ສະມາຄົມມິດຕະພາບລາວ-ຮົງກາລີ ຈັດພິທີສະຫຼູບຜົນງານການເຄື່ອນໄຫວແຕ່ປີ 2016-2021 ແລະ ວາງທິດທາງວຽກງານໃນຊຸມປີຕໍ່ໜ້າ

ເຜີຍ​ແຜ່​ໂດຍ​: admin ເວ​ລາ: 24/05/2022 10:05:41 ຈຳ​ນວນ​​ຢ້ຽມ​ຊົມ 1108 ຄັ້ງ ​

ໃນວັນທີ 11 ມີນາ 2022 ຜ່ານມາ, ທີ່ພັດທະຄານແມ່ຂອງ ສະມາຄົມມິດຕະພາບລາວ-ຮົງກາລີ ໄດ້ຈັດພິທີສະຫຼູບຜົນງານການເຄື່ອນໄຫວແຕ່ປີ 2016-2021 ແລະວາງທິດທາງວຽກງານໃນຊຸມປີຕໍ່ໜ້າ ໂດຍພາຍໃຕ້ການເປັນປະທານຮ່ວມຂອງ ທ່ານ ປອ ພວງປາຣີສັກ ປຣະວົງວຽງຄໍາ ປະທານສະມາຄົມຜູ້ເກົ່າ ແລະ ທ່ານ ສີທົງ ຈິດໂຍທິນ, ປະທານສະມາຄົມຜູ້ໃຫມ່ ໂດຍໃຫ້ກຽດເຂົ້າຮ່ວມ ຂອງທ່ານ ປອ ລາສະໂລ ວາຣໍດີ(Varádi László) ປະທານສະມາຄົມມິດຕະພາບຮົງກາລີ-ລາວ ແລະ ທ່ານ ຕໍກາສ ລາສະໂລ (Takács László) ອຸປະທູດຮົງກາລີ ປະຈໍາ ສປປລາວ ແລະ ຕາງໜ້າກົມກ່ຽວຂ້ອງຂອງຄະນະພົວພັນຕ່າງປະເທດສູນກາງພັກ ຕາມຄໍາເຊີນຂອງ ສະມາຄົມມິດຕະພາບ ລາວ-ຮົງກາລີ.

ພາຍຫຼັງຄະນະຈັດຕັ້ງພິທີກ່າວຈຸດປະສົງແລ້ວ ທ່ານ ປອ ພວງປາຣີສັກ ປຣະວົງວຽງຄໍາ ປະທານສະມາຄົມຜູ້ເກົ່າ ກໍໄດ້ຂຶ້ນຜ່ານບົດສະຫຼູບຜົນງານການເຄື່ອນໄຫວແຕ່ປີ 2016-2021 ແລະວາງທິດທາງວຽກງານໃນຊຸມປີຕໍ່ໜ້າ ໂດຍຍົກໃຫ້ເຫັນເຖິງຄວາມສາມັກຄີເປັນເອກກະພາບຂອງຄະນະບໍລິຫານງານສະມາຄົມມິດຕະພາບລາວ-ຮົງກາລີ ທີ່ໄດ້ສຸມສະຕິປັນຍາ, ເຫື່ອແຮງ ນຳພາ-ຊີ້ນຳ ການເຄື່ອນໄຫວວຽກງານການທູດປະຊາຊົນ ມີຜົນສຳເລັດຫຼາຍດ້ານ ໂດຍສະເພາະການເຄື່ອນໄຫວສ້າງກິດຈະກຳຕ່າງໆ ເພື່ອສະໜັບສະໜູນ ແລະສົ່ງເສີມສາຍພົວພັນມິດຕະພາບ ແລະ ການຮ່ວມມື ເປັນຕົ້ນແມ່ນດ້ານການສຶກສາ, ວັດທະນະທຳ-ສັງຄົມ, ກະສິກໍາ-ປ່າໄມ້, ເສດຖະກິດ-ການຄ້າ, ການລົງທຶນ, ວິທະຍາສາດ-ເຕັກນິກ, ດ້ານການກຸສົນ ແລະ ໄດ້ຍາດແຍ່ງເອົາການຊ່ວຍເຫຼືອຈາກ ປະເທດຮົງກາລີ ຈຳນວນໜຶ່ງມາຊ່ວຍ ສປປ ລາວ ຊຶ່ງ ຄະນະບໍລິຫານງານສະມາຄົມມິດຕະພາບຂອງລາວ-ຮົງກາລີ ຊຸດໃໝ່ ພ້ອມດ້ວຍບັນດາສະມາຊິກ ຈະໄດ້ສືບຕໍ່ປະຕິບັດໜັາທີ່ສໍາຄັນ ແລະ ມີກຽດນີ້ ເພື່ອນໍາພາການເຄື່ອນໄຫວວຽກງານການທູດປະຊາຊົນຢ່າງຫ້າວຫັນ ຕາມພາລະບົດບາດ, ຂອບເຂດສິດ ແລະ ໜ້າທີ່ ທີ່ພັກ-ລັດ ມອບໝາຍໃຫ້ ເພື່ອປະກອບສ່ວນປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບອັນດີງາມ ແລະ ການຮ່ວມມື ລະຫວ່າງ ປະຊາຊົນສອງຊາດ ລາວ ກັບ ຮົງກາລີໃຫ້ນັບມື້ແໜ້ນແຟ້ນ ແລະ ຈະເລີນງອກງາມແນໃສ່ ນໍາເອົາຜົນປະໂຫຍດຕົວຈິງມາສູ່ປະຊາຊົນ ເພື່ອປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາ ສປປ ລາວ.

---