ສະມາຄົມມິດຕະພາບລາວ - ສປປ ເກົາຫຼີຮ່ວມກັບສູນກາງແນວລາວສ້າງຊາດ ແລະ ສະຖານເອກອັກຄະລັດຖະທູດແຫ່ງ ສປປ ເກົາຫຼີ ໄດ້ຈັດພິທີປາຖະກະຖາເນື່ອງໃນໂອກາດວັນເກີດຂອງປະທານ ກິມ ອີນ ຊຸງ ຄົບຮອບ 110 ປີ

ເຜີຍ​ແຜ່​ໂດຍ​: admin ເວ​ລາ: 24/05/2022 09:20:38 ຈຳ​ນວນ​​ຢ້ຽມ​ຊົມ 577 ຄັ້ງ ​

ໃນ​ຕອນ​ເຊົ້າ​​ວັນ​ທີ 06 ເມສາ 2022, ສະມາຄົມມິດຕະພາບລາວ - ສປປ ເກົາຫຼີຮ່ວມກັບສູນກາງແນວລາວສ້າງຊາດ ແລະ ສະຖານເອກອັກຄະລັດຖະທູດແຫ່ງ ສປປ ເກົາຫຼີ ໄດ້​ຈັດພິທີປາຖະກະຖາເນື່ອງໃນໂອກາດວັນເກີດຂອງປະທານ ກິມ ອີນ ຊຸງ ຄົບຮອບ 110 ປີ (​15/4/1912-15/4/2022) ທີ່ສູນກາງແນວລາວສ້າງຊາດ. ໃນໂອກາດດັ່ງກ່າວໄດ້​ມີ​ການວາງ​ສະ​ແດງ​ຮູບ​ພ​າບ, ສາຍ​ວີ​ດີ​ໂອ, ສະແດງສິລະປະຂອງ ລາວ ແລະ ສປປ ເກົາຫຼີ ແລະ ປາຖະກະຖາກ່ຽວ​ກັບ​​ຊີວິດການເຄື້່ອນໄຫວປະຕິວັດ, ຜົນງານບົດບາດການນໍາພາຂອງປະທານ ກິມ ອີນ ຊຸງ, ຜູ້ນໍາທີ່ຍິ່ງໃຫຍ່ຂອງປະຊາຊົນ ສປປ ເກົາຫຼີ ອ້າຍນ້ອງໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສປປ ເກົາຫຼີ ໃນໄລຍະຜ່ານມາ.

ໃນພິທີ​ປາ​ຖະ​ກະ​ຖາໃນ​ຄັ້ງ​ນີ້ ໃຫ້ກຽດເຂົ້າ​ຮ່ວມ​ມີ: ສະຫາຍ ປອ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ, ປະທານສູນ​ກາງ​ແນວລາວສ້າງຊາດ; ສະຫາຍ ອາດສະພັງທອງ ສີພັນດອນ, ກໍາມະການສູນກາງພັກ, ເຈົ້າຄອງນະຄອນຫຼວງວຽງຈັນ, ປະທານ ສະມາຄົມມິດຕະພາບ ລາວ - ສປປ ເກົາຫຼີ;ສະຫາຍ ລີ ຢົງ ຊົນ, ເອກອັກ ຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ; ສະຫາຍ ວາລະໄຊ ເລັ່ງສະຫວັດ, ກໍາມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍພະນັກງານທີ່ມາຈາກພາກສ່ວນກ່ຽວຂ້ອງທັງ ສປປ ເກົາຫຼີ ແລະ ລາວ ຈໍານວນປະມານ 300 ກວ່າຄົນເຂົ້າຮ່ວມ, ໃນນີ້ 200 ກວ່າຄົນ ແມ່ນໄດ້ເຂົ້າຮ່ວມດ້ວຍລະບົບທາງໄກ (online).

