ຄະນະຜູ້ແທນ ພັກ ປປ ລາວ ເຂົ້າຮ່ວມກອງປະຊຸມສາກົນໂຕະມົນ ພາຍໃຕ້ຫົວຂໍ້ “ຈິດໃຈຂອງການຮ່ວມມືໃນພາກພື້ນເອີຣົບ-ອາຊີ ທີ່ຍິ່ງໃຫຍ່” ໃນວັນທີ 16 ທັນວາ 2025

ເຜີຍ​ແຜ່​ໂດຍ​: moderator ເວ​ລາ: 19/12/2025 14:31:40 ຈຳ​ນວນ​​ຢ້ຽມ​ຊົມ 19 ຄັ້ງ ​

       ຄະນະຜູ້ແທນພັກ ປປ ລາວ ນໍາໂດຍ ສະຫາຍ ບຸນຍະເດດ ໄຊຍະວົງ, ຄະນະບໍລິຫານງານພັກ, ຫົວໜ້າຫ້ອງການ ຄະນະພົວພັນຕ່າງປະເທດສູນກາງພັກ ໄດ້ເຂົ້າຮ່ວມກອງປະຊຸມສາກົນໂຕະມົນ ພາຍໃຕ້ຫົວຂໍ້ “ຈິດໃຈຂອງການຮ່ວມມືໃນພາກພື້ນ ເອີຣົບ-ອາຊີ ທີ່ຍິ່ງໃຫຍ່” ໃນວັນທີ 16 ທັນວາ 2025 ຜ່ານວີດີໂອທາງໄກ. ໂດຍການເປັນປະທານ ຂອງ ທ່ານ ອັນເດຣ ກລີມົບ, ຜູ້ປະສານງານປະຈໍາສະພາຣັດເຊຍ “ເວທີປຶກສາຫາລືເອີຣົບ-ອາເຊີ”, ຮອງປະທານຄະນະກໍາມາທິການຮ່ວມມືສາກົນ ແລະ ສະໜັບສະໜູນພົນລະເມືອງພັດຖິ່ນ, ກອງປະຊຸມດັ່ງກ່າວ ມີຜູ້ຕາງໜ້າຈາກພັກການເມືອງເອີຣົບ-ອາຊີ ແລະ ບັນດາຜູ້ນໍາທາງສາສະໜາ ຢູ່ ສ. ຣັດເຊຍ ແລະ ຕ່າງປະເທດ ເຂົ້າຮ່ວມທັງໝົດ ຈໍານວນ 40 ທ່ານ.

      ກອງປະຊຸມຄັ້ງນີ້ ໄດ້ປຶກສາຫາລື ແລະ ແລກປ່ຽນຄໍາຄິດຄໍາເຫັນ ຄຸນຄ່າທາງດ້ານຈິດໃຈ ແລະ ສິນທໍາ ເຊິ່ງແມ່ນພື້ນຖານສໍາຄັນສໍາລັບການພັດທະນາປະເທດຊາດ, ຄວາມສາມັກຄີທາງສັງຄົມ ແລະ ການຮ່ວມມືສາກົນໃນໄລຍະຍາວ; ພາກພື້ນເອີຣົບ-ອາຊີ ແມ່ນພາກພື້ນໃຫຍ່ ທີ່ປະກອບດ້ວຍຫຼາຍລັດ ເຊິ່ງມີຄວາມຫຼາກຫຼາຍທາງອະລິຍະທໍາ ແລະ ມີປະຊາກອນຫຼາຍທີ່ສຸດໃນໂລກ. ບັນດາຄະນະຜູ້ແທນໄດ້ສະແດງຄວາມຊົມເຊີຍຕໍ່ພັກເຈົ້າພາບ ໃນການຈັດກອງປະຊຸມຄັ້ງນີ້ໄດ້ເປັນຢ່າງດີ ແລະ ຍົກໃຫ້ເຫັນເຖິງການຮ່ວມມືສາກົນທີ່ຍືນຍົງ, ການເຄົາລົບນັບຖືເອກະລັກທາງວັດທະນະທໍາ ແລະ ຄວາມຫຼາກຫຼາຍທາງອາລະຍະທໍາ ເຊິ່ງເປັນແຮງຂັບເຄື່ອນໃຫ້ກັບການສ້າງສັນຕິພາບ, ສະຖຽນລະພາບ, ແລະ ການພັດທະນາຮ່ວມກັນໃນໂລກຫຼາຍຂົ້ວ ທີ່ກໍາລັງເກີດຂຶ້ນ ແລະ ຮຽກຮ້ອງໃຫ້ມີການປະສານງານທີ່ໃກ້ຊິດກວ່າເກົ່າ ລະຫວ່າງບັນດາປະເທດ, ອົງການຈັດຕັ້ງສາກົນ ແລະ ສະຖາບັນມະນຸດສະທຳ ເພື່ອສົ່ງເສີມສະຖຽນລະພາບ, ຄວາມຈະເລີນຮຸ່ງເຮືອງ ແລະ ອະນາຄົດຮ່ວມກັນ ສຳລັບເອີີຣົບ-ອາຊີ ແລະ ອາລະຍະທຳໂລກໂດຍລວມ.

