ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ແລະ ປະດັບຫຼຽນໄຊໃຫ້ແກ່ຄະນະສະມາຄົມມິດຕະພາບ ຣັດເຊຍ-ລາວ

ເຜີຍ​ແຜ່​ໂດຍ​: admin ເວ​ລາ: 24/05/2022 09:49:27 ຈຳ​ນວນ​​ຢ້ຽມ​ຊົມ 513 ຄັ້ງ ​

       ໃນວັນ​ທີ 12 ເມສາ 2022, ທີ່ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການ ສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ສຈ. ປອ. ປານຟີລົບ ອີກຣໍ (PANFILOV IGOR), ຮອງປະທານສະມາຄົມມິດຕະພາບ ຣັດເຊຍ-ລາວ ພ້ອມດ້ວຍຄະນະໃນໂອ ກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

       ໃນໂອກາດດັັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຕ້ອນຮັບອັນສະໜິດສະໜົມ ແລະ ຕີລາຄາ ສູງຕໍ່ການມາຢ້ຽມຢາມ ສປປ ລາວ ໃນຄັ້ງນີ້ຂອງຄະນະຜູ້ແທນສະມາຄົມມິດຕະພາບ ຣັດເຊຍ-ລາວເຊິ່ງເປັນການສົ່ງເສີມ ການທູດປະຊາຊົນ, ປະກອບສ່ວນສຳຄັນເຂົ້າໃນການຮັດແໜ້ນ,ເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ລະຫວ່າງສອງປະເທດ ກໍຄືປະຊາຊົນສອງຊາດລາວ-ຣັດເຊຍ ໃຫ້ນັບມື້ໄດ້ຮັບການພັດທະນາ ແລະ ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ຫົວໜ້າ ຄຕພ ຍັງໄດ້ຊົມເຊີຍຕໍ່ການພົວພັນຮ່ວມມືລະຫວ່າງ ສອງສະມາຄົມມິດຕະພາບລາວ-ຣັດເຊຍແລະ ຣັດເຊຍ-ລາວທີ່ມີມາແຕ່ດົນນານ ເຊິ່ງໄດ້ເຮັດບົດບາດສຳຄັນສະໜັບສະໜູນ ແລະ ຊຸກຍູ້ ການພົວພັນດ້ານລັດຂອງສອງຊາດໃຫ້ມີຄວາມໂລ່ງລ່ຽນ ແລະ ມີປະສິດທິຜົນຍິ່ງໆຂຶ້ນ ໂດຍສະເພາະ ຊຸກຍູ້ການຮ່ວມມືໃນ ຂະແໜງເສດຖະກິດ, ການຄ້າ,ການລົງທຶນ, ການສຶກສາ, ວັດທະນະທຳ ແລະ ການທ່ອງທ່ຽວ.

       ພ້ອມດຽວກັນນີ້, ທ່ານ ປານຟີລົບ ອີກໍຣ, ຮອງປະທານສະມາຄົມມິດຕະພາບ ຣັດເຊຍ-ລາວ ກໍໄດ້ສະແດງ ຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນຂອງ ທ່ານ ທອງສະຫວັນ ພົມວິຫານ ແລະ ໃຫ້ຄວາມໝາຍໝັ້ນທີ່ຈະ ສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການຮ່ວມມືອັນດີງາມຂອງສອງປະເທດ ແລະ ປະຊາຊົນສອງຊາດເພື່ອນຳເອົາຜົນປະໂຫຍດຕົວຈິ່ງມາສູ່ປະຊາຊົນ ຣັດເຊຍ-ລາວ.

