ຄະນະພົວພັນຕ່າງປະເທດສູນກາງພັກ

ສະຫາຍ ບຸນທອງ ຈິດມະນີ, ກໍາມະການກົມການເມືອງ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ຕ້ອນຮັບ ສະຫາຍ ຟ້າມ ມິງ ຈິງ, ກໍາມະການກົມການເມືອງ, ນາຍົກລັດຖະມົນຕີ ແຫ່ງ ສສ ຫວຽດນາມ ເຂົ້າຢ້ຽມພົບປ

ເຜີຍແຜ່ໂດຍ: moderator ເວລາ: 15/10/2024 10:16:53 ຈຳນວນຢ້ຽມຊົມ 172 ຄັ້ງ

ຕອນແລງຂອງວັນທີ 11 ຕຸລາ 2024, ຢູ່ສໍານັກງານຫ້ອງວ່າການສູນກາງພັກ, ສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມພົບປະຂອງ ສະຫາຍ ຟ້າມ ມິງ ຈິງ, ກໍາມະການກົມການເມືອງສູນກາງພັກ, ນາຍົກ ລັດຖະມົນຕີ ແຫ່ງ ສສ ຫວຽດນາມ ພ້ອມດ້ວຍຄະນະ.

ສະຫາຍ ບຸນທອງ ຈິດມະນີ, ໄດ້ສະແດງຄວາມຍິນດີຕ້ອນຮັບ ແລະ ປິຕິຍິນດີເປັນຢ່າງຍິ່ງ ທີ່ໄດ້ພົບກັບ ສະຫາຍ ຟ້າມມິງຈິງ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສສ ຫວຽດນາມ ອີກຄັ້ງ ໃນໂອກາດເດີນທາງມາຮ່ວມ ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ກໍ່ຄື ກອງປະຊຸມປິ່ນອ້ອມ ຢູ່ ສປປ ລາວ, ເຊິ່ງເປັນການສະແດງເຖິງຄວາມໃກ້ຊິດສະໜິດສະໜົມ, ພ້ອມທັງໄດ້ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫຼວງ, ຮອບດ້ານທີ່ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຍາດມາໄດ້ຕະຫຼອດໄລຍະແຫ່ງການດໍາເນີນພາລະກິດປ່ຽນແປງໃໝ່, ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ວຽກງານປ້ອງກັນຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ເສດຖະກິດມີການຂະຫຍາຍຕົວດ້ວຍຈັງຫວະສູງ ແລະ ຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນ, ການພົວພັນຮ່ວມມື ແລະ ເຊື່ອມໂຍງສາກົນ ສືບໄດ້ຮັບການເປີດກວ້າງ, ບົດບາດ ອິດທິພົນຂອງ ພັກ ແລະ ລັດ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ; ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງ ພັກກອມມູນິດຫວຽດນາມ, ປະຊາຊົນຫວຽດນາມອ້າຍນ້ອງ ຈະສືບຕໍ່ຍາດໄດ້ຜົນສໍາເລັດໃໝ່ ໃຫຍ່ຫຼວງກວ່າເກົ່າ ໃນການປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກໄດ້ຢ່າງມີໄຊ ໃນການຫັນປະເທດເປັນອຸດສາຫະກໍາຕາມທິດທັນສະໄໝ ແລະ ບັນລຸເປົ້າໝາຍ ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທໍາ, ສີວິໄລ.

ສະຫາຍນາຍົກລັດຖະມົນຕີ ຟ້າມ ມິງ ຈິງ, ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນ ຮັບອັນອົບອຸ່ນ, ສະໜິດສະໜົມຖານສະຫາຍອ້າຍນ້ອງຂອງ ສະຫາຍ ບຸນທອງ ຈິດມະນີ ກໍ່ຄື ການຕ້ອນຮັບຂອງຝ່າຍລາວ ໃນໂອກາດເຂົ້າຢ້ຽມຂໍ່ານັບ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ; ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ພົບປະກັບ ສະຫາຍ ສອນໄຊ ສີພັນດອນ ນາຍົກລັດຖະມົນຕີ; ຕີລາຄາສູງ ຕໍ່ບັນດາຜົນສໍາເລັດ ທີ່ພັກ, ລັດ ແລະ ປະຊາຊົນລາວ ຍາດມາໄດ້ໃນພາລະກິດສ້າງສາພັດທະນາປະເທດຊາດ ຕະຫຼອດໄລຍະຜ່ານມາ. ສະແດງຄວາມຂອບໃຈຕໍ່ ພັກ, ລັດ ແລະ ປະຊາຊົນລາວ ບັນດາເຜົ່າ ທີ່ຍາມໃດກໍ່ຕິດຕາມ ແລະ ຢູ່ຄຽງຂ້າງ, ໃຫ້ການສະໜັບສະໜູນປະຊາຊົນຫວຽດນາມ ໃນຍາມພົບກັບຄວາມຫຍຸ້ງຍາກ ບໍ່ວ່າຈະຢູ່ໃນຍາມສົງຄາມ ກໍ່ຄື ໃນຍາມສັນຕິພາບ, ພິເສດແມ່ນການບິແບ່ງຄວາມຫຍຸ້ງຍາກ ກໍ່ຄື ການຊ່ວຍເຫຼືອຢ່າງທັນການທາງດ້ານວັດຖຸ ກໍ່ຄື ຈິດໃຈ ແກ່ປະຊາຊົນຫວຽດນາມ ໃນການຟື້ນຟູຜົນກະທົບຈາກພະຍຸເລກ 3 (Yagi) ທີ່ຜ່ານມາ.

