ຂະບວນລົດໄຟຄັ້ງທຳອິດໃນປະຫວັດສາດຂອງລາວ
ເຜີຍແຜ່ໂດຍ: admin ເວລາ: 11/03/2022 13:50:17 ຈຳນວນຢ້ຽມຊົມ 433 ຄັ້ງ ໂດຍ: ພູວັນ
ລົດໄຟ EMU ຫຼື ເອີ້ນວ່າ: ຂະບວນລົດ “ລ້ານຊ້າງ” ໄດ້ມາຮອດນະຄອນຫຼວງວຽງຈັນເປັນທີ່ຮຽບຮ້ອຍແລ້ວ ແລະ ໄດ້ສົ່ງມອບໃຫ້ບໍລິສັດທາງລົດໄຟລາວ-ຈີນ ຈຳກັດ ຢ່າງເປັນທາງການ ສົມກັບການລໍຄອຍຂອງປະຊາຊົນລາວບັນດາເຜົ່າ ເມື່ອເຫັນລົດໄຟມາຮອດ. ທຸກຄົນຕ່າງກໍມີຄວາມມ່ວນຊື່ນໃນຈິດໃຈເພາະນັ້ນໝາຍເຖິງການປະກາດໃຫ້ຮູ້ຢ່າງທົ່ວເຖິງວ່າ ສປປ ລາວ ກໍາລັງກ້າວເຂົ້າສູ່ຍຸກສະໄໝໃໝ່ແຫ່ງການຂົນສົ່ງທາງລົດໄຟຟ້າ, ປະຊາຊົນລາວຈະພົບກັບຍຸກສະໄໝໃໝ່ແຫ່ງການປ່ຽນແປ່ງດ້ານການຂົນສົ່ງຂະບວນລົດໄຟລ້ານຊ້າງ ຈະເປັນສັນຍາລັກໃໝ່ໃຫ້ແກ່ປະຊາຊົນລາວ ຊຶ່ງສ້າງປະເທດຊາດໃຫ້ມີຄວາມມັ່ງຄັ່ງເຂັ້ມແຂງເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນ ພ້ອມທັງປະກອບສ່ວນເຂົ້າໃນການສົ່ງເສີມການສ້າງແລວເສດຖະກິດລາວ-ຈີນ ກໍຄືການຮ່ວມມືທີ່ຕິດແທດກັບຕົວຈິງລະຫວ່າງລາວ-ຈີນ ຊຶ່ງທັງສອງຝ່າຍໄດ້ຮ່ວມກັນສ້າງທາງລົດໄຟດັ່ງກ່າວນີ້ ໃຫ້ກາຍເປັນໂຄງການສັນຍາລັກແຫ່ງການຮ່ວມມືພາຍໃຕ້ຂໍ້ລິເລີ່ມ ‘’ໜຶ່ງແລວ ໜຶ່ງເສັ້ນທາງ’’ ກໍຄືມິດຕະພາບລາວ-ຈີນ.
ການຕັ້ງຊື່ຂະບວນລົດ “ລ້ານຊ້າງ” ແມ່ນອີງໃສ່ຊື່ເກົ່າຂອງ ສປປ ລາວ ໃນອະດີດທີ່ເອີ້ນວ່າອານາຈັກ “ລ້ານຊ້າງ”, ມີຄວາມໝາຍດ້ານອານາຈັກແຫ່ງເຈົ້າຊີວິດ ແລະ ແມ່ນໍ້າທີ່ໄຫຼຜ່ານດິນແດນຂອງ ສປ ຈີນ ແລະ ສປປ ລາວ ສະແດງເຖິງບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ, ຄູ່ຮ່ວມມືທີ່ດີ. ສຳລັບຮູບຊົງພາຍນອກຂອງຕົວລົດໄຟ EMU ຂະບວນ “ລ້ານຊ້າງ” ປະກອບດ້ວຍລວດລາຍທີ່ນຳໃຊ້ສີທຸງຊາດລາວ “ສີເເດງ, ສີຟ້າ, ສີຂາວ” ຊຶ່ງຖືກເອີ້ນວ່າ “ຄວາມສວຍງາມຂອງທຸງຊາດ”. ການຕົບແຕ່ງພາຍໃນຂອງຂະບວນລົດແມ່ນນຳໃຊ້ແນວຄວາມຄິດຂອງ “ກິ່ນຫອມມີສະເໜ່ດອກຈໍາປາ”, “ຄວາມງາມຂອງພູຜາແມ່ນໍ້າລຳເຊ” ແລະ ເຫັນໄດ້ດອກຈຳປາແຕ່ລະດອກກຳລັງເບັ່ງບານຢ່າງສວຍງາມ, ຖືເອົາລວດລາຍສີສັນຂອງດອກຈຳປາເປັນສີພື້ນ ຊຶ່ງມີຄວາມໝາຍສະແດງເຖິງວິໄສທັດການດຳລົງຊີວິດຂອງປະຊາຊົນ ແລະ ມິດຕະພາບອັນດີງາມຂອງປະຊາຊົນສອງຊາດ ລາວ-ຈີນ, ດ້ານໃນຂອງລົດຕົບແຕ່ງດ້ວຍ “ຄວາມງາມຂອງພູຜາແມ່ນໍ້າລຳເຊ” ແມ່ນຖືເອົາສີຂອງຜ້າໄໝລາວເປັນສີພື້ນ, ທີ່ໄດ້ລວບລວມເອົາຄວາມສວຍງາມດ້ານວັດທະນະທຳ ແລະ ຮີດຄອງປະເພນີຂອງປະຊາຊົນສອງຊາດ ລາວ-ຈີນ ເຂົ້າກັນຢ່າງກົມກຽວ.
