ນາ​ຍົກ​ ເຂົ້າ​ຮ່ວມກອງປະຊຸມສຸດຍອດອາ​ຊຽນ​ ກັບ ຄູ່ຮ່ວມເຈລະຈາ

ເຜີຍ​ແຜ່​ໂດຍ​: admin ເວ​ລາ: 11/03/2022 14:16:00 ຈຳ​ນວນ​​ຢ້ຽມ​ຊົມ 760 ຄັ້ງ ​

ໃນວັນທີ 27 ຕຸລາ 2021, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ນໍາພາຄະນະເຂົ້າຮ່ວມກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 24, ກອງປະຊຸມສຸດຍອດອາຊຽນ-ອົສຕຣາລີ ຄັ້ງທີ 1, ກອງປະຊຸມສຸດຍອດອາຊຽນບວກສາມ (ຈີນ, ຍີ່ປຸ່ນ ແລະ ສ ເກົາຫຼີ) ຄັ້ງທີ 24 ແລະ ກອງປະຊຸມສຸດຍອດອາຊີຕາເວັນອອກ (ອີເອເອັດສ) ຄັ້ງທີ 16 ໃນຮູບແບບທາງໄກ.

1. ກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 24: (ໂດຍການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ແລະ ທ່ານ ກິຊິດະ ຟູມິໂອະ ນາຍົກລັດຖະມົນຕີຍີ່ປຸ່ນ)

ກອງປະຊຸມໄດ້ຕີລາຄາສູງຕໍ່ການຮ່ວມມືອາຊຽນ-ຍີ່ປຸ່ນ ຊຶ່ງໄດ້ຮັບຜົນສຳເລັດທີ່ສຳຄັນຫຼາຍດ້ານ. ຜູ້ນຳ ອາຊຽນໄດ້ສະແດງຄວາມຂອບໃຈຕໍ່ການປະກອບສ່ວນເຂົ້າໃນການສ້າງປະຊາຄົມອາຊຽນຂອງຍີ່ປຸ່ນ ໂດຍສະ ເພາະການຊ່ວຍເຫຼືອໃນດ້ານການພັດທະນາຊັບພະຍາກອນມະນຸດ, ການຈັດຕັ້ງປະຕິບັດແຜນແມ່ ບົດເພື່ອ ການເຊື່ອມຈອດອາຊຽນ 2025 ແລະ ຂໍ້ລິເລີ່ມເພື່ອການເຊື່ອມໂຍງອາຊຽນ ສະບັບທີ 4 ກໍຄືການຊ່ວຍ ເຫຼືອໃນການຮັບມືກັບການແຜ່ລະບາດຂອງພະຍາດໂຄວິດ-19 ໂດຍສະເພາະການປະກອບສ່ວນຂອງຍີ່ປຸ່ນ ເຂົ້າໃນກອງທຶນອາຊຽນເພື່ອຮັບມືກັບການແຜ່ລະບາດຂອງພະຍາດໂຄວິດ-19 ຈໍານວນ 1 ລ້ານໂດລາ ແລະ 50 ລ້ານໂດລາ ໃນການສ້າງຕັ້ງສູນອາຊຽນ ວ່າດ້ວຍການຊ່ວຍເຫຼືອສຸກເສີນຂະແໜງສາທາລະນະສຸກ ແລະ ພະຍາດລະບາດ, ກໍຄືການສະໜອງວັດຖຸອຸປະ ກອນທາງການແພດ ແລະ ສະໜອງວັກຊິນໃຫ້ແກ່ປະເທດ ສະມາຊິກອາຊຽນ ໂດຍສະເພາະ ສປປ ລາວ.

ຍີ່ປຸ່ນ ໄດ້ສືບຕໍ່ໃຫ້ຄຳໝາຍໝັ້ນທີ່ຈະໃຫ້ການຊ່ວຍເຫຼືອອາຊຽນ ໃນການສະກັດກັ້ນ, ຄວບຄຸມ ແລະ ແກ້ໄຂບັນຫາການແຜ່ລະບາດຂອງພະຍາດໂຄວິດ-19 ກໍຄືການຟື້ນຟູລະບົບເສດຖະກິດຫຼັງໂຄວິດ-19, ສືບ ຕໍ່ເພີ່ມທະວີການຮ່ວມມືໃນການສົ່ງເສີມການເຊື່ອມໂຍງເສດຖະກິດພາກພື້ນ, ການຫັນເປັນດີຈີຕອນ, ການຊ່ວຍ ເຫຼືອດ້ານການພັດທະນາຊັບພະຍາກອນມະນຸດ, ນະວັດຕະກຳ ແລະ ອື່ນໆ.

