ຄະນະຜູ້ແທນຜູ້ຕາງໜ້າພິເສດຂອງ ສະຫາຍເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ ຢ້ຽມຢາມ ສປ ຈີນ

ເຜີຍ​ແຜ່​ໂດຍ​: moderator ເວ​ລາ: 22/04/2026 11:14:13 ຈຳ​ນວນ​​ຢ້ຽມ​ຊົມ 99 ຄັ້ງ ​

     ສະຫາຍ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ, ຜູ້​ຕາງ​ໜ້າ​ພິ​ເສດຂອງ​ ສະ​ຫາຍ ​ເລ​ຂາ​ທິ​ການ​ໃຫ​ຍ່​​ ຄະ​ນະ​ບໍ​ລິ​ຫານ​ງານ​ສູນ​ກາງພັກ ​ປະ​ຊາ​ຊົນປະ​ຕິ​ວັດ​ລາວ ພ້ອມ​ດວ້ຍຄະນະ ໄດ້ເດີນທາງ​​ໄປ​ຢ້ຽມ​ຢາມ ສປ ຈີນ ແຕ່​ວັນ​ທີ 20-22 ເມສາ 2026 ​​ເພື່ອແຈ້ງ​ຜົນ​ສຳ​ເລັດ​ຂອງ ກອງ​ປະ​ຊຸມ​ໃຫ​ຍ່ຜູ້ແທນທົ່ວປະເທດ ​ຄັ້ງ​ທີ XII ຂອງ​ ພັກ ປ​ປ ລາວ ຕໍ່ການນໍາ ພັກ, ລັດ ສປ ຈີນ.

     ໃນ​ຕອນບ່າຍຂອງວັນ​ທີ 21 ເມສາ 2026, ສະຫາຍ ສະເຫຼີມໄຊ ກົມມະສິດ ​ພ້ອມ​ຄະ​ນະ ໄດ້​​ເຂົ້າ​ຢ້ຽມ​ຂໍ່ານັບ​ ສະຫາຍ ສີ ຈິ້ນຜິງ, ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດແຫ່ງ ສປ ຈີນ. ສະຫາຍ ສະເຫຼີມໄຊ ກົມມະສິດ ໄດ້ນໍາເອົາຄວາມຢື້ຢາມ​ຖາມ​ຂ່າວ ແລະ ຈົດໝາຍທາງວາຈາທີ່ຂຽນດ້ວຍລາຍມືຈາກ ​ສະ​ຫາຍ ທອງລຸນ ສີສຸລິດ, ເລ​ຂາ​ທິ​ການ​ໃຫ​ຍ່ ​ຄະ​ນະ​ບໍ​ລິ​ຫານ​ງານ​ສູນ​ກາງ ​ພັກ ປ​ປ ລາວ; ປະທານປະເທດ ແຫ່ງ ສປປ ລາວ ໄປ​ຍັງ​ ສະ​ຫາຍ ສີ ຈິ້ນຜິງ, ເລ​ຂາ​ທິ​ການ​ໃຫ​ຍ່, ປະທານປະເທດ ແຫ່ງ ສປ ຈີນ ແລະ ບັນດາສະຫາຍການນໍາ ພັກ, ລັດຈີນ; ​ແຈ້ງ​ຜົນສໍາເລັດ​ກອງ​ປະຊຸມ​ໃຫຍ່​ ຄັ້ງ​ທີ XII ຂອງ​ ພັກ ປປ ລາວ ​ສະ​ແດງ​ຄວາມ​ຊົມ​ເຊີຍ​ຜົນສໍາເລັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XX ໂດຍສະເພາະຜົນສໍາເລັດກອງປະຊຸມຄົບຄະນະ ຄັ້ງທີ 4 ສະໄຫມທີ XX ຂອງພັກກອມມູນິດຈີນ ທີ່ໄດ້ຮັບຮອງເອົາແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 15 ໃນທ້າຍປີຜ່ານມາ; ຊົມເຊີຍຜົນສໍາເລັດກອງປະຊຸມສະພາປຶກສາການເມືອງທົ່ວປະເທດຈີນ ແລະ ສະພາຜູ້ແທນປະຊາຊົນຫ່ງຊາດຈີນ ຄັ້ງທີ 4 ສະໄໝທີ XIV ໃນຕົ້ນເດືອນມີນາຜ່ານມາ ແລະ ບັນດາຜົນສໍາເລັດໃນດ້ານຕ່າງໆ ທີ່ປະຊາຊົນຈີນອ້າຍນ້ອງ ຍາດມາໄດ້ ພາຍໃຕ້ການນຳພາຂອງ ພັກກອມມູນິດຈີນ ໃນການສ້າງສາພັດທະນາປະເທດຈີນ ກໍຄື ການຫັນເປັນທັນສະໄໝຕາມ “ແນວຄິດ ສີ ຈິ້ນຜິງ ວ່າດ້ວຍ ສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່”, ອັນໄດ້ເຮັດໃຫ້ບົດບາດ ແລະ ອິດທິພົນຂອງ ພັກ, ລັດຈີນ ນັບມື້ນັບສູງເດັ່ນໃນເວທີພາກພື້ນ ແລະ ສາກົນ.

