ຄະນະພົວພັນຕ່າງປະເທດສູນກາງພັກ, ຈັດພິທີມອບ-ຮັບ ໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ; ເຜີຍແຜ່ເນື້ອໃນຈິດໃຈກອງປະຊຸມວຽກງານກວດກາທົ່ວປະເທດ ປີ 2024; ສະຫຼຸບ ແລະ ເປີດຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ

ເຜີຍ​ແຜ່​ໂດຍ​: moderator ເວ​ລາ: 12/03/2025 11:37:31 ຈຳ​ນວນ​​ຢ້ຽມ​ຊົມ 28 ຄັ້ງ ​

       ໃນ​ວັນ​ທີ  07 ມີນາ 2025, ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຄ​ຕ​ພ) ໄດ້ຈັດພິທີມອບ-ຮັບ​ ໃບຢັ້ງຢືນໜ່ວຍ​ພັກ​ປອດ​ໃສ, ເຂັ້ມ​ແຂງ, ໜັກ​ແໜ້ນ; ເຜີຍ​ແຜ່​ເນື້ອ​ໃນ​ຈິດ​ໃຈ​ກອງ​ປະ​ຊຸມ​ວຽກ​ງານກວດ​ກາ​ທົ່ວ​ປະ​ເທດ ປີ 2024; ສະຫຼຸບ ແລະ ເປີດຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ປີ 2025 ພາຍ​ໃຕ້​ການ​ເປັນ​ປະ​ທານ ​ຂອງ​ ສະ​ຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະພັກ, ຮັກສາການຫົວ​ ໜ້າ ​ຄະນະພົວພັນຕ່າງປະເທດສູນກາງພັກ ຊຶ່ງມີບັນດາຄະນະບໍລິຫານງານພັກ, ຫ້ອງການ, ບັນດາກົມ, ພະແນກ, ສະມາຊິກພັກ, ພະນັກງານ ເຂົ້າ​ຮ່ວມ 92 ສະ​ຫາຍ, ຍິງ 36 ສະ​ຫາຍ.

     ສະ​ຫາຍ ​ຮັກ​ສາ​ການ ​ເລ​ຂາ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ  ໄດ້ສະແດງຄວາມຊົມເຊີຍ ແລະ ຕີ​ລາ​ສູງມາຍັງບັນ​ດາໜ່ວຍພັກພາຍໃນຄະນະພົວພັນຕ່າງປະເທດສູນກາງພັກ ທີ່ສາມາດສ້າງ ແລະ ຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ໄດ້ເຖິງ 6 ໜ່ວຍພັກ ເຊິ່ງເປັນຄັ້ງທີ 2 ທີ່ສາມາດຍາດມາໄດ້ພ້ອມກັນທັງ 6 ໜ່ວຍພັກ ສາມາດຕີລາໄດ້ 100 %, ສິ່ງດັ່ງກ່າວສະແດງໃຫ້ເຫັນເຖິງການຊີ້ນຳໆພາ, ຄວາມເປັນເອກະພາບ​ພາຍ​ໃນ​ໜ່ວຍ​ພັກ, ຄວາມບຸກບືນຫ້າວຫັນໃນການເຄື່ອນໄຫວເຮັດໜ້າທີ່ການເມືອງ ຂອງສະ​ມາ​ຊິກ​ພັກ-ພະ​ນັກ​ງານຢ່າງຕັ້ງໜ້າ ໂດຍ​ຕິດ​ພັນ​ກັບຂະ​ບວນ​ການ​ແຂ່ງ​ຂັນ-ຍ້ອງ​ຍໍ ​ຮັກ​ຊາດ ແລະ ພັດ​ທະ​ນາ ຂອງ​ບັນ​ດາ​ກົມ ສຳ​ເລັດ​ຜົນດ້ວຍ​ດີ ເຊິ່ງ​ສະ​ແດງ​ອອກ​ໃນ​ການ​ປະ​ເມີນວຽກງານ ແລະ ​ການຍ້ອງ​ຍໍ​ ​ປະ​ຈຳ​ປີ​ 2024 ຂອງພະ​ນັກ​ງານ-​ລັດ​ຖະ​ກອນ ທີ່ຜ່ານ​ມານີ້.

      ໂອກາດນີ້ ສະ​ຫາຍ ກໍ່​ໄດ້​ໃຫ້​ທິດ​ຊີ້​ນຳ​ບັນ​ດາ​ໜ່ວຍ​ພັກ ພາຍ​ໃນ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ຈົ່ງ​ພາ​ກັນສືບຕໍ່ຮັກສານາມມະຍົດໃຫ້ໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນຊຸມ​ປີຕໍ່​ໜ້າ ແລະ ​ຕິດ​ພັນ​ກັບ​ຂະ​ບວນ​ການ​ແຂ່ງ​ຂັນ-ຍ້ອງ​ຍໍ ຮັກ​ຊາດ ແລະ ພັດ​ທະ​ນາ ໃຫ້ເປັນ​ຂະ​ບວນ​ການຟົດ​ຟື້ນ, ຍົກ​ສູງ​ຄວາມ​ເປັນ​ແບບ​ຢ່າງ​ນຳ​ໜ້າ, ເອົາ​ໃຈ​ໃສ່ວຽກງານນຳພາການເມືອງ-ແນວຄິດ ​ຂອງ​ສະ​ມາ​ຊິກ​ພັກ-ພະ​ນັກ​ງານ ເປັນ​ກົກ, ເອົາໃຈໃສ່ໃນການປະຕິບັດຫຼັກການລວມສູນປະຊາທິປະໄຕ, ພ້ອມ​ກັນປັບປຸງລະບອບແບບແຜນວິທີເຮັດວຽກ​ກັບການຈັດຕັ້ງປະຕິບັດວາລະແຫ່ງຊາດ, ສຶກສາອົບຮົມໃຫ້ພະນັກງານ-ສະມາຊິກພັກ ເອົາ​ໃຈ​ໃສ່​ການ​ປະ​ຕິ​ບັດກົດລະບຽບຂອງພັກ, ກົດໝາຍຂອງລັດ ວາງອອກ, ຮັບປະກັນໃນການເປັນເສນາທິການໃຫ້ຂັ້ນເທິງ​ໃນ​ແຕ່​ລະ​ໄລ​ຍະ, ໃນໂອກາດດຽວກັນ, ບັນດາໜ່ວຍພັກ ພາຍໃນ ຄຕພ ກໍ່ໄດ້ຂື້ນຈັບມືເປີດຂະບວນການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ປີ 2025, ໂດຍບັນດາໜ່ວຍພັກໄດ້ໃຫ້ຄຳໝັ້ນສັນຍາວ່າ ຈະພ້ອມກັນສູ້ຊົນສືບຕໍ່ກໍ່ສ້າງໜ່ວຍພັກຂອງຕົນ ແລະ ຫຼາຍກວ່າເກົ່າ ທັງດ້ານປະລິມານ ແລະ ຄຸນນະພາບ ເພື່ອສຶບຕໍ່ເປັນເຈົ້າການໃນການຮັກສານາມມະຍົດໜ່ວຍພັກຂອງຕົນໃຫ້ໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີ 2025 ແລະ ໃນ​ປີຕໍ່ໄປ.

---