ໃນໂອກາດນີ້, ທ່ານນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການພົວ ພັນຮ່ວມມືສອງຝ່າຍ ລາວ-ຍີ່ປຸ່ນ, ພ້ອມທັງສະແດງຄວາມຂອບໃຈມາຍັງລັດຖະບານ ແລະ ປະຊາຊົນ ຍີ່ປຸ່ນ ທີ່ໄດ້ສືບຕໍ່ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ອັນໄດ້ປະກອບສ່ວນສໍາຄັນເຂົ້າໃນ ການພັດທະນາໂຄງລ່າງພື້ນຖານ ແລະ ເສດຖະກິດ-ສັງຄົມ ຂອງປະເທດຕະຫຼອດມາ.

1. ກອງປະຊຸມສຸດຍອດ ອາຊຽນ-ອົສຕຣາລີ ຄັ້ງທີ 1: (ໂດຍການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ແລະ ທ່ານ  ສະກອ໊ດ ມໍຣິສັນ ນາຍົກລັດຖະມົນຕີອົສຕຣາລີ)

ຜູ້ນຳອາຊຽນ ແລະ ອົະຕຣາລີ ໄດ້ຈັດກອງປະຊຸມສຸດຍອດອາຊຽນ-ອົສຕຣາລີ ແບບປະຈຳປີ ເປັນຄັ້ງ ທຳອິດຫຼັງຈາກທີ່ສອງຝ່າຍໄດ້ເຫັນດີຮ່ວມກັນໃນປີ 2020 ທີ່ຜ່ານມາ. ໃນຖານະທີ່ ສປປ ລາວ ເປັນປະເທດ ປະສານງານ ການພົວພັນຮ່ວມມືອາຊຽນ-ອົສຕຣາລີ, ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບກຽດອ່ານບົດຄໍາເຫັນລວມ (ASEAN Common Statement) ຂອງອາຊຽນ ຕໍ່ກອງ ປະຊຸມສຸດຍອດດັ່ງກ່າວ ຊຶ່ງໄດ້ສະແດງຄວາມເພິ່ງພໍໃຈຕໍ່ການພົວພັນ - ຮ່ວມມືອາຊຽນ - ອົສຕຣາລີ ໃນໄລຍະຜ່ານມາ ຊຶ່ງອົສຕຣາລີໄດ້ໃຫ້ການຊ່ວຍເຫຼືອ ແລະ ສະໜັບສະໜູນອາຊຽນໃນຂົງເຂດຕ່າງໆ ເຊັ່ນ: ດ້ານການສຶກສາ, ການເຊື່ອມໂຍງພາກພື້ນ, ການເຊື່ອມຈອດອາຊຽນ, ການຮັດແຄບຄວາມແຕກໂຕນດ້ານ ການພັດທະນາ ແລະ ການຊ່ວຍເຫຼືອໃນການຮັບມືກັບການແຜ່ລະບາດ ຂອງພະຍາດໂຄວິດ-19. ພິເສດ, ກອງປະຊຸມໄດ້ສະແດງຄວາມຍິນດີຕໍ່ການປະກາດໃຫ້ການຊ່ວຍເຫຼືອຂອງ ລັດຖະບານອົສຕຣາລີ ຈຳນວນ 1 ລ້ານໂດລາອົສຕຣາລີ ເຂົ້າໃນກອງທຶນອາຊຽນເພື່ອຮັບມືກັບ ພະຍາດໂຄວິດ-19, 1 ລ້ານໂດລາອົສຕຣາລີ ເຂົ້າໃນແຜນຟື້ນຟູຮອບດ້ານຂອງອາຊຽນ ແລະ 21 ລ້ານໂດລາອົສຕຣາລີ ເພື່ອສະໜັບສະໜູນການສ້າງ ຕັ້ງສູນອາຊຽນ ວ່າດ້ວຍການຊ່ວຍເຫຼືອສຸກເສີນຂະແໜງສາທາ ລະນະສຸກ ແລະ ພະຍາດແຜ່ລະບາດ.