     ສະຫາຍຜູ້ຕາງໜ້າພິເສດ ​ໄດ້ຕີລາຄາສູງການພົວພັນຮ່ວມມື ລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ ລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍຢ່າງຕັ້ງໜ້າ ແລະ ຢູ່ໃນໄລຍະດີທີ່ສຸດໃນປະຫວັດສາດ; ການຈັດຕັ້ງປະຕິບັດແຜນການຮ່ວມມື 2 ພັກ ແລະ ແຜນບໍາລຸງສ້າງພະນັກງານ ລາວ-ຈີນ ໄລຍະປີ 2021-2025 ໄດ້ມີຜົນສໍາເລັດເປັນຢ່າງດີ, ການຈັດຕັ້ງປະຕິບັດແຜນແມ່ບົດວ່າດ້ວຍ ການສ້າງຄູ່ຮ່ວມຊາຕາກໍາ ລາວ-ຈີນ ຍາດໄດ້ໝາກຜົນຕົວຈິງມາສູ່ປະຊາຊົນ 2 ຊາດ, ປະກອບ ສ່ວນ​ເຂົ້າ​​ໃນ​ພາລະກິດ​ສັນຕິພາບ, ມິດຕະ​ພາບ, ການ​ຮ່ວມ​ມື​ ​ເພື່ອ​ການ​ພັດທະນາ​ໃນ​ພາກ​ພື້ນ ​ແລະ ​ໃນ​ໂລກ.​ ໃນ​ໂອກາດ​ດັ່ງ​ກ່າວ, ສະຫາຍ ຜູ້ຕາງໜ້າພິເສດ ​ໄດ້​ສະ​ແດງ​ຄວາມ​ຂອບ​ໃຈ ​ແລະ ຮູ້​ບຸນ​ຄຸນ​ເປັນ​ຢ່າງ​ສູງ ຕໍ່​ພັກ, ລັດ​ຖະບານ ​ແລະ ປະຊາຊົນຈີນອ້າຍ​ນ້ອງ ທີ່​ໄດ້​ໃຫ້ການ​ສະໜັບສະໜູນ, ຊ່ວຍ​ເຫຼືອ​ອັນ​ໃຫຍ່ຫຼວງ ​ແລະ ມີ​ປະສິດທິ​ຜົນ​ໃຫ້​ແກ່ປະຊາຊົນລາວ ​​ຕະຫຼອດ​ໄລຍະ​ຜ່ານ​ມາ ກໍ່ຄື ໃນປະຈຸບັນ.

