ຄະນະຜູ້ແທນຄະນະສັນຕິພາບ ແລະ ສາມັກຄີ ຂອງລາວ ເຂົ້າຮ່ວມກອງປະຊຸມສາກົນເພື່ອສະເຫຼີມສະຫຼອງວັນສັນຕິພາບສາກົນ 21 ກັນຍາ ແລະ ຢ້ຽມຢາມ ຢູ່ ສປ ຈີນ.

ເຜີຍ​ແຜ່​ໂດຍ​: moderator ເວ​ລາ: 26/09/2024 15:58:54 ຈຳ​ນວນ​​ຢ້ຽມ​ຊົມ 202 ຄັ້ງ ​

     ໂດຍຕອບສະໜອງຕາມການເຊີນ ຂອງ ສະມາຄົມປະຊາຊົນຈີນ ເພື່ອສັນຕິພາບ ແລະ ຫຼຸດຜ່ອນອາວຸດ ຄະນະຜູ້ແທນຄະນະສັນຕິພາບ ແລະ ສາມັກຄີຂອງລາວ ນຳໂດຍ ທ່ານ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງລາວ ໄດ້ເຂົ້າຮ່ວມກອງປະຊຸມສາກົນສະເຫຼີມ ສະຫຼອງວັນສັນຕິພາບສາກົນ ປະ​ຈຳ​ປີ 2024 ແລະ ຢ້ຽມຢາມ ຢູ່ ສປ ຈີນ.

     ໃນວັນທີ 19 ກັນ​ຍາ 2024, ທ່ານ ສົມມາດ ພົລເສນາ ໄດ້ເຂົ້າຮ່ວມພິທີເປີດກອງປະຊຸມສາກົນເພື່ອສະ ເຫຼີມສະຫຼອງວັນສັນຕິພາບສາກົນ 21 ກັນຍາ. ໃຫ້ກຽດເຂົ້າຮ່ວມ ແລະ ມີຄໍາເຫັນກ່າວເປີດ ໂດຍ ທ່ານ Han Zheng, ຮອງ​ປະ​ທານ​ປະ​ເທດ ສ​ປ ຈີນ. ນອກນັ້ນ, ຍັງມີ​ບັນ​ດາທ່ານອະ​ດີດ​ປະ​ທາ​ນາ​ທິ​ບໍ​ດີ, ລັດ​ຖະ​ມົນ​ຕີ, ຮອງ​ລັດ​ຖະ​ມົນ​ຕີ ຈາກ 80 ປະເທດ ແລະ ອົງການຈັດຕັ້ງສາກົນເຂົ້າຮ່ວມ 150 ທ່ານ. ໃນໂອກາດດັ່ງກ່າວ ທ່ານປະທານຄະ ນະສັນຕິພາບ ແລະ ສາມັກຄີ ຂອງລາວ ໄດ້ມີຄໍາເຫັນໃນເວທີໃນຫົວຂໍ້ ເພື່ອລະນຶກວັນສາກົນ ເພື່ອສັນຕິພາບ ພາຍໃຕ້ຄຳຂວັນ “  ຢຶດຫມັ້ນຕໍ່ອະນາຄົດຮ່ວມກັນເພື່ອສ້າງໂລກແຫ່ງການຢູ່ຮ່ວມກັນໂດຍສັນຕິ”  ຄໍາຂວັນດັ່ງກ່າວແມ່ນເປົ້າຫມາຍອັນແທ້ຈິງ ຂອງວິໃສທັດທາງການທູດທີ່ ທ່ານ ສີ ຈິ້ນຜີງ ໄດ້ວາງອອກໃນໄລຍະໃຫມ່ ເພື່ອຜົນປະໂຫຍດອັນຍາວນານ ຂອງບັນດາປະຊາຊາດ. ທ່ານ ສົມມາດ ພົລເສນາ ໄດ້ມີຄໍາເຫັນຕີລາຄາສະພາບການພາກພື້ນ ແລະ ສາກົນ ເຫັນວ່າຍັງສືບຕໍ່ຜັນແປໄປຢ່າງໄວວາ, ສັບສົນ, ບັນຫາສະພາບອາກາດ, ໄພພິບັດທໍາມະຊາດ ແລະ ການປະທະກັນ ດວ້ຍກໍາລັງອາວຸດຍັງສືບຕໍ່ເກີດຂຶ້ນຢູ່ຫລາຍຂົງເຂດ ຂອງໂລກ ແລະ ແຜ່ລາມເປັນວົງກວ້າງ, ບັນຫາເຫຼົ່ານັ້ນໄດ້ເປັນໄພຂົ່ມຂູ່ຕໍ່ສັນຕິພາບ, ຄວາມໝັ້ນຄົງສາກົນ ແລະ ການພັດທະນາ ຂອງບັນດາປະເທດໃນໂລກ. ພ້ອມນັ້ນ, ກໍ່ໄດ້ຊົມເຊີຍ ແລະ ຕີລາຄາສູງຕໍ່ການປະກອບສ່ວນຢ່າງເອົາໃຈໃສ່ ຂອງ ສປ ຈີນ ໃນຄວາມພະຍາຍາມສ້າງສັນຕິພາບ, ຄວາມໝັ້ນຄົງ ແລະ ການພັດທະນາ ຂອງໂລກ ໂດຍສະເພາະແມ່ນການລິເລີ່ມແນວຄວາມຄິດ “ 5 ຫຼັກການຢູ່ຮ່ວມກັນໂດຍສັນຕິ ”. ສໍາລັບປະຊາຊົນລາວຮູ້ດີເຖິງຄຸນຄ່າ ຂອງສັນຕິພາບ ແລະ ຜົນຮ້າຍຂອງສົງຄາມ ແລະ ພ້ອມທີ່ຈະຮ່ວມກັບປະຊາຊາດຜູ້ຮັກຫອມສັນຕິພາບໃນໂລກ ໃນການສະໜັບສະໜູນ ແລະ ຕໍ່ສູ້ເພື່ອສັນຕິພາບ ເພື່ອເຮັດໃຫ້ໂລກ ຂອງພວກເຮົາມີຄວາມສະຫງົບ, ມີຄວາມຍຸຕິທໍາ ເພື່ອໃຫ້ຄົນລຸ່ນໃໝ່ ຂອງພວກເຮົາໄດ້ດໍາລົງຊີວິດຢ່າງມີຄວາມສຸກ.

