ສ​ປ​ປ ລາວ-ສ ເກົາຫຼີ ເພີ່ມ​ທະ​ວີ​ການ​ຮ່ວມ​ມື​ດ້ານ​ນິ​ຕິ​ບັນ​ຍັດ

ເຜີຍ​ແຜ່​ໂດຍ​: admin ເວ​ລາ: 03/03/2022 21:05:51 ຈຳ​ນວນ​​ຢ້ຽມ​ຊົມ 753 ຄັ້ງ ​

      ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປ ລາວ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ ພົບປະທາງໄກ ກັບ ທ່ານ  ປາກ ບຽວ ຊຶງ (H.E. Park Byeong-seug) ປະທານສະພາແຫ່ງຊາດ ແຫ່ງ ສາ​ທາ​ລະ​ນະ​ລັດ​ເກົາຫຼີ ພ້ອມດ້ວຍຄະນະ ໃນວັນທີ 3 ມີນານີ້ ທີ່ສະພາແຫ່ງຊາດ.

      ໃນໂອກາດດັ່ງກ່າວ, ທ່ານ ໄຊສົມພອນ ພົມວິຫານ ໄດ້ສະແດງຄວາມຍິນດີເປັນຢ່າງສູງທີ່ໄດ້ມີໂອກາດພົບປະກັບ ທ່ານ ປາກ ບຽວ ຊຶງ ພ້ອມດ້ວຍຄະນະ ຜ່ານລະບົບທາງໄກ ຊຶ່ງເປັນຄັ້ງທຳອິດພາຍຫຼັງທີ່ໄດ້ຮັບຕໍາແໜ່ງເປັນປະທານສະພາແຫ່ງຊາດ ເມື່ອຕົ້ນປີ 2021 ຜ່ານ​ມາ, ການພົບປະຄັ້ງນີ້ ສອງ​ຝ່າຍ​ໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນນໍາກັນ ກ່ຽວກັບການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີງາມ ລະຫວ່າງ ສປປ ລາວ-ສ ເກົາຫຼີ ກໍຄື ສອງອົງການນິຕິບັດຍັດໃຫ້ເກີດດອກອອກຜົນຍິ່ງໆຂຶ້ນ.

ຕະຫຼອດ​ໄລ​ຍະ​ຜ່ານ​ມາ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ-ສ ເກົາຫຼີ ທີ່ມີມູນເຊື້ອດີງາມມາແຕ່ດົນນານ ພວມໄດ້ຮັບການເສີມຂະຫຍາຍຕົວຢ່າງຕໍ່ເນື່ອງ ຊຶ່ງໄດ້ສະແດງອອກໃນການແລກປ່ຽນຢ້ຽມຢາມຂອງຄະນະຜູ້ແທນລະ ດັບຂັ້ນສູງ ນໍາກັນ. ພິເສດ, ທ່ານປະທານປະເທດ ແຫ່ງ ສປປ ລາວ ຢ້ຽມຢາມ ສ ເກົາຫຼີ ປີ 2013 ແລະ ໃນເດືອນກັນຍາ 2019, ທ່ານ ມູນ ແຈ ອິນ ປະທານາທິບໍດີ ສ ເກົາຫຼີ ໄດ້ເດີນທາງມາຢ້ຽມຢາມລັດຖະກິດ ສປປ ລາວ. ສອງປະເທດ ໄດ້ມີການຮ່ວມມືທີ່ດີນໍາກັນທາງດ້ານເສດຖະກິດ, ການຄ້າ, ການລົງທຶນ, ສຶກສາ, ສາທາລະນະສຸກ, ທ່ອງທ່ຽວ, ກີລາ ແລະ ອື່ນໆ. ນອກນີ້, ສ ເກົາຫຼີ ກໍຍັງເປັນປະເທດທີ່ມີການລົງທຶນຢູ່ ສປປ ລາວ, ແບ່ງປັນບົດຮຽນໃນການພັດທະນາປະເທດຊາດ, ໃຫ້ການຊ່ວຍເຫຼືອ ແກ່ ສປປ ລາວ ເປັນຕົ້ນ ການເກັບກູ້ລະເບີດບໍ່ທັນແຕກ UXO, ການຊ່ວຍເຫຼືອເພື່ອການພັດທະນາ ODA, ການຊ່ວຍເຫຼືອດ້ານມະນຸດສະທຳ ແລະ ອື່ນໆ. ສະເພາະການ​ລົງທຶນ​ ຂອງ ສ ​ເກົາຫຼີ ຢູ່ ສປປ ລາວ ​ມີມູນຄ່າປະມານ 751 ລ້ານ​ໂດ​ລາ​ ໃນຈໍານວນ​ 293 ໂຄງການ ແລະ ຈັດຢູ່​ໃນ​ອັນດັບ 5 ຂອງ ການ​ລົງທຶນຂອງ​ຕ່າງປະ​ເທດ ຢູ່ ສປປ ລາວ, ເປັນຕົ້ນລົງທຶນໃນຂະແໜງພະລັງງານໄຟຟ້າ, ການກໍ່ສ້າງ, ການບໍລິການ, ກະສິກຳ, ອຸດສາຫະກໍາ ແລະ ຫັດຖະກໍາ, ໂຮງແຮມ ແລະ ຮ້ານອາຫານ, ທະນາຄານ ແລະ ອື່ນໆ. ພ້ອມ​ທັງສະແດງຄວາມຂອບໃຈຢ່າງຈິງໃຈຕໍ່ ສ ເກົາຫຼີ ທີ່ໄດ້ໃຫ້ການຊ່ວຍເຫຼືອ ສປປ ລາວ ເພື່ອສະກັດກັ້ນ ແລະ ແກ້ໄຂການແຜ່ລະບາດຂອງເຊື້ອພະຍາດ COVID-19 ເປັນຕົ້ນ ຊ່ວຍເຫຼືອຕາມໂຄງການສຸກເສີນ COVID-19, ຊ່ວຍເຫຼືອທຶນຮອນ, ອຸປະກອນທາງການແພດ ຈໍານວນໜຶ່ງເພື່ອສະກັດກັ້ນການເເຜ່ລະບາດຂອງພະຍາດໂຄວິດ-19 ຮອບໃໝ່ ຊຶ່ງມີມູນຄ່າຈໍານວນທັງໝົດ 2.240.000 ກວ່າ ໂດລາ. ນອກນີ້, ມູນລະນິທິຂອງ ສ ເກົາຫຼີ ຍັງໄດ້ຊ່ວຍເຫຼືອລົດດັບເພີງ 2 ຄັນ, ລົດໂຮງໝໍ 6 ຄັນ, ຜ້າອັດປາກ 707 ແກັດໃຫ້ສະພາແຫ່ງຊາດລາວ, ຍັງຊ່ວຍລົດ ຈໍານວນ 10 ຄັນໃຫ້ແກ່ທ້ອງຖິ່ນຂອງລາວ.