     ສະຫາຍ ເລຂາທິການໃຫຍ່, ປະທານປະເທດ ສີ ຈິ້ນ ຜິງ ​ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ ສະຫາຍ ສະເຫຼີມໄຊ ກົມມະສິດ ທີ່ຖືກແຕ່ງຕັ້ງເປັນຜູ້​ຕາງ​ໜ້າ​ພິ​ເສດ ຂອງ​ ສະ​ຫາຍ ​ເລ​ຂາ​ທິ​ການ​ໃຫ​ຍ່​​ ຄະ​ນະ​ບໍ​ລິ​ຫານ​ງານ​ສູນ​ກາງພັກ​ປະ​ຊາ​ຊົນປະ​ຕິ​ວັດ​ລາວ ນຳພາຄະນະໄປແຈ້ງຜົນສໍາເລັດກອງປະຊຸມໃຫຍ່ ຄັ້ງທີ XII ຂອງ ພັກ ປປ ລາວ, ອັນໄດ້ສະແດງໃຫ້ເຫັນເຖິງ ການໃຫ້ຄວາມສຳຄັນໃນລະດັບສູງຕໍ່ສາຍພົວພັນມິດຕະພາບທີ່ເປັນມູນເຊື້ອ ລາວ-ຈີນ, ຊົມ​ເຊີຍ​ຕໍ່​ຜົນສຳ​ເລັດ​ອັນ​ໃຫຍ່​ຫຼວງ​ ທີ່ ພັກ, ລັດ ​ແລະ ປະຊາຊົນລາວ ຍາດ​ມາ​ໄດ້​ໃນ​ໄລຍະ 50 ປີ​ທີ່​ຜ່ານ​ມາ, ໂດຍສະເພາະ 40 ປີ ແຫ່ງ​ການ​ປະຕິບັດ​ແນວທາງ​ປ່ຽນ​ແປງ​ໃໝ່, ​ກໍ່ຄື ໃນໄລຍະ 5 ປີ​ ​ແຫ່ງ​ການຈັດ​ຕັ້ງ​ປະຕິບັດ​ມະຕິກອງ​ປະຊຸມ​ໃຫຍ່​ ຄັ້ງ​ທີ XI ຂອງ​ ພັກປະຊາຊົນປະຕິວັດ​ລາວ; ​ເຊື່ອ​ໝັ້ນ​​ວ່າ ພາຍ​ໃຕ້​ການ​ນຳພາ​ອັນ​ສະຫຼາດ​ສ່ອງ​ໃສ​ຂອງ ​ພັກປະຊາຊົນປະຕິວັດລາວ ​ໂດ​ຍມີ ​ສະຫາຍ ທອງລຸນ ສີສຸລິດ ເປັນ​ຜູ້ນຳ​ໜ້ານັ້ນ​, ປະຊາຊົນລາວບັນດາ​ເຜົ່າ ຈະ​ສືບຕໍ່ຍາດ​ໄດ້​ບັນດາ​ຜົນສຳ​ເລັດ​ອັນ​ໃໝ່, ​ໃຫຍ່​ຫຼວງ​ກ່ວາ​ເກົ່າ​ໃນ​ພາລະກິດ​ປ່ຽນ​ແປງ​ໃໝ່ຮອບດ້ານ ແລະ ມີຫຼັກການຂອງ ພັກ ປປ ລາວ,​ ປະ​ຕິ​ບັດ​ມະຕິ​ຂອງ​ກອງ​ປະຊຸມ​ໃຫຍ່​ ຄັ້ງ​ທີ XII ​​ຂອງ​ພັກຢ່າງມີໄຊ, ສະຫາຍ ເລຂາທິການໃຫຍ່, ປະທານປະເທດ ສີ ຈິ້ນ ຜິງ ໄດ້​ຝາກ​ຄຳ​ຢື້ຢາມ​ຖາມ​ຂ່າວ ອັນ​ສະໜິດສະໜົມ​ ເຖິງ​ ສະຫາຍ ​ເລຂາທິການ​ໃຫຍ່, ປະທານປະເທດ ທອງລຸນ ສີສຸລິດ​.

