ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນສະມາຄົມມິດຕະພາບ ສ.ເກົາຫຼີ-ລາວ.

ເຜີຍ​ແຜ່​ໂດຍ​: admin ເວ​ລາ: 09/05/2022 10:24:01 ຈຳ​ນວນ​​ຢ້ຽມ​ຊົມ 595 ຄັ້ງ ​

 ໃນວັນ​ທີ 25 ເມສາ 2022, ທີ່ສໍານັກງານຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ໂອ ມິງ ຮວັນ (Oh Myung Hwan), ປະທານສະມາຄົມມິດຕະພາບ ສ.ເກົາຫຼີ-ລາວ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
     ໃນໂອກາດດັັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນສະມາຄົມມິດຕະພາບ ສ.ເກົາຫຼີ-ລາວ, ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດ ກໍຄື ປະຊາຊົນສອງຊາດ ລາວ-ສ.ເກົາຫຼີ ໃຫ້ນັບມື້ໄດ້ຮັບການພັດທະນາ ແລະ ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ພ້ອມນັ້ນ, ຍັງໄດ້ຊົມເຊີຍຕໍ່ການພົວພັນຮ່ວມມື​ທີ່​ດີ ​ຕະຫຼອດ​ໄລ​ຍະ​ເກືອບ​ສອງ​ທົດ​ສະ​ວັດ​ທີ່​ສ້າງ​ຕັ້ງ​ສະ​ມາ​ຄົມ​​ມິດ​ຕະ​ພາບຮ່ວມ​ກັນ ລະຫວ່າງ ລາວ-ສ.ເກົາຫຼີ ແລະ ສ.ເກົາຫຼີ-ລາວ ໃນການເຮັດບົດບາດການທູດປະຊາຊົນເພື່ອສະໜັບສະໜູນການພົວພັນດ້ານລັດຂອງສອງປະເທດໃຫ້ມີປະສິດທິຜົນຍິ່ງໆຂຶ້ນ ໂດຍສະເພາະຊຸກຍູ້ການຮ່ວມມືໃນຂະແໜງເສດຖະກິດ, ການຄ້າ, ການລົງທຶນ, ການສຶກສາ, ວັດທະນະທຳ ແລະ ການທ່ອງທ່ຽວ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ສ.ເກົາຫຼີ. ພ້ອມນັ້ນ ຍັງ​ໄດ້ປະ​ກອບ​ສ່ວນ​ທຶນຮອນເຂົ້າ​ໃນ​ການ​ສ້າງ​ສາ​ພັດ​ທະ​ນາ ສ​ປ​ປ ລາວ ໂດຍ​ສະ​ເພາະ​​ແມ່ນ​ການ​ລະ​ດົມ​ທຶນ​ມາ​ພັດ​ທະ​ນາ​ພື້ນ​ຖານ​ໂຄງ​ລ່າງ​ດ້ານ​ການ​ສຶກ​ສາ, ສາ​ທ​າ​ລະ​ນະ​ສຸກ, ວັດ​ທະ​ນະ​ທຳ-ສັງ​ຄົມເປັນຕົ້ນແມ່ນສະ​ໜັບ​ສະ​ໜູນສ້າງໂຮງຮຽນ, ສະໜັບສະໜູນເຄື່ອງນຸ່ງຫົ່ມ, ເກີບ, ຢາປົວພະຍາດ, ອຸປະກອນການແພດຕ້ານໂຄວິດ-19 ແລະ ອື່ນໆ.
