ການພົວພັນລາວ-ຫວຽດນາມ ກາຍເປັນສັນຍາລັກ ການພົວພັນດີງາມທີ່ສຸດ

ເຜີຍ​ແຜ່​ໂດຍ​: admin ເວ​ລາ: 11/03/2022 11:36:03 ຈຳ​ນວນ​​ຢ້ຽມ​ຊົມ 567 ຄັ້ງ ​

ໂດຍ: ຈັນປະສິດ ອຸນາພົມ ຮອງຫົວໜ້າພະແນກຮ່ວມມືດ້ານເສດຖະກິດ ແລະ ການລົງທຶນ, ຫ້ອງການຄະນະກຳມະການຮ່ວມມື ລາວ-ຫວຽດນາມ

ລາວ ແລະ ຫວຽດນາມ ແມ່ນສອງປະເທດບ້ານໃກ້ເຮືອນຄຽງ ທີ່ມີມູນເຊື້ອການພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ມາແຕ່ດົນນານ, ມີອຸດົມການອັນດຽວກັນ, ມີລະບອບການເມືອງ ການປົກຄອງຄືກັນ. ການພົວພັນ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໄດ້ຜ່ານການທົດສອບ ໃນແປວໄຟສົງຄາມຕໍ່ສູ້ອັນດຸເດືອດຕ້ານສັດຕູໂຕດຽວກັນ ອັນໄດ້ສ້າງປະຫວັດສາດທີ່ສະຫງ່າງາມຈາລຶກໄວ້ໃນໜ້າປະວັດສາດຂອງສອງຊາດ ໂດຍ ປະທານ ໂຮຈິມິນ ຜູ້ນຳທີ່ຍິ່ງໃຫຍ່, ປະທານ ໄກສອນ ພົມວິຫານ, ປະທານ ສຸພານຸວົງ ຮ່ວມກັນກໍ່ຕັ້ງຂຶ້ນ. ຈາກນັ້ນ ບັນດາການນໍາຜູ້ອື່ນໆແຕ່ລະລຸ້ນ ໄດ້ຮ່ວມຈິດຮ່ວມໃຈກັນເພີ່ມພູນຄູນສ້າງຢ່າງລໍ່ຢຸດຢັ້ງ, ຮ່ວມສຸກຮ່ວມທຸກນຳກັນ, ເຂົ້າເມັດຫັກຜັກເສັ້ນໜຶ່ງກໍ່ບິແບ່ງກັນ, ຮ່ວມຂຸມຕະຄອງດຽວກັນ ໄດ້ຜູກພັນມິດຕະພາບອັນເລິກເຊິ່ງ ໃນການຕໍ່ສູ້ກູ້ຊາດໃນເມື່ອກ່ອນເພື່ອຕີຕ້ານກັບສັດຕູ, ໄດ້ສ້າງພື້ນຖານການຜຸກພັນອັນໝັ້ນແກ່ນໃຫ້ສອງຊາດລາວ-ຫວຽດນາມ ຕໍ່ກັນມາຈົນເຖິງທຸກວັນນີ້. ລູກຫຼານຂອງປະຊາຊົນລາວ ຈຳນວນຫຼາຍຫຼາຍຮຸ່ນຄົນ ໄດ້ໄປສຶກສາຮໍ່າຮຽນຢູ່ປະເທດຫວຽດນາມ ກາຍເປັນພະນັກງານຜູ້ສືບທອດ ແລະ ເປັນຜູ້ທີ່ຊຸກຍູ້ ຖະນຸຖະໜອມ ສາຍພົວພັນມິດຕະພາບອັນຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຊາດລາວ-ຫວຽດນາມໃຫ້ສວຍສົດງົດງາມຍິ່ງໆຂຶ້ນ.

ພວກເຮົາຮູ້ບຸນຄຸນ ພັກ, ລັດ, ກອງທັບ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ສະໜັບສະໜູນຊ່ວຍເຫຼືອພາລະກິດປົດປ່ອຍຊາດ ແລະ ຄວາມເປັນເອກະລາດຂອງຊາດລາວ, ທະຫານອາສາສະໝັກ ແລະ ຊ່ຽວຊານຫວຽດນາມ ຈຳນວນຫຼວງຫຼາຍໄດ້ເສຍສະຫຼະຊີວິດ ແລະ ອຸທິດຄວາມໜຸ່ມແໜ້ນຂອງຕົນຢູ່ບົນດິນແດນດອກຈຳປາແຫ່ງນີ້ ເພື່ອພາລະກິດຕໍ່ສູ້ກູ້ຊາດຂອງພວກເຮົາ, ພວກເພິ່ນສູ້ຮົບຄຽງບ່າຄຽງໄຫຼ່ ຮ່ວມຂຸມຄອງດຽວກັນກັບ ທະຫານ ແລະ ປະຊາຊົນລາວພວກເຮົາ ຕີຕ້ານກັບສັດຕູ, ຍາດເອົາເອກະລາດ ແລະ ຜືນແຜ່ນດີນອັນຄົບຖ້ວນມາໃຫ້ປະຊາຊົນລາວ.

