ສະຫາຍ ເລຂາທິການໃຫຍ່, ປະທານປະເທດ ທອງລຸນ ສີສຸລິດ ພົບປະສົນທະນາຜ່ານວີດີໂອທາງໄກ ກັບ ສະຫາຍ ເລຂາທິການໃຫຍ່ ໂຕເລີມ ເນື່ອງໃນໂອກາດ ວັນສະຖາປະນາ ສປປ ລາວ ຄົບຮອບ 49 ປີ

ເຜີຍ​ແຜ່​ໂດຍ​: moderator ເວ​ລາ: 03/12/2024 08:29:21 ຈຳ​ນວນ​​ຢ້ຽມ​ຊົມ 92 ຄັ້ງ ​

           ໃນຕອນບ່າຍ ວັນທີ 1 ທັນວາ 2024, ທີ່ ສໍານັກງານສູນກາງພັກ, ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ໄດ້ພົບປະສົນທະນາຜ່ານວີດີໂອທາງໄກ ກັບ ສະຫາຍ ໂຕເລີມ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ເພື່ອສະແດງຄວາມຊົມເຊີຍ ແລະ ອວຍພອນ ວັນສະຖາ ປະນາ ສປປ ລາວ ຄົບຮອບ 49 ປີ, ຮ່ວມກັນປຶກສາຫາລື ແລະ ແລກປ່ຽນຄໍາຄິດເຫັນຕໍ່ ການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ທິດທາງການພົວພັນຮ່ວມມືໃນຕໍ່ໜ້າ.

         ໃນການພົບປະສົນທະນາ, ສະຫາຍເລຂາທິຫານໃຫຍ່ ໂຕເລີມ ໄດ້ສະແດງຄວາມຊົມເຊີຍ ແລະ ອວຍພອນໄຊອັນປະເສີດ, ພ້ອມທັງຕີລາຄາສູງ ຕໍ່ບັນດາຜົນງານທີ່ ພັກ, ລັດ ແລະ ປະຊາຊົນລາວບັນດາເຜົ່າ ຍາດມາໄດ້ຕະຫຼອດໄລຍະ 49 ປີ ຜ່ານມາ ແລະ ເຊື້ອໝັ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງ ພັກປະຊາຊົນ ປະຕິວັດລາວ, ປະຊາຊົນລາວອ້າຍນ້ອງ ຈະສືບຕໍ່ຍາດໄດ້ຜົນສໍາເລັດອັນໃໝ່ ໃຫຍ່ຫຼວງກວ່າເກົ່າ, ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະໄໝທີ XI ຂອງພັກປະຊາຊົນ ປະຕິວັດລາວ ໄດ້ຢ່າງມີໄຊ, ບັນລຸບັນດາເປົ້າໝາຍ ແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໄລຍະ 2021 – 2025, ດໍາເນີນກອງປະຊຸມໃຫຍ່ 3 ຂັ້ນ ເພື່ອກ້າວໄປເຖິງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງ ພັກປະຊາຊົນ ປະຕິວັດລາວ ສໍາເລັດຜົນຢ່າງມີໄຊ.