ກອງປະຊຸມໄດ້ໃຫ້ຄຳໝາຍໝັ້ນທີ່ຈະສືບຕໍ່ຮ່ວມມືໃນບາງຂົງເຂດບູລິມະສິດ ເຊັ່ນ: ສາທາລະນະສຸກ ລວມທັງການຮັບມືກັບພະຍາດໂຄວິດ - 19; ການຍົກລະດັບການເຊື່ອມໂຍງເສດຖະກິດພາກພື້ນໂດຍການ ຫັນເປັນດີຈີຕອນ; ການສຶກສາ, ການເຊື່ອມຈອດອາຊຽນ, ການຈັດຕັ້ງປະຕິບັດຂໍ້ລິເລີ່ມເພື່ອການເຊື່ອມ ໂຍງອາຊຽນ ສະບັບທີ 4 (2021-2025); ການພັດທະນາແບບຍືນຍົງ ແລະ ການພັດທະນາເຄືອຂ່າຍ ຕົວເມືອງອັດສະລິຍະອາຊຽນ. ໃນໂອກາດກອງປະຊຸມ ບັນດາຜູ້ນຳອາຊຽນ ແລະ ອົສຕຣາລີ ໄດ້ເຫັນ ດີໃນດ້ານຫຼັກການ ໃນການຍົກລະດັບການຮ່ວມມືຈາກການເປັນຄູ່ຮ່ວມຍຸດທະສາດອາຊຽນ - ອົສຕຣາລີ ຂື້ນສູ່ລະດັບການເປັນຄູ່ຮ່ວມຍຸດທະສາດຮອບດ້ານ ອາຊຽນ-ອົສຕຣາລີ ອີກດ້ວຍ.

 

1. ກອງປະຊຸມສຸດຍອດ ອາຊຽນບວກສາມ (ຈີນ, ຍີ່ປຸ່ນ ແລະ ສ ເກົາຫຼີ) ຄັ້ງທີ 24: (ໂດຍການ ເປັນປະທານຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ)

 

ກອງປະຊຸມໄດ້ຕີລາຄາສູງ ຕໍ່ຜົນຂອງການຮ່ວມມືອາຊຽນບວກສາມໃນໄລຍະຜ່ານມາ,  ໃນທ່າມກາງ ທີ່ພາກພື້ນອາຊຽນ ກໍຄືພາກພື້ນອາຊີຕາເວັນອອກ ແລະ ໂລກກຳລັງປະເຊີນໜ້າກັບສິ່ງທ້າທາຍໃໝ່, ໂດຍ ສະເພາະການແຜ່ລະບາດຂອງພະຍາດໂຄວິດ-19. ໃນນີ້, ກອງປະຊຸມໄດ້ສະແດງຄວາມເພິ່ງພໍໃຈການຮ່ວມ ມືກັນໃນການປ້ອງກັນ, ຮັບມື ແລະ ການແກ້ໄຂຜົນກະທົບຂອງພະຍາດໂຄວິດ-19 ຕໍ່ການພັດທະນາເສດ ຖະກິດ-ສັງຄົມ ກໍຄືຊີວິດການເປັນຢູ່ຂອງປະຊາຊົນ.

 

ກອງປະຊຸມເຫັນດີໃຫ້ເພີ່ມທະວີການຮ່ວມມືໃນຂອບອາຊຽນບວກສາມ ໂດຍຜ່ານການຈັດຕັ້ງປະຕິບັດ ແຜນປະຕິບັດງານ (2018-2022) ໃຫ້ມີປະສິດທິຜົນຍິ່ງຂຶ້ນ, ສືບຕໍ່ຮ່ວມມືກັນເພື່ອຟື້ນຟູເສດຖະກິດ ຮອບດ້ານ ໂດຍການຮັກສາຕ່ອງໂສ້ການຜະລິດ ແລະ ການຂົນສົ່ງ, ການຫັນໄປສູ່ເສດຖະກິດດິຈິຕອນ, ການເຊື່ອມຈອດ, ເຄືອຂ່າຍຕົວເມືອງອັດສະລິຍະອາຊຽນ, ການຄໍ້າປະກັນສະບຽງອາຫານຜ່ານຄັງເຂົ້າສຸກ ເສີນອາຊຽນບວກສາມ, ການຮ່ວມມືດ້ານການເງິນ, ການພັດທະນາສີຂຽວ, ການຫຼຸດຜ່ອນຄວາມທຸກຍາກ ແລະ ການເລັ່ງລັດການໃຫ້ສັດຕະຍາບັນສັນຍາການຮ່ວມມືເສດຖະກິດແບບຮອບດ້ານລະດັບພາກພື້ນ. ກອງ ປະຊຸມໄດ້ເຫັນດີຮັບຮອງເອົາຖະແຫຼງການຜູ້ນຳອາຊຽນບວກສາມ ວ່າດ້ວຍ ການຮ່ວມມືດ້ານສຸຂະພາບຈິດ ຂອງເຍົາວະຊົນ ແລະ ຊາວໜຸ່ມ.