ລົດໄຟຂະບວນ “ລ້ານຊ້າງ” ສາມາດແລ່ນດ້ວຍຄວາມໄວສູງເຖິງ 160 ກມ/ຊມ, ປະກອບມີ 9 ຕູ້ ຊຶ່ງລວມມີ: ຫົວຈັກລົດໄຟ, ຕູ້ບ່ອນນັ່ງປະເພດໜຶ່ງ ແລະ ຕູ້ຫ້ອງອາຫານຢ່າງລະ 1 ຕູ້, ຕູ້ບ່ອນນັ່ງປະເພດສອງ 6 ຕູ້ ຊຶ່ງທັງໝົດສາມາດບັນຈຸຜູ້ໂດຍສານໄດ້ 720 ຄົນ ແລະ ສາມາດເຊື່ອມຕໍ່ສອງຂະບວນລົດໄຟໄດ້ໃນເວລາທີ່ຕ້ອງການ, ຕູ້ບ່ອນນັ່ງປະເພດ 1 ແລະ ປະເພດ 2 ຂອງຂະບວນລົດໄຟມີຄວາມໂອ່ໂຖ່ງ ກວ້າງຂວາງ ແລະ ສະດວກສະບາຍ, ຜູ້ໂດຍສານສາມາດປັບອຸນຫະພູມເຄື່ອງປັບອາກາດໄດ້ຕາມຄວາມຕ້ອງການ, ການອອກແບບເບາະຕັ່ງນັ່ງແມ່ນຖືກຕາມຮູບຮ່າງສະລີລະຂອງຄົນ, ຢູ່ດ້ານລຸ່ມຂອງເບາະນັ່ງ ມີຮູປັກສຽບໄຟຟ້າທີ່ສາມາດໃຊ້ໄດ້ກັບມາດຕະຖານປັກສຽບຂອງລາວ ແລະ ຈີນ. ຕູ້ຫ້ອງອາຫານປະກອບດ້ວຍຕູ້ໂຊອາຫານ, ເຄື່ອງເຮັດກາເຟ, ໄມໂຄເວັບ ແລະ ອຸປະກອນອື່ນໆ. ມີພື້ນທີ່ນັ່ງຮັບປະທານອາຫານ ຊຶ່ງສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການຂອງຜູ້ໂດຍສານ ໃນການຮັບປະທານອາຫານ ແລະ ພັກຜ່ອນ. ພາສາທີ່ນໍາໃຊ້ໃນການໃຫ້ຂໍ້ມູນຜ່ານຈໍສະແດງ, ໂທລະໂຄ່ງ ແລະ ປ້າຍສັນຍາລັກການໃຫ້ບໍລິການຢູ່ພາຍໃນ ແລະ ພາຍນອກຂະບວນລົດມີ 3 ພາສາຄື: ພາສາລາວ, ພາສາຈີນ ແລະ ພາສາອັງກິດ. ຕູ້ທີ 4 ຂອງຂະບວນລົດໄຟແມ່ນເຂດປອດສິ່ງກີດຂວາງ ຊຶ່ງມີເບາະນັ່ງ ແລະ ຮາວຈັບສໍາລັບຄົນພິການ, ມີຫ້ອງນໍ້າສໍາລັບຄົນພິການ, ມີປຸ່ມກົດຂໍຄວາມຊ່ວຍເຫຼືອ SOS ແລະ ພາສາສັນຍາລັກນໍາທາງສໍາລັບຄົນພິການທາງສາຍຕາ ແລະ ສິ່ງອໍານວຍຄວາມສະດວກອື່ນໆ. ເຮັດໃຫ້ຜູ້ໂດຍສານທີ່ເປັນຄົນພິການສາມາດເດີນທາງໄດ້ຢ່າງສະດວກ, ສາມາດເວົ້າໄດ້ວ່າລົດໄຟຂະບວນລ້ານຊ້າງສາມາດຕອບສະໜອງໄດ້ຕາມຄວາມຮຽກຮ້ອງຕ້ອງການສົມກັບການລໍຄອຍຂອງປະຊາຊົນລາວຢ່າງແທ້ຈິງ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20