ຄວາມສາມັກຄີ ແມ່ນທາງເລືອກທີ່ຖືກຕ້ອງພຽງໜຶ່ງດຽວຂອງມວນມະນຸດໃນການເອົາຊະນະການແຜ່ລະບາດຂອງພະຍາດໂຄວິດ-19

ເຜີຍ​ແຜ່​ໂດຍ​: admin ເວ​ລາ: 11/03/2022 14:30:25 ຈຳ​ນວນ​​ຢ້ຽມ​ຊົມ 531 ຄັ້ງ ​

ມະຫາວິທະຍາໄລຈອນ ຮອບກິນ ຂອງສະຫະລັດອາເມຣິກາໄດ້ເປີດເຜີຍໂຕເລກສະຖິຕິກ່ຽວກັບການແຜ່ລະບາດຂອງພະຍາດໂຄວິດ-19 ໃນວັນທີ 1 ພະຈິກຜ່ານມາ ໂດຍສະແດງໃຫ້ເຫັນວ່າ: ຈຳນວນຜູ້ເສຍຊີວິດຍ້ອນພະຍາດໂຄວິດ-19 ຢູ່ໃນໂລກມີຫຼາຍກວ່າ 5 ລ້ານຄົນ. ນີ້ແມ່ນເລື່ອງທີ່ໜ້າເຈັບແສບທີ່ສຸດເລື່ອງໜຶ່ງ. ມັນໄດ້ເຕືອນໃຫ້ຊາວໂລກຮ່ວມແຮງຮ່ວມໃຈກັນຕໍ່ສູ້ກັບພະຍາດໂຄວິດ-19 ທີ່ເປັນສັດຕູຮ່ວມທີ່ອັນຕະລາຍ. ປະຊາຄົມໂລກຕ້ອງເພີ່ມທະວີການຮ່ວມມື ແລະ ຄວາມສາມັກຄີກັນ, ໃຊ້ການກະທຳທີ່ເຂັ້ມແຂງກວ່າເກົ່າ ຈຶ່ງຈະເຮັດໃຫ້ການຕ້ານກັບພະຍາດໂຄວິດ-19 ໄດ້ຮັບໄຊຊະນະໃນທີ່ສຸດ.

1 ປີກວ່າທີ່ຜ່ານມາ, ຈີນໄດ້ຢຶດໝັ້ນການຖືເອົາປະຊາຊົນ ແລະ ຊີວິດຢູ່ເໜືອທຸກສິ່ງ ທຸກຢ່າງ, ປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢ່າງຖືກຕ້ອງ ແລະ ປະສານງານກັນໂດຍເຄື່ອນໄຫວເປັນແບບປົກກະຕິ ແລະ ການຮັບມືສຸກເສີນ, ໄດ້ປະສານສົມທົບການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ກັບການພັດທະນາເສດຖະກິດ-ສັງຄົມ, ນຳໜ້າໂລກໃນການຄວບຄຸມການແຜ່ລະບາດຂອງພະຍາດໂຄວິດ-19, ນຳໜ້າຟື້ນຟູການຜະລິດ ແລະ ການເຮັດວຽກ, ນຳໜ້າການບັນລຸເປົ້າໝາຍການເຕີບໂຕທາງດ້ານເສດຖະກິດຈາກໂຕເລກລົບເປັນໂຕເລກບວກ ແລະ ອື່ນໆ. ພ້ອມດຽວກັນນີ້, ຈີນໄດ້ຕັ້ງໜ້າສະໜອງແຜນການຮັບມືດ້ານມະນຸດສະທຳຂອງໂລກທີ່ອົງການສະຫະປະຊາຊາດລິເລີ່ມ, ໄດ້ໃຫ້ການຊ່ວຍເຫຼືອວັດຖຸ ແລະ ອຸປະກອນໃຫ້ແກ່ 150 ກວ່າປະເທດ ແລະ ອົງການຈັດຕັ້ງສາກົນ, ໄດ້ສົ່ງອອກວັດຖຸ ແລະ ອຸປະກອນປ້ອງກັນພະຍາດໂຄວິດ-19 ໃຫ້ແກ່ 200 ກວ່າປະເທດ ແລະ ເຂດແຄວ້ນ, ໄດ້ສະໜອງຜ້າປິດປາກ 320 ກວ່າຕື້ອັນ ແລະ ຊຸດປ້ອງກັນພະຍາດ 3,9 ຕື້ຊຸດ ແລະ ນ້ຳຢາກວດຫາເຊື້ອໄວຣັດໂຄວິດ-19 ທັງໝົດ 5,6 ຕື້ຊຸດ. ການຂົນສົ່ງວັດຖຸອຸປະກອນສຸກເສີນ, ການຮ່ວມແຮງຮ່ວມໃຈກັນຂອງໂລກບໍ່ພຽງແຕ່ໄດ້ມອບຄວາມອົບອຸ່ນຈາກການຊ່ວຍເຫຼືອຊຶ່ງກັນ ແລະ ກັນເທົ່ານັ້ນ, ຫາກຍັງໄດ້ສ້າງຄວາມໝັ້ນໃຈໃຫ້ກັບໂລກໃນການເອົາຊະນະການແຜ່ລະບາດຂອງພະຍາດໂຄວິດ-19 ອີກດ້ວຍ.

