ຊຸກຍູ້ການຮ່ວມມືສາກົນ ເພື່ອຕ້ານການແຜ່ລະບາດພະຍາດໂຄວິດ-19

ເຜີຍ​ແຜ່​ໂດຍ​: admin ເວ​ລາ: 11/03/2022 11:27:24 ຈຳ​ນວນ​​ຢ້ຽມ​ຊົມ 591 ຄັ້ງ ​

ສະພາບການແຜ່ລະບາດຂອງພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນເຮັດໃຫ້ຄົນເຮົາປະເຊີນໜ້າກັບສິ່ງທ້າທາຍໃຫຍ່ທີ່ສຸດຫຼັງສົງຄາມໂລກຄັ້ງທີ 2 ເປັນຕົ້ນມາ. ການແຜ່ລະບາດຂອງພະຍາດດັ່ງກ່າວທີ່ເກີດຂຶ້ນໃນຮອບຮ້ອຍປີເທື່ອໜຶ່ງ, ຈີນໄດ້ຕັ້ງໜ້າຊຸກຍູ້ການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດ, ປະກອບສ່ວນ ແລະ ເພີ່ມຄວາມໝັ້ນໃຈໃຫ້ກັບສັງຄົມໃນການຕ້ານກັບການແຜ່ລະບາດຂອງພະຍາດໂຄວິດ-19 ຂອງໂລກ ຊຶ່ງໄດ້ສະແດງໃຫ້ເຫັນເຖິງຄວາມຮັບຜິດຊອບຂອງປະເທດຈີນ.

ໂດຍປະເຊີນໜ້າກັບການແຜ່ລະບາດຂອງພະຍາດໂຄວິດ-19, ທົ່ວປະເທດຈີນໄດ້ຮ່ວມຈິດຮ່ວມໃຈກັນ, ຈັດຕັ້ງປະຕິບັດມາດຕະການປ້ອງກັນ ແລະ ຄວບຄຸມການແຜ່ລະບາດຂອງພະຍາດຢ່າງຮອບດ້ານ, ເຂັ້ມງວດ ແລະ ເຖິງຖອງ ແລະ ໄດ້ຮັບຜົນສຳເລັດທີ່ມີລັກສະນະຍຸດທະສາດສຳຄັນໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໃນໄລຍະພຽງບໍ່ເທົ່າໃດເດືອນພາຍຫຼັງພະຍາດດັ່ງກ່າວແຜ່ລະບາດຢູ່ປະເທດຈີນ, ຈີນໄດ້ສ້າງກຳແພງປ້ອງກັນພະຍາດໂຄວິດ-19 ທີ່ໝັ້ນແກ່ນໃຫ້ກັບຄວາມປອດໄພດ້ານສາທາລະນະສຸກ.

ໃນເວລາທີ່ປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຢູ່ປະເທດຕົນໃຫ້ດີນັ້ນ, ຈີນຍັງໄດ້ສົ່ງເສີມ ແລະ ປະຕິບັດລັດທິຫຼາຍຝ່າຍ, ຊຸກຍູ້ການຮ່ວມມືສາກົນເພື່ອຕ້ານກັບການແຜ່ລະບາດຂອງພະຍາດໂຄວິດ-19 ແລະ ໄດ້ເພີ່ມພະລັງແຮງໃນການຕ້ານກັບການແຜ່ລະບາດຂອງພະຍາດໃຫ້ກັບທົ່ວໂລກ. ໃນກອງປະຊຸມສຸດຍອດສະໄໝພິເສດຂອງກຸ່ມ 20 ປະເທດ ເພື່ອຮັບມືກັບການແຜ່ລະບາດຂອງພະຍາດໂຄວິດ-19, ໃນກອງປະຊຸມໃຫຍ່ຂອງອົງການອະນາໄມໂລກ ສະໄໝທີ 73 ທາງວິດີໂອ, ກອງປະຊຸມສຸດຍອດສະໄໝພິເສດຈີນ-ອາຟຣິກາ ເພື່ອຕ້ານກັບການແຜ່ລະບາດຂອງພະຍາດໂຄວິດ-19 ແລະ ເວທີຫຼາຍຝ່າຍອື່ນໆ, ທ່ານ ສີຈິ້ນຜິງ ປະທານປະເທດຈີນ ໄດ້ສະເໜີຫຼາຍເທື່ອວ່າ: ຄວນເພີ່ມທະວີການຮ່ວມມືສາກົນຢ່າງຮອບດ້ານ, ເນັ້ນໜັກຄຳເວົ້າທີ່ວ່າສາມັກຄີກັນ ແລະ ຮ່ວມມືກັນແມ່ນວິທີດີທີ່ສຸດໃນການຮັບມືກັບການແຜ່ລະບາດຂອງພະຍາດໂຄວິດ-19. ນອກຈາກນີ້, ຈີນຍັງໄດ້ບໍລິຈາກເງິນ 50 ລ້ານໂດລາ ໃຫ້ແກ່ອົງການອະນາໄມໂລກເພື່ອສະໜັບສະໜູນອົງການດັ່ງກ່າວດຳເນີນການຮ່ວມມືຕ້ານກັບການແຜ່ລະບາດຂອງພະຍາດໃນທົ່ວໂລກ.

