ຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 24/12/2024 16:00:37 ຈຳ​ນວນ​​ຢ້ຽມ​ຊົມ 60 ຄັ້ງ ​

       ໂດຍຕອບສະໜອງຕາມຄຳເຊີນ ຂອງ ຄະນະສັນຕິພາບ ແລະ ສາມັກຄີ ຂອງລາວ, ຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ ນໍາໂດຍ ສະຫາຍ ຟານ ແອັງ ເຊີນ, ປະທານສະ ຫະພັນບັນດາອົງການຈັດຕັ້ງມິດຕະພາບຫວຽດນາມ ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ແຕ່ວັນທີ 23-24 ທັນວາ 2024.

     ວັນທີ 23 ທັນວາ 2024, ໄດ້ມີກອງປະຊຸມພົບປະແລກປ່ຽນບົດຮຽນການເຄື່ອນໄຫວການທູດປະຊາຊົນ ແລະ ການຄຸ້ມຄອງອົງການຈັດຕັ້ງສາ​ກົນ​ທີ່ບໍ່ສັງກັດລັດຖະບານ (INGOs), ອົງການຈັດຕັ້ງທາງສັງຄົມ (CSOs) ລະຫວ່າງ ຄະນະສັນຕິພາບ ແລະ ສາມັກຄີ ຂອງລາວ ແລະ ສະຫະພັນບັນດາອົງການຈັດຕັ້ງມິດຕະພາບ ຫວຽດນາມ. ຝ່າຍລາວ ນໍາໂດຍ ສະຫາຍ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງ ລາວ; ຝ່າຍຫວຽດນາມ ນໍາໂດຍ ສະຫາຍ ຟານ ແອັງ ເຊີນ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ. ໃນກອງປະຊຸມໄດ້ຍົກຫົວຂໍ້ແລກປ່ຽນບົດຮຽນກ່ຽວກັບການເຄື່ອນ ໄຫວການທູດປະຊາຊົນ, ເຊິ່ງສອງຝ່າຍ ຕີລາຄາກ່ຽວກັບການທູດປະຊາຊົນມີບົດບາດສໍາຄັນໃນປະຈຸບັນເຄື່ອນໄຫວຄຽງຄູ່ກັບການເຄື່ອນໄຫວຕ່າງປະເທດ ຂອງພັກ ແລະ ລັດ, ສ້າງສະພາບແວດລ້ອມອັນເອື້ອອໍານວຍໃຫ້ແກ່ການພົວພັນຮ່ວມມື. ການເຄື່ອນໄຫວການທູດປະຊາຊົນ ຍັງເປັນວິທີທາງໃນການໂຄສະນາເຜີຍແຜ່ແນວທາງ ແລະ ຄວາມເປັນຈິງ ຂອງປະເທດຕົນຕໍ່ຕ່າງປະເທດ ເພື່ອໃຫ້ເຂົາເຈົ້າມີຄວາມເຫັນດີເຫັນພ້ອມ ແລະ ໃຫ້ການໜັບສະໜູນ. ພ້ອມນັ້ນ, ຍັງຈະໄດ້ແລກປ່ຽນກ່ຽວກັບການຄຸ້ມຄອງອົງການຈັດຕັ້ງສາ​ກົນ​ທີ່ບໍ່ສັງກັດລັດຖະບານ (INGOs) ແລະ ອົງການຈັດຕັ້ງທາງສັງຄົມ (CSOs), ເຊິ່ງສອງຝ່າຍໄດ້ຕີລາຄາການປະກອບສ່ວນ ຂອງບັນດາອົງການຈັດຕັ້ງດັ່ງກ່າວທີ່ເປັນຄູ່ຮ່ວມມືເພື່ອການພັດທະນາຢູ່ ສປປ ລາວ.