 

1. ກອງປະຊຸມສຸດຍອດ ອາຊີຕາເວັນອອກ (ອີເອເອັດສ) ຄັ້ງທີ 16: (ໂດຍການເປັນປະທານຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ)

 

ກອງປະຊຸມຄັ້ງນີ້ ບັນດາຜູ້ນຳໄດ້ທົບທວນຄືນການຈັດຕັ້ງປະຕິບັດບັນດາກິດຈະກຳຕ່າງໆພາຍໃຕ້ 6 ຂະແໜງການບຸລິມະສິດຂອງ ອີເອເອັດສ ເຊັ່ນ: ການເງິນ, ສິ່ງແວດລ້ອມ ແລະ ພະລັງງານ, ການສຶກສາ, ສາທາລະນະສຸກ ແລະ ພະຍາດຕິດແປດ, ການຄຸ້ມຄອງໄພພິບັດ ແລະ ການເຊື່ອມຈອດ. ບັນດາຜູ້ນຳ ໄດ້ໃຫ້ຄຳໝາຍໝັ້ນສືບຕໍ່ຮ່ວມມືກັນ ໃນການປ້ອງກັນ, ຮັບມື ແລະ ແກ້ໄຂການແຜ່ລະບາດຂອງພະຍາດ ໂຄວິດ-19 ແລະ ເພີ່ມທະວີຄວາມພະຍາຍາມໃນການຮ່ວມມື ແລະ ສ້າງເງື່ອນໄຂທີ່ເອື້ອອໍານວຍໃຫ້ ແກ່ການຟື້ນຟູເສດຖະກິດ-ສັງຄົມ ຫຼັງການແຜ່ລະບາດຂອງໂຄວິດ-19 ແລະ ການພັດທະນາແບບຍືນ ຍົງຂອງພາກພື້ນໃຫ້ຫຼາຍຂຶ້ນກວ່າເກົ່າ ໂດຍສຸມໃສ່ຊຸກຍູ້ການຮ່ວມມືແບບຫຼາຍຝ່າຍ, ການຮັດແໜ້ນການເຊື່ອມ ໂຍງເສດຖະກິດພາກພື້ນ, ການຫັນໄປສູ່ເສດຖະກິດດີຈີຕອນ, ການເຊື່ອມຈອດ, ການຟື້ນຟູການເດີນທາງໄປ ມາຫາສູ່ກັນຂອງ ປະຊາຊົນ ແລະ ການທ່ອງທ່ຽວ, ການຄ້າ, ການລົງທຶນ ແລະ ການຄ້າເສລີຫຼາຍຝ່າຍ.

 

ພ້ອມກັນນັ້ນ, ກອງປະຊຸມຍັງໄດ້ປຶກສາຫາລືກ່ຽວກັບບັນຫາພາກພື້ນ ແລະ ສາກົນທີ່ພົ້ນເດັ່ນ ແລະ ມີຄວາມສົນໃຈຮ່ວມກັນ ແລະ ເຫັນພ້ອມນຳກັນວ່າທ່າມກາງສະພາບການໃນພາກພຶື້ນ ແລະ ສາກົນ ທີ່ ຍັງສືບຕໍ່ຜັນແປໄປຢ່າງໄວວາ ແລະ ຫຍຸ້ງຍາກສັບສົນບວກກັບສິ່ງທ້າທາຍຕ່າງໆເຊັ່ນ: ພະຍາດຕິດແປດ, ໄພພິບັດ ແລະ ອື່ນໆ, ກອງປະຊຸມສຸດຍອດອາຊີຕາເວັນອອກ ຄວນສືບຕໍ່ເປັນເວທີປຶກສາຫາລືສຳລັບຜູ້ນຳ ກ່ຽວກັບບັນຫາຍຸດທະສາດ, ບັນຫາການເມືອງ ແລະ ເສດຖະກິດທີ່ມີຄວາມສົນໃຈ ແລະ ຜົນປະໂຫຍດ ຮ່ວມກັນ ເພື່ອການຮ່ວມມືຢູ່ອາຊີຕາເວັນອອກ.  ກອງປະຊຸມໄດ້ຮັບຮອງເອົາ 3 ເອກະສານສໍາລັບຜົນກອງ ປະຊຸມສຸດຍອດ ອີເອເອັດສ ຄື: 1). ຖະແຫຼງການຜູ້ນໍາ ອີເອເອັດສ ວ່າດ້ວຍ ການຮ່ວມມືດ້ານສຸ ຂະພາບ ທາງຈິດໃຈ; 2). ຖະແຫຼງການຜູ້ນໍາ ອີເອເອັດສ ວ່າດ້ວຍການເຕີບໂຕຂອງເສດຖະກິດ ໂດຍຜ່ານການຟື້ນ ຟູດ້ານການທ່ອງທ່ຽວ; ແລະ 3). ຖະແຫຼງການຜູ້ນໍາ ອີເອເອັດສ ວ່າດ້ວຍ ການຟື້ນຟູສີຂຽວ ເພື່ອກ້າວໄປ ສູ່ອະນາຄົດທີ່ຍືນຍົງ ແລະ ເຂັ້ມແຂງ

ຂ່າວ-ພາບ: ກະ​ຊວງ​ການ​ຕ່າງ​ປະ​ເທດ

---