     ທ່ານ ໂອ ມິງ ຮວັນ, ປະທານສະມາຄົມມິດຕະພາບ ສ.ເກົາຫຼີ-ລາວ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນຂອງ ທ່ານ ທອງສະຫວັນ ພົມວິຫານ ແລະ ໄດ້​ລາຍ​ງານ​ການ​ເຄື່ອນ​ໄຫວ ຂອງ ສະ​ມາ​ຄົມ​ມິດ​ຕະ​ພາບ ສ.ເກົາຫຼີ-ລາວ ​ໂດຍ​ຫຍໍ້ໃຫ້​ຊາບ ພ້ອມທັງໃຫ້ຄຳໝັ້ນໝາຍທີ່ຈະສືບຕໍ່ພົວພັນຮ່ວມມືກັບສະມາຄົມມິດຕະພາບ ລາວ-ສ.ເກົາຫຼີ ໃນການປະຕິບັດພາລະບົດບາດ ຂອງ ຕົນ ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ແລະ ປະຊາຊົນສອງຊາດ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ສ.ເກົາຫຼີ-ລາວ.
     ໃນວັນດຽວກັນນີ້, ສອງສະມາຄົມມິດຕະພາບ ລາວ-ສ.ເກົາຫຼີ ແລະ ສ.ເກົາຫຼີ-ລາວ ໄດ້ຈັດກອງປະຊຸມພົບປະສອງ ຝ່າຍ ເຊິ່ງຝ່າຍລາວນຳໂດຍ ທ່ານ ຄຳສວຍ ແກ້ວດາລາວົງ, ປະທານສະມາຄົມມິດຕະພາບ ລາວ-ສ.ເກົາຫຼີ ແລະ ຝ່າຍ ສ.ເກົາຫຼີ ນຳໂດຍ ທ່ານ ໂອ ມິງ ຮວັນ, ປະທານສະມາຄົມມິດຕະພາບ ສ.ເກົາຫຼີ-ລາວ. ສອງຝ່າຍໄດ້ຕີລາຄາການເຄື່ອນໄຫວວຽກງານ, ການຈັດກິດຈະກຳຮ່ວມກັນໃນໄລຍະຜ່ານມາ ແລະ ວາງແຜນການຮ່ວມມືໃນຕໍ່ໜ້າ​ລະ​ຫວ່າງ​​​​ສອງສະມາ​ຄົມ ເພື່ອປະກອບສ່ວນເສີມຂະຫຍາຍ​ສາຍ​ພົວ​ພັນ ແລະ ການຮ່ວມມືລະຫວ່າງສອງປະເທດ ແລະ ປະຊາຊົນສອງຊາດລາວ ແລະ ສ.ເກົາຫຼີ ໃຫ້​ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ​ຍິ່ງໆ​ຂື້ນ.
     ໃນໂອກາດມາຢ້ຽມຢາມ ສປປ ລາວ ຄັ້ງນີ້, ຄະນະຜູ້ແທນສະມາຄົມມິດຕະພາບ ສ.ເກົາຫຼີ-ລາວ ຍັງໄດ້ໄປເຄື່ອນໄຫວ​ຢ້ຽມ​ຢາມແຂວງຫົວພັນ ເພື່ອ​ສຶກ​ສາຂໍ້​ມູນ​​ຄວາມ​ເປັນ​ໄປ​ໄດ້​ ໃນ​​ການໃຫ້​​ຄວາມ​ຊ່ວຍ​ເຫຼືອ​ດ້ານ​ງົບ​ປະ​ມານ​ສ້າງ​ໂຮງ​ຮຽນ​ປະ​ຖົມ ​ ຢູ່ເມືອງວຽງ​ໄຊ ແລະ ເຄື່ອນໄຫວ​ຢ້ຽມ​ຢາມ ມອບເຄື່ອງຊ່ວຍເຫຼືອ​ໃຫ້​ແກ່ໂຮງ​ຮ​ຽນ​ປະ​ຖົມ ​ບ້ານ ​ຍ້ອຍ​ໄຮ ເມືອງງ່າ, ແຂວງອຸ​ດົມ​ໄຊ. ພ້ອມດຽວກັນນັ້ນ, ຍັງໄດ້ໄປທ່ຽວຊົມສະຖານທີ່ທ່ອງທ່ຽວທາງປະຫວັດສາດ, ວັດທະນະທຳ ແລະ ທຳມະຊາດ ຈຳນວນໜຶ່ງ ຢູ່ນະຄອນຫຼວງວຽງຈັນ, ແຂວງຫຼວງພະບາງ ແລະ ຫົວພັນ.

---