ຄະນະຜູ້ແທນ ພັກ ປປ ລາວ ເຂົ້າຮ່ວມກອງປະຊຸມຄະນະປະຈໍາ ຂອງ ອົງການກອງປະຊຸມສາກົນ ຂອງບັນດາພັກການເມືອງໃນອາຊີ (ICAPP) ຄັ້ງທີ 45 ແລະ ກອງປະຊຸມປິ່ນອ້ອມ ທີ່ນະຄອນຫຼວງອູລານບາຕໍ, ປະເທດ ມົງໂກລີ.

ເຜີຍ​ແຜ່​ໂດຍ​: moderator ເວ​ລາ: 29/06/2026 08:51:22 ຈຳ​ນວນ​​ຢ້ຽມ​ຊົມ 38 ຄັ້ງ ​

      ຄະນະຜູ້ແທນພັກ ປປ ລາວ ນໍາໂດຍ ສະຫາຍ ວາລະໄຊ ເລັ່ງສະຫວັດ, ກໍາມະການສໍາຮອງສູນກາງພັກ, ຮອງຫົວ ໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມຄະນະປະຈໍາ ຂອງອົງການກອງປະຊຸມສາກົນ ຂອງບັນດາພັກການເມືອງໃນອາຊີ (ICAPP ຫຼື ໄອແຄັບ) ຄັ້ງທີ 45 ແລະ ກອງປະຊຸມປິ່ນອ້ອມ, ໃນລະຫວ່າງວັນທີ 25-28 ມິຖຸນາ 2026 ທີ່ນະຄອນຫຼວງອູລານບາຕໍ, ປະເທດມົງໂກລີ ໂດຍການເປັນເຈົ້າພາບ ຂອງ ພັກປະຊາຊົນມົງໂກລີ ຮ່ວມກັບ ກອງເລຂາໄອແຄັບ, ມີຄະນະຜູ້ແທນຈາກພັກການເມືອງ ທີ່ເປັນສະມາຊິກຄະນະປະຈໍາຂອງ 22 ພັກການເມືອງ ຈາກ 17 ປະເທດ ເຂົ້າຮ່ວມ.

     ກອງປະຊຸມຄະນະປະຈໍາໄອແຄັບ ແມ່ນກອງປະຊຸມກົນໄກປົກກະຕິຂອງອົງການດັ່ງກ່າວ ທີ່ຈັດຂືຶ້ນສອງຄັ້່ງຕໍ່ປີ ໂດຍໄດ້ເຕົ້າໂຮມເອົາສະເພາະບັນດາພັກການເມືອງ ທີ່ເປັນສະມາຊິກຄະນະປະຈໍາ ເພື່ອທົບທວນຄືນຜົນສໍາເລັດ ຂອງໄອແຄັບ ໃນໄລຍະ 06 ເດືອນຕົ້ນປີ 2026; ກໍານົດທິດທາງ ແລະ ແຜນການເຄື່ອນໄຫວໃນຕໍ່ໜ້າ ລວມທັງ ປຶກສາຫາລື ກ່ຽວກັບ ການຈັດກອງປະຊຸມໃຫຍ່ຂອງໄອແຄັບ ຄັ້ງທີ 13 ເຊິ່ງມີແຜນຈະຈັດຂຶ້ນໃນເດືອນພະຈິກ ທີ່ຈະມາເຖິງນີ້. ພ້ອມນັ້ນ, ກອງປະຊຸມຄັ້ງນີ້ ຍັງໄດ້ມີການຈັດກອງປະຊຸມພິເສດ ຄູ່ຂະໜານກັນ ພາຍໃຕ້ຫົວຂໍ້: “ການຫັນປ່ຽນ ຂອງອາຊີ ໃນຍຸກດີຈີຕອນ: ສິ່ງທ້າທ້າຍ ຂອງປັນຍາປະດິດ” (Asian Transformation in the Digital Age: The Challenge of AI).

      ໃນກອງປະຊຸມຄັ້ງນີ້, ບັນດາຜູ້ແທນທີ່ເຂົ້າຮ່ວມກອງປະຊຸມ ໄດ້ລົງເລິກແລກປ່ຽນ ກ່ຽວກັບ ແຜນການດໍາເນີນງານ ຂອງໄອແຄັບ ແລະ ການຂະຫຍາຍຈໍານວນສະມາຊິກຄະນະປະຈໍາ;  ແລກປ່ຽນບົດຮຽນ ກ່ຽວກັບ ຂະບວນການພັດທະນາເຕັກໂນໂລຊີ ແລະ ດີຈີຕອນ ໂດຍໄດ້ຍົກໃຫ້ເຫັນວ່າ ການຫັນປ່ຽນດີຈີຕອນ ຖືເປັນໂອກາດອັນຍິ່ງໃຫຍ່, ເປັນສິ່ງທ້າທ້າຍ ແລະ ເປັນແຮງຂັບເຄື່ອນທີ່ສໍາຄັນ ໃນຂະບວນການພັດທະນາໄປສູ່ການສ້າງອຸດສະຫະກໍາ ແລະ ຄວາມທັນສະໄໝ; ເນັ້ນໜັກຄວາມສໍາຄັນຂອງເຕັກໂນໂລຊີ ໃນການຂັບເຄື່ອນເສດຖະກິດ ຜ່ານລະບົບການຄ້າເອເລັກໂຕຣນິກ, ການເງິນດີຈີຕອນ, ການໃຫ້ບໍລິການພາກລັດແບບເອເລັກໂຕຣນິກ ແລະ ເສດຖະກິດດີຈີຕອນ; ຊຸກຍູ້ການເສີມຂະຫຍາຍການຮ່ວມມື ໃນພາກພື້ນ ແລະ ໃນໂລກ ເພື່ອຮ່ວມກັນຮັບມືກັບສິ່ງທ້າທ້າຍທີ່ມາພ້ອມການຫັນປ່ຽນດັ່ງກ່າວ ເປັນຕົ້ນ: ບັນຫາຄວາມໝັ້ນຄົງທາງໄຊເບີ, ຄວາມແຕກໂຕນທາງດີຈີຕອນ, ການຮັກສາຂໍ້ມູນ, ຂ່າວສານທີ່ບິດເບືອນ, ມາດຖານທາງຈາລິຍະທໍາ ແລະ ຜົນກະທົບ ຕໍ່ ຮູບແບບການຈ້າງງານ. 