    ໃນໂອກາດດັ່ງກ່າວ, ຫົວໜ້າຄະນະຜູ້ແທນພັກ ປປ ລາວ ໄດ້ປະກອບຄໍາເຫັນຕໍ່ກອງປະຊຸມ ໂດຍສະແດງຊົມເຊີຍຕໍ່ພັກຣັດເຊຍເອກະພາບ ໃນການເປັນເຈົ້າພາບກອງປະຊຸມຄັ້ງນີ້ ເຊິ່ງເປັນເວທີສໍາຄັນ ໃຫ້ບັນດາຜູ້ເຂົ້າຮ່ວມໄດ້ປຶກສາຫາລື ແລກປ່ຽນຄໍາຄິດຄໍາເຫັນ ຕໍ່ກັບສະພາບການ ແລະ ບົດຮຽນຂອງຕົນ ກ່ຽວກັບການຮ່ວມມືຄຸນຄ່າດ້ານຈິດໃຈ ທີ່ຕ້ອງຄຳນຶງເຖິງຄຸນຄ່າດ້ານສິນລະທຳ, ຫຼັກຈາລິຍະທຳ, ປັດຊະຍາ ແລະ ຄວາມເຊື່ອ ທີ່ເຮັດໃຫ້ປະຊາຊົນ 2 ທະວີບ ເອີຣົບ-ອາຊີ ສາມາດແລກປ່ຽນກັນ, ເຂົ້າອົກເຂົ້າໃຈກັນ ແລະ ດຳລົງຊີວິດທີ່ກົມກຽວປອງດອງຍິ່ງຂຶ້ນ; ການຢູ່ຮ່ວມກັນບົນພື້ນຖານການເຄົາລົບນັບຖືກຽດສັກສີຂອງມະນຸດ, ຄວາມຫຼາກຫຼາຍທາງວັດທະນະທຳ, ຄວາມຍຸຕິທຳທາງສັງຄົມ ແລະ ຄວາມຮັບຜິດຊອບທາງສິນທຳ; ສະຫາຍໄດ້ຍົກໃຫ້ເຫັນວ່າ ປະເທດລາວ ມີມູນເຊື້ອທາງດ້ານວັດທະນະທໍາ ຮິດຄອງປະເພນີ ແລະ ຄວາມເຊືຶ່ອຖື ທີ່ສືບທອດກັນມາແຕ່ບູຮານນະການ; ບັນດາປັດຊະຍາ, ຫຼັກຈາລິຍະທຳ ທີ່ດີງາມ ໄດ້ເຊື່ອມໂຍງເຂົ້າສູ່ ແນວຄິດຈິດໃຈ ແລະ ວິຖີ-ແບບແຜນການດຳລົງຊີວິດຂອງປະຊາຊົນລາວ ຈົນເຖິງປະຈຸບັນ. ພ້ອມນັ້ນ, ຍັງໄດ້ຢືນຢັນທັດສະນະຂອງພັກ ປປ ລາວ ທີ່ຈະສືບຕໍ່ປະສານສົມທົບຢ່າງໃກ້ຊິດ ກັບພັກຣັດເຊຍເອກະພາບ ແລະ ພັກການເມືອງບັນດາປະເທດໃນ ອາຊີ-ເອີຣົບ ເພື່ອພັດທະນາການຮ່ວມມື ແລະ ແລກປ່ຽນບົດຮຽນດ້ານຕ່າງໆນຳກັນ, ເສີມສ້າງຄວາມເຂົ້າອົກເຂົ້າໃຈເຊິ່ງກັນ ແລະ ກັນ ເພື່ອສັນຕິພາບ, ສະຖຽນລະພາບ ການພັດທະນາ ແລະ ຄວາມປອງດອງຂອງພາກພື້ນອາຊີ-ເອີຣົບ ແລະ ໃນໂລກ.

---