     ໃນວັນດຽວກັນ, ​ສະຫາຍ ສະເຫຼີມໄຊ ກົມມະສິດ ຍັງໄດ້​ພົບ​ປະ​ກັບ ສະຫາຍ ຫວັງອີ້, ກໍາມະການກົມການເມືອງສູນກາງພັກ, ລັດຖະມົນຕີການຕ່າງປະເທດ ສປ ຈີນ​, ສອງຝ່າຍ ຕ່າງກໍ່ສະແດງຄວາມປິຕິຊື່ນຊົມກັນ ແລະ ກັນ ​ຕໍ່ຜົນສຳ​ເລັດ​ກອງ​ປະຊຸມ​ໃຫຍ່​ ​ຄັ້ງ​ທີ XII ຂອງ ​ພັກ ປປ ລາວ, ຜົນສໍາເລັດກອງປະຊຸມສະພາປຶກສາການເມືອງ ແລະ ສະພາຜູ້ແທນປະຊາຊົນທົ່ວປະເທດຈີນ ຄັ້ງທີ 4 ສະໄໝທີ XIV ແລະ ບັນດາຜົນສໍາເລັດໃນດ້ານຕ່າງໆ ທີ່ປະຊາຊົນ 2 ຊາດຍາດມາໄດ້ ໃນການສ້າງສາພັດທະນາປະເທດຊາດ ພາຍໃຕ້ການນຳພາຂອງແຕ່ລະພັກ; ຕີລາຄາສູງຕໍ່ການພົວພັນຮ່ວມມື 2 ພັກ, 2 ລັດ ແລະ ປະຊາຊົນ 2 ຊາດ ລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍຢ່າງຕັ້ງໜ້າ, ການຈັດຕັ້ງປະຕິບັດແຜນການຮ່ວມມື 2 ພັກ, ແຜນແມ່ບົດຄູ່ຮ່ວມຊາຕາກໍາ ລາວ-ຈີນ ໄດ້ມີຜົນສໍາເລັດເປັນຢ່າງດີ, ໂຄງການເສັ້ນທາງລົດໄຟ ລາວ-ຈີນ ໄດ້ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ; ພ້ອມນັ້ນ, ສອງຝ່າຍ ຍັງໄດ້ແລກປ່ຽນຄວາມຄິດເຫັນກ່ຽວ​ກັບ ບັນຫາພາກພື້ນ ແລະ ສາກົນ ຈຳນວນ​ຫ​ນຶ່ງ ທີ່ສອງຝ່າຍມີຄວາມສົນໃຈຮ່ວມກັນ.

     ໃນຕອນຄໍ່າວັນທີ 20 ເມສາ 2026, ຄະນະຍັງໄດ້​ພົບ​ປະ ​ແລະ ​ເຮັດ​ວຽກ​ກັບ ສະຫາຍ ຫຼິວ ຮາຍຊິງ, ກໍາມະການສູນກາງພັກ, ຫົວໜ້າ​ຄະນະ​ພົວພັນ​ຕ່າ​ງປະ​ເທດ​ສູນ​ກາງ​ພັກກອມມູນິດຈີນ, ​ໃນ​ການ​ພົບ​ປະ​ຄັ້ງ​ນີ້ ສອງ​ຝ່າຍ​ ໄດ້ແຈ້ງສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດໃຫ້ກັນຊາບ, ພ້ອມກັນສັງເກດຕີລາຄາຄືນການພົວພັນຮ່ວມມື 2 ຝ່າຍ, ການຈັດຕັ້ງຜັນຂະຫຍາຍແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃນ​ໄລ​ຍະ​ຜ່ານ​ມາ, ປຶກ​ສາ​ຫາ​ລືກ່ຽວກັບ ​ທິດ​ທາງ​ຮ່ວມ​ມື​ໃນ​ຕໍ່​ຫ​ນ້າ ແລະ ຢືນຢັນຈະສືບຕໍ່ປະສານສົມທົບຢ່າງແໜ້ນແຟ້ນ ໃນການຊຸກຍູ້ເສີມຂະຫຍາຍສາຍພົວພັນ ລາວ-ຈີນ, ເຊິ່ງປີນີ້ ເປັນປີມິດຕະພາບແຫ່ງການສ້າງຕັ້ງສາຍພົວພັນການທູດ ລາວ-ຈີນ, ຈີນ-ລາວ ຄົບຮອບ 65 ປີ, ສອງຝ່າຍ ຈະຊີ້ນໍາພາກສ່ວນກ່ຽວຂ້ອງ ກະກຽມບັນດາກິດຈະກໍາຕ່າງໆ ເພື່ອສະເຫຼີມສະຫຼອງ ໃຫ້ເປັນຂະບວນຟົດຟື້ນ ແລະ ມີເນື້ອໃນຄົບຖວ້ນ.

     ນອກນັ້ນ, ຄະນະຜູ້ແທນຜູ້ຕາງໜ້າພິເສດ ພັກ ປປ ລາວ ຍັງໄດ້ຢ້ຽມຢາມສະຖານທີ່ສຳຄັນທາງປະຫວັດສາດ ແລະ ວັດທະນະທຳຈໍານວນໜຶ່ງ ຢູ່ນະຄອນຫຼວງປັກກິ່ງ.

---