ສະຫາຍ ຮັກສາການຫົວໜ້າ ຄຕພ ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຮອງລັດຖະມົນຕີກະຊວງການຕ່າງປະເທດເວເນຊູເອລາ

ເຜີຍ​ແຜ່​ໂດຍ​: moderator ເວ​ລາ: 20/12/2024 15:15:07 ຈຳ​ນວນ​​ຢ້ຽມ​ຊົມ 29 ຄັ້ງ ​

     ໃນຕອນບ່າຍ ຂອງ ວັນທີ 20 ທັນວາ 2024, ທີ່ ສໍານັກງານຄະນະພົວພັນຕ່າງປະເທດສູນກາງພັກ, ສະຫາຍ ບຸນເຫຼືອ ພັນດານຸວົງ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ນ. ຕາເຕຍນາ ປູກ ໂມເຣໂນ, ຮອງລັດຖະມົນຕີກະຊວງການຕ່າງປະເທດອໍານາດປະຊາຊົນ ແຫ່ງ ສາທາລະນະລັດ ໂບລິວາຣຽນ ເວເນຊູເອລາ, ໃນໂອກາດທີ່ເດີນທາງມາຢ້ຽມຢາມເຮັດວຽກ ຢູ່ ສປປ ລາວ ແຕ່ວັນທີ 19-21 ທັນວາ 2024.

    ໃນໂອກາດນີ້, ສະຫາຍ ບຸນເຫຼືອ ພັນດານຸວົງ ໄດ້ສະແດງຄວາມຊົມເຊີຍການມາຢ້ຽມຢາມ ສປປ ລາວ ຂອງຄະນະ ແລະ ຕີລາຄາສູງຕໍ່ຜົນການພົບປະເຮັດວຽກ ລະຫວ່າງ ສະຫາຍ ນ. ຕາເຕຍນາ ປຸກ ໂມເຣໂນ ແລະ ສະຫາຍ ຮອງລັດຖະມົນຕີກະຊວງການຕ່າງປະເທດຂອງລາວ. ນອກນັ້ນ, ກໍໄດ້ແຈ້ງໃຫ້ຊາບໂດຍຫຍໍ້ ກ່ຽວກັບ ພາລະບົດບາດ ຂອງ ຄະນະພົວພັນຕ່າງປະເທດສູນກາງພັກ; ສະພາບການພົ້ນເດັ່ນ ຢູ່ ສປປ ລາວ ໂດຍສະເພາະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງ ພັກ ປປ ລາວ; ຊົມເຊີຍຜົນສໍາເລັດ ທີ່ປະຊາຊົນເວເນຊູເອລາອ້າຍນ້ອງຍາດມາໄດ້ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດເວເນຊູເອລາ ໃຫ້ຮັ່ງມີ ແລະ ເຂັ້ມແຂງ; ຕີລາຄາສູງຕໍ່ສາຍພົວພັນມິດຕະພາບ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ເວເນຊູເອລາ, ຊຶ່ງໄດ້ຮັບການເສີມຂະຫຍາຍໃຫ້ກ້າວເຂົ້າສູ່ລວງເລິກ.

     ສະຫາຍ ນ. ຕາເຕຍນາ ປຸກ ໂມເຣໂນ ໄດ້ສະແດງຄວາມຂອບໃຈຢ່າງຈິງໃຈ ຕໍ່ ສະຫາຍ ບຸນເຫຼືອ ພັນດານຸວົງ ທີ່ໄດ້ໃຫ້ຕ້ອນຮັບຄະນະໃນຄັ້ງນີ້, ສະແດງຄວາມດີໃຈ ທີ່ໄດ້ມີໂອກາດຢ້ຽມຢາມ ສປປ ລາວ ອີກຄັ້ງ ແລະ ໄດ້ເຫັນການສ້າງສາພັດທະນາປະເທດຊາດຂອງລາວ, ຕີລາຄາສູງຕໍ່ຜົນສໍາເລັດ ທີ່ ສປປ ລາວ ຍາດມາໄດ້ ພ້ອມທັງເຊື່ອໝັ້ນວ່າ ພາຍໃຕ້ການນໍາພາຂອງ ພັກ ປປ ລາວ ຈະສາມາດສືບຕໍ່ປະສົບຜົນສໍາເລັດ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຍາດໄດ້ຜົນສໍາເລັດອັນໃໝ່ໃຫຍ່ຫຼວງກວ່າເກົ່າ.

     ພ້ອມກັນນັ້ນ, ສະຫາຍ ບຸນເຫຼືອ ພັນດານຸວົງ ຍັງໄດ້ເເຈ້ງຈຸດປະສົງການມາຢ້ຽມຢາມ ກໍຄື ລາຍງານ ກ່ຽວກັບສະພາບລວມໃນການພັດທະນາເສດຖະກິດ-ສັງຄົມ ແລະ ບົດບາດຂອງພັກສັງຄົມນິຍົມເອກະພາບເວເນຊູເອລາ ໃນການນໍາພາປະເທດ ໃຫ້ ສະຫາຍ ບຸນເຫຼືອ ພັນດານຸວົງ ໄດ້ຮັບຊາບ. ພ້ອມທັງ ໄດ້ຕາງໜ້າໃຫ້ພັກ, ລັດຖະບານເວເນຊູເອລາ ສະເເດງຄວາມໝາຍໝັ້ນ ທີ່ຈະສືບຕໍ່ເສີມຂະຫຍາຍການຮ່ວມມືໃນດ້ານຕ່າງໆກັບ ສປປ ລາວ ເວົ້າລວມ, ເວົ້າສະເພາະ ກໍຄື ພັກ ປປ ລາວ ໃຫ້ຫຼາຍຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ເວເນຊູເອລາ-ລາວ.

---