ກອງປະຊຸມປະສຳມະນາທິດສະດີ ລະຫວ່າງ ພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ ຄັ້ງທີ VIII

ເຜີຍ​ແຜ່​ໂດຍ​: admin ເວ​ລາ: 10/03/2022 14:30:39 ຈຳ​ນວນ​​ຢ້ຽມ​ຊົມ 580 ຄັ້ງ ​

ໃນວັນທີ 16 ທັນວາ 2021, ​ໂດຍປະ​ຕິ​ບັດ​ຕາມ​ການຕົກລົງເຫັນ​ດີ​ຂອງ​ກົມ​ການ​ເມືອງ​ສູນ​ກາງ​ພັກ ລາວ-ຫວຽດນາມ, ແລະ ບົດ​ບັນ​ທຶກ​ການ​ຮ່ວມມືລະຫວ່າງ ສະພາທິດສະດີສູນກາງພັກປະຊາຊົນ ປະຕິ ວັດລາວ ແລະ ສະພາທິດສະດີສູນກາງພັກກອມມູນິດຫວຽດນາມ ໄລຍະປີ 2018 – 2021, ສະພາທິດສະດີຂອງສອງພັກ ລາວ-ຫວຽດນາມ ໄດ້ຮ່ວມກັນຈັດກອງປະຊຸມສໍາມະນາທິດສະດີລະຫວ່າງ ສອງພັກ ລາວ - ຫວຽດນາມ ຄັ້ງທີ VIII ຜ່ານວີດີໂອທາງໄກ ພາຍໃຕ້ຫົວຂໍ້ “ບັນດາບັນຫາທິດສະດີ - ພຶດຕິກໍາຕົວຈິງໃໝ່ໃນເອກະສານກອງປະຊຸມໃຫຍ່ ຄັ້ງທີ  XI ຂອງພັກປະຊາຊົນປະຕິວັດລາວ ແລະ ເອກະສານກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ” ໂດຍການເປັນປະທານຮ່ວມຂອງ ສະ​ຫາຍ ຄຳ​ພັນ​ ເຜີຍ​ຍະ​ວົງ, ເລ​ຂາ​ທິ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ໂຄ​ສະ​ນາ​ອົບ​ຮົມ​ສູນ​ກາງ​ພັກ, ປະທານສະພາທິດສະດີສູນກາງພັກປະຊາຊົນ ປະຕິວັດລາວ ແລະ ສະຫາຍ ຫງວຽນຊວັນຖັງ, ກໍາມະການກົມການເມືອງສູນກາງພັກ, ຫົວໜ້າສະຖາບັນການເມືອງແຫ່ງຊາດ ໂຮ່ຈິມິນ, ປະທານສະພາທິດສະດີສູນກາງພັກກອມມູນິດຫວຽດນາມ. ເຂົ້າຮ່ວມກອງປະຊຸມຍັງມີບັນດາສະຫາຍພະນັກງານການນໍາຂັ້ນສູງທີ່ປຶກສາສະພາທິດສະດີຂອງສອງພັກ ລາວ-ຫວຽດນາມ; ບັນດາສະຫາຍນັກວິທະຍາສາດ, ນັກທິດສະດີ; ບັນດາຜູ້ຕາງໜ້າຈາກຄະນະຂອງສູນກາງພັກ, ກະຊວງ, ອົງການ ແລະ ຂະແໜງການ ຂອງສອງຝ່າຍເຂົ້າຮ່ວມ.

