ຄະນະພົວພັນຕ່າງປະເທດສູນກາງພັກ

ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບທູດຕວັກກີເຂົ້າຢ້ຽມຂໍ່ານັບອໍາລາ.

ເຜີຍແຜ່ໂດຍ: moderator ເວລາ: 24/12/2024 16:10:42 ຈຳນວນຢ້ຽມຊົມ 51 ຄັ້ງ

ວັນທີ 24 ທັນວາ 2024, ທີ່ ສຳນັກງານຄະນະພົວພັນຕ່າງປະເທດສູນກາງພັກ, ທ່ານ ບຸນເຫຼືອ ພັນດານຸວົງ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂ່ຳນັບອໍາລາຂອງ ທ່ານ ໂອຣຮັນ ອືເຊີກ (Orhan Isik), ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ຕວັກກີ ປະຈໍາ ສປປ ລາວ.

ໃນໂອກາດພົບປະ ທ່ານ ບຸນເຫຼືອ ພັນດານຸວົງ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍທ່ານທູດໃນການສໍາເລັດການປະຕິບັດໜ້າທີ່ຂອງຕົນຢູ່ ສປປ ລາວ ຕະຫຼອດໄລຍະ 04 ປີ, ເຊິ່ງປະກອບສ່ວນສໍາຄັນເຂົ້າໃນການເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ແລະ ສ. ຕວັກກີ; ຕີລາຄາສູງ ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ຕະຫຼອດໄລຍະກວ່າຫົກທົດສະວັດ ຜ່ານມາ; ສະແດງຄວາມຂອບໃຈ ລັດຖະບານ ແລະ ປະຊາຊົນຕວັກກີ ທີ່ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ເປັນຕົ້ນ: ທາງດ້ານສາທາລະນະສຸກ, ການສຶກສາ, ການສົ່ງເສີມທັກສະ ແລະ ຄວາມກ້າວໜ້າຂອງຊາວໜຸ່ມ ແລະ ແມ່ຍິງ ແລະ ເຊື່ອໝັ້ນວ່າ ສ. ຕວັກກີ ຈະສືບຕໍ່ໃຫ້ການສະໜັບສະໜູນຂະແໜງການຕ່າງໆຂອງ ສປປ ລາວ ເພື່ອສົ່ງເສີມການພົວພັນ ແລະ ການຮ່ວມມື ລະຫວ່າງ ສອງປະເທດ.

ທ່ານທູດ Orhan Isik ໄດ້ສະແດງຄວາມຂອບໃຈຢ່າງຈິງໃຈຕໍ່ ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງຊົມເຊີຍການເຂົ້າຮັບໜ້າທີ່ໃໝ່ຂອງ ທ່ານ ບຸນເຫຼືອ ພັນດານຸວົງ ແລະ ໄດ້ຕີລາຄາສູງຕໍ່ຜົນສຳເລັດຂອງ ສປປ ລາວ ໃນການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດທີ່ກ່ຽວຂ້ອງອື່ນໆ. ພ້ອມນັ້ນ, ທ່ານທູດ ໄດ້ຢືນຢັນວ່າ ຈະສືບຕໍ່ຊຸກຍູ້ ລັດຖະບານຕວັກກີ ໃນການສະໜັບສະໜູນ ແລະ ຊ່ວຍເຫຼືອ ສປປ ລາວ ແລະ ເພີ່ມທະວີຮ່ວມມືກັບພາກສ່ວນຕ່າງໆຂອງລາວ ເພື່ອປະກອບສ່ວນເຂົ້າໃນການເສີມຂະຫຍາຍການພົວພັນ ລະຫວ່າງ ສປປ ລາວ ແລະ ສ. ຕວັກກີ ໃຫ້ນັບມື້ແໜ້ນແຟ້ນຍິ່ງຂຶ້ນ.