ຫົວໜ້າ ຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງເອກອັກຄະລັດຖະທູດ ແຫ່ງ ສະຫະພາບເອີຣົບ ປະຈໍາ ສ ປປ ລາວ

ເຜີຍ​ແຜ່​ໂດຍ​: editor ເວ​ລາ: 19/07/2022 11:16:08 ຈຳ​ນວນ​​ຢ້ຽມ​ຊົມ 428 ຄັ້ງ ​

       ໃນ​ຕອນ​ເຊົ້າຂອງວັນ​ທີ 23 ມິ​ຖຸ​ນາ 2022, ທີ່ ​ຄະ​ນະ​ພົວ​ພັນ​ຕ່າງ​ປະ​ເທດສູນ​ກາງ​ພັກ,​ ທ່ານ ທອງສະຫວັນ ພົມວິຫານ, ກຳ​ມະ​ການ​ສູນ​ກາງ​ພັກ, ຫົວໜ້າ​ຄ​ະ​ນະ​ພົວ​ພັນ​ຕ່າງ​ປະ​ເທດສູນ​ກາງ​ພັກ, ໄດ້​ຕ້ອນຮັບການ​ເຂົ້າ​ຢ້ຽມ​ຂ່ຳ​ນັບຂອງ​ ທ່ານ ນາງ ອີນາ ມາຈູລໍນີແຕ (Ina MARCIULIONYTE), ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະພາບເອີຣົບ ປະຈໍາ ສປປ ລາວ ເພື່ອ​ສະ​ເໜີ​ຕົວ, ປຶກສາຫາລືກ່ຽວກັບການພົວພັນຮ່ວມມືລະຫວ່າງ ສປປ ລາວ-ສະຫະພາບເອີຣົບ ແລະ ບັນຫາອື່ນໆທີ່ທັງສອງຝ່າຍມີຄວາມສົນໃຈນໍາກັນ.

​       ໃນການພົບປະດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະ​ແດງ​ຄວາມຍິນດີຕ້ອນຮັບຢ່າງອົບອຸ່ນ ແລະ ຊົມເຊີຍການປະຕິບັດໜ້າທີ່ຢ່າງຫ້າວຫັນຂອງທ່ານທູດຢູ່ ສປປ ລາວໄລຍະໜຶ່ງປີກວ່າ; ພ້ອມທັງຕີລາຄາສູງຕໍ່ສາຍພົວພັນອັນດີ ລະຫວ່າງ ສປປ ລາວ ແລະ ສະຫະພາບເອີຣົບ ຕະຫຼອດໄລຍະ 47 ປີ ຜ່ານມາ ເຊິ່ງໄດ້ສ້າງຄວາມເຂົ້າໃຈເຊິ່ງກັນແລະກັນລະຫວ່າງ ປະຊາຊົນ ລາວ-ສະຫະພາບເອີຣົບ, ປະກອບສ່ວນສໍາຄັນເຂົ້າໃນການສົ່ງເສີມການໄປມາຫາສູ່, ການທ່ອງທ່ຽວ, ການຄ້າ, ການລົງທຶນ, ແລະ ສະໜັບສະໜູນໃນການຮ່ວມມືເພື່ອການພັດທະນາຂອງສອງຝ່າຍ; ສະແດງຄວາມຂອບໃຈສະຫະພາບເອີຣົບ ທີ່ໃຫ້ການຊ່ວຍເຫຼືອດ້ານຕ່າງໆແກ່ ສປປ ລາວ ໃນໄລຍະຜ່ານມາ ແລະ ເຊື່ອໝັ້ນວ່າ ໃນໄລຍະທ່ານທູດປະຕິບັດໜ້າທີ່ຢູ່ລາວ ຈະມີການຮ່ວມມືກັນຢ່າງໃກ້ຊິດກັບຂະແໜງການຕ່າງໆຂອງລາວ ເພື່ອສົ່ງເສີມການຮ່ວມມືສອງຝ່າຍ ໃຫ້ໄດ້ຮັບໝາກຜົນໃໝ່ໃຫຍ່ຫຼວງກວ່າເກົ່າ ແລະ ຫວັງວ່າ ສະຫະພາບເອີຣົບຈະສືບຕໍ່ເພີ່ມທະວີການຮ່ວມມື ແລະ ສະໜັບສະໜູນ ສປປ ລາວ ໃນການພັດທະນາປະເທດໃຫ້ບັນລຸວາລະ 2030 ເພື່ອການພັດທະນາແບບຍືນຍົງຂອງສະຫະປະຊາຊາດຢ່າງຮອບດ້ານ ແລະ ນໍາເອົາປະເທດອອກຈາກສະຖານະພາບປະເທດດ້ອຍພັດທະນາໃນຕໍ່ໜ້າ.