ເມື່ອກ້າວເຂົ້າສູ່ຍຸກໃໝ່, ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ຍິ່ງໄດ້ຮັບການເປີດກວ້າງ ແລະ ເຂົ້າສູ່ລ່ວງເລິກ. ການໄປມາຫາສູ່ກັນ ນັບມື້ນັບໃກ້ຊິດສະໜິດແໜ້ນຂຶ້ນເລື້ອຍໆ. ນີ້ແມ່ນການພົວພັນທີ່ໃສແຈ້ງ, ໝັ້ນຄົງຍາວ ນານ, ສະເໝີຕົ້ນສະເໝີປາຍ, ສະເໝີພາບ ແລະ ຕ່າງຝ່າຍຕ່າງມີຜົນປະໂຫຍດ, ຊຸກຍູ້ສົ່ງເສີມການສ້າງສາພັດທະນາຮອບດ້ານ ເສດຖະກິດ, ການເມືອງ, ການທະຫານ, ວັດທະນະທຳ, ສັງຄົມ ແລະ ອື່ນໆ. ໃນກອງປະຊຸມຄັ້ງທີ 43, ປະຈຳປີ 2021 ຂອງຄະນະກຳມະການຮ່ວມມືທະວີພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ທີ່ຜ່ານມາ ໄດ້ມີການຕົກລົງຮ່ວມມືກັນໄດ້ຫຼາຍບັນຫາຄື: ການເຊື່ອມຈອດຕາຂ່າຍໄຟຟ້າ ແລະ ການຊື້-ຂາຍໄຟຟ້າ ລະຫວ່າງ ສອງປະເທດ ໄດ້ມີບາດກ້າວຂະຫຍາຍຕົວໃໝ່, ຫຼາຍໂຄງການພະລັງງານໄຟຟ້າຂອງລາວ ໄດ້ຖືກລົງນາມ ເພື່ອຕົກລົງຂາຍພະລັງງານໄຟຟ້າໄປ ສສ ຫວຽດນາມ, ການເຊື່ອມຈອດດ້ານຄົມມະນາຄົມ ກໍໄດ້ຮັບການພັດທະນາຮ່ວມກັນ ແລະ ຖືກຊຸກຍູ້ຢ່າງໃກ້ຊິດຈາກສອງລັດຖະບານ. ສິ່ງທີ່ພົ້ນເດັ່ນ ແມ່ນການຮ່ວມມືລົງທຶນພັດທະນາທ່າເຮືອຫວຸງອາງ 1, 2 ແລະ 3 ຊຶ່ງຈະໄດ້ຮັບການພັດທະນາໃຫ້ເປັນທ່າເຮືອສາກົນ ລາວ-ຫວຽດນາມ. ນອກນັ້ນ, ສອງປະເທດ ຍັງໄດ້ພ້ອມກັນ ສືບຕໍ່ຊຸກຍູ້ໂຄງການສ້າງເສັ້ນທາງລົດໄຟ ແຕ່ວຽງຈັນ-ທ່າແຂກ-ເຕິ່ນເລີບ-ຫວຸງອາງ ແລະ ໂຄງການເສັ້ນທາງດ່ວນຮ່າໂນ້ຍ-ວຽງຈັນ ໃຫ້ບັນລຸຜົນເປັນຈິງໃນອະນາຄົດອັນໃກ້ໆນີ້. ບັນດາໂຄງການຮ່ວມມືເຫຼົ່ານີ້ ຖືເປັນໂຄງການສັນຍາລັກ ແຫ່ງການຮ່ວມມືຮອບດ້ານໃນຍຸກສະໄໝໃໝ່ ລະຫວ່າງ ສອງປະເທດ, ຈະເຮັດໃຫ້ເສັ້ນທາງຄົມມະນາຄົມ, ການລົງທຶນ ແລະ ການຊື້-ຂາຍໄຟຟ້າ ທີ່ເປັນເປົ້າໝາຍໃນການພັດທະນາຮ່ວມກັນ ຂອງປະຊາຊົນສອງຊາດ ລາວ-ຫວຽດນາມ ໃຫ້ຄ່ອຍໆປະກົດຜົນເປັນຈິງ.

ຫວຽດນາມ ເປັນປະເທດໜຶ່ງ ທີ່ມີການລົງທຶນຢູ່ລາວ ຫຼາຍທີ່ສຸດ ແລະ ເປັນປະເທດຄູ່ຄ້າໃຫຍ່ອັນດັບຕົ້ນໆ ຂອງລາວ. ໃນຊຸມປີຜ່ານມາ, ມູນຄ່າການຄ້າ ລະຫວ່າງ ສອງຝ່າຍ ໄດ້ປະກອບສ່ວນຊຸກຍູ້ບໍ່ໜ້ອຍໃຫ້ແກ່ການພັດທະນາຂອງຂະແໜງພະລັງງານ-ບໍ່ແຮ່, ກະສິກຳ-ປ່າໄມ້, ການບໍລິການ ແລະ ຂະ ແໜງການອື່ນໆ ຂອງລາວ. ການລົງທຶນຂອງ ສສ ຫວຽດນາມ ໄດ້ຊຸກຍູ້ການສ້າງໂຄງການທີ່ມີຜົນດີຕໍ່ຊີວິດການເປັນຢູ່ຂອງປະຊາຊົນລາວເຊັ່ນ: ໂຮງຮຽນ, ໂຮງໝໍ, ຖະໜົນຫົນທາງ ແລະ ອື່ນໆ ເພື່ອຊ່ວຍ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນລາວໃຫ້ສູງຂຶ້ນ. ອັນພົ້ນເດັ່ນ ແມ່ນເຂື່ອນໄຟຟ້າເຊຂະໝານ 1, ໂຮງແຮມເມືອງແທັງ, ບໍລິສັດ ສະຕາໂທລະຄົມ (ຢູນີເທວ) ແລະ ໂຄງການອື່ນໆ ທີ່ປະສົບຜົນສຳເລັດ, ໄດ້ກາຍເປັນສັນຍາລັກຮ້ອຍຮຽງດວງດອກບົວຫຼວງ ໃຫ້ເບັ່ງບານຄູ່ຄຽງດວງດອກຈຳປາ ອັນສວຍງາມ ສົ່ງກິ່ນຫອມຫວນແຜ່ກະຈາຍ ຢູ່ບົນດິນແດນລ້ານຊ້າງແຫ່ງນີ້ຕະຫຼອດໄປ. ສຳລັບ ສປປ ລາວເຮົາ ກໍໄດ້ມີການສົ່ງສິນຄ້າໄປຂາຍຢູ່ ຫວຽດນາມ ເພີ່ມຂຶ້ນໃນແຕ່ລະປີເຊັ່ນ: ເຂົ້າສານໜຽວ, ກາເຟ, ໝາກກ້ວຍ, ໝາກໄມ້ ແລະ ຜະລິດຕະພັນອື່ນໆ ນັບມື້ນັບໄດ້ຮັບຄວາມນິຍົມຈາກຜູ້ບໍລິໂພກ ຫວຽດນາມຫຼາຍຂຶ້ນ.

ການແລກປ່ຽນດ້ານວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ມີການພົວພັນແລກປ່ຽນ ແລະ ຊ່ວຍເຫຼືອຊຶ່ງກັນ ແລະ ກັນຕະຫຼອດມາ. ປະກົດການເດັ່ນ ແມ່ນນັກສະແດງລາວ ແລະຫວຽດນາມ ໄດ້ຮ່ວມກັນສະແດງລະຄອນເລື່ອງ; “ຮ່ວມຂຸມຕະຄອງດຽວກັນ” ແລະ ມີການແລກປ່ຽນການສະແດງສິລະປະວັນນະຄະດີຕ່າງໆດ້ວຍກັນ ເພື່ອສ່ອງແສງເຖິງປະຫວັດການພົວພັນ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດ. ທຸກໆລາຍການສະແດງໄດ້ຮັບຄວາມນິຍົມຊົມຊອບ ແລະ ເຮັດໃຫ້ປະຊາຊົນສອງປະເທດພວກເຮົາ ປະທັບໃຈຫຼາຍທີ່ສຸດ.

