ ສະຫາຍ ສຈ.ປອ ຈະເລີນ ເຍຍປາວເຮີ, ກຳມະການສູນກາງພັກ, ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກູບາ. ໃຫ້ກຽດເຂົ້າຮ່ວມໃນພິທີອັນມີຄວາມໝາຍສໍາຄັນດັ່ງກ່າວມີ: ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ນາງ ເອັນນາ ເອເທີ ວຽງ ວາລເດສ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ.ກູບາ ປະຈຳ ສປປ ລາວ ນອກນັ້ນ, ຍັງມີບັນດາສະຫາຍຮອງລັດຖະມົນຕີ, ຕາງໜ້າກະຊວງການຕ່າງປະເທດ, ຕາງໜ້າກໍາມາທິການຂອງສະພາແຫ່ງຊາດ, ຕາງໜ້າອົງການຈັດຕັ້ງມະຫາຊົນຂັ້ນສູນກາງ, ຄະນະບໍລິຫານງານສະມາຄົມມິດຕະພາບ ລາວ-ກູບາ ແລະ ພະນັກງານຈາກພາກສ່ວນທີ່ກ່ຽວຂ້ອງ ຂອງ ລາວ ແລະ ກູບາ ເຂົ້າຮ່ວມ.
ການທີ່ພັກ, ລັດຖະບານ ແລະ ປະຊາຊົນ ກູບາ ແລະ ສະຖາບັນກູບາເພື່ອມິດຕະພາບກັບນາໆຊາດ ມອບຫຼຽນໄຊສາມັກຄີ ເຊິ່ງເປັນຫຼຽນທີ່ສູງສົ່ງ ຂອງ ສ. ກູບາ ແລະ ຫຼຽນກາລະນຶກ 60 ປີ ຫຼຽນທີ່ມີຄວາມໝາຍ ຂອງ ສະຖາບັນກູບາເພື່ອມິດຕະພາບກັບນາໆຊາດ ໃຫ້ແກ່ ສະມາຄົມມິດຕະພາບ ລາວ-ກູບາ ໃນຄັ້ງນີ້ ແມ່ນເພື່ອສະແດງຄວາມຂອບໃຈ, ຍ້ອງຍໍ ແລະ ຕີລາຄາສູງຕໍ່ການສະໜັບສະໜູນ ແລະ ເຄື່ອນໄຫວປະກອບສ່ວນ ຂອງ ສະມາຄົມມິດຕະພາບ ລາວ-ກູບາ ໃນການຕໍ່ສູ້ເພື່ອທວງເອົາຄວາມເປັນທຳໃຫ້ແກ່ ປະຊາຊົນ ກູບາ ຢູ່ໃນເວທີພາກພື້ນ ແລະ ສາກົນ ໂດຍສະເພາະແມ່ນການປະກອບສ່ວນຕໍ່ສູ້ທວງເອົາຄວາມເປັນທຳໃຫ້ແກ່ 5 ວິລະຊົນກູບາຈົນໄດ້ຮັບອິດສະຫຼະພາບ ແລະ ກັບຄືນມາສູ່ດິນແດນ ແລະ ອ້ອມກອດຂອງຄອບຄົວ, ສະໜັບສະໜູນການຕໍ່ສູ້ຕ້ານການປິດລ້ອມທຸກຮູບແບບ ຂອງ ອິດທິກໍາລັງປໍລະປັກທີ່ມີຕໍ່ກູບາ. ພ້ອມນັ້ນ, ກໍ່ຍັງເຄື່ອນໄຫວປະກອບສ່ວນເຂົ້າໃນການປົກປັກຮັກສາ, ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານ ຂອງ ສອງພັກ, ສອງລັດ ແລະ ປະຊາຊົນສອງຊາດລາວ ແລະ ກູບາ ໃຫ້ນັບມື້ເກີດດອກອອກຜົນ, ສວຍສົດງົດງາມ ແລະ ໝັ້ນຄົງຖາວອນ.
ໃນພິທີດັ່ງກ່າວ, ສະຫາຍ ສຈ.ປອ ຈະເລີນ ເຍຍປາວເຮີ, ກຳມະການສູນກາງພັກ, ຮອງປະທານສະພາແຫ່ງຊາດ,ປະທານສະມາຄົມມິດຕະພາບ ລາວ-ກູບາ ຕາງໜ້າໃຫ້ຄະນະບໍລິຫານງານສະມາຄົມມິດຕະພາບ ລາວ-ກູບາ ກໍໄດ້ສະແດງຄວາມຂອບໃຈ ແລະ ຢືນຢັນວ່າ ຈະສືບຕໍ່ສະໜັບສະໜູນ ແລະ ຊ່ວຍເຫຼືອຢ່າງສຸດຄວາມສາມາດຂອງຕົນ ຮ່ວມກັບສະຫາຍກູບາ ໃນການຕໍ່ສູ້ທວງເອົາຄວາມເປັນທຳ, ຄວາມຍຸຕິທໍາຈາກອິດທິກໍາລັງປໍລະປັກ ເພື່ອສິດທິໃນການໃນການສ້າງສາພັດທະນາດ້ວຍຕົນເອງ. ພ້ອມນີ້, ສະມາຄົມມິດຕະພາບ ລາວ-ກູບາ ມີຄວາມຍິນດີ ແລະ ພ້ອມທີ່ຈະຮ່ວມມືກັບບັນດາສະຫາຍກູບາ ໂດຍສະເພາະແມ່ນ ບັນດາສະຫາຍໃນສະຖາບັນກູບາເພື່ອມິດຕະພາບກັບນາໆຊາດ ແລະ ສະມາຄົມມິດຕະພາບ ກູບາ-ລາວ ໃນການເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືຮອບດ້ານ ຂອງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ກູບາ ໃຫ້ແຕກດອກອອກຜົນ, ເສີມຂະຫຍາຍການທູດປະຊາຊົນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20