ຫົວໜ້າຄະນະພົວພັນຕ່າງປະເທດສູນກາງພັກຕ້ອນຮັບການເຂົ້າຢ້ຽມຂໍ່ານັບ ຂອງ ເອກອັກຄະລັດຖະທູດສິງກະໂປ ປະຈຳ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 24/02/2026 16:27:16 ຈຳ​ນວນ​​ຢ້ຽມ​ຊົມ 40 ຄັ້ງ ​

        ວັນ​ທີ 24 ກຸມພາ 2026, ທີ່ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ສະຫາຍ ບຸນເຫຼືອ ພັນດານຸວົງ, ກໍາມະການສູນກາງພັກ, ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ​ ຂອງ ​ທ່ານ ອອງ ຊິວ ເກ (​Ong Siew Gay), ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ສິງກະໂປ ປະຈໍາ ສປປ ລາວ.

     ໃນໂອກາດດັ່ງກ່າວ, ສະຫາຍ ຫົວໜ້າ ຄຕພ ໄດ້ສະ​ແດງ​ຄວາມຍິນດີ ແລະ ​ຊົມ​ເຊີຍ ຕໍ່ທ່ານເອກອັກຄະລັດຖະທູດສິງກະໂປ ທີ່​ໄດ້​ຮັບການແຕ່ງຕັ້ງໃຫ້ມາປະຕິບັດໜ້າທີ່ວຽກງານການທູດ ຢູ່ ສປປ ລາວ ແລະ ສະ​ແດງ​ຄວາມ​ເຊື່ອ​ໝັ້ນ​ວ່າ ທ່ານ​ເອກ​ອັກ​​ຄະລັດຖະທູດ ຈະ​ສືບ​​ຕໍ່ໃຫ້​ການ​ຮ່ວມ​ມື ​ແລະ​ ປະ​ສານ​ສົມ​ທົບຢ່າງ​ແໜ້ນ​ແຟ້ນກັບພາກສ່ວນກ່ຽວຂ້ອງຂອງ ສປປ ລາວ ​ເພື່ອ​ເສີມ​ຂະ​ຫຍາຍ​ສາຍ​ພົວ​ພັນມິດຕະພາບ​ ແລະ ການຮ່ວມມື ລະຫວ່າງ ລາວ-ສິງກະໂປ ​ໃຫ້​ນັບ​ມື້​ນັບຂະຫຍາຍຕົວ ແລະ ​ມີໝາກຜົນ​ຍິ່ງໆ​ຂຶ້ນ, ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ ສອງຊາດ ແລະ ສ້າງຄວາມເຂັ້ມແຂງໃຫ້ອາຊຽນ.

     ທ່ານເອກອັກຄະລັດຖະທູດ ​ໄດ້ສະ​ແດງ​ຄວາມຂອບໃຈ ​ເປັນ​ຢ່າງ​ສູງ ທີ່​ໄດ້​ມີ​ໂອ​ກາດ​ເຂົ້າ​ຢ້ຽມ​ຂ່ຳ​ນັບ ສະຫາຍ ​​ຫົວໜ້າ ຄ​ຕ​ພ ແລະ ໄດ້ສະແດງຄວາມຊົມເຊີຍຕໍ່ ສະຫາຍ ຫົວໜ້າ ຄຕພ ທີ່ໄດ້ຮັບການເລືອກຕັ້ງເປັນ ກໍາມະການສູນກາງພັກ ໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງ ພັກ ປປ ລາວ; ທ່ານເອກອັກຄະລັດຖະທູດ ໄດ້ໃຫ້ຄໍາໝັ້ນສັນຍາຈະ​ເຮັດ​ສຸດ​ຄວາມ​ສາ​ມາດ​ຂອງ​ຕົນ ໃນ​ການ​​ເສີມຂະຫຍາຍສາຍພົວພັນມິດຕະພາບ ລະຫວ່າງ ສິງກະໂປ-ລາວ ໃຫ້​​ນັບ​ມື້ແຕກດອກອອກ​ຜົນຍິ່​ງໆ​ຂຶ້ນ.

     ສອງຝ່າຍ ຍິນດີປະສານສົມທົບ ແລະ ຊຸກຍູ້ການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ, ການສ້າງຊັບພະຍາກອນມະນຸດ ແລະ ອື່ນໆ, ລວມທັງການປະສານສົມທົບໃນຂອບອາຊຽນ, ຫຼາຍຝ່າຍ ໃນພາກພື້ນ ແລະ ໃນໂລກ ເພື່ອສ້າງຄວາມເຂັ້ມແຂງຮອບດ້ານໃຫ້ແກ່ປະຊາຄົມອາຊຽນ.

     ໃນຕອນທ້າຍ ສະຫາຍ ຫົວໜ້າ ຄຕພ ໄດ້ອວຍພອນທ່ານ ເອກອັກຄະລັດຖະທູດ ຈົງປະສົບຜົນສໍາເລັດໃນການປະຕິບັດໜ້າທີ່ການທູດຂອງຕົນ ຢູ່ ສປປ ລາວ.

---