ດ້ານການສຶກສາ, ມີຈໍານວນນັກສຶກສາລາວ ທັງໄດ້ຮັບທຶນການສຶກສາຈາກລັດຖະບານ ຫວຽດນາມ ແລະ ທັງຮຽນທຶນສ່ວນຕົວ ກໍມີຈໍານວນຢ່າງຫຼວງຫຼາຍ ເມື່ອທຽບກັບບັນດາປະເທດອາຊຽນ. ດ້ານສາທາລະນະສຸກ ໄດ້ຮັບການເສີມຂະຫາຍເປັນຢ່າງດີ ໃນການບໍລິການດ້ານການປິ່ນປົວພະຍາດຂອງແພດຫວຽດນາມ ແລະ ໄດ້ຮັບຄວາມນິຍົມຊົມຊອບ, ຄວາມໄວ້ເນື້ອເຊື່ອໃຈຈາກຄົນລາວເປັນຢ່າງດີ. ບັນດາໂຄງການຊ່ວຍເຫຼືອ ຂອງລັດຖະບານຫວຽດນາມ ໃຫ້ແກ່ ລັດຖະບານລາວ ກໍໄດ້ເພີ້ມຂຶ້ນໃນແຕ່ລະປີເຊັ່ນ: “ໂຄງການກໍ່ສ້າງໂຮງໝໍມິດຕະພາບ ລາວ-ຫວຽດນາມ ຢູ່ແຂວງຊຽງຂວາງ-ຫົວພັນ” ທີ່ພວມດໍາເນີນການກໍ່ສ້າງ ໄດ້ຮັບການຍ້ອງຍໍຊົມເຊີຍຈາກປະຊາຊົນລາວ ຢ່າງກວ້າງຂວາງ. ອາສາສະໝັກຊາວໜຸ່ມຫວຽດນາມ ຫຼາຍຮ້ອຍຄົນ ໄດ້ເຂົ້າມາຊ່ວຍ ເພື່ອໃຫ້ການບໍລິການໃນດ້ານຕ່າງໆເຊັ່ນ: ສາທາລະນາສຸກ, ເຕັກນິກການປູກ-ການລ້ຽງ, ດ້ານໄອທີ ແລະ ການສິດສອນກິລາກາຍະກຳເຫຼົ່ານີ້ເປັນຕົ້ນ.

ລາວ ແລະ ຫວຽດນາມ ເປັນສະມາຊິກທີ່ສຳຄັນ ໃນກົນໄກການຮ່ວມມືແມ່ນ້ຳຂອງ ໄດ້ຮັບຜົນປະໂຫຍດຮ່ວມກັນຢ່າງຫຼວງຫຼາຍ, ໄດ້ສະແດງໃຫ້ເຫັນເຖິງຄວາມເຊື່ອໝັ້ນຊຶ່ງກັນ ແລະ ກັນ, ຊ່ວຍເຫຼືອເກື້ອກຸນກັນຢ່າງສະເໝີພາບ, ຈິງໃຈ ເພື່ອການພັດທະນາຮ່ວມກັນ ຂອງອະນຸພາກພື້ນ, ສ້າງຄວາມຜາສຸກໃຫ້ແກ່ປະຊາຊົນບັນດາປະເທດຢູ່ພາກພື້ນແຫ່ງນີ້ຫຼາຍກວ່າເກົ່າ.

ຄຳສຸພາສິດລາວກ່າວໄວ້ວ່າ; “ໄມ້ລຳດຽວລ້ອມຮົ້ວບໍ່ໄຂວ່, ໄຜ່ບໍ່ພ້ອມແປງບ້ານບໍ່ເຮືອງ”, ຄົນຫວຽດນາມ ກໍມີຄໍາສຸພາສິດທີ່ມີຄວາມໝາຍຄ້າຍໆແບບນີ້ຄືກັນ ຂໍພຽງແຕ່ວ່າ ລາວ-ຫວຽດນາມ ພວກເຮົາເຂົ້າໃຈກັນ, ໄວ້ເນື້ອເຊື່ອໃຈກັນ ແລະ ຮ່ວມມືກັນ ກໍຈະເກີດເຫງົ້າພະລັງແຮງອັນມະຫາສານ, ສ້າງອະນາຄົດຈາກຕົ້ນທຶນແຫ່ງການພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ. ນີ້ເພື່ອກໍ່ໃຫ້ເກີດຜົນປະໂຫຍດອັນໃຫຍ່ຫຼວງໃຫ້ແກ່ປະເທດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ເບັ່ງບານງອກງາມຈະເລີນຮຸ່ງເຮືອງໃຫ້ແກ່ລູກຫຼານລາວ-ຫວຽດນາມ ຕໍ່ໆໄປ.

---