ຄະນະພົວພັນຕ່າງປະເທດສູນກາງພັກ

ກອງປະຊຸມປະຈຳປີ ຂອງ ສອງສະມາຄົມມິດຕະພາບ ລາວ - ສ.ເກົາຫຼີ ແລະ ສ.ເກົາຫຼີ - ລາວ

ເຜີຍແຜ່ໂດຍ: moderator ເວລາ: 17/12/2024 11:13:01 ຈຳນວນຢ້ຽມຊົມ 33 ຄັ້ງ

ໂດຍຕອບສະໜອງຕາມການເຊີນ ຂອງ ສະມາຄົມມິດຕະພາບ ລາວ - ສ.ເກົາຫຼີ, ຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ ນຳໂດຍ ທ່ານ ໂອ ມິງຮັວນ (Mr. Oh Myung Hwan), ປະທານສະມາຄົມມິດຕະ ພາບ ສ.ເກົາຫຼີ - ລາວ ພ້ອມດ້ວຍຄະນະທັງໝົດ 24 ທ່ານ ໄດ້ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມປະຈຳປີ ຂອງ ສອງສະມາຄົມມິດຕະພາບ ລາວ - ສ.ເກົາຫຼີ ແລະ ສ.ເກົາຫຼີ - ລາວ ແຕ່ວັນທີ 16-20 ທັນວາ 2024 ຢູ່ນະຄອນຫຼວງວຽງຈັນ, ສປປ ລາວ.

ໃນວັນທີ 16 ທັນວາ 2024, ສອງສະມາຄົມມິດຕະພາບໄດ້ຈັດກອງປະຊຸມພົບປະ ຄັ້ງທີ XIII, ໂດຍການເປັນປະທານຮ່ວມ ຂອງ ທ່ານ ຄຳສວຍ ແກ້ວດາລາວົງ, ປະທານສະມາຄົມມິດຕະພາບ ລາວ - ສ.ເກົາຫຼີ ແລະ ທ່ານ ໂອ ມິງຮວັນ, ປະທານສະມາຄົມມິດຕະພາບ ສ.ເກົາຫຼີ - ລາວ ແລະ ໃຫ້ກຽດເຂົ້າຮ່ວມ ຂອງ ທ່ານ ຈອງ ຢອງຊູ (Mr. Jung Yung Soo), ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສ.ເກົາຫຼີ ປະຈຳ ສປປ ລາວ. ພ້ອມນີ້ ຍັງມີບັນດາທ່ານຄະນະສະມາຄົມມິດຕະພາບ ລາວ - ສ.ເກົາຫຼີ ແລະ ສ.ເກົາຫຼີ - ລາວ, ພະນັກງານຈາກພາກສ່ວນທີ່ກ່ຽວຂ້ອງຂອງທັງສອງຝ່າຍ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ສະຫຼຸບຕີລາຄາການພົວພັນຮ່ວມມືກັນລະຫວ່າງສອງສະມາຄົມໃນໄລຍະ 1 ປີຜ່ານມາ, ເຊິ່ງຜົນສໍາເລັດອັນພົ້ນເດັ່ນ ສອງສະມາຄົມມິດຕະພາບ ໄດ້ຮ່ວມມືກັນປະກອບສ່ວນຊ່ວຍເຫຼືອ ແລະ ພັດທະນາຢູ່ ສປປ ລາວ ໂດຍສະເພາະດ້ານການພັດທະນາພື້ນຖານໂຄງລ່າງການສຶກສາ, ສາທາ, ມະນຸດສະທໍາ, ເຊິ່ງສອງສະມາຄົມມິດຕະພາບ ໄດ້ຊ່ວຍເຫຼືອສ້າງໂຮງຮຽນ, ຢາປິ່ນປົວພະຍາດ, ເຄື່ອງນຸ່ງຫົ່ມ, ອຸປະກອນການສຶກສາ ແລະ ອື່ນໆ. ພ້ອມນີ້, ຄະນະຜູ້ແທນສອງສະມາຄົມມິດຕະພາບ ຍັງໄດ້ແລກປ່ຽນຄວາມຄິດເຫັນຕໍ່ທິດທາງແຜນການ ແລະ ກິດຈະກໍາທີ່ສອງຝ່າຍຈະເຮັດຮ່ວມກັນໃນຊຸມປີຕໍ່ໜ້າ. ສອງຝ່າຍເຫັນດີສືບຕໍ່ຮ່ວມມື ແລະ ເຄື່ອນໄຫວຮ່ວມກັນຕາມພາລະບົດບາດ ໂດຍສະເພາະແມ່ນສືບຕໍ່ໂຄສະນາເຜີຍແຜ່ສາຍພົວພັນ ແລະ ການຮ່ວມມືອັນດີງາມ ລະຫວ່າງສອງປະເທດ ໃຫ້ປະຊາຊົນສອງຊາດ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ສະໜັບສະໜູນການໄປມາຫາສູ່ ແລະ ພົວພັນຮ່ວມມືລະຫວ່າງປະຊາຊົນ ເພື່ອສ້າງຄວາມຮັກແພງ, ຄວາມໄວ້ເນື້ອເຊື່ອໃຈ ແລະ ສ້າງກິດຈະກໍາຮ່ວມກັນ ເພື່ອເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ.ເກົາຫຼີ ໃຫ້ນັບມື້ໄດ້ຮັບການພັດທະນາ ແລະ ກ້າວເຂົ້າສູ່ລວງເລິກ.

