ກອງປະຊຸມທະວິພາຄີ ລະຫວ່າງ ສອງ​ທະນາຄານ ລາວ - ຫວຽດນາມ

ເຜີຍ​ແຜ່​ໂດຍ​: admin ເວ​ລາ: 11/03/2022 15:08:47 ຈຳ​ນວນ​​ຢ້ຽມ​ຊົມ 504 ຄັ້ງ ​

ກອງປະຊຸມທະວິພາຄີ ປະຈໍາປີ 2021 ລະຫວ່າງ ທະນາຄານແຫ່ງ ສປປ ລາວ ແລະ ທະນາຄານແຫ່ງລັດ ຫວຽດນາມ ໃນຮູບແບບທາງໄກ ​ໄດ້​ຈັດ​ຂຶ້ນ​ໃນ​ວັນ​ 30 ພະຈິກ ​ນີ້​ ທີ່ທະນາຄານ ແຫ່ງ ສປປ ລາວ, ເປັນກຽດເປັນເຈົ້າພາບ ຝ່າຍ ທະນາຄານແຫ່ງ ສປປ ລາວ ນໍາໂດຍ ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ແລະ ຝ່າຍ ທະ​ນາ​ຄານ​ແຫ່ງລັດ ຫວຽດ​ນາມ ນໍາໂດຍທ່ານ ນາງ  ຫງວຽນ ທິ ຮົ່ງ  ຜູ້ວ່າການທະນາຄານແຫ່ງລັດ ຫວຽດນາມ ພ້ອມດ້ວຍຄະນະ​ຜູ້​ແທນຈາກສອງທະນາຄານກາງເຂົ້າຮ່ວມ.

ກອງປະຊຸມທະ​ວິ​ພາ​ຄີ ​ຈັດ​ຂຶ້ນເປັນປະຈຳທຸກປີ ເພື່ອຮັດແໜ້ນສາຍພົວພັນທີ່ພິເສດ, ຈິງໃຈ ແລະ ໝັ້ນຄົງຍາວນານ ລະຫວ່າງ ສອງທະນາຄານກາງ ທັງເປັນການສະຫຼຸບໝາກຜົນ ແລະ ລາຍງານຄວາມຄືບໜ້າການຈັດ​ຕັ້ງ​ປະ​ຕິ​ບັດ​ວຽກ​ງານ​ການ​ພົວ​ພັນຮ່ວມມືໃນຂະແໜງການເງິນ-ເງິນຕາສອງ​ຝ່າຍ ແລະ ວາງທິດທາງການຮ່ວມມືໃນຕໍ່ໜ້າ ໂດຍສະເພາະໃນຂົງເຂດການເງິນ - ການທະນາຄານ ທີ່ປະກອບສ່ວນໃນການພັດທະນາຂະແໜງການທະນາຄານ ແລະ ເສດຖະກິດຂອງສອງປະເທດ.

 ກອງປະຊຸມໄດ້ມີການປຶກສາຫາລື ແລະ ແລກປ່ຽນຮ່ວມກັນໃນຫຼາຍບັນຫາສຳຄັນຕົ້ນຕໍ ຄື: ສະ​ພາບເສດ​ຖະ​ກິດມະ​ຫາ​ພາກ ​ແລະ ​ການພັດທະນາຂະແໜງການ​ທະ​ນາ​ຄານ​ຂອງ​ສອງ​ປະ​ເທດ, ມາດຕະການຕອບໂຕ້​ຕໍ່ການແຜ່ລະບາດຂອງພະຍາດ COVID-19, ການ​ທົບ​ທວນ​ຄືນ​ບັນ​ດາ​ໂຄງ​ການ​ ແລະ ​​ແຜນ​ການ​ຮ່ວມ​ມືສອງ​ຝ່າຍ​ໃນ​ອະ​ນາ​ຄົດ ລວມ​ເຖິງ​ການ​ແລກ​ປ່ຽນ​ບົດ​ຮຽນ​ຮ່ວມ​ກັນ​ໃນວຽກ​ງານການ​ສົ່ງ​ເສີມ​ການ​ຊຳ​ລະທີ່ບໍ່​ນຳ​ໃຊ້​ເງິນ​ສົດ ແລະ ບັນຫາອື່ນໆທີ່ທັງສອງຝ່າຍມີຄວາມສົນໃຈຮ່ວມກັນ.

(ຂ່າວ-ພາບ: ທຫລ)

---