ວັກຊິນໂຄວິດ-19 ແມ່ນອາວຸດທີ່ເຂັ້ມແຂງທີ່ສຸດໃນການເອົາຊະນະການແຜ່ລະບາດຂອງພະຍາດໂຄວິດ-19. ແຕ່ປະເທດທີ່ພັດທະນາແລ້ວຈຳນວນໜຶ່ງໄດ້ປະຕິບັດຕາມ “ລັດທິຊາດນິຍົມດ້ານວັກຊິນໂຄວິດ-19”, ໄດ້ກັກຕຸນວັກຊິນຫຼາຍເກີນກວ່າຄວາມຕ້ອງການຂອງຕົນ, ສົ່ງຜົນເຮັດໃຫ້ປະເທດພວມພັດທະນາຂາດແຄນວັກຊິນໂຄວິດ-19, ເຮັດໃຫ້ອັດຕາການສັກວັກຊິນໂຄວິດ-19 ຢູ່ໃນລະດັບຕ່ຳ.

ປັດຈຸບັນ, ຈີນໄດ້ສະໜອງວັກຊິນໂຄວິດ-19 ຫຼາຍກວ່າ 1,6 ຕື້ຫຼອດ ໃຫ້ກັບ 100 ກວ່າປະເທດ ແລະ ອົງການຈັດຕັ້ງສາກົນ, ໝົດປີນີ້ຈະສະໜອງວັກຊິນໃຫ້ກັບໂລກໃຫ້ໄດ້ຫຼາຍກວ່າ 2 ຕື້ຫຼອດ. ຈີນພວມດຳເນີນການຮ່ວມມືດ້ານການຜະລິດວັກຊິນຕ້ານໂຄວິດ-19 ກັບ 16 ປະເທດ, ຍັງໄດ້ຮ່ວມກັບ 30 ປະເທດ ສ້າງຂໍ້ລິເລີ່ມການພົວພັນຄູ່ຮ່ວມມືວັກຊິນໂຄວິດ-19 “ໜຶ່ງແລວໜຶ່ງເສັ້ນທາງ”. ວັນທີ 30 ຕຸລາຜ່ານມາ, ທ່ານ ສີຈິ້ນຜິງ ປະທານປະເທດຈີນ ໄດ້ເຂົ້າຮ່ວມກອງປະຊຸມໄລຍະທີໜຶ່ງຂອງກອງປະຊຸມສຸດຍອດຜູ້ນຳກຸ່ມ 20 ປະເທດ ຫຼື G20 ຄັ້ງທີ 16 ໂດຍຜ່ານທາງວິດີໂອ ພ້ອມທັງກ່າວຄຳປາໄສທີ່ສຳຄັນໂດຍທ່ານກ່າວເນັ້ນໜັກວ່າ: ຈີນຍິນດີຮ່ວມກັບບັນດາຝ່າຍຕ່າງໆ ພະຍາຍາມຍົກສູງອັດຕາການໃຊ້ວັກຊິນໂຄວິດ-19 ແລະ ຄວາມສາມາດເຂົ້າເຖິງວັກຊິນ ແລະ ຄວາມສາມາດຊື້ວັກຊິນຂອງປະເທດພວມພັດທະນາ ເພື່ອປະກອບສ່ວນຢ່າງຕັ້ງໜ້າເຂົ້າໃນການສ້າງກຳແພງປ້ອງກັນດ້ານວັກຊິນໂຄວິດ-19 ໃຫ້ກັບໂລກ.