       ໃນໂອກາດດັ່ງກ່າວ, ທ່ານ ນາງ ອີນາ ມາຈູລໍນີແຕ ໄດ້​​ສະແດງຄວາມຂອບ​ໃຈ​ຢ່າງ​ຈິງ​ໃຈຕໍ່ ທ່ານຫົວໜ້າຄະນະພົວພັນຕ່າງປະເທດສູນກາງພັກ ​ທີ່​ໄດ້​ໃຫ້​ການ​ຕ້ອນຮັບ​ອັນ​ອົບ​ອຸ່ນ, ພ້ອມທັງໄດ້ຊົມເຊີຍຕໍ່​ຜົນສຳ​ເລັດໃນການສ້າງສາພັດທະນາ ຂອງ ສປປ ລາວ ແລະ ການຮັບມືກັບການແຜ່ລະບາດຂອງເຊື້ອພະຍາດ Covid-19. ເພື່ອເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ແລະ ສະຫະພາບເອີຣົບໃຫ້ນັບມື້ຫຼາຍຂຶ້ນ ທ່ານທູດ ​ໄດ້​ຢືນ​ຢັນ​ວ່າ ຈະສືບຕໍ່ຊຸກຍູ້ ສະຫະພາບເອີຣົບໃຫ້ການສະໜັບສະໜູນຊ່ວຍເຫຼືອ ສປປ ລາວ ຈັດຕັ້ງປະຕິບັດບັນດາແຜນງານ ແລະ ໂຄງການຮ່ວມມືສອງຝ່າຍທີ່ໄດ້ຕົກລົງຮ່ວມກັນ ເປັນຕົ້ນແມ່ນ ພາຍໃຕ້ຍຸດທະສາດການຮ່ວມມືຂອງກຸ່ມເອີຣົບ (Team Europe Strategy) ສຳລັບສົກປີ 2021-2025. ພ້ອມດຽວກັນນັ້ນ, ທ່ານທູດຍັງໄດ້ຢືນຢັນວ່າ ສະຫະພາບເອີຣົບ ຈະໃຫ້ການສະໜັບສະໜູນໃນການກະກຽມຄວາມພ້ອມເປັນປະທານໜູນວຽນອາຊຽນ ຂອງ ສປປ ລາວ ໃນປີ 2024 ທີ່ຈະມາເຖິງ.

​       ໃນຕອນທ້າຍ, ທ່ານ ທອງສະຫວັນ ພົມວິຫານ, ກຳ​ມະ​ການ​ສູນ​ກາງ​ພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍ​ພອນ​ໃຫ້​ແກ່ ທ່ານທູດ ອີນາ ມາຈູລໍນີແຕ ຈົ່ງມີສຸຂະພາບແຂງແຮງ ແລະ ປະ​ສົບ​ຜົນສຳ​ເລັດ​ໃນການປະຕິບັດ​​ໜ້າທີ່ການທູດອັນມີກຽດຂອງທ່ານຢູ່ ສປປ ລາວ.

---