ຄະນະພົວພັນຕ່າງປະເທດສູນກາງພັກ

ກອງປະຊຸມສະຫຼຸບການເຄື່ອນໄຫວວຽກງານຕ່າງປະເທດ ປະຈຳປີ 2024 ແລະ ທິດທາງແຜນການ ປີ 2025 ຂອງຄະນະພົວພັນຕ່າງປະເທດສູນກາງພັກ

ເຜີຍແຜ່ໂດຍ: moderator ເວລາ: 10/01/2025 15:33:04 ຈຳນວນຢ້ຽມຊົມ 81 ຄັ້ງ

ໂດຍປະຕິບັດຕາມແຜນການປະຈໍາປີ 2024 ຂອງ ຄະນະພົວພັນຕ່າງປະເທດສູນກາງພັກ, ໃນຕອນເຊົ້າ ຂອງວັນທີ 10 ມັງກອນ 2025 ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຂອງຕົນໃນໄລຍະ 1 ປີ ຜ່ານມາ, ໂດຍການເປັນປະທານຂອງ ສະຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ແລະ ມີຄະນະພັກ-ຄະນະນໍາ, ຄະນະກົມ, ພະນັກງານອາວຸໂສບໍານານ ຕະຫຼອດເຖິງ ພະນັກງານ-ສະມາຊິກພັກຫຼັກແຫຼ່ງທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມ.

ກອງປະຊຸມໄດ້ຮັບຟັງການສະຫຼຸບຕີລາຄາຄືນການປະຕິບັດວຽກງານຂອງ ຄະນະພົວພັນຕ່າງປະເທດສູນກາງພັກ ໃນໄລຍະ 1 ປີ ຜ່ານມາ, ໂດຍໄດ້ຍົກໃຫ້ເຫັນຜົນງານທີ່ຍາດມາໄດ້, ບາງດ້ານທີ່ຄົງຄ້າງ, ບົດຮຽນທີ່ຖອດຖອນໄດ້, ທິດທາງແຜນການ ແລະ ຄາດໝາຍສູ້ຊົນສຳລັບປີ 2025. ໃນຂະນະດຽວກັນໃນພິທີ, ສະຫາຍ ເກີລໍ່ ຢ່າງກໍ, ຫົວໜ້າກົມຈັດຕັ້ງ-ພະນັກງານ ຂອງຄະນະພົວພັນຕ່າງປະເທດສູນກາງພັກ ໄດ້ຂຶ້ນຜ່ານມະຕິຕົກລົງ ຂອງເລຂາທິການສູນກາງພັກ ສະບັບເລກທີ 307 /ຄລສພ, ລົງວັນທີ 29 ພະຈິກ 2024 ວ່າດ້ວຍວ່າດ້ວຍການແຕ່ງຕັ້ງ ສະຫາຍ ວາລະໄຊ ເລັ່ງສະຫວັດ, ກຳມະການຄະນະພັກ ຂຶ້ນເປັນຮອງເລຂາຄະນະບໍລິຫານງານພັກ ຄະນະພົວພັນຕ່າງປະເທດສູນກາງພັກ ແລະ ຜ່ານຂໍ້ຕົກລົງວ່າດ້ວຍການອະນຸມັດໃຫ້ພະນັກງານ ອອກພັກຜ່ອນຮັບອຸດໜູນ-ບຳນານ 2 ສະຫາຍ, ເລື່ອນຕຳແໜ່ງບໍລິຫານຂັ້ນກົມ 1 ສະຫາຍ, ຂັ້ນຫົວໜ້າພະແນກ 6 ສະຫາຍ ແລະ ຮອງຫົວໜ້າພະແນກ 4 ສະຫາຍ; ພ້ອມທັງຍ້ອງຍໍ ພະນັກງານພາຍໃນ ຄະນະພົວພັນຕ່າງປະເທດສູນກາງພັກ ຜູ້ມີຜົນງານດີເດັ່ນ.