         ສະຫາຍເລຂາທິການໃຫຍ່, ປະທານປະເທດ ທອງລຸນ ສີສຸລິດ ໄດ້ສະແດງຄວາມປິຕິຍິນດີທີ່ໄດ້ມີໂອກາດພົບປະສົນທະນາຜ່ານວີດີໂອທາງໄກກັບ ສະຫາຍເລຂາທິການໃຫຍ່ ໂຕເລີມ, ເຊິ່ງເປັນການ ສະແດງໃຫ້ເຫັນເຖິງຄວາມເອົາໃຈໃສ່ຂອງ ສະຫາຍການນໍາ ພັກ, ລັດ ຫວຽດນາມ, ທັງເປັນການ ສະແດງເຖິງມິດຈິດມິດໃຈ, ຄວາມຮັກແພງອັນສະໜິດສະໜົມ ຖານສະຫາຍອ້າຍນ້ອງ ແລະ ຄວາມມີຊີວິດຊີວາຂອງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບ ດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ; ສະແດງຄວາມຂອບອົກຂອບໃຈ ຢ່າງຈິງໃຈ ຕໍ່ຄວາມຊົມເຊີຍ, ອວຍພອນໄຊອັນປະເສີດ ແລະ ຄຳ​ເວົ້າ​ອັນ​ຈົບ​ງາມ​ຂອງ​ ສະ​ຫາຍເລຂາທິການໃຫຍ່ ໂຕ ເລີມ ທີ່​ມີ​ຕໍ່ ພັກ, ລັດ ແລະ ປະຊາຊົນລາວ ບັນດາເຜົ່າ ເນື່ອງໃນໂອກາດ ວັນສະຖາປະນາ ສປປ ລາວ ຄົບຮອບ 49 ປີ, ພ້ອມທັງ ຕີ​ລາ​ຄາ​ສູງ​ຕໍ່​ ການ​ຊີ້​ນຳ-ນໍາພາ ຂອງ​ພັກກອມມູນິດຫວຽດນາມ, ການຕິດຕາມກວດກາຂອງສະພາແຫ່ງຊາດ, ການບໍລິຫານຂອງລັດຖະບານ ແລະ ສະ​ແດງ​ຄວາມ​ຊົມ​ເຊີຍຢ່າງສຸກອົກສຸດໃຈ ຕໍ່ບັນດາໄຊຊະນະ ແລະ ຜົນສໍາເລັດອັນສໍາຄັນ, ໃຫຍ່ຫຼວງ, ຮອບດ້ານ ແລະ ມີຄວາມໝາຍປະຫວັດສາດ ທີ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຍາດມາໄດ້ຕະຫຼອດໄລຍະແຫ່ງການດໍາເນີນ ພາລະກິດປ່ຽນແປງໃໝ່ ອັນໄດ້​ເຮັດ​ໃຫ້​ ສສ ຫວຽດ​ນາມ ມີສະ​ຖຽນ​ລະ​ພາບ​ທາງ​ດ້ານ​ການ​ເມືອງ​​ຢ່າງ​ໜັກແໜ້ນ, ວຽກງານປ້ອງກັນ ຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ເສດ​ຖະ​ກິດ​ມີ​ການ​ຂະ​ຫຍາຍ​ຕົວ​ດ້ວຍ​ຈັງຫວະສູງ​ ແລະ ຕໍ່​ເນື່ອງ,  ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ ​ໄດ້ຮັບການປັບປຸງ​​ດີ​ຂຶ້ນ, ການ​ພົວ​ພັນ​ຮ່ວມ​ມື ແລະ ເຊື່ອມໂຍງ​ສາກົນ​ ສືບຕໍ່ໄດ້​ຮັບ​ການ​ເປີດກວ້າງ, ບົດ​ບາດ​ອິດ​ທິ​ພົນ​ຂອງ ພັກ​ ແລະ ລັດ ຫວຽດ​ນາມ ນັບ​ມື້​ນັບ​ສູງ​ເດັ່ນ​ຂຶ້ນ​ໃນ​ເວ​ທີ​ພາກ​ພື້ນ ແລະ ສາ​ກົນ; ເຊື່ອໝັ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງ ພັກກອມມູນິດຫວຽດນາມ, ປະຊາຊົນຫວຽດນາມອ້າຍນ້ອງ ຈະສືບຕໍ່ຍາດໄດ້ຜົນສໍາເລັດໃໝ່ ໃຫຍ່ຫຼວງກວ່າເກົ່າ ໃນການປະຕິບັດ ມະຕິກອງປະຊຸມໃຫຍ່ ສະໄໝທີ XIII ແລະ ກະກຽມກອງປະຊຸມໃຫຍ່ ຄັ້ງທີ XIV ຂອງພັກໄດ້ຢ່າງມີໄຊ ໃນການຫັນປະເທດເປັນອຸດສາຫະກໍາ ຕາມທິດທັນສະໄໝ ແລະ ບັນລຸເປົ້າໝາຍ ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະຊາທິປະ ໄຕ, ຍຸຕິທໍາ, ສີວິໄລ.

