ຄະນະຜູ້ແທນພັກ ປປ ລາວ ເຂົ້າຮ່ວມກອງປະຊຸມ ບັນດາພັກການເມືອງໃນອາຊີ ກ່ຽວກັບ ການປ່ຽນແປງສະພາບດິນຟ້າອາກາດ

ເຜີຍ​ແຜ່​ໂດຍ​: admin ເວ​ລາ: 16/03/2022 12:13:50 ຈຳ​ນວນ​​ຢ້ຽມ​ຊົມ 563 ຄັ້ງ ​

ຄະນະຜູ້ແທນພັກ ປປ ລາວ ນໍາໂດຍ ທ່ານ ທອງສະຫວັນ ພົມວິຫານ ຫົວໜ້າຄະນະພົວພັນ ຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມສຳມະນາພິເສດທາງໄກຂອງອົງການ ກອງປະຊຸມສາກົນບັນດາພັກການເມືອງໃນອາຊີ (ICAPP) ກ່ຽວກັບ ການປ່ຽນແປງຂອງສະພາບດິນ ຟ້າອາກາດ ຊຶ່ງໄດ້ຈັດຂຶ້ນໃນວັນທີ 8 ທັນວາ 2021, ພາຍໃຕ້ຫົວຂໍ້: “ບົດບາດຂອງບັນດາພັກການ ເມືອງໃນອາຊີ ເພື່ອບັນລຸການປ່ອຍທາດອາຍເຮືອນແກ້ວໃຫ້ເຫຼືອສູນ”. ໃນກອງປະຊຸມຄັ້ງນີ້ ມີຜູ້ແທນ 55 ທ່ານ ຈາກ 31 ພັກການເມືອງ ທີ່ມາຈາກ 23 ປະເທດໃນອາຊີ, ອົງການບັນດາພັກການເມືອງໃນອາ ເມຣິກາລາຕິນ ແລະ ກາຣີອິບ (COPPPAL), ອົງການສະພາບັນດາພັກການເມືອງອາຟຣິກາ (CAPP) ແລະ ລັດຖະສະພາສະຫະພາບເອີຣົບເຂົ້າຮ່ວມ. ນອກຈາກນີ້, ຍັງມີການເຂົ້າຮ່ວມຂອງ ທ່ານ ບັນ ກີມູນ ເລຂາທິການໃຫຍ່ອົງການສະຫະປະຊາຊາດ ຄົນທີ 8 ປະທານສະມັດຊາຂອງສະຖາບັນການເຕີບໂຕສີ ຂຽວສາກົນ (GGGI) ປະທານສະພາຂອງ GGGI.

ໃນກອງປະຊຸມດັ່ງກ່າວ, ທ່ານ ທອງສະຫວັນ ພົມວິຫານ ໄດ້​ປະກອບ​ຄຳ​ເຫັນ ໂດຍໄດ້ຍົກໃຫ້ເຫັນ ນະໂຍບາຍຂອງ ພັກ ປປ ລາວ ກໍຄື ລັດຖະບານ ສປປ ລາວ ທີ່ຢຶດໝັ້ນແນວທາງການພັດທະນາຕາມ ທິດສີຂຽວ ແລະ ຍືນຍົງ ແລະ ຖືເອົາການພັດທະນາເສດຖະກິດເປັນໃຈກາງ ຄຽງຄູ່ກັບການປົກປັກຮັກ ສາສິ່ງແວດລ້ອມ ແລະ ການພັດທະນາວັດທະນະທໍາ-ສັງຄົມ; ໃຫ້ຄວາມສຳຄັນຕໍ່ວຽກງານການຮັບມືກັບ ການປ່ຽນແປງຂອງສະພາບດິນຟ້າອາກາດ ແລະ ສູ້ຊົນຮ່ວມກັບປະຊາຄົມໂລກ ໃນການຈັດຕັ້ງປະຕິບັດ ເປົ້າໝາຍຂອງສັນຍາປາຣີ ເພື່ອຫຼຸດຜ່ອນການປ່ອຍ ແລະ ເພີ່ມການດູດຊັບທາດອາຍເຮືອນແກ້ວ ໃຫ້ເປັນສູນພາຍໃນປີ 2050; ໄດ້ເຊື່ອມສານເອົາວຽກງານປົກປັກຮັກສາສິ່ງແວດລ້ອມ ເຂົ້າໃນແຜນພັດ ທະນາເສດຖະກິດ-ສັງຄົມແຫ່ງຊາດ, ວາງຍຸດທະສາດການເຕີບໂຕສີຂຽວແຫ່ງຊາດ ແລະ ແຜນງານແຫ່ງ ຊາດ ກ່ຽວກັບການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດ (NDC) ຊຶ່ງໄດ້ວາງຄາດ ໝາຍຫຼຸດຜ່ອນການປ່ອຍທາດອາຍເຮືອນແກ້ວ ໃຫ້ໄດ້ 60% ພາຍໃນປີ 2030 ໂດຍໄດ້ກໍານົດມາດຕະ ການຕ່າງໆທີ່ກ່ຽວຂ້ອງ ລວມທັງການເພີ່ມເນື້ອທີ່ປົກຫຸ້ມຂອງປ່າໄມ້ໃຫ້ໄດ້ 70% ຂອງເນື້ອທີ່ປ່າໄມ້ທົ່ວ ປະເທດ, ເພີ່ມກໍາລັງຕິດຕັ້ງພະລັງງານທົດແທນ ແລະ ພະລັງງານສະອາດ ແລະ ເພີ່ມການນໍາໃຊ້ລົດ ໄຟຟ້າໃຫ້ໄດ້ 30% ແລະ ອື່ນໆ. ສະຫາຍຫົວໜ້າຄະນະຜູ້ແທນ ຍັງໄດ້ຍົກໃຫ້ເຫັນເຖິງຄວາມ ຈໍາເປັນໃນການເພີ່ມທະວີການຮ່ວມມື ແລະ ປະສານງານ ລະຫວ່າງ ພັກການເມືອງ ແລະ ລະຫວ່າງ ລັດຖະບານ ໃນລະດັບພາກພື້ນ ແລະ ສາກົນ ເພື່ອຮ່ວມກັນຈັດຕັ້ງປະຕິບັດບັນດາມາດຕະການທີ່ຈໍາເປັນ ໃນການບັນລຸເປົ້າໝາຍລວມແຫ່ງການຫຼຸດຜ່ອນການປ່ອຍທາດອາຍເຮືອນແກ້ວໃຫ້ເຫຼືອສູນ.

