ຄະນະພົວພັນຕ່າງປະເທດສູນກາງພັກ

ກອງທຶນຈີນ ເພື່ອພັດທະນາຊົນນະບົດ ຊ່ວຍເຫຼືອລົດຖີບໃຫ້ແກ່ນັກຮຽນໃນ ສປປ ລາວ ຈໍານວນ 1,000 ຄັນ

ເຜີຍແຜ່ໂດຍ: moderator ເວລາ: 30/12/2024 11:31:32 ຈຳນວນຢ້ຽມຊົມ 19 ຄັ້ງ

ໃນວັນທີ 25 ທັນວາ 2024 ທີ່ສະພາແຫ່ງຊາດ, ນະຄອນຫຼວງວຽງຈັນ, ຄະນະສັນຕິພາບ ແລະ ສາມັກຄີຂອງລາວ ແລະ ກອງທຶນຈີນເພື່ອພັດທະນາຊົນນະບົດ ໄດ້ຈັດພິທີມອບ - ຮັບ ແລະ ແຈກຢາຍລົດຖີບ (ການຊ່ວຍເຫຼືອຈາກມູນນິທິຈີນເພື່ອພັດທະນາຊົນນະບົດ) ໃຫ້ແກ່ນັກຮຽນ ໃນ ສປປ ລາວ, ໃຫ້ກຽດເເປັນປະທານຮ່ວມໃນຄັ້ງນີ້ ທ່ານ ສົມມາດ ພົລເສນາ, ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ ແລະ ທ່ານ ນາງ Lin yuan, ຕາງໜ້າກອງທຶນຈີນເພື່ອພັດທະນາຊົນນະບົດ, ໃນນີ້, ມີບັນດາສະມາຊິກສະພາແຫ່ງຊາດ ປະຈໍາບັນດາເຂດເລືອກຕັ້ງໃນທົ່ວປະເທດ; ຄະນະບໍລິຫານງານຄະນະສັນຕິພາບ ແລະ ສາມັກຄີຂອງລາວ; ຄະນະກົມ, ຄະນະພະແນກ, ວິຊາການຈາກຄະນະພົວພັນຕ່າງປະເທດສູນກາງພັກ, ກະຊວງສຶກສາທິການ ແລະ ກິລາ, ພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຄູອາຈານ ແລະ ນັກຮຽນຈາກບັນດາໂຮງຮຽນປະຖົມສົມບູນ ແລະ ໂຮງຮຽນມັນທະຍົມສົມບູນຂອງນະຄອນຫຼວງວຽງຈັນ ເຂົ້າຮ່ວມປະມານ 150 ກວ່າທ່ານເຂົ້າຮ່ວມ.

ລົດຖີບທີ່ໄດ້ມອບ - ຮັບ ໃນຄັ້ງນີ້ ມີຈໍານວນລວມທັງໝົດ 1,000 ຄັນ, ລວມມູນຄ່າທັງໝົດ 40,040 ໂດລາສະຫະລັດ, ເຊິ່ງຄະນະສັນຕິພາບ ແລະ ສາມັກຄີຂອງລາວ ແລະ ກອງທຶນຈີນເພື່ອພັດທະນາຊົນນະບົດ ໄດ້ມອບຜ່ານ ບັນດາສະມາຊິກສະພາແຫ່ງຊາດປະຈໍາເຂດເລືອກຕັ້ງຕ່າງໆ ໃນ ສປປ ລາວ ເພື່ອມອບໃຫ້ນັກຮຽນຂອງລາວໃນນະຄອນ ຫຼວງວຽງຈັນ ແລະ 17 ແຂວງທົ່ວປະເທດ. ໃນພິທີດັ່ງກ່າວ, ທ່ານ ປະທານຄະນະສັນຕິພາບ ແລະ ສາມັກຄີຂອງລາວ ສະແດງຄວາມຂອບໃຈຢ່າງສູງມາຍັງພັກກອມມູນິດຈີນ, ລັດຖະບານ ແລະ ປະຊາຊົນຈີນ, ໂດຍສະເພາະແມ່ນກອງທຶິນຈີນເພື່ອພັດທະນາຊົນນະບົດ, ກຸ່ມບໍລິສັດ Hello ແລະ ມູນນິທິການກຸສົນ COSCO ຂົນສົ່ງສິນຄ້າ, ບໍລິສັດລົດໄຟລາວ - ຈີນ ທີ່ໄດ້ມີສ່ວນຮ່ວມໃນການປະກອບສ່ວນຈໍານວນລົດຖີບທີ່ມີຄວາມໝາຍຄວາມສໍາຄັນດັ່ງກ່າວໃຫ້ແກ່ນັກຮຽນຂອງ ລາວ ໃນທົ່ວປະເທດ ແລະ ຈະນຳເອົາລົດຖີບຊ່ວຍເຫຼືອດັ່ງກ່າວໄປນຳໃຊ້ໃຫ້ເກີດປະໂຫຍດສູງສຸດ, ປະກອບສ່ວນປັບປຸງຄຸນນະພາບການສຶກສາ ຂອງນ້ອງນັກຮຽນໃຫ້ນັບມື້ດີຂຶ້ນ, ຫວັງຢ່າງຍິ່ງວ່າບັນດາອົງການດັ່ງກ່າວຈະສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນຕໍ່ໜ້າ.