ພະນະທ່ານ ບຸນທອງ ຈິດມະນີ, ກໍາມະການກົມການເມືອງ, ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ ສປປ ລາວ ພົບປະກັບ ພະນະທ່ານ ຊຸກິໂອໂນ (Sugiono), ຮອງປະທານພັກເກີຣິນດຣາ (GERINDRA Party) ຂອງອິນໂດເນເຊຍ ພ້ອມຄະ

ເຜີຍ​ແຜ່​ໂດຍ​: moderator ເວ​ລາ: 30/09/2024 12:39:58 ຈຳ​ນວນ​​ຢ້ຽມ​ຊົມ 206 ຄັ້ງ ​

      ໃນຕອນບ່າຍຂອງ ວັນທີ 27 ກັນຍາ 2024 ທີ່ ສໍານັກງານຫ້ອງວ່າການສູນກາງພັກ, ພະນະທ່ານ ບຸນທອງ    ຈິດມະນີ, ກໍາມະການກົມການເມືອງ, ຜູ້ປະຈໍາການ ຄະນະເລຂາທິການສູນກາງພັກ, ຮອງປະທານປະເທດ ສປປ ລາວ ໄດ້ຕ້ອນຮັບການມາຢ້ຽມພົບຂອງ ພະນະທ່ານ ຊຸກິໂອໂນ (Sugiono), ຮອງປະທານພັກເກີຣິນດຣາ (GERINDRA Party) ຂອງອິນໂດເນເຊຍ ພ້ອມຄະນະ ທີ່ເດີນທາງມາຢ້ຽມຢາມ ສປປ ລາວ.

      ໃນໂອກາດດັ່ງກ່າວ, ພະນະທ່ານ ບຸນທອງ ຈິດມະນີ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ການມາຢ້ຽມຢາມ ສປປ ລາວ ຂອງ ຄະນະ ໃນຄັ້ງນີ້, ເປັນການປະກອບສ່ວນອັນສໍາຄັນ ເຂົ້າໃນການຮັດແໜ້ນ ສາຍພົວພັນມິດຕະພາບ ແລະ ເສີມຂະຫຍາຍການຮ່ວມມືອັນດີງາມ ລະຫ່ວາງ ລາວ-ອິນໂດເນເຊຍ ໃຫ້ແໜ້ນແຟ້ນຍິ່ງໆຂຶ້ນ, ຍິນດີ ທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫ່ວາງ ລາວ-ອິນໂດເນເຊຍ ຕະຫຼອດໄລຍະ 67 ປີຜ່ານມາ ແມ່ນໄດ້ຮັບການເສີມຂະຫຍາຍເປັນກ້າວໆມາ, ສະແດງຄວາມຊົມເຊີຍຕໍ່ ພັກເກີຣິນດຣາ ທີ່ໄດ້ຮັບໄຊຊະນະ ໃນການເລືອກຕັ້ງທົ່ວໄປຂອງ ອິນໂດເນເຊຍ ໃນເດືອນກຸມພາ ຜ່ານມາ ແລະ ສະແດງຄວາມຊົມເຊີຍທີ່ ພະນະທ່ານ ພຣາໂບໂວ ສຸບຽນໂຕ, ປະທານພັກເກີຣິບດຣາ ໄດ້ຮັບໄຊຊະນະ ໃນການເລືອກຕັ້ງເປັນປະທານາທິບໍດີ ອິນໂດເນເຊຍ ແລະ ຈະເຂົ້າສາບານຕົນ ໃນວັນທີ 20 ຕຸລາ 2024. ພ້ອມນັ້ນ, ພະນະທ່ານ ຍັງໄດ້ແຈ້ງໃຫ້ຊາບສະພາບພົ້ນເດັ່ນຂອງ ພັກ, ລັດລາວ ໃນການສ້າງສາພັດທະນາເສດຖະກິດ-ສັງຄົມ ຂອງ ສປປ ລາວ ໃນໄລຍະຜ່ານ, ໂດຍສະເພາະການດຶງດູດການລົງທຶນຈາກຕ່າງປະເທດ, ພ້ອມນັ້ນ ຍັງສະແດງຄວາມຂອບໃຈຕໍ່ການຊ່ວຍເຫຼືອຂອງລັດຖະບານອິນໂດເນເຊຍ ໃນດ້ານການສຶກສາ, ການພັດທະນາຊັບພະຍາກອນມະນຸດ, ການຮ່ວມມືທາງດ້ານການຄ້າ ໃຫ້ແກ່ ພັກ-ລັດ ລາວ ແລະ ຫັວງວ່າຝ່າຍອິນໂດເນເຊຍ ຈະສືບຕໍ່ໃຫ້ການຊ່ວຍເຫຼືອ ສປປ ລາວ ໃນດ້ານຕ່າງໆ ຕື່ມອີກໃນຕໍ່ໜ້າ.

