ສະຫາຍຜູ້ປະຈໍາການຄະນະບໍລິຫານງານສູນກາງພັກ ຕ້ອນຮັບການເຂົ້າຢ້ຽມຂໍ່ານັບຂອງ ຄະນະຜູ້ແທນຫວຽດນາມ

ເຜີຍ​ແຜ່​ໂດຍ​: moderator ເວ​ລາ: 01/04/2026 20:43:50 ຈຳ​ນວນ​​ຢ້ຽມ​ຊົມ 18 ຄັ້ງ ​

     ວັນທີ 31 ມີນາ 2026, ທີ່ສໍານັກງານສູນກາງພັກ, ສະຫາຍ ວິໄລ ຫຼ້າຄໍາຟອງ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ ປະຊາຊົນປະຕິວັດລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫງວຽນແມ້ງເກືອງ, ກໍາມະການສູນກາງພັກ, ຮອງເລຂາຜູ້ປະຈໍາການຄະນະພັກ, ຮອງລັດຖະມົນຕີກະຊວງການຕ່າງປະເທດຫວຽດນາມ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.ສະຫາຍ ວິໄລ ຫຼ້າຄຳຟອງ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ສະຫາຍ ຫງວຽນແມ້ງເກືອງ ພ້ອມດ້ວຍຄະນະໃນຄັ້ງນີ້, ເຊິ່ງຈະເປັນການປະກອບສ່ວນຢ່າງຕັ້ງໜ້າເຂົ້າໃນການຮັດແໜ້ນ ແລະ ເພີມທະວີການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ທັງເປັນການກະກຽມໃຫ້ແກ່ການນໍາຂັ້ນສູງ ພັກ, ລັດ ຫວຽດນາມ ມາຢ້ຽມຢາມ ສປປ ລາວ ໃນຕົ້ນເດືອນ ເມສາ 2026 ທີ່ຈະມາເຖິງ; ຢືນຢັນວ່າ ສປປ ລາວ ຍາມໃດກໍ່ຖືສໍາຄັນ ແລະ ໃຫ້ບູລິມະສິດໃນລະດັບສູງສຸດໃນການພັດທະນາການ​ພົວພັນ​ກັບ​ ສສ ຫວຽດນາມ; ຕີລາຄາສູງຕໍ່ການພົວພັນຮ່ວມມື ລາວ-ຫວຽດນາມ ທີ່ນັບມື້ກ້າວເຂົ້າສູ່ລະດັບສູງກວ່າເກົ່າ, ການພົວພັນທາງດ້ານການເມືອງມີຄວາມໜັກແໜ້ນ ແລະ ໄວ້ວາງໃຈກັນໃນລະດັບສູງ, ສະແດງອອກໃນຜົນສໍາເລັດຂອງ ການຢ້ຽມຢາມລັດຖະກິດຂອງການນໍາຂັ້ນສູງ ພັກ, ລັດ ສອງປະເທດ ໃນມໍ່ໆຜ່ານມາ, ການຮ່ວມມືທາງດ້ານ ເສດຖະກິດ - ການຄ້າ, ປ້ອງກັນຊາດ, ປ້ອງກັນຄວາມສະຫງົບ ແລະ ຂົົງເຂດຕ່າງໆລະຫວ່າງສອງປະເທດ ມີບາດກ້າວໃໝ່ທີ່ຕັ້ງໜ້າ; ພ້ອມນັ້ນ, ສະຫາຍ ຍັງໄດ້ສະແດງຄວາມຂອບໃຈ ແລະ ຕີລາຄາສູງຕໍ່ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ທີ່ໄດ້ໃຫ້ການສະໜັບສະໜູນຊ່ວຍເຫຼືອງອັນໃຫຍ່ຫຼວງ, ລໍ້າຄ່າ, ທັນການ ແລະ ມີປະສິດທິຜົນ ໃຫ້ແກ່ ພັກ, ລັດ ແລະ ປະຊາຊົນລາວບັນດາເຜົ່າ ຕະຫຼອດໄລຍະຜ່ານມາ; ຊົມເຊີຍຜົນສໍາເລັດອັນໃຫຍ່ຫຼວງ, ຮອບດ້ານທີ່ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ຍາດມາໄດ້ໃນໄລຍະຜ່ານມາ ໂດຍສະເພາະ ຜົນສໍາເລັດຂອງກອງປະຊຸມໃຫຍ່ ຄັ້ງທີ XIV ຂອງ ພັກກອມມູນິດຫວຽດນາມ, ຜົນສໍາເລັດການເລືອກຕັ້ງສະພາແຫ່ງຊາດ ຊຸດທີ XVI ແລະ ສະພາປະຊາຊົນຂັ້ນຕ່າງໆ ກ້າວໄປເຖິງການປັບປຸງກົງຈັກການຈັດຕັ້ງລັດຖະບານ. ໃນໂອກາດດັ່ງກ່າວສະຫາຍ ຫງວຽນແມ້ງເກືອງ ໄດ້ນໍາເອົາຄໍາຢື້ຢາມຖາມຂ່າວ ແລະ ຄໍາອວຍພອນໄຊອັນປະເສີດຂອງ ສະຫາຍ ເຈີນເກີ້ມຕູ້ກໍາມະການກົມການເມືອງ, ຜູ້ປະຈໍາການ ຄະນະເລຂາທິການສູນກາງພັກກອມມູນິດຫວຽດນາມ ມາຍັງ ສະຫາຍ ວິໄລ ຫຼ້າຄໍາຟອງ ໃນໂອກາດບຸນປີໃໝ່ລາວ; ຊົມເຊີຍຕໍ່ບັນດາຜົນສໍາເລັດອັນພົ້ນເດັ່ນທີ່ ພັກ, ລັດ ແລະ ປະຊາຊົນລາວ ຍາດມາໄດ້​ໃນ​ໄລຍະ​ມໍ່ໆ​ມາ​ນີ້, ພິ​ເສດ​ແມ່ນ​ຜົນສຳ​ເລັດ​ຂອງ​ ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ ຄັ້ງ​ທີ XII ຂອງ​ພັກ, ການ​ເລືອກ​ຕັ້ງ​ສະພາ​ແຫ່ງ​ຊາດ ຊຸດ​ທີ X ​ແລະ ສະພາ​ປະຊາຊົນ​ຂັ້ນ​ແຂວງ - ນະຄອນ, ​ເຊື່ອ​ໝັ້ນ​ວ່າ, ປະຊາ​ຊົນ​​ລາວ ​ຈະ​ສືບ​ຕໍ່​ປະຕິບັດ​ ມະຕິ​ກອງ​ປະຊຸມ​ໃຫຍ່​​ ຄັ້ງ​ທີ XII ຂອງພັກ ​ແລະ ​ແຜນ​ພັດທະນາ ​ເສດຖະກິດ-ສັງຄົມ 5 ປີ​ ຄັ້ງ​ທີ 10 ຢ່າງມີຜົນສໍາເລັດ; ຕີລາຄາສູງຕໍ່ ການພົວພັນຮ່ວມມື ຫວຽດນາມ-ລາວ ໃນໄລຍະຜ່ານມາ ທີ່ໄດ້ສືບຕໍ່ພັດທະນາຢ່າງຕັ້ງໜ້າ, ການ​ພົວ​ພັນ​ດ້ານ​ການ​ເມືອງ​ນັບ​ມື້​ນັບ​​ແໜ້ນແຟ້ນ ແລະ ໄວ້​ເນື້ອ​ເຊື່ອ​ໃຈກັນໃນລະດັບສູງ; ການ​ຮ່ວມ​ມື​ດ້ານ​ປ້ອງ​ກັນ ຊາດ-ປ້ອງກັນ​ຄວາມ​ສະຫງົບ ​ໄດ້​ຮັບ​ການ​ເພີ່ມ​ທະວີ​ຢ່າງ​ບໍ່​ຢຸດ​ຢັ້ງ, ການ​ຮ່ວມ​ມື​ດ້ານ​ເສດ​ຖະ​ກິດ, ການ​ຄ້າ, ການ​ລົງ​ທຶນ, ວັດ​ທະ​ນະ​ທໍາ, ການ​ສຶກ​ສາ​ ບັນ​ລຸ​ຜົນສໍາເລັດຢ່າງຕັ້ງໜ້າ, ສອງຝ່າຍ​ ໄດ້ປະສານ​ສົມທົບ​ກັນ​ຢ່າງ​ມີ​ປະສິດທິ​ຜົນ​ໃນ​ການຈັດຕັ້ງ​ປະຕິບັດ ​ບັນດາ​ຂໍ້​ຕົກລົງ​ຂັ້ນ​ສູງ ໂດຍສະເພາະ​ແມ່ນ ການ​ຊຸກຍູ້​ບັນດາ​ໂຄງການຮ່ວມມືຈຸດສຸມ; ​ຢືນຢັນ​ວ່າ ຄະນະ​ພັກ​ ກະຊວງ​ການ​ຕ່າງປະ​ເທດ ຫວຽດນາມ ຈະສືບ​ຕໍ່​ ປະສານສົມທົບຢ່າງ​ແໜ້ນ​ແຟ້ນ ກັບ ຄະນະ​​ພົວພັນ​ຕ່າງປະ​ເທດ​ສູນ​ກາງພັກ ​ແລະ ກະຊວງ​ການ​ຕ່າງປະ​ເທດລາວ ໃນການຕິດຕາມ ​ການຈັດຕັ້ງ​ປະຕິບັດ​ບັນດາ​ຂໍ້​ຕົກລົງຂອງການນໍາຂັ້ນສູງ ​ແລະ ​ສັນຍາ​ຮ່ວມມື ລະຫວ່າງ​ ບັນດາ​ກະຊວງ, ອົງການ​ ຂອງ​ສອງ​ປະ​ເທດ, ໃນນັ້ນ ສຸມ​ໃສ່ການຫັນເປັນອັນລະອຽດ ​ບັນດາ​ເນື້ອ​ໃນ​ຂອງ “ການເປັນຫຸ້ນສ່ວນຍຸດ​ທະ​ສາດ” ​ໃນບັນດາຂົງເຂດການຮ່ວມມືຕ່າງໆ​ໃນຕໍ່ໜ້າ. ສອງຝ່າຍ ໄດ້ແຈ້ງໃຫ້ກັນຊາບສະພາບພົ້ນເດັ່ນຂອງແຕ່ລະພັກ, ແຕ່ລະປະເທດ, ​ເຫັນ​ດີ​ສືບ​ຕໍ່​ຊຸກຍູ້ການຈັດຕັ້ງປະຕິບັດ​ບັນດາ​ຂໍ້​ຕົກ ລົງ​ຂອງການນໍາຂັ້ນ​ສູງ, ​ ຮັກສາ​ການ​ແລກປ່ຽນ​ຄະນະ​ຜູ້​ແທນ​ຂັ້ນ​ຕ່າງໆໃຫ້ປົກກະຕິ; ​ເພີ່ມ​ທະວີ​ການປະສານສົມທົບ ແລະ ຮ່ວມມື ​ລະຫວ່າງ ​ບັນດາ​ອົງການ​ພັກ ​ແລະ ລັດ ຂອງສອງປະເທດ; ສືບ​ຕໍ່​ເອົາ​ໃຈ​ໃສ່​ເປັນ​ພິ​ເສດ​ ວຽກງານ​ກໍ່ສ້າງ​ພັກບຳລຸງ​ສ້າງ​ພະນັກງານ ​ແລະ ຊຸກຍູ້​ການ​ຮ່ວມ​ມື​ໃນ​ບັນດາ​ຂົງ​ເຂດ​ສຳຄັນ, ປະກອບສ່ວນເພີ່ມພູນຄູນສ້າງ ​ສາຍ​ພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບ ດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ ​ໃຫ້ນັບມື້ເລິກເຊິ່ງ ແລະ ແຕກດອກອອກຜົນຍິ່ງໆຂຶ້ນ.

