ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ພົບປະກັບ ຫົວໜ້າຄະນະພົວພັນຕ່າງປະເທດສູນກາງພັກກອມມນູນິດກູບາ

ເຜີຍ​ແຜ່​ໂດຍ​: moderator ເວ​ລາ: 08/07/2026 15:06:51 ຈຳ​ນວນ​​ຢ້ຽມ​ຊົມ 32 ຄັ້ງ ​

      ໃນວັນທີ 7 ກໍລະກົດ 2026, ສະຫາຍ ບຸນເຫຼືອ ພັນດານຸວົງ, ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ໄດ້ພົບປະຜ່ານຮູບແບບວິດີໂອທາງໄກ ກັບ ສະຫາຍ ເອມີລິໂອ ຣັດມິຣ ໂລຊາດາ ກາຣເຊຍ (Emilio Ratmir Lozada Garcia), ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດກູບາ.

     ໃນໂອກາດດັ່ງກ່າວ, ສະຫາຍ ບຸນເຫຼືອ ພັນດານຸວົງ ໄດ້ສະແດງຄວາມປິຕິຍິນດີເປັນຢ່າງຍິ່ງ ທີ່ໄດ້ມີໂອກາດພົບ​ປະ​ຜ່ານວີ​ດິໂອທາງໄກ​ ກັບ ສະຫາຍ ເອມີລິໂອ ຣັດມິຣ ໂລຊາດາ ກາຣເຊຍ​. ຝ່າຍລາວ ໄດ້ແຈ້ງສະພາບການທີ່ພົ້ນເດັ່ນຢູ່ ສປປ ລາວ ໃນໄລຍະຜ່ານມາ, ໂດຍສະເພາະ ຜົນສໍາເລັດການຈັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ; ​ຊົມ​ເຊີຍ ແລະ ຕີລາຄາສູງ​ຕໍ່​​ຜົນສຳ​ເລັດ​ອັນໃຫຍ່ຫຼວງທີ່ປະຊາຊົນກູ​ບາອ້າຍນ້ອງ ​ພາຍໃຕ້ການນໍາພາ​ອັນ​ເດັດ​ດ່ຽວ​ໜຽວ​ແໜ້ນຂອງ ພັກກອມມູນິດກູບາ ຍາດມາໄດ້ຕະຫຼອດໄລຍະ 60 ກວ່າປີຜ່ານມາ, ໂດຍສະເພາະແມ່ນຜົນ​ສຳ​ເລັດ​ທີ່​ມີ​ຄວາມ​ໝາຍ​ຄວາມ​ສຳ​ຄັນ​ໃນ​ການ​ພັດທະນາ​ເສດຖະກິດ-​ສັງຄົມ​​ ແລະ ປົກ​ປັກ​ຮັກສາໝາກຜົນ​​ຂອງການ​ປະຕິ ວັດ ໃນທ່າມກາງການຖືກປິດລ້ອມທາງດ້ານເສດຖະກິດ, ການຄ້າ ແລະ ການເງິນ ເປັນເວລາກວ່າຫົກທົດສະວັດ.

      ສະຫາຍ ເອມີລິໂອ ຣັດມິຣ ໂລຊາດາ ກາຣເຊຍ​ ໄດ້ແຈ້ງໃຫ້ຊາບກ່ຽວກັບ​ການຈັດຕັ້ງປະຕິບັດມະຕິກອງປະຊຸມໃຫ່ຍ ຄັ້ງທີ VIII ຂອງພັກກອມ​ມູ​ນິດ​ກູ​ບາ ແລະ ການກະກຽມຈັດກອງປະຊຸມໃຫຍ່ຄັ້ງທີ IX ຂອງພັກກອມມູນິດກູບາ ກໍ່ຄືການພັດທະນາເສດຖະກິດ-ສັງຄົມ ຂອງ ສ.ກູບາ. ພ້ອມນັ້ນ, ຍັງໄດ້ສະ​ແດງ​ຄວາມ​ຊົມ​ເຊີຍ ​ແລະ ຕີ​ລາຄາ​ສູງ​ຕໍ່ບັນດາຜົນສຳ​ເລັດ​ ການຈັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ  ແລະ ຜົນສໍາເລັດ ໃນ​ພາລະ ກິດປົກປັກຮັກສາ ແລະ ​ສ້າງສາ​ພັດທະນາ​ປະ​ເທ​ດຊາດ ພາຍ​ໃຕ້​ການ​ນຳພາ​ອັນຖືກຕ້ອງ ແລະ ສະຫຼາດສ່ອງໃສຂອງ ພັກປະຊາຊົນປະຕິວັດລາວ, ອັນ​ໄດ້​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ປະຊາຊົນ​ລາວ ​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ​ເທື່ອ​ລະ​ກ້າວ;      ບົ​ດບາດ ແລະ ​​ອິດ​ທິພົນ ຂອງ ພັກ ແລະ ລັດຖະບານ ສປປ ລາວ​ ນັບ​ມື້​ສູງ​ເ​​ດັ່ນຂື້ນ​ໃນ​ເວ​ທີພາກ​ພື້ນ ແລະ ​ສາກົ​ນ; ພ້ອມທັງສະ​ແດງ​ຄວາມ​ຂອບ​ໃຈ​ມາ​ຍັງ ​ພັກ, ລັດຖະບານ ​ແລະ ປະຊາຊົນ​ລາວອ້າຍ​ນ້ອງ ທີ່​ໃຫ້ການຊ່ວຍ​ເຫຼືອ ​ແລະ ​ສະໜັບສະໜູນ​ການ​ປະຕິວັດ​ກູ​ບາ ຕະຫຼອດ​ໄລຍະ​ຜ່ານ​ມາ.

      ສອງຝ່າຍ ຍັງໄດ້ຕີລາຄາສູງ ແລະ ປິຕິຍິນດີ ທີ່ສາຍພົວພັນ ແລະ ການຮ່ວມມືອັນດີງາມ ລະຫວ່າງ ລາວ ແລະ ກູບາ ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ; ປຶກສາຫາລື ກ່ຽວກັບ ທິດທາງໃນການເສີມຂະຫຍາຍສາຍພົວພັນຮ່ວມມືໃນຕໍ່ໜ້າ; ປຶກສາຫາລື ແລະ ແລກປ່ຽນທັດສະນະ ກ່ຽວກັບບັນຫາພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈ. ການພົບປະໄດ້ດໍາເນີນໄປດ້ວຍບັນຍາກາດທີ່ສະໜິດສະໜົມ, ເປັນກັນເອງ ແລະ ປະສົບຜົນສໍາເລັດຢ່າງຈົບງາມ.

---