ສອງຝ່າຍ ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ສືບຕໍ່ໄດ້ຮັບການເພີ່ມທະວີຢ່າງບໍ່ຢຸດຢັ້ງ ແລະ ກ້າວສູ່ລວງເລິກໃນທຸກຂົງ ເຂດວຽກງານ; ສອງຝ່າຍ ໄດ້ແລກປ່ຽນການຢ້ຽມຢາມເຊິ່ງກັນແລະກັນ ລະຫວ່າງ ການນໍາຂັ້ນສູງ ຂອງສອງພັກ, ສອງລັດ ແລະ ຂັ້ນຕ່າງໆ ນັບແຕ່ສູນກາງຈົນເຖິງທ້ອງຖິ່ນ, ແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ, ວຽກງານກໍ່ສ້າງພັກ, ສ້າງລະບົບການເມືອງໃຫ້ເຂັ້ມແຂງ; ສໍາເລັດການຈັດຊຸດຄົ້ນຄວ້າ ແລະ ແລກປ່ຽນຫົວຂໍ້ສະເພາະ ສໍາລັບພະນັກງານຂອງລາວ ຂັ້ນຕ່າງໆຫຼາຍຊຸດ; ແລກປ່ຽນບົດຮຽນ ແລະ ຊ່ວຍເຫຼືອດ້ານວິຊາການ - ຊ່ຽວຊານ ໃນການແກ້ໄຂບັນຫາເສດຖະກິດ-ການເງິນ ກໍ່ຄື ການພັດທະນາເສດຖະກິດ - ສັງຄົມ ແລະ ການເຊື່ອມໂຍງສາກົນ ແລະ ອື່ນໆ.

ສອງຝ່າຍ ຢືນຢັນວ່າ ໃນສະພາບການພາກພື້ນ, ສາກົນ ມີການຜັນແປໄປຢ່າງສັບສົນ ໃນປະຈຸບັນ, ຍິ່ງເຫັນໄດ້ຄວາມຈໍາເປັນ ທີ່ຈະຕ້ອງຮັດແໜ້ນການພົວພັນຮ່ວມມື ເພື່ອນໍາເອົາຜົນປະໂຫຍດຕົວຈິງມາສູ່ ປະຊາຊົນສອງຊາດ ລາວ ແລະ ຫວຽດນາມ ນັບມື້ນັບຫຼາຍຂຶ້ນ, ສືບຕໍ່ຊຸກຍູ້ການຈັດຕັ້ງຜັນຂະຫຍາຍ ບົດບັນທຶກຂອງການນໍາຂັ້ນສູງຂອງ ສອງພັກ, ສອງລັດ, ບັນດາຖະແຫຼງການຮ່ວມສອງຝ່າຍ ກໍ່ຄື ການຈັດຕັ້ງປະຕິບັດບັນດາໂຄງການຮ່ວມມື, ລົງທຶນ ແລະ ຊ່ວຍເຫຼືອ ທີ່ສອງຝ່າຍໄດ້ເປັນເອກະພາບກັນ ໃຫ້ມີປະສິດທິຜົນສູງ, ປະກອບສ່ວນເຂົ້າໃນການປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ຫວຽດນາມ - ລາວ ໃຫ້ນັບມື້ນັບ ແຕກອອກອອກຜົນ, ຂຽວສົດງົດງາມ ແລະ ໝັ້ນຄົງຂະໜົງແກ່ນຊົ່ວກາລະນານ.