ຄະນະຜູ້ແທນສະມາຄົມມິດຕະພາບ ລາວ - ຣັດເຊຍ ສຳເລັດການຢ້ຽມຢາມ ແລະ ເຄື່ອນໄຫວວຽກງານ ທີ່ ສ. ຣັດເຊຍ, ໃນລະຫວ່າງວັນທີ 10 - 18 ພຶດສະພາ 2023
ເຜີຍແຜ່ໂດຍ: editor ເວລາ: 18/05/2023 15:55:52 ຈຳນວນຢ້ຽມຊົມ 606 ຄັ້ງ ໂດຍຕອບສະໜອງຕາມຄຳເຊີນ ຂອງ ຄະນະສະມາຄົມມິດຕະພາບ ຣັດເຊຍ -ລາວ, ຜູ້ແທນສະມາຄົມມິດຕະພາບ ລາວ - ຣັດເຊຍ ນໍາໂດຍ ສະຫາຍ ປອ. ສັນຕິສຸກ ສິມມາລາວົງ, ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ຮອງປະທານສະມາຄົມມິດຕະພາບ ລາວ - ຣັດເຊຍ ໄດ້ເດີນທາງເຂົ້າຮ່ວມພິທີເປີດງານວາງສະແດງຮູບພາບ ກ່ຽວກັບ ປະເທດລາວ ພາຍໃຕ້ຄຳຂວັນ: "ປະເທດລາວ ປະເທດລ້ານຊ້າງ ແລະ ຄັນຮົ່ມສີຂາວ" ທີ່ ນະຄອນຫຼວງມົດສະກູ, ສ. ຣັດເຊຍ ໂດຍການເປັນເຈົ້າພາບຮ່ວມ ຂອງ ສະມາຄົມມິດຕະພາບ ຣັດເຊຍ - ລາວ ແລະ ກອງທຶນສັນຕິພາບຣັດເຊຍ, ໂດຍໃຫ້ກຽດເຂົ້າຮ່ວມ ຂອງທ່ານ ວະລາດິມີຣ໌ ໂຊໂກລິນ ເລໂອນິດາວິດຈ໌ (Vladimir Sokolin Leonidovich), ປະທານສະມາຄົມມິດຕະພາບ ຣັດເຊຍ - ລາວ ພ້ອມດ້ວຍຄະນະ, ທ່ານ ນາງ ວິລາວັນ ເຢຍປໍເຮີ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ. ຣັດເຊຍ ພ້ອມດ້ວຍຄະນະ, ທ່ານ ນາງ ເຢເລນາ ຊູຕໍຣ໌ມິນາ ວາຊີລີເຢັບນາ (Elena Sutormina Vasilievna)
ຮອງປະທານຄົນທີໜຶ່ງ ຂອງ ກຳມາທິການກອງທຶນສາກົນ "ກອງທຶນສັນຕິພາບຣັດເຊຍ", ບັນດາອົງການຈັດຕັ້ງກ່ຽວຂ້ອງ ຂອງຣັດເຊຍ ແລະ ບັນດານັກສຶກສາລາວ.
