ຫົວໜ້າຄະນະພົວພັນຕ່າງປະເທດສູນກາງພັກ ລາວ-ຈີນ ພົບປະຜ່ານວິດີໂອທາງໄກ
ເຜີຍແຜ່ໂດຍ: editor ເວລາ: 19/07/2022 10:50:01 ຈຳນວນຢ້ຽມຊົມ 442 ຄັ້ງ ໃນວັນທີ 31 ພຶດສະພາ 2022 ທີ່ຄະນະພົວພັນຕ່າງປະເທດສູນກາງພັກ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະເຮັດວຽກຜ່ານວິດີໂອທາງໄກກັບ ສະຫາຍ ຊົ້ງທາວ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ.
ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຍິນດີ ແລະ ຕີລາຄາສູງ ຕໍ່ການພົບປະສອງຝ່າຍໃນຄັ້ງນີ້, ເຊິ່ງເປັນການປະຕິບັດຕາມແຜນການຮ່ວມມື ລະຫວ່າງ 2 ພັກ ກໍຄື 2 ຄະນະພົວພັນຕ່າງປະເທດສູນກາງພັກ ລາວ-ຈີນ ປະຈໍາປີ ແລະ ເປັນການຜັນຂະຫຍາຍຄວາມຮັບຮູ້ເປັນເອກະພາບກັນ ລະຫວ່າງ ການນໍາສູງສຸດຂອງສອງພັກ ລາວ-ຈີນ; ຕາງໜ້າສູນກາງພັກ ປປ ລາວ ແຈ້ງໂດຍຫຍໍ້ກ່ຽວກັບ ສະພາບການພົ້ນເດັ່ນພາຍໃນພັກ, ພາຍໃນປະເທດ, ໂດຍສະເພາະແມ່ນຜົນສໍາເລັດຂອງການດໍາເນີນກອງປະຊຸມຄົບຄະນະ ເທື່ອທີ 4 ສະໄໝທີ XI ຂອງພັກ ປປ ລາວ ໃຫ້ຝ່າຍຈີນຊາບ, ພ້ອມທັງສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດ ຂອງ ກອງປະຊຸມ 2 ສະພາ ເທື່ອທີ 5 ສະໄໝທີ XIII ຂອງ ສປ ຈີນ ໃນເດືອນມີນາ 2022 ກໍ່ຄືຜົນສໍາເລັດຂອງ ພັກກອມມູນິດຈີນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIX ຂອງພັກ ໃນຕະຫຼອດ 5 ປີຜ່ານມາ ແລະ ອວຍພອນໃຫ້ການກະກຽມດໍາເນີນກອງປະຊຸມໃຫຍ່ ຄັ້ງທີ XX ຂອງພັກກອມມູນິດຈີນ ທີ່ຈະມີຂື້ນໃນທ້າຍປີນີ້ ປະສົບຜົນສໍາເລັດຢ່າງຈົບງາມ.
ສະຫາຍ ຊົ້ງທາວ ໄດ້ສະແດງຄວາມຂອບໃຈ ຕໍ່ ການແຈ້ງສະພາບພົ້ນເດັ່ນພາຍໃນຂອງພັກ, ລັດລາວ ແລະ ຕີລາຄາສູງຕໍ່ຜົນສໍາເລັດຂອງ ກອງປະຊຸມຄົບຄະນະ ເທື່ອທີ 4 ສະໄໝທີ XI ຂອງພັກ ປປ ລາວ, ສະຫາຍ ຍັງໄດ້ແຈ້ງໃຫ້ຊາບ ກ່ຽວກັບສະພາບພົ້ນເດັ່ນພາຍໃນ ຂອງ ພັກກອມມູນິດຈີນ ໂດຍສະເພາະຜົນສໍາເລັດຂອງການຈັດຕັ້ງຜັນຂະຫຍາຍແນວຄິດ ສີຈີ້ນຜິງ ວ່າດ້ວຍສັງຄົມນິຍົມທີ່ມີລັກສະນະພິເສດຂອງຈີນ ໃນຍຸກສະໄໝໃໝ່, ຜົນສຳເລັດໃນການພັດທະນາເສດຖະກິດ-ສັງຄົມ ຂອງຈີນ ໃນໄລຍະຜ່ານມາ ແລະ ການຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ສປ ຈີນ ໃນປັດຈຸບັນ.
