ທັດ​ສະ​ນະ​ຂອງທູດຈີນ ຕໍ່ສອງເຫດການສຳຄັນລະຫວ່າງ ຈີນ - ລາວ

ເຜີຍ​ແຜ່​ໂດຍ​: admin ເວ​ລາ: 11/03/2022 15:21:15 ຈຳ​ນວນ​​ຢ້ຽມ​ຊົມ 546 ຄັ້ງ ​

ສປ ຈີນ ແລະ ສປປ ລາວ ລວມທັງປະຊາຄົມໂລກ ໄດ້ຕີລາສູງຕໍ່ກອງປະຊຸມທາງໄກ ຂອງຜູ້ນຳສູງສຸດຂອງ ສ​ປ ຈີນ ແລະ ສ​ປ​ປ ລາວ ລວມທັງຕີລາຄາສູງຕໍ່ພິທີເປີດນໍາໃຊ້ທາງລົດໄຟຈີນ-ລາວ ຢ່າງເປັນທາງການ ໃນວັນທີ 3 ທັນວາ ຜ່ານມາ ຊຶ່ງເປັນຂີດໝາຍໃໝ່ທີ່ສຳຄັນ, ເປັນຜົນສະທ້ອນໃນໄລຍະຍາວແຫ່ງການເສີມສ້າງຄູ່ຮ່ວມຊະຕາກຳ ຈີນ - ລາວ ໃຫ້ກ້າວເຂົ້າສູ່ລະດັບໃໝ່ ແລະ ນໍາເອົາຜົນປະໂຫຍດອັນແທ້ຈິງມາສູ່ປະຊາຊົນສອງຊາດໃຫ້ຫຼາຍກວ່າເກົ່າ.

ທ່ານ ຈ່ຽງຈ່າຍຕົ່ງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ ສປ​ປ ລາວ ໄດ້ກ່າວໃນໂອກາດພົບປະສື່ມວນຊົນລາວ-ຈີນ ຮູບແບບອອນລາຍ ໃນວັນທີ 6 ທັນວາ ນີ້ ວ່າ: ສອງເຫດການສຳຄັນ ລະຫວ່າງ ສປປ ລາວ - ສປ ຈີນ ທີ່ເກີດຂຶ້ນໃນວັນທີ 3 ທັນວາ ຜ່ານມາ ກໍຄື ກອງປະຊຸມພົບ​ປະທາງໄກ ຂອງຜູ້ນຳສູງສຸດຂອງສອງປະເທດ ລະ​ຫວ່າງ ສະຫາຍ ສີຈິ້ນຜິງ ເລຂາທິການໃຫຍ່ ປະທານປະເທດ ແຫ່ງ ສປ ຈີນ ແລະ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ເປັນກອງປະຊຸມທີ່ມີລັກສະນະບຸກເບີກ ມີຜົນສຳເລັດເປັນຂີດໝາຍໃໝ່ທີ່ສຳຄັນ ແລະ ການຮ່ວມເປັນສັກຂີພິຍານໃນພິທີເປີດນໍາໃຊ້ທາງລົດໄຟ ລາວ-ຈີນ, ຈີນ-ລາວ ຢ່າງເປັນທາງການ ລວມທັງຄຳກ່າວປາໄສຂອງຜູ້ນຳທັງສອງປະເທດ ໄດ້ເປັນທີ່ສົນໃຈຢ່າງສູງຈາກບັນດາປະເທດໃກ້ຄຽງ, ພາກພື້ນ ແລະ ສາກົນ.

      ທ່ານເອກອັກຄະລັດຖະທູດ ກ່າວອີກວ່າ: ​ສອງ​ເຫດ​ການ​ທີ່​ກ່າວ​ມາ​ຂ້າງ​ເທິງ​ນັ້ນ ສຸ​ດ​ທີ່ມີຄວາມໝາຍສໍາຄັນທາງປະຫວັດສາດຂອງການພົວພັນລະຫວ່າງ ຈີນ-ລາວ ທັງເປັນການປະກອບສ່ວນເຂົ້າໃນການສະເຫຼີມສະຫຼອງ ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດຈີນ-ລາວ ແລະ ປີມິດຕະພາບຈີນ-ລາວ 2021 ໃຫ້ມີຄວາມໝາຍເລິກເຊິ່ງກວ່າເກົ່າ ຊຶ່ງຈະເປັນການຊຸກຍູ້ສົ່ງເສີມການພົວພັນລະຫວ່າງສອງປະເທດ ກ້າວເຂົ້າສູ່ຍຸກສະໄໝໃໝ່ ແລະ ເປີດໂສມໜ້າໃໝ່. ສຳລັບຜົນສຳ ເລັດທີ່ມີລັກສະນະຂີດໝາຍ ກໍຄື ສະຫາຍ ທອງລຸນ ສີສຸດລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໄດ້ຊີ້ອອກມານັ້ນ ຮ່ວມກັບຜົນສຳເລັດແຫ່ງການກໍ່ສ້າງ ແລະ ເປີດນໍາໃຊ້ທາງລົດໄຟ ຈີນ-ລາວ ຢ່າງເປັນທາງການ ແມ່ນເປັນຂີດໝາຍ​ໃນການກໍ່ສ້າງພື້ນຖານໂຄງລ່າງຂອງລາວ ໃຫ້ປະເທດລາວໄດ້ອຳລາຈາກຍຸກສະໄໝທີ່ບໍ່ມີລົດໄຟ ແລະ ເປັນຂີດໝາຍທີ່ເປັນຄວາມໝາຍປະຫວັດ ສາດແຫ່ງຍຸກສະໄໝ.

