ສູນກາງພັກກອມມູນິດຈີນ ມອບລົດກວດສຸຂະພາບເຄື່ອນທີ່ ໃຫ້ສູນກາງພັກ ປປ ລາວ

ເຜີຍ​ແຜ່​ໂດຍ​: editor ເວ​ລາ: 19/07/2022 13:48:44 ຈຳ​ນວນ​​ຢ້ຽມ​ຊົມ 744 ຄັ້ງ ​

       ໃນຕອນເຊົ້າ ຂອງ ວັນທີ 29 ມິຖຸນາ 2022, ທີ່ ຄະນະພົວພັນຕ່າງປະເທດສູນກາງພັກ ໄດ້ມີພິທີ ມອບ-ຮັບ ລົດກວດສຸຂະພາບເຄື່ອນທີ່ ທີ່ ສູນກາງພັກກອມມູນິດຈີນ ມອບໃຫ້ ສູນກາງພັກ ປປ ລາວ ເພື່ອໝູນໃຊ້ເຂົ້າໃນວຽກງານສາທາລະນະສຸກ ຢູ່ ສປປ ລາວ.

       ໃນພິທີດັ່ງກ່າວ, ສະຫາຍ ຈຽງ ຈ້າຍຕົງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ໄດ້ຕາງໜ້າຝ່າຍຈີນ ກ່າວມອບ ແລະ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕາງໜ້າໃຫ້ ສູນກາງພັກ ປປ ລາວ ເປັນຜູ້ຮັບ ໂດຍມີບັນດາສະຫາຍ ຕາງໜ້າຄະນະນໍາ ຈາກ ຫ້ອງວ່າການສູນກາງພັກ, ກົມຮັກສາສຸຂະພາບສູນກາງ ພ້ອມດ້ວຍພະນັກງານທີ່ກ່ຽວຂ້ອງ ຂອງ ຄະນະພົວພັນຕ່າງປະເທດສູນກາງພັກ ແລະ ສະຖານທູດ ແຫ່ງ ສປ ຈີນ ເຂົ້າຮ່ວມ.

       ສະຫາຍ ທອງສະຫວັນ ພົມວິຫານ ໄດ້ຕາງໜ້າໃຫ້ ສູນກາງພັກ ປປ ລາວ ສະແດງຄວາມຂອບໃຈ ຕໍ່ ການຊ່ວຍເຫຼືອຂອງ ສູນກາງພັກກອມມູນິດຈີນ ໃນຄັ້ງນີ້ ກໍຄື ການຊ່ວຍເຫຼືອທາງດ້ານອຸປະກອນການແພດ, ຢາວັກແຊັງ ແລະ ການສົ່ງທີມແພດຊ່ຽວຊານ ມາຊ່ວຍ ສປປ ລາວ ຢ່າງທັນການ ເພື່ອຮັບມືກັບການແຜ່ລະບາດ ຂອງ ພະຍາດໂຄວິດ-19 ຢູ່ ສປປ ລາວ ໃນໄລຍະຜ່ານມາ, ເຊິ່ງເປັນການປະກອບສ່ວນສໍາຄັນ ເຂົ້າໃນຜົນສໍາເລັດໃນການຄວບຄຸມ ແລະ ແກ້ໄຂການແຜ່ລະບາດຂອງພະຍາດດັ່ງກ່າວ ຢູ່ ສປປ ລາວ, ທັງເປັນການສະແດງໃຫ້ເຫັນເຖິງມິດຈິດມິດໃຈ ຂອງ ການເປັນຄູ່ຮ່ວມຊະຕາກໍາດຽວກັນ ຂອງ ປະຊາຊົນສອງຊາດ ລາວ-ຈີນ ຢ່າງແທ້ຈິງ.

       ລົດກວດສຸຂະພາບເຄື່ອນທີ່ ທີ່ຝ່າຍຈີນ ມອບໃຫ້ຄັ້ງນີ້, ຄະນະພົວພັນຕ່າງປະເທດສູນກາງພັກ ຈະໄດ້ມອບຕໍ່ໃຫ້ ສູນກາງພັກ ປປ ລາວ ເພື່ອນໍາໃຊ້ໃຫ້ເກີດຜົນປະໂຫຍດສູງສຸດ ໃນວຽກງານສາທາລະນະສຸກ.

---