ຫົວໜ້າຄະນະຜູ້ແທນສະມາຄົມມິດຕະພາບ ລາວ - ຣັດເຊຍ ໄດ້ປະກອບຄຳເຫັນໃນພິທີເປີດງານດັ່ງກ່າວ ໂດຍສະແດງຄວາມຂອບໃຈເປັນຢ່າງສູງຕໍ່ການເຊື້ອເຊີນ ແລະ ຕີລາຄາສູງຕໍ່ການເອົາໃຈໃສ່ ແລະ ໃຫ້ກຽດ ຂອງ ສະມາຄົມມິດຕະພາບ ຣັດເຊຍ - ລາວ ແລະ ກອງທຶນສັນຕິພາບຣັດເຊຍ, ໂດຍສະເພາະແມ່ນ ການປະກອບສ່ວນອັນສຳຄັນ ຂອງ ທ່ານ ອາເລັກຊານເດີ ລະວົບ (Alexander Lvov), ຊ່າງຖ່າຍຮູບຜູ້ມີຊື່ສຽງ ຂອງຣັດເຊຍ ທີ່ໄດ້ເດີນທາງຖ່າຍທໍາຮູບພາບສະຖານທີ່ສຳຄັນຕ່າງໆ ຂອງລາວ ນັບແຕ່ວັນທີ 4 ກຸມພາ - 3 ມີນາ 2023 ຜ່ານມາ ແລະ ໄດ້ຖືກນໍາມາວາງສະແດງ ທີ່ ນະຄອນຫຼວງມົດສະກູ ເພື່ອເປັນການໂຄສະນາເຜີຍແຜ່ສະຖານທີ່ທ່ອງທ່ຽວສຳຄັນ ຂອງລາວ ໃຫ້ປະຊາຊົນຣັດເຊຍ ແລະ ບັນດານັກທ່ອງທ່ຽວທົ່ວໂລກ ໄດ້ຮັບຮູ້ ກ່ຽວກັບ ການທ່ອງທ່ຽວ ຂອງລາວ. ພ້ອມນີ້, ຄະນະຜູ້ແທນ ຍັງໄດ້ຢ້ຽມຢາມສູນວິທະຍາສາດ ແລະ ວັດທະນະທຳລາວ ທີ່ ນະຄອນຫຼວງມົດສະກູ ແລະ ເຂົ້າຮ່ວມງານພິທີປະທັບຕາໃສ່ສະແຕັມໄປສະນີ ເນື່ອງໃນໂອກາດຄົບຮອບ 100 ປີ ຂອງ ບໍລິສັດ ມຽດສະດູນາໂຣດນາຢາ ຄະຍີກາ (MK). ຈາກນັ້ນ, ຄະນະຜູ້ແທນສະມາຄົມມິດຕະພາບ ລາວ - ຣັດເຊຍ ໄດ້ເດີນທາງຢ້ຽມຢາມ ສາຂາ ຂອງ ສະມາຄົມມິດຕະພາບ ຣັດເຊຍ - ລາວ ທີ່ ນະຄອນເຊັນປີເຕີສະເບີກ ເພື່ອເສີມຂະຫຍາຍສາຍພົວພັນມິດຕະພາບ ລະຫວ່າງ ສອງສະມາຄົມມິດຕະພາບ ລາວ - ຣັດເຊຍ ແລະ ຣັດເຊຍ - ລາວ ໃຫ້ມີຄວາມແໜ້ນແຟ້ນຍິ່ງຂຶ້ນ, ຊຸກຍູ້ໃຫ້ປະຊາຊົນສອງຊາດ ລາວ - ຣັດເຊຍ ມີຄວາມເຂົ້າໃຈອັນດີຕໍ່ກັນ ແລະ ໄປມາຫາສູ່ກັນຫຼາຍຂຶ້ນ. ນອກນັ້ນ, ຄະນະຜູ້ແທນສະມາຄົມມິດຕະພາບ ລາວ - ຣັດເຊຍ ຍັງໄດ້ຢ້ຽມຢາມລັດວິສາຫະກິດ ລຽນປາລິກຣາຟ໌ມັດສ໌ (Lenpoligrafmash) ເພື່ອສຶກສາຄວາມເປັນໄປໄດ້ໃນການສົ່ງເສີມການຮ່ວມມືດ້ານການຄ້າ, ທຸລະກິດ Startup, ເຕັກໂນໂລຊີ ແລະ ນະວັດຕະກໍາ ພ້ອມທັງ ຊຸກຍູ້ໃຫ້ພາກທຸລະກິດ ຂອງ ນະຄອນເຊັນປີເຕີສະເບີກ ເພີ່ມທະວີການລົງທຶນໃນຂະແໜງການທີ່ສອງຝ່າຍມີຄວາມສົນໃຈ ແລະ ມີຜົນປະໂຫຍດຮ່ວມກັນ, ໂດຍສະເພາະແມ່ນ ຂະແໜງການທີ່ ສປປ ລາວ ມີທ່າແຮງ. ສະຫຼຸບລວມແລ້ວ, ການເດີນທາງຢ້ຽມຢາມ ແລະ ເຄື່ອນໄຫວວຽກງານ ຂອງ ຄະນະສະມາຄົມມິດຕະພາບ ລາວ - ຣັດເຊຍ ໃນຄັ້ງນີ້ແມ່ນປະສົບຜົນສຳເລັດຢ່າງຈົບງາມ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20