ໃນກອງປະຊຸມດັ່ງກ່າວ, ສະຫາຍ ບຸນເຫຼືອ ພັນດານຸວົງ ໄດ້ໃຫ້ກຽດໂອ້ລົມ ໄດ້ສະແດງຄວາມຊົມເຊີຍຕໍ່ ບັນດາຜົນສຳເລັດ ແລະ ຜົນງານທີ່ພະນັກງານຄະນະພົວພັນຕ່າງປະເທດສູນກາງພັກ ຍາດມາໄດ້ຕະຫຼອດ ໄລຍະ 1 ປີ ຜ່ານມາ, ໂດຍສະເພາະ ໄດ້ເປັນເຈົ້າການຄົ້ນຄວ້າສະເໜີຂັ້ນເທິງພິຈາລະນາຕົກລົງຂະຫຍາຍການຮ່ວມມືດ້ານພັກເພີ່ມຂື້ນຕື່ມອີກ 5 ພັກການເມືອງ. ປັດຈຸບັນ, ພັກປະຊາຊົນ ປະຕິວັດລາວ ມີສາຍພົວພັນກັບ 145 ພັກການເມືອງ, ມີສະມາຄົມມິດຕະພາບລາວກັບຕ່າງປະເທດ 20 ສະມາຄົມ ແລະ 1 ຄະນະສັນຕິພາບ ແລະ ສາມັກຄີຂອງລາວ ເຊິ່ງເປັນການເຮັດສຳເລັດພາລະບົດບາດ ເປັນເສນາທິການໃຫ້ແກ່ສູນກາງພັກ ໃນການເຄື່ອນໄຫວຕ່າງປະເທດດ້ານພັກ ແລະ ການທູດປະຊາຊົນ ອັນໄດ້ເຮັດໃຫ້ມີເພື່ອນມິດນັບມື້ນັບເພີ່ມຂຶ້ນ, ບົດບາດຂອງ ພັກ-ລັດເຮົາ ໄດ້ຮັບການຍົກສູງໃນເວທີພາກພື້ນ ແລະ ສາກົນ. ສະຫາຍ ຍັງໄດ້ຊົມເຊີຍບັນດາພະນັກງານ ທີ່ໄດ້ຮັບໜ້າທີ່ໃໝ່ ເຊິ່ງຖືເປັນຄວາມໄວ້ເນື້ອເຊື່ອໃຈຢ່າງສູງຈາກຄະນະພັກ-ຄະນະນຳ ຄະນະພົວພັນຕ່າງປະເທດສູນກາງພັກ ໃຫ້ປະຕິບັດໜ້າທີ່ສຳຄັນ. ນອກນັ້ນ, ກໍໄດ້ມີຄໍາເຫັນ ຊີ້ນໍາໃຫ້ພະນັກງານ-ສະມາຊິກພັກ ຂອງ ຄຕພ ສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ II ຂອງ ອົງຄະນະພັກ ຄຕພ, ແຜນພັດທະນາ ຄຕພ ແຕ່ປີ 2021-2025, 2 ວາລະແຫ່ງງຊາດ, ຂໍ້ແຂ່ງຂັນຮັກຊາດ ແລະ ພັດທະນາ ໃຫ້ແຕກດອກອອກຜົນຍິ່ງໆຂຶ້ນ.

ໃນຕອນທ້າຍ, ສະຫາຍ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ໄດ້ສະແດງຄວາມເຊື່ອໝັ້ນວ່າດ້ວຍຈິດໃຈມານະບຸກບືນ, ຄວາມສາມັກຄີເປັນເອກະພາບພາຍໃນ ຈະເຮັດໃຫ້ການປະຕິບັດໜ້າທີ່ ຂອງ ຄະນະພົວພັນຕ່າງປະເທດສູນກາງພັກ ສືບຕໍ່ຍາດໄດ້ຜົນສຳເລັດໃຫຍ່ກວ່າເກົ່າ, ສືບຕໍ່ສ້າງສະພາບແວດລ້ອມທີ່ເອື້ອອໍານວຍ ໂດຍຍຶດໝັ້ນແນວທາງການຕ່າງປະເທດ “ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ ແລະ ປະຕິບັດນະໂຍບາຍເປີດກວ້າງການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ ເພີ່ມມິດຫຼຸດຜ່ອນສັດຕູ” ແລະ ປະຕິບັດຕາມຄໍາຂວັນ ຂອງກອງປະຊຸມວຽກງານການຕ່າງປະເທດ ຄັ້ງທີ 14 ຄື: ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ, ພ້ອມທັງເພີ່ມທະວີປະສິດທິພາບການຈັດຕັ້ງປະຕິບັດຜົນການເຄື່ອນໄຫວຕ່າງປະເທດ ໃຫ້ປະກົດຜົນເປັນຮູບປະທຳ ເຮັດໃຫ້ການເຄື່ອນໄຫວວຽກງານການຕ່າງປະເທດ ຂອງ ສປປ ລາວ ສືບຕໍ່ຍາດໄດ້ຜົນສໍາເລັດທີ່ພົ້ນເດັ່ນ ທັງຂອບການພົວພັນຮ່ວມມືສອງຝ່າຍ ແລະ ຫຼາຍຝ່າຍ ຊຶ່ງເປັນການປະກອບສ່ວນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.