ສຳ​ລັບ ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດ ແຫ່ງ ສ ເກົາຫຼີ ໄດ້ຮັບການເສີມ​ຂະ​ຫຍາຍ​ຢ່າງ​ຕໍ່​ເນື່ອງ ຊຶ່ງສະແດງອອກມີການແລກປ່ຽນຢ້ຽມຢາມ ຊຶ່ງກັນ ແລະ ກັນ ໃນລະດັບປະທານສະພາແຫ່ງຊາດ, ລະດັບປະທານກໍາມາທິການ ແລະ ຄະນະມິດຕະພາບລັດຖະສະພາ ລາວ-ສ ເກົາຫຼີ ແລະ ອື່ນໆ.

ເພື່ອສືບຕໍ່ພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດ ສ ເກົາຫຼີ, ທ່ານ ໄຊ​ສົມພອນ ພົມ​ວິ​ຫານ ໄດ້ສະເໜີທິດທາງຮ່ວມມື ໃນຕໍ່ໜ້າ ດັ່ງນີ້:

1. ສືບຕໍ່ແລກປ່ຽນການຢ້ຽມຢາມ ລະຫວ່າງ ຄະນະຜູ້ແທນຂັ້ນສູງ, ຂັ້ນກໍາມາທິການ, ຄະນະເລຂາທິການ ແລະ ຄະນະມິດຕະພາບລັດຖະສະພາ ຂອງສອງອົງການນິຕິບັນຍັດນໍາກັນຢ່າງເປັນປົກກະຕິຕາມເງື່ອນໄຂແບບວິຖີຊີວິດໃໝ່;
2. ສືບຕໍ່ແລກປ່ຽນຂໍ້ມູນຂ່າວສານ ກ່ຽວກັບການປະຕິບັດພາລະບົດບາດ ດ້ານນິຕິບັນຍັດ ດ້ວຍຮູບແບບຈັດກອງປະຊຸມສຳມະນາ ຮູບ​ແບບທາງໄກ ລະຫວ່າງ ບັນດາກຳມາທິການ, ຄະນະມິດຕະພາບລັດຖະສະພາ ແລະ ຄະນະເລຂາທິການສະພາແຫ່ງຊາດລາວ ຮ່ວມກັບ ສະພາແຫ່ງຊາດ ສ ເກົາຫຼີ;
3. ໃນຖານະເປັນອົງການນິຕິບັນຍັດ, ສະເໜີສອງຝ່າຍ ຊຸກຍູ້ ແລະ ສົ່ງເສີມໃຫ້ລັດຖະບານຂອງສອງປະເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະຂໍ້ຕົກລົງທີ່ສອງລັດຖະບານ ໄດ້ລົງນາມຮ່ວມກັນໃຫ້ເປັນຮູບປະທຳ ເປັນຕົ້ນແມ່ນ ສັນຍາຕ່າງໆ ໃນການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ, ສາທາລະນະສຸກ, ການທ່ອງທ່ຽວ, ດ້ານພະລັງງານ ແລະອື່ນໆ;
4. ສືບຕໍ່ຮ່ວມມື ແລະ ສະໜັບສະໜູນ ຊຶ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ ເພື່ອປະກອບສ່ວນໃນພາລະກິດປົກປັກຮັກສາສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ເພື່ອການພັດທະນາແບບຍືນຍົງ ໃນພາກພື້ນ ແລະ ສາກົນ.

ຂ່າວ : ນາງ​ແສງ​ຈັນ

---