     ໃນໂອກາດນີ້, ຄະນະຜູ້ແທນ ພັກ ປປ ລາວ ໄດ້ປະກອບຄຳເຫັນໃນ 2 ກອງປະຊຸມດັ່ງກ່າວ ໂດຍຢືນຢັນຄືນຄວາມໝາຍໝັ້ນຂອງພັກ ປປ ລາວ ໃນການປະກອບສ່ວນເຄື່ອນໄຫວໃນຂອບວຽກໄອແຄັບ ແລະ ເຊື່ອໝັ້ນວ່າ ໄອແຄັບ ເປັນກົນໄກໜຶ່ງທີ່ສໍາຄັນ ໃນການຊຸກຍູ້ສ້າງຄວາມເຂັ້ມແຂງໃຫ້ແກ່ການຮ່ວມມືຫຼາຍຝ່າຍ ເພື່ອສົ່ງເສີມການພັດທະນາ ແລະ ຄວາມຈະເລີນຮຸ່ງເຮືອງ ມາສູ່ ພາກພື້ນ ກໍຄື ໃນໂລກ;  ຍົກໃຫ້ເຫັນຄວາມສໍາຄັນ ຂອງບັນດາພັກການເມືອງ ໃນການຮ່ວມມືກັນ ເພື່ອໃຫ້ການຫັນປ່ຽນດີຈີຕອນເກີດຂຶ້ນ ຢ່າງກວມລວມ, ດຸ່ນດ່ຽງ ແລະ ຍືນຍົງ ເພື່ອໃຫ້ບັນດາປະເທດອາຊີ ມີຄວາມເຊື່ອມໂຍງທາງດີຈີຕອນ, ສາມາດປັບຕົວຕໍ່ການປ່ຽນແປງທາງເຕັກໂນໂລຊີ ແລະ ສາມາດນໍາໃຊ້ປະໂຫຍດຈາກນະວັດຕະກໍາໄດ້ຢ່າງເຕັມສ່ວນ. 

     ໃນການເຂົ້າຮ່ວມກອງປະຊຸມຄັ້ງນີ້, ສະມາຊິກຄະນະປະຈໍາໄອແຄັບ ໄດ້ເຂົ້າພົບຢ້ຽມຂໍ່ານັບ ສະຫາຍ ນຽມ ໂອຊໍ ອູດສຣາ (Nyam-Osor Uchral), ນາຍົກລັດຖະມົນຕີ, ປະທານພັກປະຊາຊົນມົງໂກລີ. ໃນການພົບປະຄັ້ງນີ້, ໄດ້ຕີລາຄາສູງຜົນສໍາເລັດຂອງການເຄື່ອນໄຫວ ຂອງໄອແຄັບ ໃນໄລຍະຜ່ານມາ. ພ້ອມທັງ, ສະແດງຄວາມຍິນດີ ໃນການເສີມສ້າງການຮ່ວມມືລະຫວ່າງບັນດາປະເທດໃນອາຊີ ແລະ ຄວາມໝາຍໝັ້ນໃນການປະກອບສ່ວນເຂົ້າໃນຂອບວຽກດັ່ງກ່າວ ໂດຍໄດ້ແຈ້ງເຈດຈໍານົງ ຂອງພັກປະຊາຊົນມົງໂກລີ ໃນການຈັດກອງປະຊຸມຊາວໜຸ່ມໄອແຄັບ ໃນຕໍ່ໜ້າ.

     ກອງ​ປະ​ຊຸມຄັ້ງ​ນີ້​​ ໄດ້ປະສົບ​ຜົນສຳ​ເລັດ​ຢ່າງ​ຈົບງາມ ແລະ ໄດ້​​ເປັນ​​​ເອກະ​ພາບຮັບຮອງເອົາຫຼາຍບັນຫາສໍາຄັນ ໂດຍສະເພາະ ການແຈ້ງ ກ່ຽວກັບ ການກະກຽມທີ່ຈະຮັບຮອງເອົາ ພັກ ປປ ລາວ  ເຂົ້າເປັນສະມາຊິກຄະນະປະຈໍາໄອແຄັບ ຢ່າງເປັນທາງການ ໃນກອງປະຊຸມໃຫຍ່ຂອງໄອແຄັບ ຄັ້ງທີ 13 ເຊິ່ງມີແຜນຈະຈັດຂຶ້ນໃນເດືອນພະຈິກ ທີ່ນະຄອນຫຼວງເຊອູນ, ສ. ເກົາຫຼີ.

---