ຄະນະພົວພັນຕ່າງປະເທດສູນກາງພັກ

ສະຫະພັນກຳມະບານ ຄະນະພົວພັນຕ່າງປະເທດສູນກາງພັກ ສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າປະຈໍາປີ 2021

ເຜີຍແຜ່ໂດຍ: admin ເວລາ: 16/03/2022 08:33:46 ຈຳນວນຢ້ຽມຊົມ 1067 ຄັ້ງ

ໃນວັນທີ 09ມີນາ 2022, ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າປະຈໍາປີ 2021 ຂອງສະຫະພັນກໍາມະບານ ຄະນະພົວພັນຕ່າງປະເທດສູນກາງພັກ, ໂດຍໃຫ້ກຽດເຂົ້າຮ່ວມ ຂອງ ສະຫາຍ ວາລະໄຊ ເລັ່ງສະຫວັດ, ກໍາມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ; ຜູ້ຕາງໜ້າສູນກາງສະຫະພັນກໍາມະບານລາວ; ມີບັນດາສະຫາຍຄະນະບໍລິຫານງານສະຫະພັນ ກໍາມະບານຄະນະພົວພັຕ່າງປະເທດສູນກາງພັກ, ຜູ້ຕາງໜ້າບັນດາໜ່ວຍພັກ, ອົງການຈັດຕັ້ງຊາວໜຸ່ມ ແລະ ແມ່ຍິງ ຕະຫຼອດຮອດບັນດາສະຫາຍ ສະມາຊິກກໍາມະບານຈໍານວນໜຶ່ງເຂົ້າຮ່ວມ.

ໃນກອງປະຊຸມສະຫາຍ ເກີລໍ່ ຢາງກໍ, ກໍາມະການຄະນະພັກ, ຄະນະບໍລິຫານງານສູນກາງສະຫະພັນກໍາມະບານລາວ, ປະທານສະຫະພັນກໍາມະບານ ຄະນະພົວພັຕ່າງປະເທດສູນກາງພັກ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າປະຈໍາປີ 2021 ແລະ ທິດທາງແຜນການປະຈໍາປີ 2022 ຂອງສະຫະພັນກໍາມະບານ ຄະນະພົວພັນຕ່າງປະເທດສູນກາງພັກ ໂດຍໄດ້ຍົກໃຫ້ເຫັນເຖິງຜົນສຳເລັດໃນການເຄື່ອນໄຫວວຽກງານກໍາມະບານທີ່ພົ້ນເດັ່ນໃນໄລຍະ 1 ປີ ຜ່ານມາໂດຍສະເພາະແມ່ນວຽກງານການປະເມີນການຈັດຕັ້ງປະຕິບັດຂໍແຂ່ງຂັນເນື້ອໃນ 05 ເປັນເຈົ້າຂອງ 06 ກໍາມະບານຮາກຖານທີ່ຢູ່ພາຍໃຕ້ການຄຸ້ມຄອງຂອງສະຫະພັນກໍາມະບານ ຄະນະພົວພັນຕ່າງປະເທດສູນກາງພັກ ໄດ້ມີການປະເມີນຜົນຢ່າງຖືກຕາມກົດລະບຽບລະບຽບສູນກາງສະຫະພັນກໍາມະບານລາວສະເລ່ຍໄດ້ 93,18%, ເພື່ອເປັນການຢັ້ງຢືນເຖິງຜົນງານທີ່ດີເດັ່ນດັ່ງກ່າວສະຫາຍ ນິດວິໄລ ເພັດມີໄຊ, ຮອງຫົວໜ້າກົມຂະບວນການແຂ່ງຂັນ ແລະ ຍ້ອງຍໍ, ໄດ້ຕາງໝ້າສູນກາງສະຫະພັນກໍາມະບານລາວ ມອບໃບຢັ້ງຢືນ 5 ເປັນເຈົ້າໃຫ້ແກ່ສະຫະພັນກໍາມະບານ ຄະນະພົວພັນຕ່າງປະເທດສູນກາງພັກ ແລະ ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ມອບໃບຢັ້ງຢືນ 5 ເປັນເຈົ້າໃຫ້ 06 ກໍາມະບານຮາກຖານຂອງຄະນະພົວພັນຕ່າງປະເທດສູນກາງພັກ .

ໃນຕອນທ້າຍ, ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ກໍ່ໄດ້ໂອ້ລົມຕໍ່ກອງປະຊຸມ ເຊິ່ງໄດ້ຍ້ອງຍໍ-ຊົມເຊີຍຜົນງານທີ່ດີເດັ່ນຂອງ ສະຫະພັນກໍາມະບານ ຄະນະພົວພັນຕ່າງປະເທດສູນກາງພັກ ທີ່ໄດ້ສຸມສະຕິປັນຍາ, ເຫື່ອແຮງ ຊີ້ນຳ - ນຳພາການເຄື່ອນໄຫວວຽກງານ ຂອງສະຫະພັນກໍາມະບານ ມີຜົນສຳເລັດຫຼາຍດ້ານໂດຍສະເພາະການເຄື່ອນໄຫວວຽກງານການມະບານ ແລະ ວິຊາສະເພາະ ຊຶ່ງໄດ້ເປັນການປະກອບສ່ວນອັນສໍາຄັນຊ່ວຍຄະນະພັກ ຄະນະພົວພັນຕ່າງປະເທດສູນກາງພັກ ໃນການເຕົ້າໂຮມຄວາມສາມັກຄີ, ປຸກລະດົມ ແລະສຶກສາອົບຮົມສະມາຊິກກຳມະບານເຂົ້າຮ່ວນຂະບວນການຕ່າງໆເປັນຕົວແທນແຫ່ງການປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານກໍ່ຄືພະນັກງານ - ລັດຖະກອນທີ່ສັງກັດຢູ່ຄະນະພົວພັນຕ່າງປະເທດສູນກາງພັກຕະຫຼອດໄລຍະຜ່ານມາ.ນອກຈາກນີ້, ສະຫາຍ ກໍ່ໄດ້ເນັ້ນໃຫ້ບັນດາ ສະຫາຍ ສະມາຊິກໃນ ສະຫະພັນກໍາມະບານ ຄະນະພົວພັນຕ່າງປະເທດສູນກາງພັກ ໃຫ້ສືບຕໍ່ຮັກສາຜົນງານທີ່ດີເດັ່ນທີ່ຜ່ານມາ ແລະ ໃຫ້ສືບຕໍ່ນຳພາ-ຊີ້ນຳວຽກງານກໍາມະບານຂອງຕົນ ໃຫ້ໄດ້ຮັບການພັດທະນາ ແລະ ມີບາດກ້າວອັນໃໝ່. (ຈົບ).