ບັນ​ດາ​ຜູ້​ແທນທີ່ເຂົ້າຮ່ວມກອງປະຊຸມ ໄດ້​​ຮັບຮອງ​ເອົາຖະ​ແຫຼ​ງການຮ່ວມຂອງກອງປະຊຸມ ສຳມະ ນາພິເສດທາງໄກ ກ່ຽວກັບການປ່ຽນແປງຂອງສະພາບດິນຟ້າອາກາດ ຊຶ່ງໄດ້ຮຽກຮ້ອງໃຫ້ບັນດາພັກ ການເມືອງ, ລັດຖະບານ ແລະ ພາກເອກະຊົນ ປະສານສົມທົບປະຕິບັດມາດຕະການຮ່ວມກັນ ທີ່ຈິງຈັງ ຫຼາຍຂຶ້ນ ໂດຍຜ່ານການຈັດຕັ້ງປະຕິບັດນະໂຍບາຍ, ຍຸດທະສາດ ແລະ ມາດຕະການໄລຍະສັ້ນ ແລະ ໄລຍະຍາວທີ່ກ່ຽວຂ້ອງເປັນຕົ້ນແມ່ນການປ່ຽນແປງໄປສູ່ລະບົບພະລັງງານທີ່ປ່ອຍມົນລະພິດຕໍ່າ ໂດຍຜ່ານ ການຜະລິດພະລັງງານສະອາດ  ແລະ ມາດຕະການໃນການນໍາໃຊ້ພະລັງງານຢ່າງມີປະສິດທິພາບ; ຊຸກ ຍູ້ການມີສ່ວນຮ່ວມຂອງປະຊາຊົນ, ການສະໜອງດ້ານການເງິນ, ການຖ່າຍໂອນເຕັກໂນໂລຊີ ແລະ ການ ກໍ່ສ້າງຄວາມສາມາດໃຫ້ແກ່ປະເທດກໍາລັງພັດທະນາ; ສົ່ງເສີມການຮ່ວມມືພາກພື້ນ ແລະ ສາກົນ ລະຫວ່າງ ພັກ,  ລັດ, ລັດຖະສະພາ ແລະ ອົງການຈັດຕັ້ງສາກົນ; ສະແດງຄວາມໝາຍໝັ້ນຂອງພັກ ການເມືອງໃນອາຊີ ໃນການສ້າງແຜນແມ່ບົດຂອງອາຊີ ເພື່ອຫຼຸດຜ່ອນການປ່ອຍທາດອາຍເຮືອນແກ້ວໃຫ້ ເຫຼືອສູນໂດຍສອດຄ່ອງກັບເປົ້າໝາຍຂອງສັນຍາປາຣີ ວ່າດ້ວຍ ການປ່ຽນແປງດິນຟ້າອາກາດ ໃນການ ຫຼຸດຜ່ອນການປ່ອຍ ແລະ ເພີ່ມການດູດຊັບທາດອາຍເຮືອນແກ້ວໃນທົ່ວໂລກໃຫ້ເປັນສູນ ພາຍໃນປີ 2050 ແລະ ຈຳກັດ ການເພີ່ມຂຶ້ນຂອງອຸນຫະພູມສະເລ່ຍຂອງໂລກບໍ່ໃຫ້ກາຍ 1,5 ອົງສາເຊ ຂອງລະດັບ ກ່ອນອຸດສະຫະກຳ.

ຂ່າວ-ພາບ: ຄ​ຕ​ພ

---