ຄະນະຜູ້ແທນຄະນະສັນຕິພາບ ແລະ ສາມັກຄີ ຂອງລາວ ຢ້ຽມຢາມ ແລະ ເຮັດວຽກຢູ່ ສສ ຫວຽດນາມ

ເຜີຍ​ແຜ່​ໂດຍ​: moderator ເວ​ລາ: 27/08/2024 10:31:49 ຈຳ​ນວນ​​ຢ້ຽມ​ຊົມ 222 ຄັ້ງ ​

   ໂດຍຕອບສະໜອງຕາມການເຊີນ ຂອງ ຄະນະສັນຕິພາບ ຫວຽດນາມ, ຄະນະຜູ້ແທນຄະນະສັນ ຕິພາບ ແລະ ສາມັັກຄີຂອງລາວ ນຳໂດຍ ສະຫາຍ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງລາວ ໄດ້ເດີນທາງໄປ ຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ແຕ່ວັນທີ 21-24 ສິງຫາ 2024.

   ໃນວັນທີ 22 ສິງຫາ 2024, ຄະນະຜູ້ແທນຄະນະສັນຕິພາບ ແລະ ສາມັກຄີ ຂອງລາວ ໄດ້ເຂົ້າຢ້ຽມຂ່ຳນັບ ສະຫາຍ ເຈີນ ແທັງ ເມີ້ນ, ​ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ປະ​ທານ​ສະ​ພາ​ແຫ່ງ​ຊາດຫວຽດນາມ. ສອງຝ່າຍ ຕີລາຄາສູງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ລາວ - ຫວຽດນາມ ຍັງສືບຕໍ່ໄດ້ຮັບການເສີມຂະຫຍາຍ ນັບມື້ກ້າວເຂົ້າສູ່ລວງເລິກ, ສວຍສົດງົດງາມ ແລະ ເກີດດອກອອກຜົນນຳເອົາຜົນປະໂຫຍດຕົວຈິງ ມາສູ່ປະຊາຊົນ ສອງຊາດ ລາວ ແລະ ຫວຽດນາມ. ພ້ອມນັ້ນ, ຍັງໄດ້ແຈ້ງສະພາບອັນພົ້ນເດັ່ນຂອງແຕ່ລະປະເທດໃຫ້ກັນຊາບ, ລວມທັງ ການເຄື່ອນໄຫວວຽກງານສະພາແຫ່ງຊາດ.  

   ໃນວັນດຽວກັນ, ຜູ້ແທນຄະນະສັນຕິພາບ ແລະ ສາມັກຄີ ຂອງລາວ ຍັງໄດ້ພົບປະເຮັດວຽກ ກັບ ຄະນະສັນຕິພາບຫວຽດນາມ. ຝ່າຍລາວ ນໍາໂດຍ ສະຫາຍ ສົມມາດ ພົລເສນາ, ກຳມະການສູນກາງ ພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງລາວ ແລະ ຝ່າຍ ຫວຽດນາມ ສະຫາຍ ອວງ ຈູ ລິວ, ອະດີດ ກຳມະການສູນກາງພັກ, ອະດີດຮອງປະທານສະພາແຫ່ງຊາດ, ປະທານຄະນະສັນຕິພາບ ຫວຽດນາມ ໃນການພົບ ປະສອງຝ່າຍ ໄດ້ຕີລາຄາການພົວພັນຮ່ວມມືໃນໄລຍະຜ່ານມາ, ປຶກສາຫາລື, ແລກປ່ຽນຂໍ້ມູນຂ່າວສານ ແລະ ບາງທັດ ສະນະຕໍ່ບັນຫາ ແລະ ສະພາບການພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈ. ພ້ອມກັນນັ້ນ ສອງຝ່າຍ ໄດ້ແຈ້ງສະພາບການອັນພົ້ນເດັ່ນການພັດທະນາ ເສດຖະກິດ-ສັງຄົມ ຂອງແຕ່ລະປະເທດ ໃຫ້ກັນຊາບ ແລະ ຍັງເຫັນດີ ເປັນເອກະພາບ ຈະສືບຕໍ່ກົນໄກການແລກປ່ຽນຢ້ຽມຢາມ, ສະໜອງຂໍ້ມູນຂ່າວສານ, ສະໜັບສະໜູນເຊິ່ງກັນ ແລະ ກັນ ໃນການເຄື່ອນໄຫວໃນເວທີພາກພື້ນ ແລະ ສາກົນ, ຮ່ວມມືກັນດ້ວຍຫລາຍຮູບການ ແລະ ຫລາຍວິທີ ເພື່ອເຮັດ ໃຫ້ການພົວພັນມີສີສັນ ແລະ ມີປະສິດທິພາບ ແລະ ປະສິດທິຜົນເພີ່ມຂຶ້ນ. ນອກນັ້ນ, ຍັງໄດ້ແລກປ່ຽນບົດຮຽນການ ເຄື່ອນໄຫວການທູດປະຊາຊົນກັບ ສະຫາຍ ຟານ ແອັງ ເຊີນ, ປະທານສະຫະພັນບັນດາອົງການຈັດຕັ້ງມິດຕະພາບ ຫວຽດນາມ.

   ນອກຈາກພົບປະເຮັດວຽກຢູ່ນະຄອນຫຼວງຮ່າໂນ້ຍ, ຄະນະຜູ້ແທນ ຍັງໄດ້ໄປຢ້ຽມຢາມ ແລະ ພົບປະການນໍາ ແຂວງຮ໋າຍຟອງ ແລະ ຢ້ຽມຢາມ ສະຖານທີ່ທ່ອງທ່ຽວປະຫັວດສາດ, ວັດທະນະທໍາ ຈໍານວນໜຶ່ງ, ເຊິ່ງການໄປຢ້ຽມ ຢາມແຕ່ລະບ່ອນ ແມ່ນໄດ້ຮັບການຕ້ອນຮັບຢ່າງອົບອຸ່ນ ແລະ ອຳນວຍຄວາມສະດວກເປັນຢ່າງດີ.

   ການຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ຂອງ ຄະນະຜູ້ແທນ ຄະນະສັນຕິພາບ ແລະ ສາມັກຄີ ຂອງລາວ ໃນຄັ້ງນີ້ ໄດ້ຮັບຜົນສໍາເລັດຢ່າງຈົບງາມ ແລະ ມີເນື້ອໃນເລິກເຊິ່ງ.

---