ຄຕພ ຈັດຝຶກອົບຮົມວຽກງານການຂ່າວ ໃຫ້ພະນັກງານວິຊາການ

ເຜີຍ​ແຜ່​ໂດຍ​: moderator ເວ​ລາ: 14/01/2025 14:03:54 ຈຳ​ນວນ​​ຢ້ຽມ​ຊົມ 35 ຄັ້ງ ​

       ໃນວັນທີ 6-8/01/2025, ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຄຕພ) ໄດ້​ຈັດ​ຊຸດ​ຝຶກ​ອົບ​ຮົມ​ວຽກ​ງານ​ການ​ຂ່າວ ໂດຍ ມີ​ວິ​ທະ​ຍາ​ກອນ 2 ສະ​ຫາຍ ​ຈາກສະ​ຖາ​ນີ​ໂທ​ລະ​ພາບ​ແຫ່ງ​ຊາດ​ລາວ ມາ​ໃຫ້​ການ​ບັນ​ຍາຍ ແກ່ພະນັກງານວິຊາການຂອງ ຄ​ຕ​ພ ຈຳ​ນວນ 25 ສະ​ຫາຍ. ​ຈຸດ​ປະ​ສົງ​ຂອງ​ການ​ຝຶກ​ອົບ​ຮົມ​ຄັ້ງ​ນີ້ ເພື່ອເປັນການຍົກລະດັບຄວາມເຂົ້າໃຈ ກ່ຽວກັບ ວຽກງານການຂ່າວ ແລະ ການນຳໃຊ້ເຄື່ອງມື ທີ່ທັນສະໄໝ ເຂົ້າໃນວຽກງານວິຊາສະເພາະຂອງແຕ່ລະພາກສ່ວນ.

        ໃນ​ໄລ​ຍະ​ຝຶກ​ອົບ​ຮົມ,​ ສຳ​ມະ​ນາ​ກອນ ໄດ້​ແລກ​ປ່ຽນ​ບົດ​ຮຽນໃນ​ການ​ຂຽນ​ຂ່າວ, ການ​ອອກ​ຂ່າວ ແລະ ຄວາມຮູ້ພື້ນຖານກ່ຽວກັບການຖ່າຍພາບ, ວິທີຖ່າຍພາບ ໃນສະຖານທີ່ຕ່າງໆ, ວິທີປັບແຕ່ງຮູບພາບ, ວິທີການບັນທຶກວີດີໂອ, ​ການຕັ້ງກ້ອງວີດີໂອ, ​ລວມ​ທັງ​ການ​ນຳ​ໃຊ້ໂປຣແກຣມ ຕັດ​ຕໍ່​ພາບ​ວິ​ດີ​ໂອ ​ໃນ​ການຕັດຕໍ່ວີດີໂອ, ​​ຄວາມ​ຮູ້ໃໝ່ ແລະ ບົດຮຽນຕົວຈິງໃນ​ການ​ໃຊ້​ເຄື່ອງ​ມື​ທີ່​ທັນ​ສະ​ໄໝ, ສາມາດນຳໃຊ້ເຂົ້າໃນວຽກງານຂອງຕົນໃຫ້ມີປະສິດທິພາບກວ່າເກົ່າ; ສຳ​ມະ​ນາ​ກອນ ແລະ ວິ​ທະ​ຍາ​ກອນ ​ຍັງ​ໄດ້​ແລກ​ປ່ຽນ​ຄວາມ​ຄິດ​ເຫັນ, ປະສົບການ ນຳ​ກັນ​ຢ່າງ​ກົງ​ໄປ​ກົງ​ມາ ດ້ວຍ​ບັນ​ຍາ​ກາດ​ທີ່​ຟົດ​ຟື້ນ.

        ຊຸດ​ຝຶກ​ອົບ​ຮົມ​ຍັງ​ເປັນ​ການ​ຮັດ​ແໜ້ນກົນ​ໄກ​ປະ​ສານ​ງານ​ ລະ​ຫວ່າງ ຄ​ຕ​ພ​ ແລະ ພາກ​ສ່ວນ​ສື່ມວນ​ຊົນ ເຊິ່ງນອກ​ຈາກ​ເປັນການເສີມສ້າງທັກສະ ແລະ ຄວາມຊຳນິຊຳນານໃນ​ວຽກ​ງານ​ການ​ຂ່າວແ​ລ້ວ​ ຍັງເປັນ​ການ​ຍົກ​ສູງ​ຄຸນ​ນະ​ພາບ​ໃນ​ການ​ເປັນ​ເສ​ນາ​ທິ​ການ​ໃຫ້​ແກ່​ຂັ້ນ​ເທິງໃນ​ການ​ເຜີຍ​ແຜ່​ແນວ​ທາງ​ການ​ຕ່າງ​ປະ​ເທດຂອງ​ພັກ ​ກໍ່​ຄື ເຮັດ​ສຳ​ເລັດ​ໜ້າ​ທີ່ ທີ່​ໄດ້​ຮັບ​ມອບ​ໝາຍ ​ແລະ ​ການຫັນ​ເປັນ​ທັນ​ສະ​ໄໝ​ເທື່ອ​ລະ​ກ້າວ.

       ພາຍຫຼັງ​ສຳ​ເລັດ​ຊຸດ​ຝຶກ​ອົບ​ຮົມ ​ຍັງ​ໄດ້​ມີ​ພິ​ທີ​ການມອບ​ໃບ​ຢັ້ງ​ຢືນ​ໃຫ້​ບັນ​ດາ ​ສຳ​ມະ​ນາ​ກອນ ຊຶ່ງ​ໃຫ້​ກຽດ​ມອບໂດຍ ສະ​ຫາຍ ບຸນ​ຍະ​ເດດ ໄຊ​ຍະ​ວົງ, ກຳ​ມະ​ການ​ຄະ​ນະ​ພັກ, ຫົວ​ໜ້າ​ຫ້ອງ​ການ ຄ​ຕ​ພ.

---