     ໃນວັນດຽວກັນ, ສະຫາຍ ນາງ ສີໃສ ລືເດດມູນສອນ, ກໍາມະການກົມການເມືອງສູນ, ເລທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ກໍ່ໄດ້ຕ້ອນຮັບຄະນະດັ່ງກ່າວ, ສະຫາຍ ນາງ ສີໃສ ລືເດດມູນສອນ ໄດ້ຕີລາຄາສູງ ຕໍ່    ໝາກຜົນຂອງການຮ່ວມມື ລະຫວ່າງ ສອງຄະນະຈັດຕັ້ງສູນກາງພັກ ລາວ-ຫວຽດນາມ, ຫວັງໃຫ້ສອງຝ່າຍ ສືບຕໍ່ເພີ່ມທະວີການປະສານສົມທົບ, ແລກປ່ຽນຄະນະຜູ້ແທນ, ແລກປ່ຽນບົດຮຽນໃນວຽກງານພະນັກງານ, ໂດຍສະເພາະແມ່ນພະນັກງານຢູ່ໃນແຜນບຸກຄະລາກອນ, ວຽກງານບຳລຸງສ້າງ, ຝຶກອົບຮົມ ພະນັກງານການນໍາຂັ້ນຕ່າງໆ, ປະກອບສ່ວນ​ຍົກ​ສູງ​ຄຸນ​ນະພາ​ບ​ແຫຼ່ງຊັບພະຍາກອນ​ມະນຸດ ເພື່ອຕອບສະໜອງໃຫ້​ຄວາມ​ຕ້ອງການ​ພັດທະນາ​ ຂອງ​ແຕ່ລະ​ປະ​ເທດ.

     ນອກນັ້ນ,​ ສະຫາຍ ບຸນເຫຼືອ ພັນດານຸວົງ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ກໍ່ໄດ້ຕ້ອນຮັບການເຂົ້າຢ້ຽມຂອງ ສະຫາຍ ຫງວຽນແມ້ງເກືອງ ພ້ອມດ້ວຍຄະນະ, ສອງ​ຝ່າຍ ​​ເຫັນ​ດີ​ສືບ​ຕໍ່ປະສານ​ສົມທົບ​ກັນ​ຢ່າງ​ແໜ້ນ​ແຟ້ນ ​ໃນ​ການ​ເປັນເສນາທິການດ້ານຍຸດທະສາດ ວຽກງານພົວພັນຕ່າງປະເທດ ໃຫ້​ແກ່​ການ​ນຳ​ຂັ້ນ​ສູງ​ຂອງ​ ສອງ​ພັກ, ສອງລັດ; ​ເພີ່ມ​ທະວີ​ການ​ແລກປ່ຽນ​ຂໍ້​ມູນ​ຂ່າວສານ, ແລກປ່ຽນບົດຮຽນ​ໃນ​ການ​ຄົ້ນຄວ້າ, ​ປະສານສົມທົບໃນການຈັດຕັ້ງຜັນຂະຫຍາຍ ​ບັນດາ​ຂໍ້​ຕົກລົງ​ຮ່ວມ​ມື​ທີ່​ໄດ້​ລົງ​ນາມ ​ຢ່າງ​ມີ​ປະສິດທິ​ຜົນ, ​ໂດຍ​ສະ​ເພາະ​ແມ່ນ ​ວຽກ​ງານ​ບຳລຸງ​ສ້າງ​ພະນັກງານ​ທີ່​ເຮັດ​ວຽກ​ງານ​ພົວພັນ​ຕ່າງປະ​ເທດ​ຂອງ​ພັກ; ສອງຝ່າຍ ໄດ້ຢືນຢັນ​ວ່າ ​ໃນ​ສະພາບ​ການ​ໂລກ ​ແລະ ພາກ​ພື້ນ ​ທີ່​ມີ​ການ​ປ່ຽນ​ແປງ​ຢ່າງ​​ໄວວາ ​ແລະ ສັບສົນ, ການ​ເພີ່ມ​ທະວີ​ການ​ປະສານສົມທົບ​ ລະຫວ່າງ​ ບັນດາ​ອົງການ​ຕ່າງປະ​ເທດ​ຂອງສອງພັກ ​ແມ່ນ​ສຳຄັນ​ທີ່​ສຸດ, ປະກອບສ່ວນ​ຍົກ​ສູງ​ປະສິດທິ​ຜົນ​ວຽກ​ງານ ການເປັນ​ເສນາທິການ, ຮັບ ປະກັນ​ຜົນ​ປະ​ໂຫຍ​ດ​ແຫ່ງ​ຊາດ ​ຂອງ​ແຕ່ລະ​ປະ​ເທດ, ພ້ອມທັງສ້າງແວດລ້ອມ ​ສັນຕິພາບ, ສະຖຽນ​ລະ​ພາບ​ ໃຫ້​ແກ່​ການ​ພັດທະນາ.

---