ໃນວັນດຽວກັນ, ທ່ານ ບຸນເຫຼືອ ພັນດານຸວົງ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ຕາງໜ້າໃຫ້ລັດຖະບານແຫ່ງ ສປປ ລາວ ໄດ້ປະດັບຫຼຽນກາມິດຕະພາບ ໃຫ້ຄະນະບໍລິຫານງານຂອງສະມາຄົມມິດຕະພາບ ສ.ເກົາຫຼີ - ລາວ ຈຳນວນ 06 ທ່ານ ເພື່ອເປັນການຍ້ອງຍໍຜົນງານ ແລະ ຄຸນງາມຄວາມດີຕໍ່ການປະກອບສ່ວນເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສ.ເກົາຫຼີ ກໍ່ຄືການປະກອບສ່ວນທຶນຮອນຊ່ວຍເຫຼືອສ້າງສາພັດທະນາ ສປປ ລາວ ເປັນຕົ້ນແມ່ນດ້ານການສຶກສາ, ສາທາລະນະສຸກ, ມະນຸດສະທໍາ ແລະ ອື່ນໆ. ໂດຍສະເພາະໃຫ້ທຶນກໍ່ສ້າງໂຮງຮຽນຢູ່ນະຄອນຫຼວງວຽງຈັນ ແລະ ແຂວງຫົວພັນ ເຊັ່ນ: ໂຮງຮຽນປະຖົມສົມບູນບ້ານຊຽງແລນາ, ເມືອງປາກງື່ມ, ນະຄອນຫຼວງວຽງຈັນ; ໂຮງຮຽນປະຖົມສົມບູນບ້ານຫ້ວຍລ້າ, ເມືອງສັງທອງ, ນະຄອນຫຼວງວຽງຈັນ ແລະໂຮງຮຽນປະຖົມສົມບູນບ້ານກ້ານ, ເມືອງຊຳເໜືອ, ແຂວງຫົວພັນ.