ວັກຊິນແມ່ນອາວຸດອັນເຂັ້ມແຂງທີ່ຈະເອົາຊະນະການແຜ່ລະບາດຂອງພະຍາດ ແລະ ຟື້ນຟູເສດຖະກິດ. ຈີນ ໄດ້ລົງເລິກການຮ່ວມມືສາກົນດ້ານວັກຊິນມາໂດຍຕະຫຼອດ, ຮັບປະກັນ ຄວາມສາມາດຂອງປະເທດພວມພັດທະນາໃນການເຂົ້າເຖິງວັກຊິນ ແລະ ສາມາດຊື້ໄດ້, ເຮັດໃຫ້ວັກຊິນກາຍເປັນຜະລິດຕະພັນສາທາລະນະຂອງໂລກ. ຈີນໄດ້ປະກອບສ່ວນເຮັດໃຫ້ວັກຊິນເຂົ້າເຖິງປະເທດພວມພັດທະນາໄວຂຶ້ນດ້ວຍການກະທຳຕົວຈິງ, ປັດຈຸບັນໄດ້ສະໜອງວັກຊິນຫຼາຍກວ່າ 800 ລ້ານຫຼອດ ໃຫ້ແກ່ 100 ກວ່າປະເທດ ແລະ ອົງການຈັດຕັ້ງສາກົນ.

ໃນພິທີມອບ-ຮັບວັກຊິນປ້ອງກັນພະຍາດໂຄວິດ-19 ງວດທີ 5 ທີ່ລັດຖະບານຈີນໃຫ້ການຊ່ວຍເຫຼືອ ສປປ ລາວ ໃນວັນທີ 11 ສິງຫາຜ່ານມາ ທ່ານ ພັນຄໍາ ວິພາວັນ ນາຍົກລັດຖະມົນຕີແຫ່ງ ສປປ ລາວ ກ່າວວ່າ: ປັດຈຸບັນສະພາບການແຜ່ລະບາດຂອງພະຍາດໂຄວິດ-19 ໃນໂລກຍັງຂ້ຽວຂາດຢູ່, ຈີນໄດ້ມີຄວາມຮັບຜິດຊອບໃນຖານະປະເທດໃຫຍ່, ສະໜອງວັກຊິນ ແລະ ເຄື່ອງອຸປະກອນປິ່ນປົວທີ່ມີຄຸນນະພາບສູງ, ປອດໄພ ແລະ ມີປະສິດທິຜົນໃຫ້ແກ່ປະຊາຄົມໂລກ, ຊຸກຍູ້ການຮ່ວມມືຕ້ານກັບການແຜ່ລະບາດຂອງພະຍາດໂຄວິດ-19 ຂອງໂລກໃຫ້ເຂົ້າສູ່ລວງເລິກຢ່າງບໍ່ຢຸດຢັ້ງດ້ວຍການກະທຳຕົວຈິງ, ໄດ້ປະກອບສ່ວນສ້າງປະຊາຄົມຮ່ວມສາທາລະນະສຸກດ້ວຍພະລັງແຮງຂອງຈີນ.

ຈາກການທີ່ແຈ້ງຂໍ້ມູນກ່ຽວກັບສະພາບການແຜ່ລະບາດຂອງພະຍາດໂຄວິດ-19 ຢ່າງທັນເວລາ, ການສະໜອງຂໍ້ມູນກ່ຽວກັບພະຍາດ, ການແບ່ງປັນບົດຮຽນຕ້ານກັບການແຜ່ລະບາດຂອງພະຍາດ, ການສົ່ງໜ່ວຍງານຜູ້ຊ່ຽວຊານປິ່ນປົວພະຍາດໄປຊ່ວຍເຫຼືອຕ່າງປະເທດ, ການດຳເນີນການຊ່ວຍເຫຼືອຕ້ານກັບການແຜ່ລະບາດຂອງພະຍາດ, ການສົ່ງອອກເຄື່ອງອຸປະກອນຕ້ານກັບການແຜ່ລະບາດຂອງພະຍາດ, ຈາກການຮ່ວມມືຄົ້ນຄວ້າ ແລະ ຜະລິດວັກຊິນຮອດການສ້າງປະຊາຄົມຮ່ວມສາທາລະນະສຸກຂອງມວນມະນຸດ, ໃນເວລາສຳຄັນທີ່ສະພາບການແຜ່ລະບາດຂອງພະຍາດໂຄວິດ-19 ເກີດຂຶ້ນຊ້ຳແລ້ວຊ້ຳອີກ, ເຊື້ອພະຍາດກາຍພັນເລື້ອຍໆ, ສະຖານະການຍັງສັບສົນຂ້ຽວຂາດຢູ່, ຈີນໄດ້ເດີນຕາມເສັ້ນທາງທີ່ຖືກຕ້ອງດ້ວຍຄວາມສາມັກຄີ ແລະ ຮ່ວມມືກັນຢ່າງເດັດດ່ຽວໜຽວແໜ້ນ.

ຂ່າວ: ຊີອາໄອ

---