      ໃນວັນທີ 24 ທັນວາ 2024, ໄດ້ຈັດປາຖະກະຖາເຜີຍແຜ່ຜົນສໍາເລັດການປະຕິບັດແນວທາງການທູດ​ຕົ້ນໄຜ່ ຂອງ ສສ ຫວຽດນາມ ຢູ່ ຄະນະໂຄສະນາອົບຮົມສູນກາງພັກ ເພື່ອໃຫ້ ພະນັກງານ ຂອງ ລາວ ໄດ້ຮັບຮູ້ ກ່ຽວກັບຜົນສໍາເລັດ ຂອງ ສສ ຫວຽດນາມ ໃນການໝູນໃຊ້ການທູດຕົ້ນໄຜ່ ຂອງ ສສ ຫວຽດນາມ ໃນການພົວພັນຮ່ວມມືກັບຕ່າງປະເທດ.

      ໃນວັນດຽວກັນ, ຄະນະຜູ້ແທນສະຫະພັນບັນດາອົງການຈັດຕັ້ງມິດຕະພາບຫວຽດນາມ ໄດ້ເຂົ້າຢ້ຽມຂໍ່ານັບ ສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ແລະ ສະຫາຍ ບຸນເຫຼືອ ພັນດານຸວົງ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ. ການພົບປະ ສະຫາຍການນໍາ ຂອງ ລາວ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມ ຂອງ ຄະນະຜູ້ແທນ ຖືເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ. ພ້ອມນັ້ນ, ຍັງໄດ້ແຈ້ງ ສະແດງຄວາມຊົມເຊີຍຕໍ່ການເຄື່ອນໄຫວ ຂອງ ສະຫະພັນບັນດາອົງການຈັດຕັ້ງມິດຕະພາບຫວຽດນາມ ໃນການເຄື່ອນໄຫວສ້າງສາຍພົວພັນມິດຕະພາບກັບຕ່າງປະເທດ, ພົວພັນຮ່ວມມືກັບອົງການຈັດຕັ້ງບໍ່ສັງກັດລັດຖະ ບານ ແລະ ໄດ້ຂົນຂວາຍທຶນຮອນມາປະກອບສ່ວນສ້າງສາພັດທະນາ ສສ ຫວຽດນາມ ເປັນຈຳນວນຫຼວງຫຼາຍ ຖືເປັນການປະກອບສ່ວນສຳຄັນໃນການສ້າງສາພັດທະນາ ສສ ຫວຽດນາມ.

    ໃນໂອກາດດັ່ງກ່າວ, ຄະນະຜູ້ແທນສະຫະພັນບັນດາອົງການ ຈັດຕັ້ງມິດຕະພາບ ຫວຽດນາມ ໄດ້ສະແດງຄວາມຂອບໃຈຕໍ່ ການຕ້ອນຮັບອັນອົບອຸ່ນ, ທັງໄດ້ແຈ້ງຈຸດປະສົງ ຂອງການຢ້ຽມຢາມ ແລະ ເຮັດວຽກ ຢູ່ ສປປ ລາວ, ລາຍງານສະພາບການພົ້ນເດັ່ນການພັດທະນາ ຂອງ ສສ ຫວຽດນາມ, ລາຍງານການເຄື່ອນໄຫວ ຂອງສະຫະພັນບັນດາອົງການຈັດຕັ້ງມິດຕະພາບຫວຽດນາມ ໃຫ້ຊາບ.

       ພ້ອມນັ້ນ, ສອງຝ່າຍ ຍັງໄດ້ຕີລາຄາສູງ ແລະ ປິຕິຍິນດີ ທີ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງ ໃຫ້ຂຽວສົດງົດງາມ, ເກີດດອກອອກຜົນ ນໍາເອົາຜົນປະໂຫຍດມາສູ່ປະຊາຊົນສອງປະເທດ.

     ນອກຈາກການພົບປະເຮັດວຽກ ຄະນະຜູ້ແທນຍັງໄດ້ຢ້ຽມຊົມສະຖານທີ່ທ່ອງທ່ຽວ ປະຫວັດສາດ, ວັດທະນະທໍາ  ຢູ່ນະຄອນຫຼວງວຽງຈັນ ຈໍານວນໜຶ່ງ.

---