ການມາຢ້ຽມຢາມຄັ້ງນີ້, ຄະນະຜູ້ແທນສະມາຄົມມິດຕະພາບ ສ.ເກົາຫຼີ-ລາວ ໄດ້ເຂົ້າຢ້ຽມຂໍ່ານັບການນໍາຂັ້ນສູງ ຂອງພັກ, ລັດ ຂອງ ສປປ ລາວ ລວມມີ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ ແລະ ທ່ານ ບຸນເຫຼືອ ພັນດານຸວົງ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ. ເຊິ່ງບັນດາການນໍາພັກ, ລັດ ຂອງ ລາວ ໄດ້ຕີລາຄາສູງຕໍ່ການຢ້ຽມຢາມ ຂອງຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ. ພ້ອມນັ້ນ, ຍັງໄດ້ຕີລາຄາສູງຕໍ່ສາຍພົວພັນ ແລະ ການຮ່ວມມືອັນດີງາມລະຫວ່າງສອງປະເທດ ແລະ ປະຊາຊົນສອງຊາດ ລາວ ແລະ ສ.ເກົາຫຼີ ທີ່ສືບຕໍ່ໄດ້ຮັບການເສີມຂະຫຍາຍ ແລະ ພັດທະນາ ແລະ ນໍາເອົາຜົນປະໂຫຍດມາສູ່ປະຊາຊົນສອງປະເທດ. ນອກນັ້ນຍັງໄດ້ແຈ້ງສະພາບການພັດທະນາອັນພົ້ນເດັ່ນ ຂອງ ສປປ ລາວ ໃຫ້ຄະນະຜູ້ແທນຊາບ. ສ່ວນ ທ່ານ ໂອ ມິງຮວັນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ອໍານວຍຄວາມສະດວກ ໃຫ້ແກ່ຄະນະຜູ້ແທນສະມາ ຄົມມິດຕະພາບ ສ.ເກົາຫຼີ - ລາວ, ທັງໄດ້ລາຍງານການເຄື່ອນໄຫວອັນພົ້ນເດັ່ນ ຂອງ ສະມາຄົມມິດຕະພາບ ສ.ເກົາຫຼີ - ລາວ ແລະ ຍິນດີສືບຕໍ່ຮ່ວມກັບສະມາຄົມມິດຕະພາບ ລາວ - ສ.ເກົາຫຼີ ສະໜັບສະໜຸນ ແລະ ປະກອບສ່ວນຊ່ວຍເຫຼືອ ໃນການສ້າງສາພັດທະນາ ຢູ່ ສປປ ລາວ.

ການມາຢ້ຽມຢາມຄັ້ງນີ້, ຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ ຍັງໄດ້ນໍາພານັກສິລະປະພື້ນເມືອງຈາກອົງການແລກປ່ຽນວັດທະນະທຳ ສ.ເກົາຫຼີ ແລະ ສະມາຄົມມິດຕະພາບ ສ.ເກົາຫຼີ - ລາວ ມາສະແດງເພື່ອສະເຫຼີມສະຫຼອງເນື່ອງໃນໂອກາດຄົບຮອບ 20 ປີ ວັນສ້າງຕັ້ງສະມາຄົມມິດຕະພາບ ສ.ເກົາຫຼີ - ລາວ ແລະ ຄົບຮອບ 15 ປີ ວັນສ້າງຕັ້ງສະມາຄົມມິດຕະພາບ ລາວ - ສ.ເກົາຫຼີ ຢູ່ຫໍວັດທະນະທໍາແຫ່ງຊາດ ເຮັດໃຫ້ບັນຍາກາດການມາຢ້ຽມຢາມ ແລະ ເຂົ້າຮ່ວມກອງປະຊຸມໃນຄັ້ງນີ້ມີຄວາມໝາຍ, ມີບັນຍາກາດ ແລະ ມີຜົນສໍາເລັດຢ່າງຈົບງາມ.

ນອກຈາກນີ້, ຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ ຍັງໄດ້ຢ້ຽມຢາມບັນດາໂຮງຮຽນປະຖົມທີ່ສະມາຄົມໄດ້ໃຫ້ການສະໜັບສະໜູນກໍ່ສ້າງອາຄານໂຮງຮຽນຜ່ານມາຢູ່ນະຄອນຫຼວງວຽງຈັນ ແລະ ແຂວງຫົວພັນ ແລະ ຢ້ຽມຢາມສະຖານທີ່ທ່ອງທ່ຽວທາງປະຫັວດສາດ ແລະ ວັດທະນະທຳຈຳນວນໜຶ່ງຢູ່ນະຄອນຫຼວງວຽງຈັນ ແລະ ແຂວງຫົວພັນ.