        ພະນະທ່ານ ຊຸກິໂອໂນ (Sugiono), ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ກໍ່ຄື ການແຈ້ງສະພາບພົ້ນເດັ່ນຂອງ ພັກ, ລັດ ລາວ ໃຫ້ຊາບ, ຊົມເຊີຍບັນດາຜົນສໍາເລັດໃນດ້ານຕ່າງໆ ທີ່ປະຊາຊົນລາວຍາດມາໄດ້, ການເປັນປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນໆທີ່ປິ່ນອ້ອມ ໂດຍສະເພາະ ຕີລາຄາສູງສາຍພົວພັນມິດຕະພາບ ແລະ ການພົວພັນຮ່ວມມືອັນດີງາມ ລະຫ່ວາງ ອິນໂດເນເຊຍ-ລາວ ໃນຕະຫຼອດໄລຍະ 67 ປີຜ່ານມາ ກໍ່ຄືປະຈຸບັັນ, ໃນໂອກາດນີ້ ພັກ, ລັດ ອິນໂດເນເຊຍ ໄດ້ສະແດງຄວາມຍິນດີທີ່ຈະສືບຕໍ່ຊຸກຍູ້ ແລະ ສະໜັບສະໜູນ ພັກ, ລັດ ສປປ ລາວ ໃນການເປັນປະທານອາຊຽນ ຄັ້ງທີ 44 ແລະ 45 ທີ່ ສປປ ລາວ ເປັນເຈົ້າພາບ ໃຫ້ປະສົບຜົນສໍາເລັດຢ່າງຈົບງາມ.

       ໃນໂອກາດການມາຢ້ຽມຢາມຄັ້ງນີ້ ພະນະທ່ານ ຊຸກິໂອໂນ (Sugiono) ໄດ້ຕາງໜ້າ ພັກເກີຣິນດຣາ ມອບເງິນ ຈໍານວນ 1,000,000 ໂດລາສະຫະລັດ ໃຫ້ແກ່ ພັກ ປປ ລາວ ເພື່ອເປັນການສະໜັບສະໜູນ ສປປ ລາວ ໃນການເປັນປະທານອາຊຽນ ປີ 2024.

       ສອງຝ່າຍ ສະແດງຄວາມຍິນດີໃນການລິເລີ່ມສ້າງສາຍພົວພັນ ລະຫວ່າງ ພັກ ປປ ລາວ ກັບ ພັກເກີຣິນດຣາ ເພື່ອແລກປ່ຽນບົດຮຽນນໍາກັນ ໃນດ້ານຕ່າງໆ, ປະກອບສ່ວນເຂົ້າໃນການພົວພັນຂອງ 2 ປະເທດ ໃຫ້ນັບມື້ໄດ້ຮັບການພັດທະນາຂຶ້ນເລື້ອຍໆ ເພື່ອສັນຕິພາບ, ເອກະລາດ, ມິດຕະພາບ ແລະ ການຮ່ວມມື ໃນພາກພື້ນ ແລະ ໃນໂລກ.

---