        ສອງຝ່າຍ ຕ່າງກໍ່ໄດ້ແລກປ່ຽນ ແລະ ແຈ້ງໃຫ້ກັນຊາບ ສະພາບ​ພົ້ນ​ເດັ່ນ​ຂອງແຕ່ລະພັກ, ແຕ່ລະປະເທດ; ພ້ອມທັງຕີລາສູງຕໍ່ໝາກຜົນການພົວພັນຮ່ວມມືສອງຝ່າຍ ທີ່ສືບຕໍ່ໄດ້ຮັບການເພີ່ມທະວີ ແລະ ກ້າວສູ່ລວງເລິກໃນທຸກຂົງເຂດວຽກງານຢ່າງບໍ່ຢຸດຢັ້ງ ໂດຍສະເພາະ ດ້ານການເມືອງ, ປ້ອງກັນ ຊາດ - ປ້ອງກັນຄວາມສະຫງົບ, ເສດຖະກິດ, ການຄ້າ - ການລົງທຶນ ແລະ ຂົງເຂດອື່ນໆ, ເຊິ່ງສອງຝ່າຍ ໄດ້ມີການແລກປ່ຽນການຢ້ຽມຢາມເຊິ່ງກັນແລະກັນ ລະຫວ່າງ ການນໍາຂັ້ນສູງ ຂອງສອງພັກ, ສອງລັດ ແລະ ຂັ້ນຕ່າງໆ ນັບແຕ່ສູນກາງຈົນເຖິງທ້ອງຖິ່ນ, ສໍາເລັດການຈັດກອງປະຊຸມພົບປະ ປະຈໍາປີ ລະຫວ່າງ ສອງກົມການເມືອງ, ສໍາເລັດການແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ; ວຽກງານກໍ່ສ້າງພັກ, ສ້າງລະບົບການເມືອງໃຫ້ເຂັ້ມແຂງ; ສໍາເລັດການຈັດຊຸດບໍາລຸງ, ຝຶກອົບຮົມ ສໍາລັບພະນັກງານຂັ້ນຕ່າງໆ; ສໍາເລັດການຈັດກອງປະຊຸມສໍາມະນາທິດສະດີລະຫວ່າງສອງພັກ, ກອງປະຊຸມສໍາມະນາວິທະຍາສາດ; ແລກປ່ຽນບົດຮຽນ ການພັດທະນາ ເສດຖະກິດ-ສັງຄົມ ແລະ ການເຊື່ອມໂຍງສາກົນ.

          ສອງຝ່າຍ ຢືນຢັນ ແລະ ເຫັນດີເປັນເອກະພາບ ຈະສືບຕໍ່ຊີ້ນໍາພາກສ່ວນກ່ຽວຂ້ອງຂອງສອງຝ່າຍ ໃນການຊຸກຍູ້ການຈັດຕັ້ງຜັນຂະຫຍາຍ ບັນດາຂໍ້ຕົກລົງຂອງການນໍາຂັ້ນສູງ ສອງພັກ, ສອງລັດ, ບັນດາຖະແຫຼງການຮ່ວມ, ບັນດາສັນຍາ, ຂໍ້ຕົກລົງຂອງສອງລັດຖະບານ ແລະ ບັນດາໂຄງການຮ່ວມມືລົງທຶນ ແລະ ຊ່ວຍເຫຼືອ ທີ່ສອງຝ່າຍ ໄດ້ເປັນເອກະພາບກັນ ໃຫ້ບັນລຸຕາມຄາດໝາຍທີ່ວາງໄວ້, ປະ ກອບສ່ວນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ຫວຽດນາມ-ລາວ ໃຫ້ນັບມືກ້າວເຂົ້າສູ່ລວງເລິກ, ມີປະສິດທິຜົນ ແລະ ເກີດອອກອອກຜົນຍິ່ງໆຂຶ້ນ.

---