ພາຍຫຼັງສິ້ນສຸດການຢ້ຽມຂ່ຳນັບແລ້ວ, ຫົວ​ໜ້າ​ຄະ​ນະ​ພົ​ວ​ພັນ​ຕ່າງ​ປະ​ເທດ​ສູນ​ກາງ​ພັກ ​ໄດ້ໃຫ້ກຽດຕາງ​ໜ້າ​ລັດ​ຖະ​ບານ​ແຫ່ງ ສ​ປ​ປລາວ ​​ປະດັບຫຼຽນ​ໄຊ​ແຮງ​ງານ​ຊັ້ນ III ໃຫ້​ແກ່​ ທ່ານ ອຸສຕິນໂນຟ ນິໂກລາຍ (USTINOV NIKOLAY), ສະມາຊິກສະມາຄົມມິດຕະພາບ ຣັດເຊຍ-ລາວ, ຜູ້ອຳນວຍການບໍລິສັດ MK ແລະ ປະດັບຫຼຽນໄຊມິດຕະພາບໃຫ້ແກ່ ທ່ານ ເກຣໂບ ຢູຣິ (KERBOYURY), ຫົວໜ້າຫ້ອງການຜູ້ຕາງໜ້າສະມາຄົມມິດຕະພາບ ຣັດເຊຍ-ລາວ ປະຈຳ ສປປ ລາວ ທີ່ມີຜົນງານອັນພົ້ນເດັ່ນໃນການ​ປະ​ກອ​ບ​ສ່ວນ​ເຂົ້າໃນ​ການ​ເພີ່ມ​ພູນ​ຄູນ​ສ້າງສາຍພົວພັນມິດຕະພາບແລະການ​ຮ່ວມມືທີ່ດີງາມລະຫວ່າງ ສປປ ລາວ-ສ.ຣັດເຊຍ ກໍຄືການປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.

       ໃນວັນດຽວກັນນີ້, ສອງສະມາຄົມມິດຕະພາບ ລາວ-ຣັດເຊຍ ແລະຣັດເຊຍ-ລາວ ໄດ້ຈັດກອງປະຊຸມພົບປະສອງ ຝ່າຍ ເພື່ອສະຫຼຸບຕີລາຄາການເຄື່ອນໄຫວວຽກງານວຽກງານຮ່ວມກັນໃນໄລຍະຜ່ານມາ, ປືກສາຫາລື ແລະ ວາງທິດທາງການ ຮ່ວມມືກັນໃນຕໍ່ໜ້າ, ເຊິ່ງຝ່າຍລາວນຳໂດຍ ທ່ານ ສຈ.ປອ ບໍ່ແສງຄຳ ວົງດາລາ, ອະດີດກຳມະການສູນກາງພັກ, ອະດີດລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານສະມາຄົມມິດຕະພາບ ລາວ-ຣັດເຊຍ ແລະ ຝ່າຍຣັດເຊຍ ນຳໂດຍ ທ່ານ ປານຟີລົບ ອີກໍຣ, ຮອງປະທານສະມາຄົມມິດຕະພາບ ຣັດເຊຍ-ລາວ.

       ໃນໂອກາດມາຢ້ຽມຢາມ ສປປ ລາວ ຄັ້ງນີ້, ຄະນະຜູ້ແທນສະມາຄົມມິດຕະພາບ ຣັດເຊຍ-ລາວ ຍັງໄດ້ເຂົ້າຢ້ຽມຂ່ຳນັບ ແລະ ອວຍພອນການນຳຂັ້ນສູງ ຂອງ ສປປ ລາວ ເນື່ອງໃນໂອກາດບຸນປີໃໝ່ລາວ.

       ໃນຕອນທ້າຍ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນ ກາງພັກ ໄດ້ຕາງໜ້າໃຫ້ຄະນະພົວພັນຕ່າງປະເທດສູນກາງພັກ ກໍຄື ສະມາຄົມມິດຕະພາບ ລາວ-ຣັດເຊຍ ອວຍພອນແກ່ ຄະນະຜູ້ແທນສະມາຄົມມິດຕະພາບ ຣັດເຊຍ-ລາວ ຈົງມີສຸຂະພາບແຂງແຮງ ແລະ ປະສົບຜົນສຳເລັດໃນການເຄື່ອນໄຫວຢ້ຽມ ຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ແລະ ກັບຄືນປະເທດໂດຍຄວາມສະຫວັດດີພາບທຸກປະການ.

---