ໃນ​ໂອ​ກາດນີ້ ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວໄດ້​​ຂຶ້ນກ່າວປາຖະກະຖາເຖິງຜົນງານຊີວິດການເຄື່ອນໄຫວປະຕິວັດ ແລະ ການຊີ້ນໍາໆພາຂອງສະຫາຍ ປະທານ ກິມ ອິນ ຊຸງ, ຜູ້ນໍາທີ່ຍິ່ງໃຫຍ່ຂອງປະຊາຊົນ ສປປ ເກົາຫຼີ ໃນພາລະກິດປະຕິວັດຂອງພັກ, ກໍາລັງປະກອບອາວຸດ ແລະ ປະຊາຊົນ ສປປ ເກົາຫຼີ ໃນຂະບວນວິວັດແຫ່ງການຕໍ່ສູ້ປົດປ່ອຍຊາດກໍ່ຄືປົກປັກຮັກສາ ແລະ ສ້າງສາພັດທະນາປະເທດຊາດ ສປປ ເກົາຫຼີ ເຮັດໃຫ້ ສປປ ເກົາຫຼີ ມີການພັດທະນາຮອບດ້ານ, ການເມືອງມີສະຖຽນລະພາບໜັກແໜ້ນ, ວຽກງານປ້ອງກັນຊາດປ້ອງກັນຄວາມສະຫງົບມີຄວາມເຂັ້ມແຂງທັນສະໄໝ, ເສດຖະກິດມີການພັດທະນາ, ຊີວິດການເປັນຢູ່ຂອງປະຊາຊົນ ສປປ ເກົາຫຼີໄດ້ຮັບການປັບປຸງດີຂືຶ້ນເລື້ອຍໆ, ອັນໄດ້ເຮັດໃຫ້ຜູ້ເຂົ້າຮ່ວມໄດ້ຮັບຮູ້ເຖິງສະພາບການຕົວຈິງ ໃນການພັດທະນາຂອງ ສປປ ເກົາຫຼີ ກໍ່ຄືຜົນສໍາເລັດອັນໃຫຍ່ຫຼວງທີ່ປະຊາຊົນຍາດມາໄດ້ ພາຍໃຕ້ການນໍາພາຂອງພັກແຮງງານເກົາຫຼີ. ພ້ອມດຽວກັນນີ້ ສະຫາຍ ເອກອັກຄະລັດຖະທູດ ກໍ່ຍັງໄດ້ຍົກໃຫ້ເຫັນເຖິງສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ ແລະ ສປປ ເກົາຫຼີໃນໄລຍະຜ່ານມາ.

ພາຍຫຼັງ ທີ່ ສະຫາຍ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວ ສໍາເລັດກ່າວປາຖະກະຖາ, ສະຫາຍ ຈັນທະວົງ ແສນອາມາດມົນຕີ, ຮອງປະທານສູນກາງແນວລາວສ້າງຊາດ ກໍ່ໄດ້ກ່າວສະແດງຄວາມຂອບໃຈຕໍ່ການເຂົ້າຮ່ວມປາຖາກະຖາທີ່ມີເນື້ອໃນສໍາຄັນ ແລະ ມີຄວາມໝາຍເລິກເຊິ່ງຂອງສະຫາຍ ທູດ ແລະ ເຊື່ອ​ໝັ້ນ​ວ່າ ພາຍ​ໃຕ້​ການ​ນຳ​ພາ​ອັນ​ຖືກ​ຕ້ອງ, ເດັດດ່ຽວ, ເຂັ້ມແຂງ ຂອງ​ພັກ​ແຮງ​ງານ​ເກົາ​ຫຼີ, ອັນ​ມີ ສະ​ຫາຍ ກິມ ເຈິງ ອຸນ ຜູ້​ນຳ​ທີ່​ເຄົາ​ລົບ​ຮັກ ​ຂອງ ສ​ປ​ປ ເກົາ​ຫຼີ ນັ້ນ, ປະ​ຊາ​ຊົນ ສ​ປ​ປ ເກົາ​ຫຼີ ອ້າຍ​ນ້ອງ ​ຈະ​ສືບ​ຕໍ່​ຍາດ​ໄດ້​ຜົນ​ສຳ​ເລັດ​ໃໝ່ໃຫຍ່​ຫຼວງກວ່າ​ເກົ່າ ໃນ​ພາ​ລະ​ກິດ​ສ້າງ​ສາ​ປະ​ເທດ​ສັງ​ຄົມ​ນິ​ຍົມ ໃຫ້​ມີ​ຄວາມ​ມັ່ງ​ຄັ່ງ ແລະ ເຂັ້ມ​ແຂງ.

---