   ໃນກອງປະຊຸມສໍາມະນາຄັ້ງນີ້, ປະທານກອງປະຊຸມຮ່ວມສອງຝ່າຍໄດ້ຜັດປ່ຽນກັນຂຶ້ນກ່າວຄໍາເຫັນ ສະແດງຄວາມຊົມເຊີຍຕໍ່ຄະນະຜູ້ແທນຂອງສອງພັກ ລາວ-ຫວຽດນາມ ທີ່ເຂົ້າຮ່ວມກອງປະຊຸມທີ່​ໄດ້​ກະ​ກຽມ​ເປັນ​ຢ່າງ​ດີ ແລະ ແລກ​ປ່ຽນ​ຢ່າງ​ກົງ​ໄປ​ກົງ​ມາ. ກອງປະຊຸມສໍາມະນາຄັ້ງນີ້ຜ່ານລະ​ບົບທາງໄກຄັ້ງທໍາອິດ ເນື່ອງ​ຈາກສະພາບການແຜ່ລະບາດຂອງພະຍາດ ໂຄວິດ-19  ແຕ່ທັງສອງຝ່າຍ ກ​ໍ​ໄດ້ສືບຕໍ່ເສີມຂະຫຍາຍ​ບັນ​ດາ​ກົນ​ໄກ​ຂອ​ງ​ການ​ຮ່ວມ​ມືທີ່​ມີ​ປະ​ສິດ​ທິ​ພາບແລະປະ​ສິດ​ທິ​ຜົນ​ລະ​ຫວ່າງພັກປະຊາຊົນ ປະຕິວັດລາວແລະພັກ​ກອມ​ມູ​ນິດ​ຫວຽດ​ນາມ ທາງດ້ານທິດສະດີ ແລະ ພຶດຕິກໍາຕົວຈິງ. ພ້ອມດ່ຽວກັນນັ້ນ, ປະທານກອງປະຊຸມສອງຝ່າຍ ໄດ້ຜັດປ່ຽນກັນສະເໜີບົດນໍາ ກ່ຽວກັບ ບັນດາບັນຫາທິດສະດີ-ພຶດຕິກໍາຕົວຈິງໃໝ່ ໃນເອກະສານກອງປະຊຸມໃຫຍ່ ຄັ້ງທີ  XI ຂອງພັກປະຊາຊົນປະຕິວັດລາວ ແລະ ເອກະສານກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມ, ໂດຍທັງສອງຝ່າຍ ໄດ້ຍົກໃຫ້ເຫັນຢ່າງຈະແຈ້ງຕໍ່ບັນດາໝາກຜົນລວມຍອດສະຕິປັນຍາຂອງແຕ່ລະພັກ ຕະຫຼອດໄລຍະແຫ່ງການນໍາພາທີ່ຜ່ານມາ, ບັນດາແນວທາງຍຸດທະສາດຂອງແຕ່ລະພັກ ລ້ວນແຕ່ມີບົດບາດຕັດສິນໃຫ້ແກ່ການກ້າວເດີນໄປຕາມຈຸດໝາຍຂອງພັກທີ່ກໍານົດໄວ້ ແລະ ບັນດາບັນຫາທິດສະດີ-ພຶດຕິກໍາຕົວຈິງໃໝ່ ທີ່ກອງປະຊຸມໃຫຍ່ ຄັ້ງທີ  XI ຂອງພັກປະຊາຊົນປະຕິວັດລາວ ແລະ ເອກະສານກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດນາມໄດ້ກໍານົດ ອອກ ເພື່ອເປັນການແລກປ່ຽນ ແລະ ບິ່ແບ່ງບົດຮຽນ, ເພີ່ມທະວີຄວາມເຂົ້າອົກເຂົ້າໃຈ, ປະກອບສ່ວນເຂົ້າໃນການຮັດແໜ້ນ ແລະ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ກ້າວເຂົ້າສູ່ລວງເລິກໃນທຸກຂົງເຂດວຽກງານ.

   ກອງປະຊຸມຄັ້ງນີ້, ບັນດານັກວິທະຍາສາດ, ນັກທິດສະດີ ຂອງທັງສອງຝ່າຍ ໄດ້ຜັດປ່ຽນກັນຂຶ້ນສະ ເໜີບົດຄໍາເຫັນໃນຫົວຂໍ້ ບັນດາບັນຫາທິດສະດີ-ພຶດຕິກໍາໃໝ່ ໃນເອກະສານກອງປະຊຸມໃຫຍ່ ຄັ້ງທີ  XI ຂອງພັກປະຊາຊົນປະຕິວັດລາວ ແລະ ເອກະສານກອງປະຊຸມໃຫຍ່ຄັ້ງທີ XIII ຂອງພັກກອມມູນິດຫວຽດ ນາມ ກ່ຽວກັບ: ການພັດທະນາເສດຖະກິດຕະຫຼາດກໍານົດທິດສັງຄົມນິຍົມ; ການພັດທະນາວັດທະນະທໍາ, ສັງຄົມ, ມະນຸດ; ວຽກງານປ້ອງກັນຊາດ, ປ້ອງກັນຄວາມສະຫງົບ, ພົວພັນຕ່າງປະເທດ; ວຽກງານກໍ່ສ້າງ, ປັບປຸງພັກ ແລະ ລະບົບການເມືອງ. ນອກນັ້ນ, ຄະນະຜູ້ແທນຂອງທັງສອງຝ່າຍຍັງໄດ້ຮ່ວມກັນແລກປ່ຽນ ແລະ ຖອດຖອນບົດຮຽນບັນຫາຕ່າງໆທີ່ທັງສອງຝ່າຍໃຫ້ຄວາມສົນໃຈ.

   ພາຍ​ຫຼັງ​ສຳ​ເລັດ​ກອງ​ປະ​ຊຸມ​ 2 ສະ​ພາ​ທິດ​ສະ​ດີ​ສູນ​ກາງ​ພັກ​ ລາວ-ຫວຽດ​ນາມ ກໍ​ໄດ້​ເຊັນ​ບົດ​ບັນ​ທຶກ​ການ​ຮ່ວມ​ມື​ກັນ​ໃນ​ໄລ​ຍະ ປີ 2022-2026.

   ກອງປະຊຸມສໍາມະນາທິດສະດີລະຫວ່າງສອງພັກ ລາວ-ຫວຽດນາມ ຄັ້ງນີ້ ໄດ້ດໍາເນີນເປັນເວລາໜຶ່ງວັນຈຶ່ງສໍາເລັດລົງ.

---