ປັດຈຸບັນ, ວິສາຫະກິດວັກຊິນຂອງຈີນ ໄດ້ດຳເນີນການຮ່ວມມືຜະລິດວັກຊິນຢູ່ຫຼາຍປະເທດເຊັ່ນ: ສະຫະລັດອາຣັບເອມີເຣດ, ອິນໂດເນເຊຍ, ມາເລເຊຍ, ເອຢິບ, ບຣາຊິນ ແລະ ປະເທດອື່ນໆ.

ທ່ານ ເທໂດຣ ອັດຮາໂນມ ເກເບຣເຢຊຸສ ຜູ້ອຳນວຍການໃຫຍ່ອົງການອະນາໄມໂລກກ່າວວ່າ: “ປະສົບການຂອງຈີນໃນການຕ້ານກັບພະຍາດໂຄວິດ-19 ໄດ້ສະແດງໃຫ້ເຫັນທ່າແຮງດ້ານລະບອບຂອງຈີນ.” ມາດຕະການທີ່ເຂັ້ມແຂງຂອງຈີນບໍ່ພຽງແຕ່ສາມາດຄວບຄຸມການແຜ່ລະບາດຂອງພະຍາດໂຄວິດ-19 ໄດ້ໃນຂອບເຂດທົ່ວປະເທດຈີນເທົ່ານັ້ນ, ຍັງຊ່ວຍສະກັດກັ້ນພະຍາດບໍ່ໃຫ້ແຜ່ລາມໄປສູ່ປະເທດອື່ນອີກດ້ວຍ, ຊຶ່ງບໍ່ພຽງແຕ່ໄດ້ປ້ອງກັນປະຊາຊົນພາຍໃນປະເທດຕົນເທົ່ານັ້ນ, ຫາກຍັງໄດ້ຊ່ວຍປ້ອງກັນຊາວໂລກນຳອີກ.

ພະຍາດໂຄວິດ-19 ຍັງສືບຕໍ່ແຜ່ລະບາດຢູ່ໃນໂລກ, ສັງຄົມມະນຸດໄດ້ເກີດມີການປ່ຽນແປງຢ່າງເລິກເຊິ່ງ ໂດຍປະເຊີນໜ້າກັບທ່ວງທ່າດ້ານການຕ້ານກັບພະຍາດໂຄວິດ-19 ຂອງໂລກທີ່ຂ້ຽວຂາດ, ປະເທດໃຫຍ່ຕ້ອງເປັນແບບຢ່າງເພື່ອສະໜອງວັກຊິນໂຄວິດ-19 ແລະ ຜະລິດຕະພັນສາທາລະນະອື່ນໆໃຫ້ຫຼາຍກວ່າເກົ່າ; ບັນດາປະເທດຕ້ອງຮ່ວມແຮງຮ່ວມໃຈກັນຕ້ານພະຍາດໂຄວິດ-19, ຕໍ່ສູ້ກັບພະຍາດແບບຄຽງບ່າຄຽງໄຫຼ່ກັນເພື່ອຊຸກຍູ້ການສ້າງປະຊາຄົມຮ່ວມສາທາລະນະສຸກຂອງມວນມະນຸດ. ນີ້ແມ່ນທາງເລືອກທີ່ຖືກຕ້ອງພຽງໜຶ່ງດຽວຂອງມວນມະນຸດໃນການເອົາຊະນະການແຜ່ລະບາດຂອງພະຍາດໂຄວິດ-19.

ຂ່າວ: ຊີອາໄອ

---