ຄະນະພົວພັນຕ່າງປະເທດສູນກາງພັກ ເຜີຍແຜ່ເຊື່ອມຊຶມ ເອກະສານສຳຄັນຂອງພັກ - ລັດ

ເຜີຍ​ແຜ່​ໂດຍ​: editor ເວ​ລາ: 23/08/2022 16:48:49 ຈຳ​ນວນ​​ຢ້ຽມ​ຊົມ 607 ຄັ້ງ ​

       ໃນວັນທີ 23 ສິງຫາ 2022, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດປາຖະກະຖາເຊື່ອມຊຶມ ເອກະສານສຳຄັນຂອງພັກ-ລັດຄື: ວັນຢຶດອໍານາດທົ່ວປະເທດ 23 ສິງຫາ ປີ 1945 ແລະ ປີ 1975; ມະຕິກອງປະຊຸມຄົບຄະນະບໍລິຫານງານພັກ ຄັ້ງທີ 4 ສະໄໝທີ XI; ວັນລັດຖະທໍາມະນູນ ແຫ່ງ ສປປລາວ ຄົບຮອບ 31 ປີ; ວັນສ້າງຕັ້ງ ອາຊຽນ ຄົບຮອບ 55 ປີ ໂດຍການໃຫ້ກຽດເຜີຍແຜ່ ຂອງ  ສະຫາຍ  ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ,  ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍໃນຄະນະບໍລິຫານງານພັກ, ສະມາຊິກພັກ, ພະນັກງານ ​ທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມຢ່າງພ້ອມພຽງ.

       ໃນພິທີ ສະຫາຍ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຫວນຄືນມູນເຊື້ອ,  ການຕໍ່ສູ້ກູ້ຊາດອັນພິລະອາດຫານ ຂອງປະຊາຊົນລາວບັນດາເຜົ່າ ເພື່ອໃຫ້ພະນັກງານ, ສະມາຊິກພັກໄດ້ມີຄວາມເຂົ້າໃຈ ເຖິງຄວາມເສຍສະຫຼະ, ຄວາມສາມັກຄີຂອງປວງຊົນລາວທັງຊາດ ບວກກັບນໍ້າໃຈຮັກຊາດ ຮັກບ້ານເກີດເມືອງນອນ ຂອງການນໍາປະຕິວັດຮຸ່ນອາວຸໂສ ພາຍໃຕ້ການນໍາພາ ອັນສະຫຼາດສ່ອງໃສຂອງພັກ ໃນແຕ່ລະໄລຍະເປັນກ້າວໆມາຈົນໄດ້ຮັບໄຊຊະນະ ແລະ ສະຖາປະນາ ເປັນ ສປປລາວ ໃນວັນທີ 02 ທັນວາ 1975, ເຊິ່ງເປັນການເປີດສັງກາດໃໝ່ໃຫ້ແກ່ການເປັນເຈົ້າຊະຕາກຳປະເທດຊາດ ຂອງ ປະຊາຊົນລາວ. ສະຫາຍ ຫົວໜ້າ ຄຕພ ສືບຕໍ່ຍົກໃຫ້ເຫັນເນື້ອໃນສຳຄັນຂອງມະຕິຂອງສູນກາງພັກ ຄັ້ງທີ 4  ສະໄໝທີ XI ເປັນຕົ້ນແມ່ນ: ຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ຕົ້ນປີ 2022 ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ວ່າດ້ວຍການແກ້ໄຂປັນຫາຢາເສບຕິດ; ສາມາດຮັບປະກັນສະຖຽນລະພາບ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ແລະ ໄດ້ຍົກໃຫ້ເຫັນໃນຊຸມປີຕໍ່ໜ້າປະເທດພວກເຮົາ ຍັງຈະສືບຕໍ່ປະເຊີນໜ້າກັບສະພາບຄວາມຫຍຸ້ງຍາກ ແລະ ສິ່ງທ້າທາຍທົດສອບຫຼາຍປະການທີ່ຈະສົ່ງຜົນກະທົບຕໍ່ສະຖຽນລະພາບເສດຖະກິດ-ສັງຄົມ,  ແຕ່ແນວໃດກໍຕາມພວກເຮົາຕ້ອງໄດ້ສູ້ຊົນ ຮັບປະກັນສະຖຽນລະພາບທາງດ້ານເສດຖະກິດ,ການເງິນ-ເງິນຕາ ມີຄວາມໝັ້ນທ່ຽງ, ເດັດຂາດ ບໍ່ໃຫ້ຕົກເຂົ້າສູ່ວິກິດການ ແລະ ມີຄວາມສາມາດໃນການສືບຕໍ່ພັດທະນາ, ຕາມທິດທີ່ກອງປະຊຸມໃຫຍ່ຄັ້ງທີ  XI ຂອງພັກກໍານົດໄວ້;  ເພີ່ມທະວີການພັດທະນາຊັບພະຍາກອນມະນຸດ ໃຫ້ມີຄຸນນະພາບສູງ, ປັບປຸງລະບົບການຈັດຕັ້ງ, ກົງຈັກ ແລະ ກົນໄກການເຄື່ອນໄຫວ ຂອງອົງການບໍລິຫານລັດ ຕາມທິດເຂັ້ມແຂງ ແລະ ມີປະສິດທິພາບ. ຈາກນັ້ນ ສະຫາຍຫົວໜ້າ ຄຕພ ສືບຕໍ່ເຜີຍແຜ່ ວັນລັດຖະທຳມະນູນແຫ່ງຊາດ ຄົບຮອບ 31 ປີ ໄດ້ຍົກໃຫ້ເຫັນລັດຖະທໍາມະນູນແມ່ນໝາກຜົນລວມຍອດຂອງການປະຕິວັດຊາດປະຊາທິປະໄຕປະຊາຊົນ ໃຕ້ການນໍາພາຂອງພັກ, ເປັນຜົນງານໃນການປົກປັກຮັກສາ ແລະ ສ້າງສາປະເທດຊາດ ແລະ ຢືນຢັນເຖິງ ຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດລາວ ພ້ອມທັງຍົກໃຫ້ເຫັນເຖິງຜົນສໍາເລັດຜ່ານມາ ແລະ ທິດທາງໃນຕໍ່ໜ້າຂອງການຈັດຕັ້ງການປະຕິບັດ ລັດຖະທຳມະນູນ ແລະ  ກົດໝາຍເພື່ອແນໃສ່ສ້າງລັດເຮົາເປັນລັດທີ່ ຄຸ້ມຄອງດ້ວຍກົດໝາຍ ເພື່ອປົກປ້ອງສິດທິອັນຊອບທຳ ແລະນຳເອົາຜົນປະໂຫຍດຕົວຈິງມາສູ່ປະຊາຊົນລາວບັນດາເຜົ່າ.

       ໃນຕອນທ້າຍ ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ຍັງໄດ້ຫວນຄືນປະຫວັດຄວາມເປັນມາຂອງອາຊຽນ, ການສ້າງປະຊາຄົມອາຊຽນ, ການເຄື່ອນໄຫວຮ່ວມມືຂອງອາຊຽນ ໃນແຕ່ລະໄລຍະ ແລະ ຜົນປະໂຫຍດທີ່ ສປປລາວ ໄດ້ຮັບໃນຂອບການຮ່ວມມືດັ່ງກ່າວ ພ້ອມທັງຍົກໃຫ້ເຫັນສິ່ງທ້າທາຍທີ່ປະເທດເຮົາ ຈະຕ້ອງປັບຕົວໃນການພົວພັນຮ່ວມມືກັບວົງສາຄະນາຍາດສາກົນ.

---