ຄະນະພົວພັນຕ່າງປະເທດສູນກາງພັກ ເຂົ້າຢ້ຽມຊົມອະນຸສອນສະຖານ ປະທານ ສຸພານຸວົງ ເນື່ອງໃນໂອກາດວັນເກີດ ຄົບຮອບ 116 ປີ (13/07/1909-13/07/2025).

ເຜີຍ​ແຜ່​ໂດຍ​: moderator ເວ​ລາ: 16/07/2025 16:30:18 ຈຳ​ນວນ​​ຢ້ຽມ​ຊົມ 27 ຄັ້ງ ​

ເນື່ອງໃນໂອກາດວັນເກີດ ປະທານ ສຸພານຸວົງ ຄົບຮອບ 116 ປີ (13 ກໍລະກົດ 1909 - 13 ກໍລະກົດ 2025), ໃນຕອນເຊົ້າຂອງວັນທີ 16 ກໍລະກົດ 2025, ພະນັກງານຫຼັກແຫຼ່ງຂອງຄະນະພົວພັນຕ່າງປະເທດສູນກາງພັກ ຈຳນວນ 30 ສະຫາຍ ນໍາໂດຍ ສະຫາຍ ບຸນຍອງ ບຸດທະວົງ, ຫົວໜ້າກົມການທູດປະຊາຊົນ, ຫົວໜ້າອະນຸກໍາມະການໂຄສະນາ, ຂະບວນການ ແລະ ສະຖານທີ່ຂອງກອງປະຊຸມໃຫຍ່ສະມາຊິກພັກອົງຄະນະພັກຄະນະພົວພັນຕ່າງປະເທດສູນກາງພັກ ໄດ້ໄປຢ້ຽມຊົມອະນຸສອນສະຖານ ປະທານ ສຸພານຸວົງ ເພື່ອສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນຕໍ່ຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງ ປະທານ ສຸພານຸວົງ ທີ່ທ່ານໄດ້ອຸທິດທັງຕະຫຼອດຊີວິດຂອງຕົນ ເພື່ອພາລະກິດຕໍ່ສູ້ປົດປ່ອຍຊາດ, ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນຮຸ່ງເຮືອງສືບທອດເຖິງປັດຈຸບັນ. ພ້ອມນັ້ນ, ກໍເພື່ອແນໃສ່ການສຶກສາອົບຮົມ, ປູກຈິດສໍານຶກໃຫ້ພະນັກງານ-ສະມາຊິກພັກຂອງຄະນະພົວພັນຕ່າງປະເທດສູນກາງພັກ ໄດ້ຄົ້ນຄວ້າເຊື່ອມຊຶມຮໍ່າຮຽນເອົາແບບຢ່າງຄຸນສົມບັດສິນທຳປະຕິວັດຂອງເພິ່ນ ເພື່ອນໍາໃຊ້ເຂົ້າໃນຊີວິດຕົວຈິງ, ພ້ອມກັນນັ້ນ ທັງເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ສະມາຊິກພັກ ຄັ້ງທີ 3 ຂອງອົງຄະນະພັກຄະນະພົວພັນຕ່າງປະເທດສູນກາງພັກ.

ການໄປຢ້ຽມຊົມໃນຄັ້ງນີ້ ຜູ້ເຂົ້າຮ່ວມໄດ້ຮັບຟັງການບັນລະຍາຍ ກ່ຽວກັບວິລະກຳການຕໍ່ສູ້ກູ້ຊາດຂອງ ປະທານ ສຸພານຸວົງ ເຮັດໃຫ້ແຕ່ລະສະຫາຍໄດ້ຮັບຮູ້ ແລະ ເຫັນແຈ້ງຕໍ່ເຫດການຕໍ່ສູ້ທາງດ້ານການເມືອງ, ການ ທະຫານອັນສະຫຼາດຄ່ອງແຄ້ວຂອງ ປະທານ ສຸພານຸວົງ, ເຊິ່ງເປັນການທັດສະນະສຶກສາ, ຮຽນຮູ້ທັງເປັນການປູກ ຈິດສໍານຶກ, ຍົກສູງສະຕິຕໍ່ຊາດ, ການສຶກສາອົບຮົມການເມືອງແນວຄິດໃຫ້ພະນັກງານ-ສະມາຊິກພັກຂອງຄະນະ ພົວພັນຕ່າງປະເທດສູນກາງພັກ ໄດ້ກຳແໜ້ນ ແລະ ຮັບຮູ້ເຖິງປະຫວັດອັນພິລະອາດຫານ, ຄວາມເສຍສະຫຼະເພື່ອຊາດ ເພື່ອປະຊາຊົນ, ຮັກບ້ານເກີດເມືອງນອນ ແລະ ນໍາເອົາບົດຮຽນທາງປະຫວັດສາດມາໝູນໃຊ້ ເຂົ້າໃນໜ້າທີ່ ວຽກງານການເມືອງຕົວຈິງຂອງຕົນ ໃຫ້ມີຜົນສໍາເລັດຍິ່ງໆຂຶ້ນ.

---