ສອງຝ່າຍ ໄດ້ເອກະພາບກັນຕີລາຄາສູງ ຕໍ່ ການພົວພັນຮ່ວມມື ລະຫວ່າງ ສອງພັກ, ສອງ ຄຕພ ລາວ-ຈີນ ໃນຕະຫຼອດໄລຍະຜ່ານມາ, ເຖິງຈະມີຄວາມຫຍຸ້ງຍາກ ເນື່ອງຈາກການແຜ່ລະບາດຂອງພະຍາດໂຄວິດ-19, ແຕ່ສອງຝ່າຍ ຍັງຮັກສາໄດ້ບັນຍາກາດອັນດີ ແລະ ໃຫ້ການສະໜັບສະໜູນເຊິ່ງກັນແລະກັນ, ຮັກສາໄດ້ກົນໄກການພົບປະປະຈໍາປີ ລະຫວ່າງ ເລຂາທິການໃຫຍ່, ປະທານປະເທດ ແລະ ການນໍາຂັ້ນຕ່າງໆ ຂອງສອງພັກ, ສອງລັດ ລາວ-ຈີນ ດ້ວຍຮູບແບບທາງໄກ, ເຊິ່ງເປັນການເສີມສ້າງຄວາມໄວ້ເນື້ອເຊື່ອໃຈເຊີ່ງກັນແລະກັນຢ່າງເລິກເຊີ່ງ ແລະ ເປັນພື້ນຖານອັນໜັກແໜ້ນໃຫ້ແກ່ການຮ່ວມມືໃນຂະແໜງການອື່ນໆ. ພ້ອມດຽວກັນນັ້ນ, ພາຍໃຕ້ການນໍາພາຊີ້ນໍາຢ່າງໃກ້ຊິດ ຂອງ ການນໍາສູງສຸດ ຂອງ ສອງພັກ, ສອງລັດ ລາວ-ຈີນ, ການຈັດຕັ້ງຜັນຂະຫຍາຍບັນດາແຜນການ ແລະ ກົນໄກການຮ່ວມມືຕ່າງໆ ທີ່ສອງພັກ, ສອງລັດ ໄດ້ລົງນາມຮ່ວມກັນໃນໄລຍະຜ່ານມາ ແມ່ນໄດ້ຮັບການຈັດຕັ້ງປະຕິບັດຢ່າງຕັ້ງໜ້າ; ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ກໍໄດ້ຮັບການຈັດຕັ້ງປະຕິບັດ ແລະ ສືບຕໍ່ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ; ແຜນການຮ່ວມມື ລະຫວ່າງ ສອງພັກ, ແຜນການຮ່ວມມືບໍາລຸງສ້າງພະນັກງານ ລາວ-ຈີນ ແລະ ກົນໄກການຮ່ວມມືອື່ນໆ ກໍ່ລ້ວນແຕ່ໄດ້ຮັບການຈັດຕັ້ງປະຕິບັດເປັນຢ່າງດີ.
ສອງຝ່າຍ ຍັງໄດ້ລົງເລິກແລກປ່ຽນຄໍາຄິດເຫັນ ແລະ ເປັນເອກະພາບກັນ ກ່ຽວກັບ ທິດທາງການຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຈີນ ໃນການເປັນເສນາທິການໃຫ້ແກ່ການພົວພັນຮ່ວມມື ລະຫວ່າງ ສອງພັກ ລາວ-ຈີນ ໃນຕໍ່ໜ້າ, ໂດຍສະເພາະແມ່ນ ການຈັດຕັ້ງຜັນຂະຫຍາຍ ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ, ການຈັດຕັ້ງປະຕິບັດແຜນການຮ່ວມມື ລະຫວ່າງ ສອງພັກ, ໂດຍສະເພາະແຜນການຮ່ວມມືບຳລຸງສ້າງພະນັກງານ ລະຫວ່າງ ສອງພັກ ປະຈໍາປີ ໃຫ້ສໍາເລັດຕາມແຜນ; ສືບຕໍ່ຮັກສາກົນໄກການປະສານງານຢ່າງໃກ້ຊິດໃນຂອບຫຼາຍຝ່າຍ ແລະ ສືບຕໍ່ປະສານສົມທົບກັນ ໃນການຊຸກຍູ້ເສີມຂະຫຍາຍການແລກປ່ຽນ ລະຫວ່າງ ອົງການກ່ຽວຂ້ອງ ຂອງ ສອງສູນກາງພັກ ລາວ-ຈີນ ໃນຕໍ່ໜ້າ.
ໃນການພົບປະ, ສອງຝ່າຍ ຍັງໄດ້ລົງເລິກແລກປ່ຽນຄວາມຄິດເຫັນ ກ່ຽວກັບ ບັນຫາພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈຮ່ວມກັນ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20