ທ່ານ ຈ່ຽງຈ່າຍຕົ່ງ ກ່າວຕື່ມວ່າ: ປີນີ້, ສອງປະເທດສະເຫຼີມສະຫຼອງວັນສ້າງຕັ້ງສາຍພົວພັນການທູດ ຄົບຮອບ 60 ປີ; ສະຫາຍ ສີຈິ້ນຜິງ ແລະ ສະຫາຍ ທອງລຸນ ສີສຸລິດ ກໍໄດ້ສົນ​ທະ​ນາ​ທາງໂທລະສັບທາງໄກໃນຕົ້ນປີນີ້ ແລະ ຈັດກອງປະຊຸມທາງໄກໃນທ້າຍປີນີ້ ຊຶ່ງການ​ນຳສູງສຸດຂອງສອງຝ່າຍ ກໍໄດ້ແລກປ່ຽນໃຫ້ກັນຮູ້ກ່ຽວກັບສະຖານະການຕ່າງໆຫຼາຍໆຄັ້ງ ໃນເວລາການພົວພັນການທູດ, ວັນຊາດ, ວັນສ້າງຕັ້ງພັກກອມມູນິດຈີນ; ການແລກປ່ຽນທາງຍຸດທະສາດທີ່ແໜ້ນແຟ້ນໃນປີນີ້, ຈະສາມາດເປັນທິດຊີ້ນຳ ໃນການສ້າງຄູ່ຮ່ວມຊາຕາກຳ ຈີນ-ລາວ ໃນຍຸກສະໄໝໃໝ່. ໂດຍສະເພາະໃນກອງປະຊຸມທາງໄກ ໃນພິທີເປີດນຳໃຊ້ທາງລົດໄຟ, ທ່ານ ສີຈິ້ນຜິງ ໄດ້ຊີ້ໃຫ້ເຫັນກຸນແຈຂອງການພັດທະນາສາຍພົວພັນຈີນ-ລາວ ໄລຍະ 60 ປີຜ່ານມາ, ໄດ້ຊີ້ໃຫ້ເຫັນລັກສະນະ​ຂອງ​ການຂັບເຄື່ອນການພັດທະນາສາຍພົວພັນຂອງສອງຝ່າຍ ຕາມທິດທາງສັງຄົມນິຍົມໄດ້ວາງອອກ ແລະ ມາດຕະການສໍາຄັນຕ່າງໆ ໃນການເສີມສ້າງຄູ່ຮ່ວມຊາຕາກຳ ຈີນ-ລາວ ໃນຕໍ່ໜ້ານີ້; ພ້ອມທັງໄດ້ມີທິດຊີ້ນຳດ້ານມາດຕະການ ແລະ ການດໍາເນີນໂຄງການທາງລົດໄຟ ຈີນ-ລາວ ໃນຕໍ່ໜ້າໃຫ້ດີຂຶ້ນ ທັງນີ້ກໍແມ່ນທິດທາງພື້ນຖານໃນການສ້າງຄູ່ຮ່ວມຊາຕາກຳ ຈີນ-ລາວ ໃນຍຸກສະໄໝໃໝ່ ທີ່ມີຄວາມໝາຍເປັນຜົນສະ ທ້ອນສຳຄັນຫຼາຍໃນໄລຍະຍາວ ຊຶ່ງສະຫາຍ ສີຈິ້ນຜິງ ກໍໄດ້ເຫັນດີເຫັນພ້ອມຢ່າງເຕັມທີ່.

 (ຂ່າວ-ພາບ: ສຸກສະຫວັນ)

---