     ໃນກອງປະຊຸມ ຄະນະຜູ້ແທນຈາກບັນດາປະເທດຕ່າງໆ ທີ່ຮັກຫອມສັນຕິພາບ ແລະ ຄວາມເປັນທຳຈະໄດ້ແລກປ່ຽນຄວາມຄິດເຫັນ ແລະ ແບ່ງປັນບົດຮຽນການເຄື່ອນໄຫວວຽກງານສັນຕິພາບ ເພື່ອປະກອບສ່ວນເຂົ້າໃນການເສີມສ້າງສັນຕິພາບ ແລະ ຄວາມໝັ້ນຄົງສາກົນ ຖືເປັນກົນໄກແຫ່ງການ ຮ່ວມມືພາຄີທີ່ທຸກຝ່າຍໄດ້ຮັບຜົນປະໂຫຍດຢ່າງແທ້ຈິງ, ທັງເປີດກວ້າງພັດທະນາເສດຖະກິດໂລກໃນທຸກດ້ານ ໂດຍຢຶດຖືເອົາຄວາມຜາສຸກ ຂອງປະຊາຊົນໃນທົ່ວໂລກເປັນບຸລິມະສິດອັນດັບໜຶ່ງ.

ນອກຈາກເຂົ້າຮ່ວມກອງປະຊຸມ, ຄະນະຜູ້ແທນລາວຍັງໄດ້ພົບປະສອງຝ່າຍກັບການ​ນຳ ຂອງ​ແຂວງ​ຊານ​ຕົ່ງ,  ສ​ປ ຈີນ. ຝ່າຍ ຈີນ ໄດ້ແຈ້ງຂໍ້ມູນ ແລະ ສະພາບການພົ້ນເດັ່ນ ຂອງການພັດທະນາເສດຖະກິດ-ສັງຄົມ ຂອງ ແຂວງຊານຕົ່ງ ໃຫ້ຊາບ, ເຊິ່ງແຂວງຊານຕົງເປັນແຂວງທີ່ມີປະຫວັດສາດຍາວນານ, ເປັນບ້ານເກີດ ຂອງ ທ່ານ ຂົງຈຶ້, ມີບົດ ບາດສໍາຄັນດ້ານວັດ​ທະ​ນະ​ທໍາ ແລະ ເປັນແຂວງທີ່ນໍາໜ້າດ້ານການ​ສຶກສາ, ການຄົ້ນຄວ້າ ແລະ ມີການຂະຫຍາຍຕົວທາງດ້ານເສດຖະກິດອັນດັບ 3 ຂອງປະເທດຈີນ. ສ່ວນຝ່າຍ ລາວ ກໍ່ໄດ້ແຈ້ງສະ​ພາບອັນ​ພົ້ນ​ເດັ່ນ​ເປັນ​ຕົ້ນ​ແມ່ນປະຈຸບັນ, ພັກ ແລະ ລັດຖະບານລາວ ພວມສຸມໃສ່ການຈັດຕັ້ງປະຕິບັດມະຕິຄັ້ງທີ XI ຂອງພັກ ແລະ ແຜນພັດທະນາເສດ ຖະກິດ-ສັງຄົມ 5 ປີ ຄັ້ງທີ 9 ຂອງລັດຖະບານ. ໃນເດືອນພຶດສະພາຜ່ານມາ, ສູນກາງພັກ ໄດ້ດໍາເນີນກອງປະຊຸມຄົບຄະນະເທື່ອທີ 8 ສະໄໝທີ XI ໂດຍໄດ້ຕີລາຄາຄືນ ແລະ ໃຫ້ທິດຊີ້ນໍາຕໍ່ການ​ແກ້​ໄຂ​ບັນ​ຫາ​ຫຍຸ້ງ​ຍາກ​ທາງ​ດ້ານ​ເສດ​ຖະ​ກິດ, ການ​ເງິນ ແລະ ແກ້​ໄຂ​ສະ​ພາບ​ການ​ເປັນ​ຢູ່ ຂອງ​ປະ​ຊາ​ຊົນ.

     ສອງຝ່າຍ ຍັງໄດ້ຕີລາຄາສູງຕໍ່ສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດ ຮອບດ້ານ, ໝັ້ນຄົງຍາວນານຕາມ ທິດ 4 ດີ ແລະ ຄູ່ຮ່ວມຊາຕາກຳ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ ທີ່ນັບມື້ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງນັບມື້ກ້າວເຂົ້າສູ່ລວງເລິກ ແລະ ນໍາເອົາຜົນໂຫຍດຕົວຈິງມາສູ່ປະຊາຊົນສອງຊາດ.

---