ຄະນະພົວພັນຕ່າງປະເທດສູນກາງພັກ ຈັດກອງປະຊຸມສະຫຼຸບວຽກງານການເຄື່ອນໄຫວຕ່າງປະເທດ ຂອງພັກ ແລະ ການທູດປະຊາຊົນ ປະຈຳ 06 ເດືອນຕົ້ນປີ 2022

ເຜີຍ​ແຜ່​ໂດຍ​: editor ເວ​ລາ: 24/08/2022 16:47:45 ຈຳ​ນວນ​​ຢ້ຽມ​ຊົມ 809 ຄັ້ງ ​

ໂດຍ​ສືບ​ຕໍ່​ປະ​ຕິ​ບັດ​ຕາມ​ແຜນ​ການ​ປະ​ຈຳ​ປີ 2022 ຂອງ​​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ໃນຕອນເຊົ້າ ວັນທີ 24 ສິງ​ຫາ 2022, ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມສະຫຼຸບຖອດຖອນບົດຮຽນການເຄື່ອນໄຫວວຽກງານຕ່າງປະເທດ ຂອງບັນດາອົງການພັກ, ສູນ​ກາງ​ແນວ​ລາວ​ສ້າງ​ຊາດ, ສະຫະພັນນັກຮົບເກົ່າແຫ່ງຊາດລາວ, ​ບັນ​ດາອົງການຈັດຕັ້ງມະຫາຊົນຂັ້ນສູນກາງ, ຄະນະສັນຕິພາບ ແລະ ສາມັກຄີຂອງລາວ ແລະ  ບັນດາສະມາຄົມມິດຕະພາບ​ລາວ​ກັບ​ຕ່າງ​ປະ​ເທດ ປະຈຳ 06 ເດືອນຕົ້ນປີ 2022 ແລະ ວາງທິດທາງແຜນການໃນທ້າຍປີ 2022 ໂດຍການໃຫ້​ກ​ຽດເປັນປະທານຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ມີຕາງໜ້າບັນດາຄະນະນໍາ, ຄະນະກົມ ແລະ ພະນັກງານທີ່ກ່ຽວຂ້ອງຈາກອົງການຈັດຕັ້ງທີ່​ກ່ຽວ​ຂ້ອງ ເຂົ້າຮ່ວມຈຳນວນ 85 ສະຫາຍ.

ໃນກອງປະຊຸມ,  ບັນດາຜູ້ແທນເຂົ້າຮ່ວມກອງປະຊຸມ ໄດ້ແລກປ່ຽນຄວາມຄິດເຫັນຢ່າງ​ກົງ​ໄປ​ກົງມາ ໄດ້​ຕີລາຄາ ດ້ານດີ, ຍົກໃຫ້ເຫັນດ້ານຄົງຄ້າງ, ບົດຮຽນທີ່ຖອດຖອນໄດ້ໃນໄລຍະຜ່ານມາ ກ່ຽວກັບການຈັດຕັ້ງປະຕິບັດວຽກງານການຕ່າງປະເທດ ຂອງພັກ ແລະ ການ​ທູດ​ປະ​ຊາ​ຊົນ, ໂດຍເນັ້ນເຖິງຄວ​າມສໍາຄັນ ແລະ ຈໍາເປັນໃນການເພີ່ມທະວີການເປັນເສນາທິການໃຫ້ແກ່ສູນກາງພັກ ໃນການເຄື່ອນໄຫວວຽກງານຕ່າງປະເທດ ຕາມມະຕິກອງປະຊຸມໃຫຍ່ ສະໄໝ XI ຂອງພັກວາງອອກ ໃນ​ທ່າມກາງສະພາບການຢູ່ພາກພື້ນ ແລະ ສາກົນ ສືບຕໍ່ມີການປ່ຽນແປງຢ່າງໄວວາ ແລະ ສະຫຼັບຊັບ​ຊ້ອນ ຄາດ​ຄະ​ເນ​ໄດ້​ຍາກ ມີ​ທັງ​ສິ່ງ​ທ້າຍ​ທາຍໃໝ່ຫຼາຍ​ປະ​ການ​​ເກີດ​ຂື້ນ.

ໃນກອງປະຊຸມຄັ້ງນີ້, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໂອ້ລົມຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານ, ຜົນສໍາເລັດທີ່​ສຳ​ຄັນຂອງການເຄື່ອນໄຫວການຕ່າງປະເທດຂອງພັກ ແລະ ການທູດປະຊາຊົນ ທີ່ຍາດມາໄດ້ໃນໄລຍະຜ່ານມາ ພ້ອມ​ທັງ​ຮຽກ​ຮ້ອງ​ໃຫ້​ທຸກ​ພາກ​ສ່ວນ​ທີ່​ກ່ຽວ​ຂ້ອງ ຈົ່ງ​ສືບ​ຕໍ່​ເປັນ​ເຈົ້າ​ການ​ຈັດ​ຕັ້ງ​ຜັນ​ຂະ​ຫຍາຍ​ແນວ​ທາງ​ການ​ຕ່າງ​ປະ​ເທດ​ທີ່ກອງ​ປະ​ຊຸມ​ໃຫຍ່​ຄັ້ງ​ທີ XI ຂອງ​ພັກ​ວາງ​ອອກ, ສືບ​ຕໍ່ເປີດກວ້າງການພົວພັນ​ດ້ານ​ພັກກັບຕ່າງປະເທດ ຍູ້​ແຮງ​ການ​ທູດ​ປະ​ຊາ​ຊົນ, ຍາດແຍ່ງຂົນຂວາຍການສະໜັບສະໜູນ ແລະ ຊ່ວຍເຫຼືອຈາກ​ເພື່ອນ​ມິດ​ທັງ​ໃກ້ ແລະ ໄກ. ສືບ​ຕໍ່ປະ​ຕິ​ບັດ​ແຜນ​ການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022 ກໍຄື ວັນສ້າງຕັ້ງສາຍພົວພັນການທູດລະຫວ່າງ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຄົບຮອບ 45 ປີ ໃຫ້ເປັນ​ຂະ​ບວນ​ຟົດ​ຟື້ນ; ທັງເປັນການໂຄສະນາແນວທາງການຕ່າງປະເທດ ຂອງພັກ ເພື່ອປະກອບສ່ວນເຂົ້າໃນການສ້າງສະພາບແວດລ້ອມສາກົນທີ່ເອື້ອອໍານວຍ​ໃຫ້ແກ່ພາ​ລະ​ກິດການປົກປັກຮັກສາ ແລະ ສ້າງສາພັດທະນາປະເທດຊາດ, ສືບຕໍ່ຍົກສູງຖານະບົດບາດຂອງພັກ, ລັດເຮົາໃນເວທີພາກພື້ນ ແລະ ສາກົນ.

---